Read fon Ezayíi 52 Bible Online

Ezayíi 52 - fon bible

Ezayíi 52

¹ Jeluzalɛ́mu fɔ́n, yǎ wǔ fɔ́n! Đe hlɔ̌nhlɔ́n towe xlɛ́! Sinyɔ́ɔ, toxo mímɛ́, dǒ nǔzínzán towe e nyɔ́ ɖɛkpɛ hú ɖě lɛ́ɛ bǐ é, ɖó toɖévomɛnu ɖě sɔ́ ná tɛ afɔ to towe mɛ ǎ; mɛ blíblí ɖě sɔ́ ná tɛ afɔ toxo towe mɛ ǎ.

²Jeluzalɛ́mu, fɛ́ kɔ́ e ɖo wǔ we ɔ́ síin; Jeluzalɛ́mu, sí te bo yi tɛn towe mɛ. Gantɔ́ Sinyɔ́ɔ tɔn, tún kan nǔ hwiɖée, tun kan e è dǒ kɔ nú we é!

³Xó e Mawu Mavɔmavɔ ɖɔ nú togun tɔn ɔ́ ɖíe: “Hwenu e un sa kannumɔ mitɔn ɔ́, un yí akwɛ́ ǎ; mɔ̌ ɖokpó ɔ́, hwenu e un ná vɔ́ gbɛ mitɔn xɔ ɔ́, un ná ná fánlan ɖokpó ǎ.”

⁴Aklúnɔ Mavɔmavɔ ɖɔ: “Ejípu wɛ togun ce to yi hwɛ̌, bó yi nɔ dɔ̌n. Ée é wá yá ɔ́, Asilíinu lɛ́ɛ ká nɔ yǎyá mɔ̌ bó dó tagba nú togun ce.

⁵ Nǔ e ká ɖo jijɛ wɛ din ɔ́, étɛ́ un ka mɔ ɖ'é mɛ? È kplá togun ce yi kannumɔgbénu ma ná nǔ ɖěbǔ mì. Mɛ e ɖo acɛ gannaganna kpa n'i wɛ lɛ́ɛ mɔ ɖɔ émí ɖu ɖ'é jí, bó nɔ́ sɔ́ nyǐkɔ ce dó nɔ acakpo jí hwebǐnu.

⁶Énɛ́ ɔ́ wú wɛ togun ce ná wá tunwun mɛ e un nyí é gbe ɖokpó. É ná wá tunwun ɖɔ nyɛ wɛ nyí mɛ e ɖɔ un jǎwe é.”

⁷ È mɔ mɛ e hɛn wɛn ɖagbe ɖé jǎwe ɔ́ ɖo só jí ɔ́, é nɔ́ nyɔ́ kpɔ́n mɛ! É nɔ́ wá dó fífá wɛn, nyɔ̌ná wɛn, bó nɔ́ dó hwlɛngán wɛn; é nɔ́ ɖɔ nú Sinyɔ́ɔ ɖɔ: “Mawu towe wɛ nyí axɔ́sú.”

⁸Din ɔ́, ɖǒtó mɛ e a sɔ́ bɔ yě ɖo mɛ cɔ́ wɛ lɛ́ɛ! Yě bǐ ɖó gbe kpɔ́ bo sú xó kpó awǎjijɛ kpó, ɖó yě ɖésú mɔ Mawu Mavɔmavɔ kpó nukún yětɔn kpó, bɔ é jǎwe Sinyɔ́ɔ.

⁹Dǒglin Jeluzalɛ́mu tɔn lɛ́ɛ mi, mi sú xó bó j'awǎ, ɖó Mawu Mavɔmavɔ ɖo wǔsyɛ́n dó lanmɛ nú togun tɔn wɛ. É ɖe Jeluzalɛ́mu sín mɛ kannu.

¹⁰Mawu Mavɔmavɔ ɖe hlɔ̌nhlɔ́n mímɛ́ tɔn xlɛ́ ɖo akɔta lɛ́ɛ bǐ nukɔn; akɔta lɛ́ɛ bǐ ná mɔ lě e Mawu mǐtɔn nɔ́ hwlɛ́n mǐ gán gbɔn é; yě ná mɔ káká yi fí e gbɛ ɔ́ kponu ɖó é.

¹¹ Mi mɛ e lɛ́ kɔ nú nǔ e è nɔ zán sinsɛn hwenu lɛ́ɛ sín Babilɔ́nu xwe Jeluzalɛ́mu lɛ́ɛ ɔ́, mi ɖidó, mi gosín Babilɔ́nu, mi yá wǔ; mi ma ɖ'alɔ nǔ kwíji ɖěbǔ wú ó. Mi hɛn miɖée ɖó mǐmɛ́ jí bó tɔ́n sín fí.

¹²Din ɔ́, midɛɛ lɛ́ɛ ɔ́, é sɔ́ nyí ɖɔ mi gosín to ɔ́ mɛ, mɛ e ahwan nya é ɖɔhun ǎ; mi zɔn adohu adohu jí bó xweyǐgbe ǎ, ɖó Mawu Mavɔmavɔ, Mawu Izlayɛ́li tɔn ɔ́ wɛ ɖo nukɔn nú mi, bó ɖo gǔdo nú mi. Xó lómílómí ɛnɛgɔ́ ɔ́

¹³Mawu ɖɔ: “Mɛsɛntɔ́ ce ɔ́, nǔ e é ná bló lɛ́ɛ bǐ wɛ ná zɔn n'i, bɔ é ná xɔ susu dó susu jí.

¹⁴Mɛ e mɔ mɛsɛntɔ́ ce lɛ́ɛ é gěgé wɛ sú alɔ nukún mɛ. Nukún mɛ tɔn wɛ è hɛn gblé sɔ mɔ̌; a mɔ ɛ ɖo te ɔ́, a sɔ́ ná tunwun ɖɔ gbɛtɔ́ wɛ ǎ.

¹⁵ Amɔ̌, din ɔ́, xó tɔn kpácá togun gěgé; axɔ́sú lɛ́ɛ sɔ́ ná tunwun nǔ e yě ná ɖɔ ɖo nukɔn tɔn é ǎ, ɖó nǔ e mɔ wɛ yě ɖe ɔ́ gbɔn vo nú nǔ e è ɖɔ nú yě ɔ́. Nǔ e kpɔ́n wɛ yě ɖe é kpó nǔ e yě se ɔ́ kpó nyí nǔ ɖokpó ɔ́ ǎ.”