Read fon Ezayíi 6 Bible Online

Ezayíi 6 - fon bible

Ezayíi 6

¹ Xwe e xwe axɔ́sú Oziyási zán kú ɔ́, un mɔ nǔ, bó mɔ Aklúnɔ ɖo ayǐjínjɔ́n axɔ́súzinkpo tɔn jí; axɔ́súzinkpo ɔ́ yi jǐ káká. Awu tɔn sín tó gɔ́ sinsɛnxɔ ɔ́.

²Wɛnsagun akpé ɖé lɛ́ɛ ɖo ta tɔn nu. Wɛnsagun lɛ́ɛ ɖokpó ɖokpó ɖó awa ayizɛ́n: Yě cyɔ́n awa we nukún mɛ, bó blá we dó wǔ, bó nɔ́ sɔ́ we dó zɔn.

³ Yě nɔ́ sú xó sɛ́ dó yěɖée ɖɔ: “Mǐmɛ́! Mǐmɛ́! Mǐmɛ́ wɛ Mawu Mavɔmavɔ Nǔbǐwúkpétɔ́ ɔ́ nyí. Susu tɔn gɔ́ gbɛ ɔ́ bǐ.”

⁴ Gbe yětɔn nɔ́ húnhún hɔnkpo lɛ́ɛ, bɔ azizɔ nɔ gɔ́ xwé ɔ́.

⁵Énɛ́ ɔ́, un ɖɔ: “Yéége gbɛ ce vɔ! Đó nu ce mɛ́ ǎ, togun e mɛ un jɔ ɖe ɔ́ lɔ sín nu mɛ́ ǎ, nyi ɖíe ka mɔ axɔ́sú Mawu Mavɔmavɔ Nǔbǐwúkpétɔ́ ɔ́ ɖó nukún wú e!”

⁶Ée un ɖo mɔ̌ ɖɔ wɛ ɔ́, wɛnsagun akpé lɛ́ɛ ɖokpó sɔ́ bɛ̌kpa dó sɔ́ myɔkán ɖokpó ɖo vɔ̌sákpe ɔ́ jí, bó zɔn wá gɔ̌n ce.

⁷É sɔ́ myɔkán ɔ́ sɔ́ nu ce bó ɖɔ: “Ée myɔkán élɔ́ jɛ nu towe wú din ɔ́, Mawu ɖe nǔ nyanya e a wa lɛ́ɛ sín kɔ nú we, bó súnsún hwɛ towe lɛ́ɛ sín kɔ nú we.”

⁸Énɛ́ ɔ́, un se Aklúnɔ ɖo kinkanbyɔ́ wɛ ɖɔ: “Mɛ̌ un ka ná sɛ́ dó? Mɛ̌ ka ná nyí gbeyíɖɔ mǐtɔn?” Bɔ un yí gbe n'i ɖɔ: “Nyɛ ná yi, sɛ́ mì dó.”

⁹ Ée un ɖɔ mɔ̌ ɔ́, Aklúnɔ lɛ́ ɖɔ: “Yi ɖɔ nú togun énɛ́ ɖɔ: ‘Mi ná se céɖécéɖé, mi ka ná mɔ nǔ jɛ mɛ ǎ; mi na mɔ ganjí, có mi ka na mɔ ǎ.’

¹⁰Blǒ bónú ayixa yětɔn ní syɛ́n, yě nǐ tlí tó bó tɔ́n nukún; ma lɔn nú nukún yětɔn mɔ nǔ ó, ma lɔn nú tó yětɔn se nǔ ó, ma lɔn nú ayixa yětɔn mɔ nǔ ó; é má nyí mɔ̌ ǎ ɔ́, yě táá lɛ́ kɔ́ wá gɔ̌n ce, bónú azɔn yětɔn ná gbɔ.”

¹¹Ée Aklúnɔ ɖɔ mɔ̌ ɔ́, un kanbyɔ́ ɛ ɖɔ: “Aklúnɔ, hwetɛ́nu é ná fó dó?” Bɔ é yí gbe nú mì ɖɔ: “Nǔ ná nɔ mɔ̌ káká jɛ hwenu e toxo lɛ́ɛ bǐ ná gba bó jɛ vɔ̌, bɔ xwé lɛ́ɛ bǐ ná jɛ vɔ̌, lobɔ to ɔ́ bǐ ná húzú gbětótló é.”

¹²Mawu Mavɔmavɔ ná sɛ́ to ɔ́ mɛ nu lɛ́ɛ dó fí ɖěvo, bɔ è nǎ jó gle gěgé dó.

¹³Ényí mɛ e ɖo to ɔ́ mɛ lɛ́ɛ vlɔ̌ɖówǒ kpo ɖo to ɔ́ mɛ ɔ́, mɛ énɛ́ lɛ́ɛ ná ji zo. Amɔ̌, lě e è nɔ gbo telebɛ́ntitín abǐ cɛ́nitín, bɔ ta tɔn nɔ kpo ɖo do mɛ ɔ́, mɛ ywɛywɛ e ná kpo ɖo togun ɔ́ mɛ ɔ́ ná dó kún mímɛ́.