Read fon Levíi ví 14 Bible Online

Levíi ví 14 - fon bible

Levíi ví 14

² “Gbe e gbe è nǎ slá wǔ nú gudunɔ ɔ́, sɛ́n e ɖɔ xó d'é wú ɔ́ ɖíe. Gbe e gbe è nǎ slá wǔ n'i ɔ́, è nǎ yi ɖɔ xó tɔn nú vɔ̌sánú-xwlémawutɔ́ ɔ́.

³Bɔ vɔ̌sánú-xwlémawutɔ́ ɔ́ ná tɔ́n sín fí e yě ɖó gɔnu ɖó ɔ́, bó ná kpɔ́n ɛ. Nú é mɔ ɖɔ gudu ɔ́ kó gbɔ n'i ɔ́,

⁴é ná ná gbe ɖɔ è nǐ zé xɛ e ma vɛ́ mɛ ǎ ɔ́ gbɛɖe we ɖó mɛ e slá wǔ ná gbé è ja ɔ́ tamɛ, bó ná zé sɛ́dlukpo, bó ná zé kan vɔvɔ cɛ́cɛ́, bó ná zé izɔ́puma sín ala gɔ́ ná.

⁵Vɔ̌sánú-xwlémawutɔ́ ɔ́ ná ná gbe bɔ è nǎ gbo gbe xɛ lɛ́ɛ ɖokpó, bɔ sin ná ɖo kogbán ɖé mɛ, bɔ è nǎ kun hun tɔn kɔn dó sin ɔ́ mɛ.

⁶É ná zé xɛ wegɔ́ e ɖo gbɛ ɔ́, kpó sɛ́dlukpo ɔ́ kpó, kpódó avɔxwɛ vɔvɔ cɛ́cɛ́ ɔ́ kpó, kpódó izɔ́puma ɔ́ kpó, bó ná nylɔ́ dó xɛ nukɔntɔn e è gbo gbe bɔ hun tɔn kɔn dó sin mɛ, ɖo kogbán mɛ ɔ́ mɛ,

⁷bó ná mi dó mɛ e slá wǔ ná gbé è ja ɔ́ wú azɔn tɛ́nwe, bó ná ɖɔ ɖɔ mɛ ɔ́ nyí mɛ mímɛ́, lobo ná yi gběhan mɛ, bó ná jó xɛ gbɛɖe ɔ́ dó, bɔ é ná zɔn yi.

⁸Mɛ e slá wǔ ná wɛ è ɖe ɔ́ ná nya avɔ tɔn lɛ́ɛ, bó ná xwlɛ́ fún e ɖo wǔtu tɔn ɔ́ bǐ, bó ná lɛ wǔ, bó húzú mɛ mímɛ́. Énɛ́ ɔ́ gúdo ɔ́, é sixú byɔ́ fí e yě ɖǒ gɔnu ɖó ɔ́. É ká ná byɔ́ goxɔ tɔn mɛ ǎ nú azǎn tɛ́nwe.

⁹Azǎn tɔn tɛ́nwegɔ́ ɔ́ gbe ɔ́, é ná lɛ́ xwlɛ́ fún e ɖo wǔtu tɔn lɛ́ɛ bǐ; é ná lɛ́ xwlɛ́ ta, bó ná lɛ́ xwlɛ́ atán, bó ná lɛ́ xwlɛ́ wunda tɔn lɛ́ɛ. É ná xwlɛ́ nǔ e kó sixú nyí fún ɖo wǔ tɔn ɔ́ bǐ. É ná nya avɔ tɔn lɛ́ɛ, bó ná lɛ wǔ, bó ná húzú mɛ mímɛ́.

¹⁰“Azǎn tántɔngɔ́ ɔ́ gbe ɔ́, é ná ná lɛ̌ngbɔ́ví asú e má ɖó blɔ̌ ɖěbǔ ǎ é we, bó ná ná lɛ̌ngbɔ́ asi e kó ɖó xwe ɖokpó, bɔ blɔ̌ ɖěbǔ má ɖo wǔ tɔn ǎ é ɖokpó, bó ná ná linfín kilóo tɛ́nnɛ, bɔ è nǎ zé ami dó nya, bó ná lɛ́ ná ami lǐtli vlɔ̌.

¹¹Vɔ̌sánú-xwlémawutɔ́ e ɖo nǔwiwa lɛ́ɛ nu ɔ́ ná kplá mɛ e slá wǔ ná wɛ è ɖe ɔ́ kpó nǔ e é ná lɛ́ɛ kpó wá Mawu Mavɔmavɔ nukɔn, ɖo goxɔ e mɛ Mawu Mavɔmavɔ nɔ kpé togun tɔn ɖe ɔ́ nukɔn.

¹²Vɔ̌sánú-xwlémawutɔ́ ɔ́ ná zé lɛ̌ngbɔ́ví asú we lɛ́ɛ ɖokpó, bó ná dó sá hwɛxɔ́súsú vɔ́ ná, bó ná zé ami lǐtli vlɔ́ ɔ́, bó ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, bó xwlé Mawu Mavɔmavɔ.

¹³É ná gbo gbe lɛ̌ngbɔ́ví ɔ́ ɖo fí e è nɔ gbo gbe kanlin e è nɔ dó sá hwɛsɔ́kɛmɛvɔ́ ɔ́, kpódó ée è nɔ dó zo ɔ́ kpó ɖe ɔ́ ɖo tɛn mímɛ́ ɖé mɛ. Đó hwɛxɔ́súsú vɔ́ ɔ́ kpódó hwɛsɔ́kɛmɛvɔ́ ɔ́ kpó ɔ́, vɔ̌sánú-xwlémawutɔ́ ɔ́ tɔn wɛ, bó nyí nǔ mímɛ́ ɖaxó ɖé.

¹⁴Vɔ̌sánú-xwlémawutɔ́ ɔ́ ná wún kanlin ɔ́ sín hun, bó ná ɖá dó mɛ ɔ́ sín tó ɖisíxwé tɔn ɔ́ sín nuvínu wú, bó ná ɖá dó alɔsú tɔn ɖisíxwé tɔn ɔ́ wú, kpódó afɔsú tɔn ɖisíxwé tɔn ɔ́ kpó wú.

¹⁵Énɛ́ ɔ́ gúdo ɔ́, é ná zé ami ɔ́, bó wún dó amyɔlɔ mɛ,

¹⁶bó ná zé nǔxlɛ́mɛlɔví ɖisíxwé tɔn ɔ́ d'é mɛ, bó mi azɔn tɛ́nwe ɖo Mawu Mavɔmavɔ nukɔn.

¹⁷Énɛ́ ɔ́ gúdo ɔ́, é ná ɖá kpɛɖé dó mɛ ɔ́ sín tó ɖisíxwé tɔn ɔ́ sín nuvínu wú, bó ná ɖá dó alɔsú ɖisíxwé tɔn ɔ́ wú, kpódó afɔsú ɖisíxwé tɔn ɔ́ kpó wú, dó fí e é kó ɖá hun ɖó ɖ'ayǐ é.

¹⁸É ná húzú ami e kpo ɖo alɔ tɔn mɛ ɔ́ dó ta nú mɛ ɔ́; énɛ́ ɔ́, é ná súnsún hwɛ tɔn ɖo Mawu Mavɔmavɔ nukɔn.

¹⁹Vɔ̌sánú-xwlémawutɔ́ ɔ́ ná sá hwɛsɔ́kɛmɛvɔ́ ɔ́, bó ná súnsún mɛ e slá wǔ nǎ wɛ è ɖe ɔ́ sín hwɛ; énɛ́ gúdo ɔ́, é ná gbo gbe kanlin e è nǎ dó sá vɔ̌ e è nɔ dó zo é,

²⁰bó ná dó kanlin ɔ́ blěbǔ tɔn zo ɖo vɔ̌sákpe jí, kpódó linfín e é ná ɔ́ kpó. Énɛ́ ɔ́, é ná súnsún mɛ e slá wǔ ná wɛ è ɖe ɔ́ sín hwɛ bɔ é ná húzú mɛ mímɛ́.”

²¹Mawu Mavɔmavɔ ɖɔ: “Nú gudunɔ ɖé nyí wamamɔnɔ, bó má mɔ nǔ e é ɖó ná ná lɛ́ɛ bǐ ǎ ɔ́, é ná ná lɛ̌ngbɔ́ví asú ɖokpó géé, bɔ è nǎ zé ɖó te nú hwɛxɔ́súsú vɔ́ ɔ́. È ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ tɔn lɛ́ɛ; é ná ná linfín kilóo atɔn, bɔ è nǎ zé ami dó nya; é ná lɛ́ ná ami lǐtli vlɔ́.

²²É ná lɛ́ ná xwelé we, abǐ ahwannɛ́ví we, lě e é kpé wú gbɔn é. É ná zé ɖokpó ɖó te nú hwɛsɔ́kɛmɛvɔ́ ɔ́, bó ná zé wegɔ́ ɔ́ ɖó te nú vɔ̌ e è nɔ dó zo é.

²³Azǎn tántɔngɔ́ ɔ́ gbe ɔ́, é ná bɛ́ nǔníná énɛ́ lɛ́ɛ bǐ wá nú vɔ̌sánú-xwlémawutɔ́ ɔ́ ɖo goxɔ ɔ́ nukɔn, ɖo Mawu Mavɔmavɔ nukɔn, bɔ è nǎ slá wǔ n'i.

²⁴Vɔ̌sánú-xwlémawutɔ́ ɔ́ ná zé lɛ̌ngbɔ́ví asú ɔ́ kpódó ami ɔ́ kpó, bó ná bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́, lobo xwlé Mawu Mavɔmavɔ.

²⁵É ná gbo gbe lɛ̌ngbɔ́ví ɔ́, bó ná ɖá hun tɔn dó mɛ ɔ́ sín tó ɖisíxwé tɔn ɔ́ sín nuvínu, bó ná lɛ́ ɖá dó alɔsú tɔn ɖisíxwé tɔn ɔ́ wú, bó ná lɛ́ ɖá dó afɔsú tɔn ɖisíxwé tɔn ɔ́ wú.

²⁶É ná wún ami ɔ́ dó alɔgogo tɔn amyɔ ɔ́ mɛ,

²⁷bó ná sɔ́ nǔxlɛ́mɛlɔví tɔn ɖisíxwé tɔn d'é mɛ, bó mi azɔn tɛ́nwe ɖo Mawu Mavɔmavɔ nukɔn.

²⁸Énɛ́ ɔ́ gúdo ɔ́, é ná ɖá kpɛɖé dó mɛ ɔ́ sín tó ɖisíxwé tɔn ɔ́ sín nuvínu, bó ná ɖá kpɛɖé dó alɔsú tɔn ɖisíxwé tɔn ɔ́ wú, bó ná ɖá dó afɔsú tɔn ɖisíxwé tɔn ɔ́ wú, dó fí e é kó ɖá hun ɖó ɖ'ayǐ é.

²⁹É ná húzú ami e kpo ɖo alɔgogo tɔn mɛ ɔ́ dó ta nú mɛ ɔ́, bó ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ sín kɔ n'i, ɖo Mawu Mavɔmavɔ nukɔn.

³⁰Vɔ̌sánú-xwlémawutɔ́ ɔ́ ná zé xwelé we abǐ ahwannɛ́ we e mɛ ɔ́ ná lɛ́ɛ ɖokpó,

³¹bó dó sá hwɛsɔ́kɛmɛvɔ́ ná, bó ná sɔ́ wegɔ́ ɔ́ kpó linfín e mɛ ɔ́ ná ɔ́ kpó dó sá vɔ̌ e è nɔ dó zo ɔ́ ná, bó ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ sín kɔ n'i ɖo Mawu Mavɔmavɔ nukɔn.”

³²Sɛ́n e ɖɔ xó dó gudunɔ wamamɔnɔ e azɔn gbɔ ná ɔ́ wú ɔ́ nɛ́.

³³Mawu Mavɔmavɔ ɖɔ nú Mɔyízi kpódó Aalɔ́ɔn kpó ɖɔ:

³⁴“Nú mi byɔ́ Kanáa to e un ná ná mi, bɔ é ná nyí mitɔn ɔ́ mɛ ɔ́, nú un bló bónú xɔ ɖé sín dǒ fun hwa ɖo to e ná nyí mitɔn ɔ́ mɛ ɔ́,

³⁵xwétɔ́ ɔ́ ná yi mɔ vɔ̌sánú-xwlémawutɔ́ ɔ́, bó ná ɖɔ n'i ɖɔ: ‘Un mɔ nǔɖé tɔ́n ɖo xɔ ce sín dǒ wú!’

³⁶Cóbónú vɔ̌sánú-xwlémawutɔ́ ɔ́ ná yi kpɔ́n nǔ e tɔ́n ɖo xɔ ɔ́ sín dǒ wú ɔ́, é ná ná gbe ɖɔ é ní bɛ́ nǔ e ɖo xɔ ɔ́ mɛ lɛ́ɛ bǐ tɔ́n, bónú nǔ lɛ́ɛ ɖěbǔ ní má wá húzú nǔblíblí ó. Nú é bɛ́ nǔ lɛ́ɛ tɔ́n gúdo ɔ́, vɔ̌sánú-xwlémawutɔ́ ɔ́ ná byɔ́ xɔ ɔ́ mɛ, bó ná kpɔ́n xɔ ɔ́.

³⁷É ná kpɔ́n nǔ e tɔ́n ɖo dǒ ɔ́ wú é. Nú é cí ɖɔ nǔ e tɔ́n ɖo dǒ ɔ́ wú ɔ́ kun so dó dǒ ɔ́ mɛ, bó vlɛ́ amamú abǐ vɔvɔ ɔ́,

³⁸vɔ̌sánú-xwlémawutɔ́ ɔ́ ná tɔ́n sín xɔ ɔ́ mɛ, bó ná sú xɔ ɔ́ sín hɔn nú azǎn tɛ́nwe.

³⁹Azǎn tɛ́nwegɔ́ ɔ́ gbe ɔ́, vɔ̌sánú-xwlémawutɔ́ ɔ́ ná lɛ́ kɔ yi xɔ ɔ́ mɛ, bó ná vɔ́ nǔ ɔ́ kpɔ́n. Nú nǔ e tɔ́n ɖo dǒ ɔ́ wú ɔ́ gbló d'é jí ɔ́,

⁴⁰vɔ̌sánú-xwlémawutɔ́ ɔ́ ná ná gbe ɖɔ è nǐ ɖe awǐnnya e wú nǔ tɔ́n ɖe lɛ́ɛ síin, bó bɛ́ sín toxo ɔ́ mɛ, bó bɛ́ kɔn nyi tɛn e ma nyí tɛn mímɛ́ ǎ é mɛ.

⁴¹É ná ɖɔ bɔ è nǎ xwlɛ́ dǒ ɔ́ wú gbɔn xɔ ɔ́ bǐ mɛ, bó ná bɛ́ sín toxo ɔ́ mɛ, bó bɛ́ kɔn nyi tɛn e ma nyí tɛn mímɛ́ ǎ é mɛ.

⁴²Énɛ́ ɔ́ gúdo ɔ́, è nǎ zé awǐnnya ɖěvo lɛ́ɛ dó ɖyɔ́ éé è ɖe síin lɛ́ɛ, bó ná vɔ́ xɔ ɔ́ sín dǒ lɛ́ɛ tlɛ́ gbɔn xɔ ɔ́ mɛ.

⁴³“Ényí è ko ɖe awǐnnya e wú nǔ tɔ́n ɖe lɛ́ɛ síin, bó ká xwlɛ́ dǒ ɔ́ bó vɔ́ tlɛ́, bɔ nǔ ɔ́ lɛ́ wá tɔ́n ɔ́,

⁴⁴vɔ̌sánú-xwlémawutɔ́ ɔ́ ná lɛ́ yi kpɔ́n dǒ ɔ́. Nú é mɔ ɖɔ nǔ ɔ́ lɛ́ tɔ́n gbɔn xɔ ɔ́ mɛ bǐ ɔ́, hǔn, hwafunfun baɖabaɖa ɖé wɛ, bɔ è nɔ sixú ɖe síin ǎ. Xɔ ɔ́ ná húzú nǔblíblí.

⁴⁵È nǎ gba xɔ ɔ́ bó ná bɛ́ awǐnnya lɛ́ɛ, atín lɛ́ɛ, kpódó nǔ e è dǒ tlɛ́ dǒ ɔ́ ná ɔ́ kpó sín toxo ɔ́ mɛ, bó bɛ́ kɔn nyi fí e nyí fí blíblí é.

⁴⁶“Hwenu e hɔn ɔ́ ná ɖo súsú ɔ́, mɛ e ná byɔ́ xɔ ɔ́ mɛ ɔ́ ná nyí mɛ blíblí káká jɛ gbadanu.

⁴⁷Mɛ e ná mlɔ́ xɔ mɔ̌hunkɔtɔn mɛ, abǐ é ná ɖu nǔ ɖ'é mɛ ɔ́, mɛ ɔ́ ɖó ná nya avɔ tɔn lɛ́ɛ.

⁴⁸“Ée é vɔ́ dǒ ɔ́ tlɛ́ ɔ́, nú vɔ̌sánú-xwlémawutɔ́ ɔ́ lɛ́ kɔ yi xɔ ɔ́ mɛ, bó mɔ ɖɔ nǔ ɔ́ ɖě kún sɔ́ tɔ́n ɖo dǒ ɔ́ wú ó ɔ́, é ná ɖɔ xɔ ɔ́ nyí nǔ mímɛ́, ɖó è sú nǔ e tɔ́n ɖo dǒ ɔ́ wú ɔ́ sín kún dó.

⁴⁹“Bónú è nǎ dó slá wǔ nú xɔ ɔ́, vɔ̌sánú-xwlémawutɔ́ ɔ́ ná yí xɛ we, bó ná yí sɛ́dlukpo, bó ná yí avɔxwɛ vɔvɔ cɛ́cɛ́, kpódó izɔ́puma kpó.

⁵⁰É ná gbo gbe xɛ lɛ́ɛ ɖokpó, bɔ sin ná ɖo kogbán ɖé mɛ, bɔ è nǎ kun hun tɔn kɔn dó sin ɔ́ mɛ.

⁵¹É ná zé sɛ́dlukpo ɔ́, izɔ́puma ɔ́, avɔxwɛ vɔvɔ cɛ́cɛ́ ɔ́, kpódó xɛ e ɖo gbɛ ɔ́ kpó, bó ná nylɔ́ dó xɛ nukɔntɔn e è hu dó sin mɛ, ɖo kogbán mɛ ɔ́ sín hun mɛ, bó ná mi azɔn tɛ́nwe dó xɔ ɔ́ wú.

⁵²Énɛ́ ɔ́, é ná zé xɛ sín hun ɔ́, sin ɖiɖi ɔ́, xɛ gbɛɖe ɔ́, sɛ́dlukpo ɔ́, kpódó avɔxwɛ vɔvɔ cɛ́cɛ́ ɔ́ kpó dó slá wǔ nú xɔ ɔ́.

⁵³É ná tɔ́n sín toxo ɔ́ mɛ, bó ná yi gběhan mɛ, bó ná jó xɛ gbɛɖe ɔ́ dó, bɔ é ná zɔn yi. Lě e é ná bló gbɔn bó ná slá wǔ nú xɔ ɔ́, bɔ é ná húzú nǔ mímɛ́ ɔ́ nɛ́.”

⁵⁴Sɛ́n e ɖɔ xó dó gudu tɛnmɛ tɛnmɛ lɛ́ɛ, lakpálakpá lɛ́ɛ,

⁵⁵nǔ tɛnmɛ tɛnmɛ e nɔ tɔ́n ɖo avɔ mɛ, éé nɔ́ tɔ́n ɖo dǒ wú,

⁵⁶nǔtitɛ, gun kpódó nǔ tɔ́n ɖo wǔ kpó lɛ́ɛ wú ɔ́ nɛ́.

⁵⁷Sɛ́n énɛ́ ná zɔ́n bɔ è nǎ tunwun hwenu e mɛɖé abǐ nǔɖé ná nyí nǔblíblí abǐ nǔ mímɛ́ dó é. Sɛ́n e ɖɔ xó dó gudu wú ɔ́ nɛ́.