Read fon Levíi ví 15 Bible Online

Levíi ví 15 - fon bible

Levíi ví 15

¹Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ

²yě ní ɖɔ nú Izlayɛ́li ví lɛ́ɛ ɖɔ: “Nú súnnu ɖé bɛ́ azɔn dó súnnuxwé tɔn, bɔ sin nɔ wá yi ɔ́, sin ɔ́ nyí nǔblíblí.

³Azɔn énɛ́ ɔ́ wɛ zɔ́n bɔ é húzú mɛ blíblí. Sin ɖo súnnuxwé tɔn gosín wɛ kpó é glɔ́n cí mɛ kpó ɔ́, mɛ blíblí wɛ é nyí.

⁴Mɛ e sín súnnuxwé gosín wɛ sin ɖe ɔ́, é mlɔ́ zan ɖěbǔ jí ɔ́, zan ɔ́ ná húzú nǔblíblí. É jínjɔ́n nǔ ɖěbǔ jí ɔ́, nǔ ɔ́ ná húzú nǔblíblí.

⁵Mɛ e ná ɖ'alɔ zan ɔ́ wú ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu.

⁶Mɛ e ná jínjɔ́n nǔ e jí é jínjɔ́n ɔ́ jí ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu.

⁷Mɛ e ná ɖ'alɔ wǔ tɔn ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu.

⁸Nú é tún atán dó mɛɖé wú, bɔ mɛ ɔ́ nyí mɛ mímɛ́ ɔ́, mɛ ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu.

⁹Nǔ e jí é ná jínjɔ́n yi tomɛ ɔ́ bǐ ná húzú nǔblíblí.

¹⁰Mɛ e ná ɖ'alɔ nǔ e jí é jínjɔ́n ɔ́ wú ɔ́ ná húzú mɛ blíblí káká jɛ gbadanu. Mɛ e ka ná sɔ́ nǔ e jí é jínjɔ́n ɔ́, ná nya avɔ tɔn lɛ́ɛ, bó ná lɛ wǔ, bó ká ná nyí mɛ blíblí káká jɛ gbadanu.

¹¹Nú azinzɔnnɔ ɔ́ má klɔ́ alɔ có bó ɖ'alɔ mɛ ɖé wú ǎ ɔ́, mɛ e wú é ɖ'alɔ ɔ́ ná nya avɔ tɔn lɛ́ɛ, bó ná lɛ wǔ, bó ká ná nyí mɛ blíblí káká jɛ gbadanu.

¹²Nú é ɖ'alɔ kogbán ɖěbǔ wú ɔ́, è nǎ hɛn kogbán ɔ́ gba. Nú é ɖ'alɔ nǔ e è zě atín dó bló ná ɔ́ ɖěbǔ wú ɔ́, è nǎ klɔ́ nǔ ɔ́ ganjí.

¹³“Nú azɔn gbɔ nú mɛ e ɖo azɔn ɔ́ jɛ wɛ ɔ́, é ná nɔ te nú azǎn tɛ́nwe cóbó ná slá wǔ. É ná nya avɔ tɔn lɛ́ɛ, bó ná zé sin dó lɛ wǔ. Énɛ́ ɔ́ gúdo ɔ́, é ná nyí mɛ mímɛ́.

¹⁴Azǎn tántɔngɔ́ ɔ́ gbe ɔ́, é ná zé xwelé we, abǐ ahwannɛ́ví we, bó ná yi Mawu Mavɔmavɔ nukɔn, ɖo goxɔ ɔ́ sín alihɛ́nnu, bó ná bɛ́ jó nú vɔ̌sánú-xwlémawutɔ́ ɔ́,

¹⁵bɔ vɔ̌sánú-xwlémawutɔ́ ɔ́ ná zé ɖokpó dó sá hwɛsɔ́kɛmɛvɔ́ ná, bó ná zé ɖokpó dó sá vɔ̌ e è nɔ dó zo ɔ́ ná; énɛ́ ɔ́, é ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́, lobo ná súnsún hwɛ sín kɔ n'i ɖo Mawu Mavɔmavɔ nukɔn, ɖó sin e wá yi sín wǔ tɔn ɔ́ wú.

¹⁶“Ényí súnnusin wá yi sín mɛ ɖé wú ɔ́, mɛ ɔ́ ɖó ná lɛ wǔ; é ká ná nyí mɛ blíblí káká jɛ gbadanu.

¹⁷Avɔ abǐ anyǔ ɖěbǔ e wú súnnusin ɔ́ ná kɔn nyi ɔ́, è ɖǒ ná nya, bɔ é ká ná nyí nǔblíblí káká jɛ gbadanu.

¹⁸“Nú súnnu ɖé ɖó xó xá nyɔ̌nu ɖé ɔ́, yě mɛ we lɛ́ɛ ɖó ná lɛ wǔ; yě ká ná nyí mɛ blíblí káká jɛ gbadanu.”

¹⁹Mawu Mavɔmavɔ ɖɔ: “Nú nyɔ̌nu ɖé jɛ glegbe ɔ́, nyɔ̌nu énɛ́ ɔ́ ná nyí mɛ blíblí xɔ azǎn tɛ́nwe. Mɛ e ná ɖ'alɔ wǔ tɔn ɔ́ ná nyí mɛ blíblí káká jɛ gbadanu.

²⁰Hwenu e nyɔ̌nu énɛ́ ɔ́ ná ɖo mɔ̌, bó ná mlɔ́ zan ɖěbǔ jí, abǐ é ná jínjɔ́n nǔ ɖěbǔ jí ɔ́, nǔ énɛ́ lɛ́ɛ húzú nǔblíblí.

²¹Mɛ ɖěbǔ ɖ'alɔ zan ɔ́ wú ɔ́, mɛ ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu.

²²Mɛ ɖěbǔ ɖ'alɔ nǔ e jí é jínjɔ́n ɔ́ wú ɔ́, mɛ ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu.

²³Nú nǔɖé ɖo zan e jí é mlɔ́ ɔ́, abǐ nǔ e jí é jínjɔ́n ɔ́, nú mɛ ɖé ɖ'alɔ wú ɔ́, mɛ ɔ́ ná nyí mɛ blíblí káká jɛ gbadanu.

²⁴Nú súnnu ɖé ɖó xó xá nyɔ̌nu mɔ̌hun bónú hun va dó wǔ tɔn ɔ́, é ná nyí mɛ blíblí nyɔ̌nu ɔ́ ɖɔhun xɔ azǎn tɛ́nwe. Bɔ nǔ ɖěbǔ e jí é ná mlɔ́ ɔ́ ná nyí nǔblíblí.

²⁵“Nú nyɔ̌nu ɖé má jɛ glegbe ǎ, bɔ hun ka wá yi sín wǔ tɔn xɔ azǎn gěgé abǐ nú glegbe tɔn dín zɛ azǎn e é ɖó ná bló ɔ́ wú ɔ́, é ná nyí mɛ blíblí káká jɛ hwenu e hun ɔ́ ná nɔ te dó é, hwenu e é jɛ glegbe ɔ́ ɖɔhun.

²⁶Nú hun ɔ́ ɖo wǐwá yi sín wǔ tɔn wɛ, bónú é mlɔ́ zan ɖé jí ɔ́, zan ɔ́ ná húzú nǔblíblí hwenu e é jɛ glegbe ɔ́ ɖɔhun. É jínjɔ́n nǔɖé jí ɔ́, nǔ ɔ́ ná húzú nǔblíblí hwenu e é jɛ glegbe ɔ́ ɖɔhun.

²⁷Mɛ e ná ɖ'alɔ nǔ énɛ́ lɛ́ɛ ɖě wú ɔ́, mɛ ɔ́ ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu.

²⁸“Nú hun e ɖo wǐwá yi sín wǔ tɔn wɛ ɔ́ gbo ɔ́, é ná nɔ te nú azǎn tɛ́nwe bó ná húzú mɛ mímɛ́.

²⁹Azǎn tántɔngɔ́ ɔ́ gbe ɔ́, é ná zé xwelé we, abǐ ahwannɛ́ví we, bó ná bɛ́ yi jó nú vɔ̌sánú-xwlémawutɔ́ ɔ́ ɖo goxɔ ɔ́ sín alihɛ́nnu,

³⁰bɔ vɔ̌sánú-xwlémawutɔ́ ɔ́ ná zé ɖokpó dó sá hwɛsɔ́kɛmɛvɔ́ ná; bó ná sɔ́ wegɔ́ ɔ́ dó sá vɔ̌ e è nɔ dó zo ɔ́ ná; énɛ́ ɔ́, vɔ̌sánú-xwlémawutɔ́ ɔ́ ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ sín kɔ n'i, ɖo Mawu Mavɔmavɔ nukɔn, ɖó hun e wá yi sín wǔ tɔn, bó zɔ́n bɔ é nyí mɛ blíblí ɔ́ wú.

³¹“Mi ná ɖɔ nú Izlayɛ́li ví lɛ́ɛ ɖɔ nú yě húzú mɛ blíblí hǔn, yě ní nɔ zɔ nú goxɔ ce; nú yě bló mɔ̌ ɔ́, yě ná kú ɖó mɛ blíblí e yě nyí ɔ́ wú ǎ. É wɛ nyí ɖɔ yě ná kú ɖó yě hɛn goxɔ e mɛ un nɔ nɔ ɖo tɛ́ntin yětɔn ɔ́ blí wú ǎ.”

³²Sɛ́n e ɖɔ xó dó súnnu e bɛ́ azɔn dó súnnuxwé tɔn, abǐ súnnu e wú súnnusin wá yi sín, bɔ é húzú mɛ blíblí é wú ɔ́ nɛ́.

³³É wɛ lɛ́ ɖɔ xó dó nyɔ̌nu e jɛ glegbe ɔ́ wú, bó ɖɔ dó súnnu abǐ nyɔ̌nu e wú sin wá yi sín ɔ́ wú, bó ɖɔ dó súnnu e ɖó xó xá nyɔ̌nu e má ɖo mǐmɛ́ jí ǎ é wú.