Read fon Ezayíi 53 Bible Online

Ezayíi 53 - fon bible

Ezayíi 53

¹ Mɛ̌ ka ɖo mǐ mɛ bó ɖi nǔ nú xó e mǐ se é? Mɛ̌ Mawu Mavɔmavɔ ka ɖe hlɔ̌nhlɔ́n tɔn xlɛ́?

²Đó mɛsɛntɔ́ Mawu Mavɔmavɔ tɔn su ɖo nukɔn tɔn, lě e nǔɖé nɔ́ wú kpowun é ɖɔhun, lě e atín ɖé nɔ́ tɔ́n kun sín ayǐkúngban xúxú mɛ é ɖɔhun. Đɛkpɛ ɖé wɛ é nyɔ́, abǐ nyɔ̌ wɛ é nyɔ́ kpɔ́n, bónú è nǎ bɔ nukún nyi wǔ tɔn ǎ. É ká ɖó nǔɖé bɔ é ná dɔn mɛ, nú è nǎ kpɔ́n ɛ ǎ.

³Mɛ bǐ nɔ́ hu tɛ́ n'i bó jó e dó. É nyí mɛ ɖé bó mɔ wǔvɛ́ bó ji ya bɔ é kó dó étɔn; é cí mɛ e sín jɛ jí mɛɖé má nɔ́ ba ná kpɔ́n ǎ é ɖɔhun. Mǐ nɔ́ hu tɛ́ n'i, mǐ sɔ́ ɛ dó mɔ nǔɖé ǎ.

⁴ Nǔ ɖo mɔ̌ có, ya mǐtɔn lɛ́ɛ sín agban wɛ é ɖíɖá, wǔvɛ́ e mǐ ná mɔ lɛ́ɛ mɛ wɛ é dó kɔ, bɔ mǐdɛɛ lɛ́ɛ ká vɛdó ɖɔ Mawu wɛ dɔn tó n'i sín, mǐ vɛdó ɖɔ Mawu sín alɔ wɛ jɛ wǔ tɔn bó dó winnyá ɛ sín.

⁵ Lo ɔ́, hwɛ mǐtɔn lɛ́ɛ wú wɛ è gblě wǔ i; nǔwanyido mǐtɔn lɛ́ɛ hu i dó anyǔ mɛ. Tódɔnnúmɛ e ná fífá mǐ ɔ́, é wɛ è dɔn ná, bɔ wǔ e è gblě e ɔ́ gbɔ azɔn nú mǐ.

⁶ Mǐ bǐ wɛ ɖo flúflú wɛ lɛ̌ngbɔ́ e bú é ɖɔhun, mɛ ɖokpó ɖokpó mlɛ́ ali e jló e é, Mawu Mavɔmavɔ ka ɖíɖá ɛ hwɛgban mǐ bǐ tɔn.

⁷ È dǒ tagba n'i, è táfú i, é ká kɛ nu ǎ; é kɛ nu ǎ lɛ̌ngbɔ́ví e è kplá xwe lanhutɛn é ɖɔhun; é kɛ nu ǎ lɛ̌ngbɔ́ e kpa fún ná wɛ è ɖe é ɖɔhun.

⁸È wlǐ i, bó ɖɔ hwɛ xá ɛ, bó bú i. Mɛ ɖé ká sɔ́ dó ga nú nǔ énɛ́ e gbo e ɔ́ ǎ. Hwɛ e togun tɔn hu ɔ́ wɛ zɔ́n bɔ è ɖe e sín gbɛ ɔ́ mɛ, è hu i.

⁹ È ɖi i dó mɛdídá lɛ́ɛ tɛ́ntin, yɔdo tɔn ɖo dɔkunnɔ lɛ́ɛ tɛ́ntin, có é xo dǎka ɖě ǎ, è ká se adingbanxó ɖo nu tɔn kpɔ́n ǎ.

¹⁰Amɔ̌, Mawu Mavɔmavɔ sɔ́ wǔvɛ́ dó dó ya nú mɛsɛntɔ́ tɔn bɔ é vɛ́ jlɛ́; ényí é sɔ́ éɖée dó sá hwɛsɔ́kɛmɛvɔ́ ná ɔ́, é ná ɖó vǐ. Mɛsɛntɔ́ tɔn ná ɖó vǐ bó ná lɛ́ nɔ gbɛ káká. É jí wɛ Mawu Mavɔmavɔ ná gbɔn bó ná bló nǔ e é to lɛ́ɛ.

¹¹Mawu ɖɔ: “Mɛsɛntɔ́ ce ji ya tobutóbú énɛ́ lɛ́ɛ mɔ̌ ɔ́, é ná wá mɔ wěziza; nǔ ná nyɔ́ n'i káká. Mɛsɛntɔ́ ce ɔ́, hwɛjijɔnɔ nǔgbó ɔ́ ná sɔ́ mɛ gěgé dó húzú hwɛjijɔnɔ, ɖó é wɛ ɖíɖá hwɛgban yětɔn.

¹² Énɛ́ wɛ zɔ́n bɔ un sɔ́ ɛ ɖó mɛ klogǎnklogǎn lɛ́ɛ há jí, é kpó mɛ e syɛ́n lɛ́ɛ kpó wɛ ná má nǔ e è hɛn sín ahwangbénu wá lɛ́ɛ, ɖó é sɔ́ éɖée hwe káká bó kú; é sɔ́ éɖée ɖó nǔ nyanyawatɔ́ lɛ́ɛ mɛ. É ɖíɖá hwɛgban mɛ gěgé tɔn, é sa vo dó hwɛhutɔ́ lɛ́ɛ tamɛ.”