Read fon Levíi ví 12 Bible Online

Levíi ví 12 - fon bible

Levíi ví 12

¹Mawu Mavɔmavɔ ɖɔ nú Mɔyízi ɖɔ

²é ní ɖɔ nú Izlayɛ́li ví lɛ́ɛ ɖɔ: “Nú nyɔ̌nu ɖé ji vǐ súnnu ɔ́, é ná nyí mɛ blíblí xɔ aklúnɔzángbla ɖokpó, hwenu e é jɛ glegbe ɔ́ ɖɔhun.

³ Azǎn tántɔngɔ́ ɔ́ gbe ɔ́, è nǎ gbo ada nú vǐ ɔ́.

⁴È gbo ada nú vǐ nú é bló azǎn gban-nukún-atɔn (33) ɔ́, è nǎ slá wǔ nú vǐnɔ ɔ́, ɖó hun e wá yi sín wǔ tɔn hwenu e é ji vǐ ɔ́ wú. É ná ɖ'alɔ nǔ e è sɔ́ ɖó vo nú Mawu lɛ́ɛ ɖěbǔ wú ǎ; é ká ná yi Mawu xwé gbe káká cóbɔ azǎn nabí e é ɖó ná nɔ te xɔ, bó ná nyí mɛ mímɛ́ ɔ́ ná wá ǎ.

⁵“Nú é ká nyí ɖɔ nyɔ̌nu wɛ é ji ɔ́, é ná nyí mɛ blíblí xɔ aklúnɔzángbla we, hwenu e é jɛ glegbe ɔ́ ɖɔhun. Énɛ́ ɔ́ gúdo ɔ́, é ná bló azǎn kanɖé koatɔ́n-nukún-ɖokpó (66), bɔ è nǎ slá wǔ n'i, ɖó hun e wá yi sín wǔ tɔn hwenu e é ji vǐ ɔ́ wú.

⁶“Nyɔ̌nu e ji vǐ súnnu abǐ vǐ nyɔ̌nu ɔ́ ná nɔ te xɔ azǎn nabí e é ɖó ná bló, bó ná húzú mɛ mímɛ́ é; énɛ́ gúdo ɔ́, é ná yi vɔ̌sánú-xwlémawutɔ́ ɔ́ gɔ́n, ɖo goxɔ ɔ́ nukɔn. É ná hɛn lɛ̌ngbɔ́ví e ɖó xwe ɖokpó ɔ́ yi n'i, bɔ é ná dó sá vɔ̌ e è nɔ dó zo ɔ́ ná. É ná lɛ́ hɛn ahwannɛ́ ɖokpó abǐ xwelé ɖokpó yi n'i, bɔ é nǎ dó sá hwɛsɔ́kɛmɛvɔ́ ɔ́ ná.

⁷Vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, bó ná xwlé vɔ̌sánú lɛ́ɛ Mawu Mavɔmavɔ, dó súnsún hwɛ sín kɔ nú vǐnɔ ɔ́. Bɛ́ sín hwenɛ́nu ɔ́, è slá wǔ n'i ɖó hun e wá yi sín wǔ tɔn hwenu e é ji vǐ ɔ́ wú.” Sɛ́n e ɖɔ xó dó nyɔ̌nu e ji vǐ súnnu abǐ vǐ nyɔ̌nu ɔ́ wú ɔ́ nɛ́.

⁸ Nú vǐnɔ ɔ́ má ɖó nǔɖé bó ná dó xɔ lɛ̌ngbɔ́ví ɔ́ ná ǎ ɔ́, é sixú hɛn xwelé we abǐ ahwannɛ́ we wá. É ná zé ɖokpó dó sá vɔ̌ e è nɔ dó zo ɔ́ ná, bó ná sɔ́ ɖokpó dó sá hwɛsɔ́kɛmɛvɔ́ ɔ́ ná. Vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ sín kɔ n'i, bɔ é ná húzú mɛ mímɛ́.