Read fon Ezayíi 64 Bible Online

Ezayíi 64 - fon bible

Ezayíi 64

¹Myɔ wɛ a nyǐ: myɔ jɛ nǔywɛ́ mɛ ɔ́, é nɔ́ wlí zo; è sɔ́ sin ɖ'é jí ɔ́, sin ɔ́ nɔ hun agbǎn. Lě e a nǎ ɖe mɛ e a nyǐ ɔ́ xlɛ́ kɛntɔ́ towe lɛ́ɛ gbɔn é nɛ́; akɔta lɛ́ɛ ná sísɔ́ ɖo nukɔn towe,

²hwenu e a nǎ bló nǔdábaɖa e mǐ ma ɖó ayi tɔn ǎ é; a nǎ jɛ te bɔ só lɛ́ɛ ná sísɔ́ ɖo nukɔn towe.

³ Nǔmɛsɛn ɖě nɔ́ wa nǔ gbɔn mɔ̌ zɛ hwɛ wú ǎ; nǔmɛsɛn ɖě nɔ́ wa nǔ gbɔn mɔ̌ nú mɛ e ɖeji dó wǔ tɔn lɛ́ɛ ǎ; è se kpɔ́n ǎ, è ka mɔ kpɔ́n ǎ.

⁴Mɛ e nɔ xwedó hwɛjijɔ kpó awǎjijɛ kpó lɛ́ɛ ɔ́, mɛ e nɔ́ nɔ ali towe jí bó nɔ́ flín we lɛ́ɛ ɔ́, a nɔ wá yě gɔ́n. A sin xomɛ ɖó nǔwanyido mǐtɔn lɛ́ɛ wú. Lo ɔ́, ali xóxó e a ɖe nú mǐ ɔ́ wɛ mǐ ná mlɛ́ bó ná mɔ hwlɛngán.

⁵Mǐ bǐ wɛ cí mɛ blíblí ɖɔhun, bɔ ɖagbe e mǐ nɔ́ wa ɔ́ nɔ́ vɛ́ mɔ nú we, lě e avɔ e mɛ kanjɔ kɔn nyi é nɔ́ vɛ́ mɔ nú we gbɔn é. Hwɛ e mǐ nɔ́ hu lɛ́ɛ zɔ́n bɔ mǐ cí ama xúxú e mɛ jɔhɔn d'alɔ é ɖɔhun.

⁶Mɛ ɖé sɔ́ nɔ́ xomlá we ǎ. Mɛ ɖé sín ayi ka sɔ́ mɔ nǔ bónú é ná wá su we ǎ. Đó a ɖe kɔ dó mǐ, a jǒ mǐ dó nyi hwɛgban mǐtɔn lɛ́ɛ glɔ́.

⁷Nǔ ká ɖo mɔ̌ có, Mawu Mavɔmavɔ, hwi wɛ nyí tɔ́ mǐtɔn. Mǐdɛɛ lɛ́ɛ ɔ́, ko wɛ mǐ nyí, hwi wɛ ka nyí zɛ̌nmɛtɔ́ ɔ́; mǐ bǐ wɛ nyí alɔ towe nǔwiwa.

⁸Mawu Mavɔmavɔ, ma sin xomɛ ó, ma sin xomɛ ní dín gbě ó. Hwɛ e mǐ hu lɛ́ɛ ɔ́, ma ɖo flínflín wɛ káká sɔ́yi ó. Lo ɔ́, kɛnklɛ́n bó kpɔ́n mǐ jí; kpɔ́n mǐ mɛ e nyí togun towe lɛ́ɛ bǐ jí.

⁹Mawu Mavɔmavɔ, toxo mímɛ́ towe lɛ́ɛ ɔ́, mɛ ɖé sɔ́ ɖo yě mɛ ǎ; gbɛtɔ́ ɖokpó sɔ́ ɖo Jeluzalɛ́mu ǎ, Sinyɔ́ɔ húzú to gbigba.

¹⁰Xwé e è sɔ́ ɖó vo nú we ɔ́, xwé ɖagbe ɖagbe e gbe tɔ́gbó mǐtɔn lɛ́ɛ nɔ́ ji han dó kpa susu nú we ɖe ɔ́ bǐ wɛ ji myɔ, bɔ nǔ e vɛ́ nú mǐ lɛ́ɛ bǐ gba hánnyá.

¹¹Mawu Mavɔmavɔ, a nǎ mɔ awě énɛ́ lɛ́ɛ ɖo xixo mǐ wɛ bó ná kɛ nu ǎ wɛ a? A nǎ tin bó kpɔ́n, bó dó winnyá ɖaxó énɛ́ mǐ wɛ ǎ?