Read fon Ezayíi 62 Bible Online

Ezayíi 62 - fon bible

Ezayíi 62

¹Jeluzalɛ́mu e, wǎn yíyí e un ɖó nú we ɔ́ wú wɛ un ma sɔ́ ná xwɛ ǎ; Sinyɔ́ɔ e, wǎn yíyí e un ɖó nú we ɔ́ wú wɛ un ma sɔ́ ná cí xwíí ǎ, un ná xwɛ cóbónú hwɛ e Mawu ná gbo nú we ɔ́ ná wá ayǐ hɔ́n jǎwe ɖɔhun ǎ; un ná cí xwíí cóbónú hwlɛngán towe ná ɖi ɖɛ̌ myɔ e è tá é ɖɔhun ǎ.

²Énɛ́ ɔ́, akɔta lɛ́ɛ bǐ ná mɔ ɖɔ Mawu Mavɔmavɔ hwlɛ́n we, axɔ́sú lɛ́ɛ bǐ ná mɔ susu e a xɔ é. Mawu Mavɔmavɔ ná ná nyǐkɔ yɔ̌yɔ́ we, bɔ nyǐkɔ énɛ́ wɛ è nǎ nɔ́ ylɔ́ we.

³A nǎ nyí axɔ́súgbákún ɖɛkpɛ ɖɛkpɛ ɖo Mawu Mavɔmavɔ lɔ mɛ, a nǎ nyí tablá ɖagbe ɖagbe ɖo Mawu towe sín alɔkpákpá mɛ.

⁴Mɛ ɖé sɔ́ ná ylɔ́ we ɖɔ “Toxo e è jǒ dó é” ǎ. È ká sɔ́ ná ylɔ́ ayǐkúngban towe ɖɔ “Ayǐkúngban e jí mɛ ɖé má ɖe ǎ é” ǎ. Lo ɔ́, è nǎ nɔ́ ylɔ́ we ɖɔ “Wǎnyínámɔ Mawu Mavɔmavɔ tɔn”, bó ná nɔ́ ylɔ́ ayǐkúngban towe ɖɔ: “Nyɔ̌nu xwési”, ɖó hwi wɛ Mawu Mavɔmavɔ ná yí wǎn ná, bɔ ayǐkúngban towe ná ɖó asú.

⁵Nǔgbó ɔ́, lě e dɔ̌nkpɛvú nɔ́ da ɖyɔ̌vǐ si ɔ́, mɔ̌ wɛ mɛ e ɖo vǐvɔ́ we bló ɖó wɛ ɔ́ ná nyí asú nú we. Lě e nyɔ̌nu yɔ̌yɔ́ nɔ́ dó xomɛhunhun nú asú tɔn gbɔn ɔ́, mɔ̌ wɛ a nǎ dó xomɛhunhun nú Mawu towe gbɔn.

⁶Jeluzalɛ́mu, un ɖó mɛ ahohó towe ta; yě ná xwɛ zǎn mɛ ǎ, yě ká ná xwɛ kéze ǎ. Un ɖɔ nú yě ɖɔ: “Mi mɛ e nɔ flín Jeluzalɛ́mu Mawu Mavɔmavɔ lɛ́ɛ ɔ́, mi ma gbɔjɛ́ ó.

⁷Mi ma ná gbɔjɛ́ Mawu Mavɔmavɔ ó; mi ma ná ɛ gbɔjɛ́ káká jɛ hwenu e é ná sɔ́ Jeluzalɛ́mu sí te bǐ dó é ó; mi ma ná ɛ gbɔjɛ́ káká jɛ hwenu e é ná sɔ́ Jeluzalɛ́mu dó bló mɛ e è nǎ nɔ́ kpa susu ná ɖo ayǐkúngban ɔ́ bǐ jí dó é ó.”

⁸Mawu Mavɔmavɔ xwlé ɖisí lɔ tɔn, é xwlé hlɔ̌nhlɔ́n lɔ tɔn bó ɖɔ: “Un sɔ́ ná sɔ́ jinukún towe lɛ́ɛ dó ná nǔɖuɖu kɛntɔ́ towe lɛ́ɛ gbeɖé ǎ. Vɛ̌ɛn towe e tamɛ a ji ya dó ɔ́, toɖévomɛnu lɛ́ɛ sɔ́ ná nu gbeɖé ǎ.

⁹Lo ɔ́, mɛ e sɔ́ jinukún lɛ́ɛ wɛ ná ɖu, bó ná kpa susu nú nyɛ Mawu Mavɔmavɔ, bɔ mɛ e ná gbɛ vǐwun lɛ́ɛ ná nu vɛ̌ɛn ɖo xwé ce sín kɔ́xota.”

¹⁰Jeluzalɛ́munu lɛ́ɛ mi, mi tɔ́n; mi tɔ́n sín toxo ɔ́ mɛ, bó ɖe ali nú mɛ e lɛ́ kɔ ja lɛ́ɛ. Mi bló ali lɛ́ɛ ɖó; mi ɖe awǐnnya e ɖo ali jí lɛ́ɛ síin. Mi dó asyá ɖokpó dó xlɛ́ ali togun lɛ́ɛ.

¹¹ Mawu Mavɔmavɔ ná ɖɔ xó élɔ́ káká yi fí e gbɛ ɔ́ kponu ɖó é; é ná ɖɔ: “Mi ɖɔ nú Sinyɔ́ɔnu lɛ́ɛ ɖɔ: Éɖíe, Mɛhwlɛ́ngántɔ́ mitɔn jǎwe; é bɛ́ nǔ e é mɔ lɛ́ɛ jǎwe; azɔ̌ e é wa ɔ́, é bɛ́ nǔ e é mɔ ɖ'é mɛ lɛ́ɛ ja.”

¹²È nǎ nɔ́ ylɔ́ yě ɖɔ: “Togun e Mawu sɔ́ ɖó vo nú éɖée” é, “mɛ e Mawu Mavɔmavɔ tún kan ná lɛ́ɛ” é. Jeluzalɛ́mu, hwɛ ɔ́, è sɔ́ ná nɔ́ ylɔ́ we ɖě ɖɔ: “Toxo e è jǒ dó ɔ́” ǎ, lo ɔ́, è nǎ nɔ́ ylɔ́ we ɖɔ: “Toxo e ba wɛ mɛ bǐ ɖe” é.