Read fon Ezayíi 9 Bible Online

Ezayíi 9 - fon bible

Ezayíi 9

¹ Togun e ɖo zǐnflú mɛ ɔ́ mɔ wěziza ɖaxó ɖé. Wěziza hɔ́n dó mɛ e ɖo ablu gɔngɔn to mɛ lɛ́ɛ jí.

²Mawu, a nǎ vǐ akɔta ɔ́ bɔ é ji gba, a dǒ xomɛhunhun xomɛhunhun jí nú yě, yě ɖo awǎ jɛ wɛ ɖo nukɔn towe mɛ e ji jɛ ná é ɖɔhun; yě ɖo xwe ɖu wɛ lě e è nɔ yi gba to ɖé, bó nɔ wá ɖo nǔ e è bɛ̌ sín ahwangbénu lɛ́ɛ má wɛ é ɖɔhun.

³A ɖe togun towe sín mɛ kannu, mɛ kannu e yě ɖe bɔ é nyí agban bo ɖo yě kpɛn wɛ ɔ́, a zlɔ̌n yě. A hɛn kpo gaga e ɖo abɔ̌ yětɔn ta é wɛ́n; a hɛn bǎ e ɖo yě xo wɛ é lɔ́, lě e a blǒ gbɔn gbe e gbe a gba Madiáani ví lɛ́ɛ dó é.

⁴Kɛntɔ́ lɛ́ɛ sín ahwanfɔkpa e fúnfún kpé kɔ́ mɛ lɛ́ɛ ɔ́, è dǒ bǐ zo; awu ɖaxó yětɔn e kanjɔ kpé mɛ lɛ́ɛ ɔ́, è dǒ bǐ zo, bǐ wɛ ji bó kɔn afín.

⁵Đó è ji vǐ ɖokpó nú mǐ, è nǎ vǐ ɖokpó mǐ. Mawu ná ɛ acɛ bɔ é ná ɖu axɔ́sú. È nɔ ylɔ́ ɛ ɖɔ Wěɖexámɛtɔ́ kpíkpé, Mawu hlɔ̌nhlɔ́nnɔ, Tɔ́ tɛgbɛ tɔn, Gǎn fífánɔ.

⁶ É ná gbló ada nú acɛkpikpa tɔn, bó ná bló bɔ fífá e má ná vɔ gbeɖé ǎ ɔ́ ná tíin. É ná jínjɔ́n axɔ́súzinkpo Davídi tɔn jí, bó ná kpa acɛ dó axɔ́súɖuto tɔn nu. É ná ɖó nǔ wa ɖó sɛ́nxwi jí ayǐ, bó ɖó hwɛjijɔ ayǐ dó sɔ́ axɔ́súɖuɖu tɔn jínjɔ́n ayǐ ganjí sín din káká sɔ́yi. Nǔ e Mawu Mavɔmavɔ Nǔbǐwúkpétɔ́ ɔ́ ná bló kpó wǎn yíyí tɔn ɖaxó ɔ́ kpó é nɛ́.

⁷Aklúnɔ ɖɔ xó dó Jakɔ́bu ví lɛ́ɛ wú; xó e é ɖɔ ɔ́ jɛ dó axɔ́súɖuto Izlayɛ́li tɔn ɔ́ jí.

⁸Mɛ bǐ wɛ tunwun, mɛ e ɖo Samalíi é kpó toví ɖě lɛ́ɛ bǐ kpó wɛ mɔ do nú xó e Aklúnɔ ɖɔ é; ɖ'ayǐ ɔ́, yě nɔ́ ɖo jǐjéjíjé wɛ bó nɔ́ ɖo go yí wɛ bó nɔ́ ɖɔ:

⁹“Dǒ e è zě blǐki dó mɛ ná é mu; lo ɔ́, mǐdɛɛ lɛ́ɛ ná vɔ́ dǒ ɔ́ mɛ kpó awǐnnya kpikpa kpó. Atín yǎyánɔ e è dǒ bló xɔ ɔ́ ná lɛ́ɛ jɛ ayǐ; lo ɔ́, mǐdɛɛ lɛ́ɛ ná fɔ sɛ́dlutín dó ɖyɔ́ yě ná.”

¹⁰Énɛ́ ɔ́, Mawu Mavɔmavɔ hun ali nú kɛntɔ́ axɔ́sú Hlesini tɔn Asilíinu lɛ́ɛ, bɔ yě ɖu ɖo Izlayɛ́li jí. Mawu Mavɔmavɔ lɛ́ fɔ́n kɛntɔ́ ɖěvo lɛ́ɛ dó yě jí:

¹¹Silíinu lɛ́ɛ gbɔn zǎnzǎnhwe jí, bɔ Filisitɛ́ɛn lɛ́ɛ gbɔn gbadahwe jí, bɔ yě wá tɔ́n ahwan yě. Yě wlɔ́ Izlayɛ́li to ɔ́ ɖu lě e é jló yě gbɔn é. Énɛ́ ka kó fá xomɛ nú Mawu Mavɔmavɔ ǎ; alɔ tɔn kpo ɖo dlɛ̌ndlɛ́n bó ná xo yě.

¹²Mawu Mavɔmavɔ dɔn tó nú togun tɔn Izlayɛ́li ɔ́ mɔ̌ có, Izlayɛ́li lɛ́ kɔ wá gɔ̌n tɔn ǎ; é hɔn wá su Mawu Mavɔmavɔ Nǔbǐwúkpétɔ́ ɔ́ ǎ.

¹³Énɛ́ ɔ́ wú wɛ Mawu Mavɔmavɔ zé kéze ɖokpó ɖó te, bó gbo ta Izlayɛ́li, bó sɛ́n sí tɔn; é sɛ́n děma kpó fántín kpó.

¹⁴É hu azaglɔ́gán lɛ́ɛ kpó tonukún lɛ́ɛ kpó; yědɛɛ lɛ́ɛ wɛ nyí ta to ɔ́ tɔn. É hu gbeyíɖɔnyíjɛtɔ́ lɛ́ɛ; yědɛɛ lɛ́ɛ wɛ nyí sí to ɔ́ tɔn.

¹⁵Togán togun élɔ́ tɔn lɛ́ɛ dɔn togun ɔ́ bú, bɔ mɛ e xlɛ́ ali wɛ yě ɖe lɛ́ɛ wlí ali nyanya ɔ́.

¹⁶Énɛ́ ɔ́ wú wɛ xomɛ ma hun Mawu Mavɔmavɔ dó dɔ̌nkpɛvú lɛ́ɛ wú ǎ; tɔ́cyɔvǐ lɛ́ɛ kpó asúkúsi lɛ́ɛ kpó sín nǔ blá wǔ n'i ǎ, ɖó yě mɛ bǐ wɛ nyí mɛdídá, yě bǐ wɛ nɔ wa nǔ nyanya; xó blíblí wɛ nɔ tɔ́n sín nu yětɔn mɛ. Tó e dɔn nú yě wɛ Mawu Mavɔmavɔ ɖe ɔ́ ká kó fá xomɛ n'i ǎ; alɔ tɔn kpo ɖo dlɛ̌ndlɛ́n bó ná xo togun tɔn.

¹⁷Dǎkaxixo nɔ́ wlí myɔ bó nɔ́ dó nǔ zo, lě e gbě nɔ́ wlí zo bɔ wun kpó kpɔvɛwun kpó nɔ́ fyɔ́ é ɖɔhun. É nɔ́ dó zungodwe e ɖo zungbó ɔ́ mɛ lɛ́ɛ zo, bɔ azɔ nɔ mlí hwǐn ɖidó jǐ.

¹⁸Xomɛsin jí wɛ Mawu Mavɔmavɔ Nǔbǐwúkpétɔ́ ɔ́ ɖe, bɔ to ɔ́ ji zo. È nǎ ɖɔ ɔ́, togun ɔ́ wɛ wlí zo. Mɛ ɖokpó ɖokpó nɔ́ sí te dó nɔzo tɔn jí.

¹⁹È nɔ kán ɖu ɖo aɖisíxwé, xovɛ́ ka nɔ́ kpo ɖo mɛ sin wɛ. È nɔ́ tlɛ́n ɖu ɖo amyɔxwé có è nɔ gɔ́ xo ǎ. Mɛ ɖokpó ɖokpó nɔ tɔ́n ahwan nɔzo tɔn.

²⁰Akɔta Manasée tɔn tɔ́n ahwan akɔta Eflayímu tɔn, bɔ Eflayímu tɔn lɔ tɔ́n ahwan akɔta Manasée tɔn. Yě mɛ we lɛ́ɛ nɔ kpɔ́ bó tɔ́n ahwan Judáa. Tó e dɔn nú yě wɛ Mawu Mavɔmavɔ ɖe ɔ́ ká kó fá xomɛ n'i ǎ, alɔ tɔn kpo ɖo dlɛ̌ndlɛ́n bó ná xo togun tɔn.