Read fon Ezayíi 63 Bible Online

Ezayíi 63 - fon bible

Ezayíi 63

¹ Mɛ̌ ká nyí mɛ énɛ́ e jǎwe sín Edɔ́mu é? Mɛ énɛ́ e jǎwe sín Bosla toxo ɔ́ mɛ bɔ nǔ vɔvɔ kɔn nyi awu tɔn mɛ mɔ̌ é? É ɖo zɔnlin jí ɖo awu gaga ɖagbe ɖagbe ɖé mɛ bó nɔ́ gó, ɖó é ɖeji dó hlɔ̌nhlɔ́n tɔn wú. Mawu yí gbe ɖɔ: “Nyɛ wɛ; nyɛ wɛ nɔ ɖɔ hwɛ jlɔ́jlɔ́, bó ɖó acɛ bó ná hwlɛ́n mi gán.”

²“Bɔ étɛ́wú nǔ vɔvɔ ka gbɔn awu towe mɛ mɔ̌? Étɛ́wú awu towe ka cí mɛ li vǐwun ɖo vǐwunto mɛ ɖɔhun mɔ̌?”

³ Mawu yí gbe ɖɔ: “Nyi ɖokpó géé wɛ li vǐwun e ɖo vǐwunto ɔ́ mɛ é; mɛ ɖé gosín togun ɖé mɛ bó dó alɔ mì ǎ. Un gbídí gbɛtɔ́ lɛ́ɛ ɖó afɔ wú kpó xomɛsin kpó, adǎn jí wɛ un ɖe bó tɛ afɔ yě jí, bɔ kanjɔ yětɔn zlɔ́n kɔn nyi awu ce mɛ, bɔ awu ce gblé bǐ.

⁴Un ko tunwun dó ayi ce mɛ ɖɔ un ná ba hlɔn nú togun ce gbe ɖokpó; azǎn ɔ́ wɛ kpé. Xwe e xwe un ná hwlɛ́n togun ce gán ɔ́ wɛ su.

⁵ Un ba mɛ e ná dó alɔ mì é gbɔn fí bǐ, un ka mɔ mɛɖé ǎ. É kpácá mì bɔ un mɔ mɛɖé nú é ná gɔ́ alɔ nú mì ǎ. Énɛ́ ɔ́, un sí te ɖɔ nyi ɖésú ná bló, bɔ xomɛsin e jí un ɖe ɔ́ ná hlɔ̌nhlɔ́n mì.

⁶Un ɖo xomɛsin jí bó gbídí togun lɛ́ɛ ɖó afɔ wú; adǎn e jí un ɖe ɔ́ mú yě ahan ɖɔhun; un kɔn kanjɔ yětɔn kɔn nyi ayǐ.”

⁷Un ná flín xomɛnyínyɔ́ Mawu Mavɔmavɔ tɔn lɛ́ɛ, bó ná flín nǔ e wú è nǎ kpa susu n'i lɛ́ɛ: é bló nǔ bǐ nú mǐ; un ná ɖɔ nǔ ɖagbe tobutóbú e é wa nú Izlayɛ́li kpó xomɛfífá tɔn kpó lɛ́ɛ, nǔ ɖagbe ɖagbe e é wa n'i kpó xomɛnyínyɔ́ ɖaxó ɖé kpó lɛ́ɛ.

⁸Mawu ɖɔ dó Izlayɛ́li ví lɛ́ɛ wú ɖɔ: “Togun ce wɛ yě nyí. Vǐ e má ná flú mì ǎ lɛ́ɛ wɛ yě nyǐ.” Ée é ɖɔ mɔ̌ ɔ́, é hwlɛ́n yě.

⁹Yě ɖo aluwɛ mɛ ɔ́, é ɖésú nɔ́ nɔ aluwɛ mɛ xá yě, bɔ wɛnsagun e nɔ ɖo kpɔ́ xá ɛ ɔ́ nɔ hwlɛ́n yě; éyɛ́ Mawu ɔ́ ɖésú xɔ yě ɖo wǎn yíyí tɔn kpó nǔbláwǔkúnúmɛ tɔn kpó mɛ; é wɛ kpé nukún dó yě wú, bó hɛn sɔ yě ɖo hwe yětɔn nu.

¹⁰Lo ɔ́, yě fɔ́n gǔ dó jǐ tɔn, yě dó awakanmɛ kú nú yɛmímɛ́ tɔn. Bɛ́ sín hwenɛ́nu ɔ́, é húzú kɛntɔ́ yětɔn, bó fun ahwan xá yě.

¹¹Énɛ́ ɔ́, togun tɔn wá flín nǔ e jɛ xóxó hwenu lɛ́ɛ, bó flín Mɔyízi bó ɖɔ: “Fítɛ́ mɛ e ɖe togun tɔn tɔ́n sín xu mɛ ɔ́ ká ɖe? Mɛ e ɖe lɛ̌ngbɔ́ tɔn lɛ́ɛ kpó lɛ̌ngbɔ́nyitɔ́ tɔn lɛ́ɛ kpó tɔ́n sín xu mɛ ɔ́, fítɛ́ é ká ɖe? Fítɛ́ mɛ e sɛ́ yɛ mímɛ́ tɔn dó bɔ é wá nɔ yě mɛ ɔ́ ká ɖe?

¹² Hwenu e yě ɖo yiyi wɛ ɔ́, é wɛ zé hlɔ̌nhlɔ́n lɔ tɔn dó ná gǎnjɛwú Mɔyízi. É má xu ɔ́ ɖó we bó ná dó xɔ susu káká sɔ́yi.

¹³É wɛ kplá yě gbɔn xuzan jí, yě ɖo yiyi wɛ ɔ́, a nǎ ɖɔ sɔ́ wɛ ɖo yiyi wɛ ɖo ayǐkúngban xúxú jí; yě klɛ́n afɔ ǎ.

¹⁴Hwenu e yɛ Mawu Mavɔmavɔ tɔn kplá yě xwe gbɔjɛtɛn ɔ́, yě cí lɛ̌ngbɔ́hwan e xwe tɔdo mɛ é ɖɔhun.” Mawu Mavɔmavɔ, hǔn lě e a hɛn togun towe gbɔn, bó dó xɔ susu ɔ́ nɛ́.

¹⁵Mawu Mavɔmavɔ, nɔ jǐxwé aga dɔ̌n, ɖo xwé towe ɖagbe ɖagbe ɔ́ gbe, xwé towe mímɛ́ ɔ́ gbe, bó kpɔ́n nǔ e ɖo mǐ gbo wɛ ɔ́. Fítɛ́ wǎn yíyí ma ɖó dogbó e a ɖǒ nú mǐ ɔ́ ká ɖe? Fítɛ́ hlɔ̌nhlɔ́n towe ká ɖe? Mǐ sɔ́ nɔ́ mɔ walɔ towe fífá ɔ́ kpó xomɛnyínyɔ́ towe kpó ɖě ǎ.

¹⁶Có hwi wɛ nyí tɔ́ mǐtɔn. Ablaxámu tɔ́gbó mǐtɔn ɔ́ tunwun mǐ ǎ. Izlayɛ́li lɔ ka tunwun mǐ ǎ. Hwɛ Mawu Mavɔmavɔ ɔ́ wɛ nyí tɔ́ mǐtɔn. Mɛhwlɛ́ngántɔ́ wɛ nyǐkɔ towe nyí sín do.

¹⁷Mawu Mavɔmavɔ, étɛ́wú a ká jó mǐ dó bɔ mǐ ɖo flúflú wɛ ɖo zɔ nú ali towe? Étɛ́wú a ka jǒ mǐ dó bɔ mǐ sú ayi mǐtɔn sín hɔn dó we, bó gbɛ́ ɖɔ mǐ kún sɔ́ ná ɖó sísí nú we ó? Mawu Mavɔmavɔ wǎ, ɖó wǎn yíyí e a ɖǒ nú mǐ mɛ e nyí mɛsɛntɔ́ towe lɛ́ɛ wútu; mǐ mɛ e nyí togun towe lɛ́ɛ wútu.

¹⁸Mǐ togun towe e a sɔ́ ɖó vo é ɔ́, hwenu kpɛɖé jɛ́n to e a nǎ mǐ ɔ́ nyí mǐtɔn xɔ; kɛntɔ́ mǐtɔn lɛ́ɛ gbídí tɛn mímɛ́ towe ɖó afɔ wú.

¹⁹Sín tɛgbɛ ɔ́, é cí ɖɔ a sɔ́ nyí axɔ́sú mǐtɔn ǎ ɖɔhun; é cí ɖɔ nyǐkɔ towe sɔ́ ɖo mǐ wú ǎ ɖɔhun. Mawu Mavɔmavɔ, nú a vǔn jǐnukúnsin bó jɛ te ɔ́, só lɛ́ɛ bǐ ná sísɔ́ ɖo nukɔn towe.