Read fon Ezayíi 59 Bible Online

Ezayíi 59 - fon bible

Ezayíi 59

¹Mawu Mavɔmavɔ sín alɔ hwe gli, bó ná gɔn mi hwlɛ́n gán ǎ; tó tɔn ká kú, bó ná gɔn xó mitɔn se ǎ.

²Lo ɔ́, nǔ e mi wa nyi do lɛ́ɛ wɛ gbo do mɛ nú mi kpó Mawu kpó; hwɛ e mi nɔ hu lɛ́ɛ wɛ sɔ́ ɛ hwlá dó mi, bó nɔ́ lɔn nú é ná se xó mitɔn ǎ.

³Đó gbɛtɔ́ kanjɔ ɖo alɔ mitɔn, nǔ nyanya e mi dó sin lɛ́ɛ hɛn alɔví mitɔn lɛ́ɛ kwíji. Mi kɛ nu ɔ́, adingban jɛ́n mi nɔ ɖó, ɖɛ̌ mitɔn dan wǔ ɖo gbla mɛ ɔ́, xó nyanya jɛ́n é nɔ ɖɔ.

⁴Mi yi hwɛ ylɔ́ mɛ gbé ɔ́, adingban wɛ mi nɔ yi ɖó. Mi nɔ xwedó nǔgbó dó jɛ ahwan mɛ jí ǎ. Xó ma ɖó ta ɖé lɛ́ɛ wú wɛ mi nɔ gán jɛ, bó nɔ́ ɖo adingban ɖó wɛ. Nǔ nyanya xo wɛ mi mɔ, bo ji awě.

⁵Mi nɔ fɛ jakpata zin; mi nɔ lɔn yɛglétete dɔ́. Mɛ ɖé ɖu azin mitɔn ɔ́, mɛ ɔ́ nɔ́ kú. Azin ɔ́ ka gba ɔ́, dan ɖé nɔ́ tɔ́n sín mɛ.

⁶Avɔ mitɔn ɔ́, è sixú dó tɔ nǔzínzán ná ǎ. È sixú cyɔ́n nǔ e mi sɔ́ alɔ mitɔn dó bló é ǎ; nǔ e mi sɔ́ alɔ mitɔn dó bló é bǐ wɛ nyí nǔ nyanya; alɔ mitɔn ɔ́, dǎka kɛ́ɖɛ́ wɛ é nɔ́ xo.

⁷ Afɔ e ɖo glɔ̌ mitɔn lɛ́ɛ nɔ́ ɖo wezun jí xwe nǔ nyanya kɔn, bó nɔ́ ɖo hwlɛndó jí bó ná kɔn xomɛvɔ́nɔ kanjɔ kɔn nyi ayǐ. Ayi e ɖo xo mitɔn mɛ ɔ́ dá kpɔ́n! Mi gbɔn fí ɖé ɔ́, dǎka xixo kpó nǔ gblégblé kpó kɛ́ɖɛ́ jɛ́n è nɔ mɔ gbɔn fí ɔ́.

⁸Mi tunwun ali e jí è nɔ gbɔn bó nɔ́ mɔ fífá é ǎ; nǔ wa ɖó sɛ́nxwi jí ɖě ká ɖo ali e mi nɔ́ gbɔn ɔ́ jí ǎ. Ali e mi nɔ gbɔn ɔ́, ali gɔ́ndɔ́n gɔ́ndɔ́n jɛ́n é nɔ́ nyí. Mɛ ɖé mlɛ́ ali énɛ́ ɔ́, mɛ ɔ́ nɔ́ mɔ fífá ǎ.

⁹Togun Mawu tɔn ɔ́ ɖɔ: “Énɛ́ ɔ́ wú wɛ Mawu ɖo te, bó má kó wá gbo hwɛ nú mǐ ǎ. Wěziza wɛ mǐ kó ɖo te kpɔ́n, bó ká kpo ɖo ablu mɛ. Mǐ ɖo te bó tunwun ɖɔ ayǐ ná hɔ́n, lo ɔ́, mǐ ɖo zɔnlin zun wɛ gbɔn zǐnflú gɔngɔn mɛ.

¹⁰Mǐ nɔ ɖo avi dlá wɛ gbɔn dǒ wú dǒ wú nukúntíntɔ́nnɔ ɖɔhun; mǐ nɔ ɖo ali ba wɛ mɛ e ma ɖó nukún ǎ é ɖɔhun. Hwe mɛ cíɖíɖí wɛ mǐ nɔ́ klɛ́n afɔ zǎn mɛ wɛ mǐ ɖe ɖɔhun; lanmɛ mǐtɔn ɖo ganjí, mǐ ká cí mɛkúkú ɖɔhun.

¹¹Mǐ nɔ́ ɖo gbe dó wɛ kinnikínní ɖɔhun, bó nɔ́ ɖo gbɛvíhan ji wɛ ahwannɛ́ ɖɔhun. Mǐ nɔ́ ɖo te kpɔ́n Mawu, bɔ é ká nɔ nyí séé. Mǐ ɖo te kpɔ́n Mawu ɖɔ é ná wá hwlɛ́n mǐ, Mawu ká ɖo zɔ dó mǐ.

¹²Mawu, hwɛ e mǐ hu dó we lɛ́ɛ sukpɔ́; hwɛ e mǐ hu lɛ́ɛ ɖo hwɛ dó mǐ wɛ, mǐ nɔ́ ɖo gǔ e mǐ fɔ́n é flín wɛ hwebǐnu, mǐ tunwun nǔ e mǐ wa nyi do lɛ́ɛ ganjí.

¹³Mǐ se tónú nú we ǎ, mǐ nɔ gbejí nú we ǎ, mǐ gbɛ́ ɖɔ mǐ kún ná xwedó hwi Mawu mǐtɔn ɔ́ ó. Lě e mǐ ná wa gbɔn bó táfú mɛ, bó fɔ́n gǔ é kɛ́ɖɛ́ xó wɛ mǐ nɔ́ ɖɔ. Nǔ e ɖo xo mǐtɔn mɛ ɔ́, adingban wɛ. Nǔ e ɖo ayi mǐtɔn mɛ ɔ́, adingban wɛ.

¹⁴Énɛ́ ɔ́ wú ɔ́, nǔjlɔ́jlɔ́wiwa yi gǔdo; nǔ wa ɖó sɛ́nxwi jí sɔ́ ɖe ǎ, mɛɖé sɔ́ nɔ́ ɖɔ xó nǔgbó ɖo tokplétɛn lɛ́ɛ ǎ; ayijlɔ́jlɔ́nɔ ɖě sɔ́ nɔ́ yi fínɛ́ ǎ.

¹⁵Nǔgbó ɖě sɔ́ ɖe ǎ. Mɛ ɖé ɖɔ émí kún sɔ́ ná wa nǔ nyanya ɖě ó ɔ́, è nɔ bɛ́ nǔ e ɖo así tɔn lɛ́ɛ bǐ.” Mawu Mavɔmavɔ mɔ nǔ e ɖo jijɛ wɛ lɛ́ɛ bǐ. Ée hwɛjijɔ ma sɔ́ tíin ǎ ɔ́, é nyí nǔɖé bó nyɔ́ nukún tɔn mɛ ǎ.

¹⁶ É mɔ ɖɔ mɛɖé kún mɔ nǔ énɛ́ lɛ́ɛ sín do jijɛ ó; ée mɛɖé má ɖo nu kɛ dó nǔ énɛ́ lɛ́ɛ wú wɛ ǎ ɔ́, é nyí nǔɖé bó kpácá ɛ. Énɛ́ ɔ́, é ɖésú sí te d'é wú, bɔ hwɛjijɔ tɔn ka ná ɛ hlɔ̌nhlɔ́n.

¹⁷ Hwɛjijɔ énɛ́ ɔ́ nyí ganwu bɔ é sɔ́ dó, bɔ hwlɛngán ɔ́ nyí gangbákún bɔ é xwe, hlɔnbiba wɛ nyí awu bɔ é sɔ́ dó, hlɔ̌nhlɔ́n e é nɔ́ dó fun ahwan ná ɔ́ wɛ nyí awu gaga bɔ é sɔ́ dó.

¹⁸Nǔ e jɛ xá mɛ ɖokpó ɖokpó ɔ́ wɛ é ná bló n'i. É ná dɔn tó nú kɛntɔ́ tɔn lɛ́ɛ bɔ é ná syɛ́n ɖésú; yě ná bó ɖo zɔ fí ɖěbǔ ɔ́, é ná dɔn tó nú yě.

¹⁹Énɛ́ ɔ́, è nǎ ɖó sísí n'i sín zǎnzǎnhwe jí, káká yi gbadahwe jí, bó ná ɖó sísí nú susu tɔn. Đó é ná wá kpó zǐngídi kpó, tɔ e ɖi sin ja kpó jɔhɔn kpó é ɖɔhun.

²⁰ Mawu Mavɔmavɔ ná wá Jeluzalɛ́mu, bó ná hwlɛ́n Izlayɛ́li ví lɛ́ɛ, Izlayɛ́li ví e ná lɛ́ kɔ sín hwɛ yětɔn gúdo lɛ́ɛ. Xó e Mawu Mavɔmavɔ ɖɔ ɔ́ nɛ́.

²¹Mawu Mavɔmavɔ ɖɔ: “Nyɛ ɔ́, akɔ e un jɛ xá mi ɔ́ ɖíe: Yɛ ce ɖo mi jí; un sɔ́ xó ce dó nu nú mi, xó énɛ́ ɔ́ ná nɔ mi nu, bó nɔ vǐ mitɔn lɛ́ɛ nu, bó nɔ vǐvú mitɔn lɛ́ɛ nu, sín din káká sɔ́yi; un ná yí xó ce sín mi nu gbeɖé ǎ; nyɛ Mawu Mavɔmavɔ wɛ ɖɔ mɔ̌.”