Read fon Ezayíi 54 Bible Online

Ezayíi 54 - fon bible

Ezayíi 54

¹ Jeluzalɛ́mu, hwi mɛ e nyí wɛnsinɔ ɔ́, hwi mɛ e ma ji vǐ kpɔ́n ǎ ɔ́, hwi mɛ e ma mɔ wǔvɛ́ ɖo ajidonu kpɔ́n ǎ ɔ́, sú xó bó j'awǎ. Đó Mawu Mavɔmavɔ ɖo ɖiɖɔ nú we wɛ ɖɔ: “Hwi mɛ e asú towe gbɛ́ we ɔ́, a nǎ ɖó vǐ hú nyɔ̌nu e ɖo asúxwé é.”

²Énɛ́ ɔ́ wú ɔ́, gblǒ ada nú goxɔ towe; vlɔ̌n goxɔ towe sín avɔ lɛ́ɛ ganjí, ma ɖɔ avɔ lɛ́ɛ vɛ́ axi ó. Nyi xɔkan towe ní ɖi ga, xwe só towe lɛ́ɛ ganjí.

³Đó a nǎ gbló ada yi ɖisí amyɔ; vǐ towe lɛ́ɛ ná yí to e ɖo akpá towe lɛ́ɛ. Yě ná gba kpé toxo towe e mɛ mɛɖé má sɔ́ ɖe ǎ lɛ́ɛ mɛ.

⁴Ma ɖi xɛsi ó, a sɔ́ ná ɖu winnyá ɖě ǎ; ayi towe ní má gbadó ó, wi towe sɔ́ ná kɔ́n ɖě ǎ. Winnyá e a ɖu ɖo wǐnnyáwínnyá mɛ ɔ́, a nǎ wɔn; hɛ̌n e a ɖu hwenu e a ɖo asúkúkúxɔmɛ ɔ́, a sɔ́ ná flín ɖě ǎ.

⁵Đó mɛ e ɖó we é wɛ ná nyí asú nú we, Mawu Mavɔmavɔ Nǔbǐwúkpétɔ́ wɛ nyǐkɔ tɔn nyí, Mɛ mímɛ́ Izlayɛ́li tɔn ɔ́ wɛ vɔ́ gbɛ towe xɔ. Mawu wɛ̌kɛ́ ɔ́ bǐ tɔn wɛ nyǐkɔ tɔn nyí.

⁶Aluwɛ ɖaxó ɖé mɛ wɛ a ɖe nyɔ̌nu e asú gbɛ́ ɔ́ ɖɔhun, lo ɔ́, Mawu Mavɔmavɔ lɛ́ vɔ́ ylɔ́ we. Mawu towe ɖɔ: “Nyɔ̌nu e è da ɖo wǐnnyáwínnyá mɛ ɔ́, è ka sixú gbɛ́ ɛ nǔgbó cé?

⁷Un jó we dó nú hwenu kpɛví ɖé; amɔ̌, un ná lɛ́ yí we ɖó wǎn yíyí ɖaxó e un ɖó nú we ɔ́ wú.

⁸Xomɛ ɖaxó ɖé wɛ un sin dó we, bó gbɛ́ ɖɔ un kún ná mɔ we ó nú hwenu kpɛví ɖé. Amɔ̌, din ɔ́, ɖó wǎn yíyí ma ɖó dogbó e un ɖó ɔ́ wú ɔ́, un ná kú nǔbláwǔ nú we; nyɛ Mawu Mavɔmavɔ e vɔ́ gbɛ towe xɔ ɔ́ wɛ ɖɔ mɔ̌ nú we.

⁹ Égbé din ɔ́, un ná wa nǔ lě e un wa nǔ gbɔn ɖo Nɔwée hwenu é; hwenɛ́nu ɔ́, un dó akpá ɖɔ tɔ ɖě kún sɔ́ ná gba ayǐkúngban ɔ́ gbeɖé ó. Mɔ̌ ɖokpó ɔ́, un dó akpá ɖɔ un kún sɔ́ ná sin xomɛ dó we gbeɖé kpɔ́n ó, un kún sɔ́ ná dó ya nú we gbeɖé ó.

¹⁰Ényí só ɖaxó ɖaxó lɛ́ɛ ná bó húnhún ɔ́, só kpɛví kpɛví lɛ́ɛ ná bó sɛ tɛn ɔ́, wǎn yíyí e un ɖó nú we ɔ́ ná húzú gbeɖé ǎ. Akɔ e un jɛ xá we bɔ nǔ ná nyɔ́ nú we ɔ́ ná húzú gbeɖé ǎ. Nyɛ Mawu Mavɔmavɔ wɛ ɖɔ mɔ̌ nú we, nyɛ mɛ e yí wǎn nú we ɔ́ wɛ ɖɔ mɔ̌ nú we.”

¹¹ Mawu ɖɔ: “Jeluzalɛ́mu gbɛ̌dónánɔ, jɔhɔn ɖaxó ɖé ɖo dǐndán we wɛ; mɛ ɖé ka ɖe bó ná dó wǔsyɛ́n lanmɛ nú we ǎ. Nyɛ Mawu Mavɔmavɔ ɔ́, un ná vɔ́ we gbá kpó awǐnnya ɖagbe ɖagbe kpó. Awǐnnya safíi wɛ un ná dó dó dǒ towe do.

¹²Awǐnnya hwlibí wɛ ná ɖo dǒ towe lɛ́ɛ jí aga, awǐnnya wěkpɛ́n ɖɔhun ɖé wɛ un ná sɔ́ dó bló hɔn towe lɛ́ɛ, bó ná sɔ́ awǐnnya xɔ akwɛ́ ɖé lɛ́ɛ dó mɛ ahohó lɛ́ lɛ̌ dó we.

¹³ Un ná kplɔ́n nǔ vǐ towe lɛ́ɛ bǐ; yě bǐ ná vo bɔ nǔ ná nyɔ́ nú yě tawun.

¹⁴A nǎ nɔ́ xwedó hwɛjijɔ dó wa nǔ; mɛ ɖěbǔ sɔ́ ná dó tagba nú we ǎ; a sɔ́ ná ɖi xɛsi nú nǔɖé ǎ; mɛ ɖěbǔ sɔ́ ná nɔ́ dó adohuhu nú we ǎ; ado sɔ́ ná hu we ǎ.

¹⁵Ényí è nǎ wá tɔ́n ahwan we ɔ́, é ná gosín nyɛ gɔ́n ǎ. Mɛ ɖěbǔ tɔ́n ahwan we ɔ́, é ná jɛ ayǐ ɖo nukɔn towe.

¹⁶A mɔ a? Nyɛ wɛ ɖó fletuntɔ́, éyɛ́ mɛ e nɔ flɔ́ akán bó nɔ́ tun alǐnnyánú tɛnmɛ tɛnmɛ lɛ́ɛ ɔ́, nyɛ wɛ ɖó e. Nyi wɛ lɛ́ ɖó gbɛtɔ́ e hɛn ɔ́, é ná hɛn alǐnnyánú énɛ́ lɛ́ɛ gblé é.

¹⁷Alǐnnyánú e è nǎ tun bó ná sɔ́ dó jǐ we ɔ́ ɖě ná wa nǔtí nú we ǎ. Mɛ ɖé kɛ nu bó dó hwɛ we ɔ́, a nǎ ɖe xlɛ́ mɛ ɔ́ ɖɔ éyɛ́ wɛ hu hwɛ. Nǔ e un sɔ́ ɖ'ayǐ nú mɛ e nyí mɛsɛntɔ́ ce lɛ́ɛ é nɛ́. Nǔ e yě ɖó acɛ ná bɔ un sɔ́ ɖ'ayǐ nú yě ɔ́ nɛ́. Xó e nyɛ Mawu Mavɔmavɔ ɖɔ ɔ́ nɛ́.”