Read fon Ezayíi 7 Bible Online

Ezayíi 7 - fon bible

Ezayíi 7

¹ Axɔ́sú Judáa tɔn Akázi e nyí Yotámu ví, bó nyí Oziyási vívú ɔ́ sín hwenu wɛ axɔ́sú Silíi tɔn Hlesini kpódó axɔ́sú Izlayɛ́li tɔn Pekáxi Hlemaliyahu ví ɔ́ kpó ɖidó ahwan tɔ́n Jeluzalɛ́mu toxo ɔ́ gbé; lo ɔ́, yě kpé wú bó tɔ́n ahwan ɛ ǎ.

²È yi ɖɔ nú Akázi, Davídi ví ɔ́, é kpódó mɛ e ɖo xwé tɔn gbe lɛ́ɛ kpó ɖɔ Silíinu lɛ́ɛ ɖó gɔnu ɖó Eflayímu yíkúngban jí. Xó énɛ́ e axɔ́sú ɔ́ kpó togun ɔ́ kpó se ɔ́ dán yě, lě e jɔhɔn nɔ dán atín e ɖo zungbó mɛ é ɖɔhun.

³Énɛ́ ɔ́, Mawu Mavɔmavɔ ɖɔ nú Ezayíi ɖɔ: “Kplá vǐ towe Cea-Yacúvu[3] bó yi mɔ Akázi. É ɖo ali e è nɔ gbɔn yi Avɔnyatɔ́ lɛ́ɛ gle mɛ ɔ́ jí, ɖo fí e ali e è ɖe nú sin e nɔ gosín sindo e ɖo só ta é mɛ ɔ́ fó dó é.

⁴A mɔ ɛ ɔ́, a nǎ ɖɔ n'i ɖɔ: ‘Đǒ ayi te, ma dán jojo ó, ma ɖi xɛsi ó, ma nú xomɛsin e jí Silíi xɔ́sú Hlesini kpó nyaví Hlemaliyahu ví ɔ́ kpó ɖe ɔ́ ɖó adohu nú we ó. Myɔtín wɛ nú yě mɛ we énɛ́ lɛ́ɛ, bɔ yě ɖo azɔ si wɛ kpowun.

⁵Un tunwun ganjí ɖɔ Silíinu lɛ́ɛ kpó nyaví Hlemaliyahu ví ɔ́ kpó, kpódó yě mɛ e ɖó gɔnu ɖó Eflayímu lɛ́ɛ kpó, ɖo gbě towe blá wɛ bɔ é syɛ́n ɖésú.’ Yě ɖɔ:

⁶‘Mi wá mǐ ní yi tɔ́n ahwan Judáa to ɔ́! Mi nú mǐ nǎ dó xɛsi i; mi nú mǐ nǎ dɔn ɛ byɔ́ gbɛ̌ mǐtɔn mɛ gǎnnugǎnnu. Mi nú mǐ ná zé Tavéyɛ́lu ví ɔ́ axɔ́sú ɖó do tɔn mɛ.’

⁷Lo ɔ́, xó e Aklúnɔ Mavɔmavɔ ɖɔ é ɖíe: ‘Nǔ sixú nyí mɔ̌ ǎ. Nǔ mɔ̌hun ná jɛ ǎ.

⁸Đó Damási wɛ nyí tota Silíi tɔn; Damási ɔ́ kɛ́ɖɛ́ nu wɛ Hlesini kpa acɛ dó. Samalíi wɛ nyí tota Eflayímu tɔn, Samalíi ɔ́ kɛ́ɖɛ́ nu wɛ nyaví Hlemaliyahu ví ɔ́ ka kpa acɛ dó. Káká nú mǐ ká ná mɔ xwe kanɖé koatɔ́n (65) din ɔ́, Eflayímu togun ɔ́ sɔ́ ná tíin nyǐ ǎ.’ Mawu wú jɛ́n mi ná gán jɛ, mi ma gán jɛ Mawu wú ǎ ɔ́, é ná kpa mi ǎ.”

¹⁰Mawu Mavɔmavɔ lɛ́ ɖɔ nú Akázi ɖɔ:

¹¹“Byɔ̌ Mawu Mavɔmavɔ, Mawu towe ɖɔ é ní ná xlɛ̌ ɖé émí. Byɔ̌ ɛ! Xlɛ̌ ɔ́ sixú gosín kútomɛ, é sixú gosín sɛ́xwé.”

¹²Lo ɔ́, Akázi ɖɔ: “Éeǒ, un ná byɔ́ nǔ ɖěbǔ ǎ, un jló ná tɛ́n Mawu Mavɔmavɔ kpɔ́n ǎ.”

¹³Bɔ Ezayíi ɖɔ n'i ɖɔ: “Hwi kpó hɛ̌nnu towe kpó ní ɖótó mì. Davídi ví lɛ́ɛ mi, mi ɖótó mì! Nǔ e dó sin wɛ mi ɖe káká bɔ é kpé kɔ nú gbɛtɔ́ lɛ́ɛ é víví hwe dó mi, bɔ mi ná ɖ'é wú káká bɔ é ná kpé kɔ nú Mawu ce wɛ a?

¹⁴ Din ɔ́, Aklúnɔ ɖésú ɖo xlɛ̌ ɖokpó ná mi wɛ: Éɖíe, ɖyɔ̌vǐ ɔ́ ná mɔ xo, bó ná ji vǐ súnnu ɖokpó. É ná sun nyǐ vǐ ɔ́ ɖɔ Emanuwɛ́li, ‘Mawu ɖo kpɔ́ xá mǐ.’

¹⁵Vǐ ɔ́ ná ɖo amɔ̌ kpó wǐin kpó ɖu wɛ káká jɛ hwenu e é ná ɖó xwe e ná tunwun nǔ nyanya ɖo nǔ ɖagbe mɛ é.

¹⁶Cóbónú vǐ súnnuví ɔ́ ná tunwun nǔ nyanya ɖo nǔ ɖagbe mɛ ɔ́, axɔ́sú we e ɖo xɛsi dó nú we lɛ́ɛ ɔ́, mɛ e ɖo to yětɔn lɛ́ɛ mɛ lɛ́ɛ bǐ ná jó to yětɔn lɛ́ɛ dó, bɔ to lɛ́ɛ bǐ ná jɛ vɔ̌.

¹⁷Amɔ̌, hwi kpó togun towe kpó mɛ e ɖo xwé towe gbe lɛ́ɛ kpó ɔ́, Mawu Mavɔmavɔ ná sɛ́ nǔɖé lɛ́ɛ dó mi; nǔ énɛ́ ɖě kó sɔ́ jɛ sín gbe e gbe axɔ́súɖuto Izlayɛ́li tɔn jɛ vo nú axɔ́súɖuto Judáa tɔn é ǎ. Nǔ e axɔ́sú Asilíi tɔn ná wa é wú ɖɔ xó dó wɛ è ɖe mɔ̌.”

¹⁸É ná su gbe ɖokpó, bɔ Mawu Mavɔmavɔ ná kún kwín, bó ná ylɔ́ sukpɔ e ɖo fí e Nilu tɔ ɔ́ yi jɛ xu mɛ ɖe é, bó ná ylɔ́ wǐin e ɖo Asilíi lɛ́ɛ.

¹⁹Sukpɔ lɛ́ɛ bǐ kpó wǐin lɛ́ɛ bǐ kpó ná wá ɖó kɔn nyi dodo hoo lɛ́ɛ mɛ, yě ná ɖó kɔn nyi só xo lɛ́ɛ mɛ, yě ná ɖó kɔn nyi zunkan lɛ́ɛ bǐ mɛ, bó ná ɖó kɔn nyi fí e kanlin lɛ́ɛ nɔ́ ɖu ama ɖe é bǐ.

²⁰É ná su gbe ɖokpó, bɔ Aklúnɔ ná xáya hǎ ɖokpó sín Efláti tɔ ɔ́ gúdo; é ná sɔ́ hǎ ɔ́ dó xwlɛ́ ta kpó wǔtu kpó atán kpó nú mi bǐ. Axɔ́sú Asilíi tɔn xó ɖɔ wɛ è ɖe mɔ̌.

²¹Hwenɛ́nu ɖokpó ɔ́, mɛ e ɖo to ɔ́ mɛ lɛ́ɛ ɖokpó ɖokpó ná nyi nyibú asi ɖokpó kpó gbɔ̌ we kpó;

²²yě ná ná anɔ̌sin káká bɔ è nǎ mɔ amɔ̌ ɖu. Mɛ e ná nɔ to ɔ́ mɛ lɛ́ɛ bǐ ná nɔ ɖu amɔ̌ kpó wǐin kpó.

²³Hwenɛ́nu ɖokpó ɔ́, è nǎ jó gle e mɛ vǐwuntín afatɔ́n (1.000) ɖe, bɔ é ná xɔ akwɛ́gan afatɔ́n (1.000) mɔ̌ é dó, bɔ wun kpó kpɔvɛwun kpó ná vun blá bǐ.

²⁴È nǎ nɔ́ hɛn da kpó gǎ kpó, bó ná nɔ́ wá nya gbě ɖo fínɛ́; wun kpó kpɔvɛwun kpó wɛ ná vun blá to ɔ́ bǐ.

²⁵Mɛ ɖěbǔ ná glá yi só kpɛví kpɛví e è nɔ zé alǐn dó lɛ ná é ta ǎ, ɖó è nǎ ɖo wun kpó kpɔvɛwun kpó hɔn ná wɛ; è nǎ jó fí énɛ́ lɛ́ɛ dó nú nyibú lɛ́ɛ kpó gbɔ̌ lɛ́ɛ kpó.