Read fon Levíi ví 11 Bible Online

Levíi ví 11 - fon bible

Levíi ví 11

¹Mawu Mavɔmavɔ ɖɔ nú Mɔyízi kpódó Aalɔ́ɔn kpó ɖɔ

²yě ní ɖɔ nú Izlayɛ́li ví lɛ́ɛ ɖɔ: “Đo kanlin lɛ́ɛ bǐ mɛ ɔ́, éé mi ná nɔ́ ɖu lɛ́ɛ ɖíe:

³Mi ná ɖu kanlin e sín afɔkpa zɛ bǐ, bɔ é nɔ́ tún nǔ ɖu lɛ́ɛ.

⁴Amɔ̌, kanlin e nɔ tún nǔ ɖu bɔ afɔkpa tɔn ma zɛ ǎ, abǐ éé afɔkpa tɔn zɛ bɔ é má nɔ́ tún nǔ ɖu ǎ ɔ́, mi ɖó ná ɖu ǎ. Hǔn kanlin élɔ́ lɛ́ɛ ɔ́, mi ɖó ná nɔ́ ɖu ǎ: lǎkúnmí, ɖó éyɛ́ nɔ́ tún nǔ ɖu, afɔkpa tɔn ka zɛ ǎ.

⁵Agidigbǎnwún, ɖó éyɛ́ nɔ́ tún nǔ ɖu, é ká ɖó afɔkpa ǎ; kanlin blíblí nɛ́.

⁶Azwi, ɖó éyɛ́ nɔ́ tún nǔ ɖu, é ká ɖó afɔkpa ǎ; kanlin blíblí nɛ́.

⁷Aglǔza, ɖó afɔkpa tɔn zɛ, é ká nɔ́ tún nǔ ɖu ǎ; kanlin blíblí nɛ́.

⁸Mi ma ɖu kanlin énɛ́ lɛ́ɛ sín lan ó, mi ma ka ɖ'alɔ kúkú yětɔn wú vɔ́vɔ́ ó. Mi mɔ yě dó mɔ kanlin blíblí.

⁹“Đo kanlin e nɔ́ nɔ sin mɛ, gba mɛ, xu mɛ abǐ tɔ mɛ lɛ́ɛ mɛ ɔ́, mi sixú ɖu éé ɖó kɛn kpódó zǎ kpó lɛ́ɛ bǐ.

¹⁰Amɔ̌, mi ma ɖu éé má ɖó kɛn ǎ, bó má ká ɖó zǎ ǎ ɖě ó. É sixú nyí kanlin kpɛví kpɛví e ɖo tɔ mɛ lɛ́ɛ, abǐ tɔ kanlin ɖěvo lɛ́ɛ. Yě vɛ́ mi.

¹¹Mi gbɛ́ wǎn nú yě; mi ma ɖu lan yětɔn ó, mi ma ɖ'alɔ kúkú yětɔn wú vɔ́vɔ́ ó. Yě vɛ́ mi.

¹²Hǔn tɔ kanlin ɖěbǔ e má ɖó kɛn ǎ, bó má ká ɖó zǎ ǎ lɛ́ɛ ɔ́, mi ma ɖu lan yětɔn ó. Yě vɛ́ mi.

¹³“Đo xɛ lɛ́ɛ mɛ ɔ́, éé vɛ́ mi bɔ mi ná gbɛ́ wǎn ná, bó má ná ɖu ǎ lɛ́ɛ ɖíe: gangan, hɔ̌n, gangan xu mɛ tɔn,

¹⁴gɛ̌nkpákpɛ, aklasú alɔkpa alɔkpa,

¹⁵avǔnsákɔwó,

¹⁶gowungo, klolwe, aɖɔwé xu mɛ tɔn, gɛ̌n alɔkpa alɔkpa,

¹⁷klolwe, avǔnsákɔwó xu mɛ tɔn, sɔ́wáyi,

¹⁸klolwe zonɔ, avǔnsákɔwó kpɛví kpɛví, lanɖuxɛ,

¹⁹tɔxɛ, aɖɔwé alɔkpa alɔkpa lɛ́ɛ, ahlǐnhǎn, afluiflui.

²⁰“Xɛ énɛ́ lɛ́ɛ bǐ vɛ́ mi; nǔvínúví e ɖó awa bó ɖó afɔ lɛ́ɛ vɛ́ mi.

²¹Amɔ̌, mi ná ɖu éé ɖó afɔ bó nɔ lɔ́n lɛ́ɛ;

²²yě wɛ nyí: wɛn alɔkpa alɔkpa lɛ́ɛ kpódó bɔ alɔkpa alɔkpa lɛ́ɛ kpó.

²³Amɔ̌, nǔvínúví ɖě lɛ́ɛ éé ɖó awa, bó ɖó afɔ lɛ́ɛ vɛ́ mi.”

²⁴“Kanlin ɖé lɛ́ɛ tíin, bɔ mɛɖé ɖó alɔ kúkú yětɔn wú ɔ́, mɛ ɔ́ ná húzú mɛ blíblí káká jɛ gbadanu.

²⁵Mɛ ɖěbǔ zé kúkú yětɔn ɔ́, mɛ ɔ́ ɖó ná nya avɔ tɔn lɛ́ɛ; é lɔmɔ̌ ká ná húzú mɛ blíblí káká jɛ gbadanu.

²⁶Kanlin e sín afɔkpa ma zɛ ǎ, kpó éé má nɔ́ tún nǔ ɖu ǎ lɛ́ɛ kpó ɔ́, mi ná mɔ yě dó mɔ kanlin blíblí. Mɛ ɖěbǔ ɖ'alɔ yě wú ɔ́, mɛ ɔ́ ná nyí mɛ blíblí.

²⁷Mɔ̌ ɖokpó ɔ́, kanlin e ɖó afɔ ɛnɛ, bó nɔ́ tɛ afɔxomɛ ayǐ dó ɖi zɔnlin ná lɛ́ɛ bǐ ɔ́, mi ná mɔ yě dó mɔ kanlin blíblí. Mɛ ɖěbǔ ɖ'alɔ kúkú yětɔn wú ɔ́, mɛ ɔ́ ná húzú mɛ blíblí káká jɛ gbadanu.

²⁸Mɛ ɖěbǔ zé kúkú yětɔn ɔ́, mɛ ɔ́ ɖó ná nya avɔ tɔn lɛ́ɛ, bó ká ná nyí mɛ blíblí káká jɛ gbadanu. Mi ná mɔ kanlin énɛ́ lɛ́ɛ dó mɔ kanlin blíblí.

²⁹Kanlin kpɛví kpɛví e mi ná mɔ dó mɔ kanlin blíblí ɖo kanlin e gba kpé ayǐkúngban ɔ́ jí lɛ́ɛ mɛ lɛ́ɛ ɖíe: wɔ, ajaka, alɔ̌tlɔ tɛnmɛ tɛnmɛ lɛ́ɛ bǐ,

³⁰nyɔxwenyɔxwe, dǔdúbeɖe, danlyɛ́nlyɛn, vɛ̌, aganma.

³¹Mi ná mɔ yě dó mɔ kanlin blíblí. Mɛ ɖěbǔ ɖ'alɔ kúkú yětɔn wú ɔ́, mɛ ɔ́ ná nyí mɛ blíblí káká jɛ gbadanu.

³²Nú kúkú yětɔn jɛ nǔ ɖěbǔ jí ɔ́, nǔ ɔ́ ná nyí nǔblíblí; é sixú nyí atínká, é sixú nyí avɔ, é sixú nyí anyǔ, é sixú nyí glo, é sixú nyí nǔ ɖěbǔ. È nǎ sɔ́ dó sin mɛ, bɔ é ná húzú nǔblíblí káká jɛ gbadanu; énɛ́ ɔ́ gúdo ɔ́, é ná lɛ́ húzú nǔ mímɛ́.

³³Ényí nǔɖé ɖo kogbán ɖé mɛ, bɔ kanlin énɛ́ lɛ́ɛ ɖě jɛ mɛ ɔ́, nǔ e ɖo kogbán ɔ́ mɛ ɔ́ húzú nǔblíblí; è ɖǒ ná hɛn kogbán ɔ́ gba.

³⁴Nú sin ɔ́ jɛ nǔɖuɖu ɖěbǔ jí ɔ́, nǔɖuɖu énɛ́ ɔ́ húzú nǔɖuɖu blíblí. Ényí nǔ e è hɛn ɔ́ è nǎ nu ɔ́ ɖo nǔ ɖěbǔ mɛ, bɔ sin ɔ́ jɛ jí ɔ́, nǔ nunu énɛ́ ɔ́ ná bó ɖo gannú ɖěbǔ mɛ ɔ́, é húzú nǔblíblí.

³⁵Nú kanlin énɛ́ lɛ́ɛ kú, bó jɛ nǔ ɖěbǔ jí ɔ́, nǔ énɛ́ ɔ́ húzú nǔblíblí. Nú adogwle abǐ kpó wɛ ɔ́, mi ní hɛn gba hánnyá, ɖó mi ɖó ná mɔ dó mɔ nǔblíblí.

³⁶Amɔ̌, nú kúkú yětɔn jɛ tɔjɔtɛn ɖé abǐ dotɔ ɖé mɛ ɔ́, nǔ mímɛ́ jɛ́n sin ɔ́ nyí; lo ɔ́, mɛ e ná ɖe kanlin kúkú ɔ́ sín sin ɔ́ mɛ ɔ́, mɛ ɔ́ ná húzú mɛ blíblí.

³⁷Nú kúkú yětɔn jɛ nǔkún e è sɔ́ ɖ'ayǐ, bó ná wá dó ɔ́ jí ɔ́, nǔ mímɛ́ jɛ́n nǔkún ɔ́ nyí.

³⁸Amɔ̌, nú è nylɔ̌ nǔkún, bɔ kúkú yětɔn jɛ mɛ ɔ́, hǔn mi ná mɔ nǔkún énɛ́ lɛ́ɛ dó mɔ nǔblíblí.

³⁹“Nú kanlin e mi hɛn ɔ́, mi ná ɖu lɛ́ɛ ɖě kú ɔ́, mɛ e ná ɖ'alɔ kúkú tɔn wú ɔ́, ná nyí mɛ blíblí káká jɛ gbadanu.

⁴⁰Mɛ e ná ɖu kúkú tɔn sín lan ɔ́ ná nya avɔ tɔn lɛ́ɛ, bó ká ná nyí mɛ blíblí káká jɛ gbadanu. Mɛ e ná zé kúkú tɔn ɔ́ ná nya avɔ tɔn lɛ́ɛ; é lɔmɔ̌ ká ná nyí mɛ blíblí káká jɛ gbadanu.

⁴¹“Kanlin kpɛví kpɛví e nɔ́ sá gbɔn kɔ́ mɛ lɛ́ɛ bǐ vɛ́ mi; mi ná ɖu ɖě ǎ.

⁴²Hǔn mi ná ɖu kanlin kpɛví kpɛví e nɔ́ sá gbɔn kɔ́ mɛ lɛ́ɛ ɖě ǎ; mi ka ná ɖu éé nɔ́ gbɔn adɔgo jí lɛ́ɛ ɖě ǎ; mi ka ná ɖu éé nɔ́ zɔn afɔ ɛnɛ jí abǐ afɔ gěgé jí lɛ́ɛ ɖě ǎ; kanlin kpɛví kpɛví énɛ́ lɛ́ɛ bǐ vɛ́ mi.

⁴³Mi ma ɖ'alɔ kanlin énɛ́ lɛ́ɛ wú, bó dó hɛn miɖée blí ó. Mi ma jó miɖée dó, bónú yě ní hɛn mi blí ó; yě táá zɔ́n bɔ mi ná nyí mɛ blíblí.

⁴⁴Đó nyɛ wɛ nyí Mawu Mavɔmavɔ, Mawu mitɔn; mi ní nɔ́ zán walɔ mímɛ́, ɖó nyɛ ɔ́, mǐmɛ́ wɛ un nyí, mi bó ma ɖ'alɔ kanlin kpɛví kpɛví énɛ́ lɛ́ɛ e nɔ sá gbɔn kɔ́ mɛ lɛ́ɛ wú, bó dó hɛn miɖée blí ó.

⁴⁵Đó nyɛ wɛ nyí Mawu Mavɔmavɔ, nyɛ wɛ ɖe mi tɔ́n sín Ejípu. Un ɖe mi tɔ́n, bó ná nyí Mawu mitɔn, mi ná nyí mɛ mímɛ́, ɖó mǐmɛ́ wɛ un nyí.”

⁴⁶Kanlin lɛ́ɛ, xɛ lɛ́ɛ, kanlin e nɔ nɔ tɔ mɛ lɛ́ɛ, kpódó éé nɔ́ sá gbɔn kɔ́ mɛ lɛ́ɛ bǐ kpó ɔ́, sɛ́n e ɖɔ xó dó yě wú lɛ́ɛ nɛ́.

⁴⁷Sɛ́n énɛ́ lɛ́ɛ ná zɔ́n bɔ è nǎ tunwun kanlin e è hɛn ɔ́, è nǎ ɖu lɛ́ɛ kpódó éé è ma sixú ɖu ǎ lɛ́ɛ kpó.