Read fon Levíi ví 16 Bible Online

Levíi ví 16 - fon bible

Levíi ví 16

¹Hwenu e Aalɔ́ɔn sín vǐ súnnu we hɛn myɔ yi Mawu Mavɔmavɔ nukɔn bó kú ɔ́, Mawu Mavɔmavɔ ɖɔ xó nú Mɔyízi. É ɖɔ n'i ɖɔ:

² “Đɔ nú nɔví towe Aalɔ́ɔn ɖɔ ní má nɔ byɔ́ tɛn mímɛ́ bǐ ɔ́ mɛ, ɖo xɔmɛgbovɔ ɔ́ gúdo hwebǐnu, ɖo fí e akɔjijɛgbá ɔ́ kpódó nusú tɔn kpó ɖe ɔ́ ó. É má nyí mɔ̌ ǎ ɔ́, é ná kú hwenu e un ná tɔ́n ɖo akpɔ́kpɔ́ mɛ, ɖo akɔjijɛgbá ɔ́ sín nusú jí é.

³ “Cóbónú Aalɔ́ɔn ka ná byɔ́ tɛn mímɛ́ bǐ ɔ́ mɛ ɔ́, é ná to zé nyibúsú wínnyáwínnyá ɖokpó, bó ná dó sá vɔ̌ e nɔ́ súnsún hwɛ sín kɔ nú mɛ ɔ́ ná, bó ná zé agbo ɖokpó, bó ná dó sá vɔ̌ e è nɔ dó zo ɔ́ ná hwɛ̌.

⁴É ná lɛ wǔ, bó ná dó awu gaga, bó ná dó gbagwé, bó ná sin gǒjíblánú, bó ná sɔ́ tablá ɖó ta; lɛ̌ɛnkanvɔ wɛ è dǒ tɔ nǔ énɛ́ lɛ́ɛ bǐ. Nǔ énɛ́ lɛ́ɛ bǐ wɛ è sɔ́ ɖó vo nú Mawu Mavɔmavɔ.

⁵Izlayɛ́li togun ɔ́ ɖó ná ná gbǎgbá we, bɔ è nǎ dó sá hwɛsɔ́kɛmɛvɔ́ ɔ́, bó ná ná agbo ɖokpó, bɔ è nǎ dó sá vɔ̌ e è nɔ dó zo ɔ́ ná.

⁶“Aalɔ́ɔn ná zé nyibúsú ɔ́ dó sá hwɛsɔ́kɛmɛvɔ́, bó ná bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ é ɖésúnɔ tɔn kpódó xwédo tɔn lɛ́ɛ tɔn kpó.

⁷Énɛ́ ɔ́ gúdo ɔ́, é ná zé gbǎgbá we lɛ́ɛ wá Mawu Mavɔmavɔ nukɔn, ɖo goxɔ ɔ́ lihɛ́nnu.

⁸É ná nyi akɔ dó gbǎgbá we lɛ́ɛ, bó ná tunwun éé nyí Mawu Mavɔmavɔ tɔn é kpó éé nyí Azazɛ́li tɔn é kpó.

⁹É ná sɔ́ gbǎgbá e akɔ ɖe ɖɔ é nyí Mawu Mavɔmavɔ tɔn ɔ́ wá Mawu Mavɔmavɔ gɔ́n, bó dó sá hwɛsɔ́kɛmɛvɔ́ ɔ́ ná.

¹⁰Gbǎgbá e akɔ ɖe ɖɔ é nyí Azazɛ́li tɔn ɔ́, é ná zé gbɛɖe tɔn wá Mawu Mavɔmavɔ nukɔn; è nǎ nya ɛ sɛ́ dó gbětótló mɛ, dó súnsún hwɛ sín kɔ nú togun ɔ́.

¹¹“Aalɔ́ɔn ná gbo gbe nyibúsú ɔ́ dó sá hwɛsɔ́kɛmɛvɔ́, bó ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó súnsún hwɛ é ɖésúnɔ tɔn kpó xwédo tɔn lɛ́ɛ tɔn kpó. É gbo gbe nyibúsú ɔ́ mɔ̌ ɔ́,

¹²é ná ɖe myɔkán ɖo vɔ̌sákpe e ɖo goxɔ Mawu Mavɔmavɔ tɔn nukɔn é jí, dó zǎlínkpɔ́nfyɔ́nú ɖé mɛ, bɔ é ná gɔ́, bó ná wún atínkɛn wǎnnɔ lili alɔgogo we, bó ná sɔ́ bǐ hɛn yi xɔmɛgbovɔ ɔ́ gúdo.

¹³Bó ná kɔn atínkɛn wǎnnɔ ɔ́ dó myɔkán ɔ́ jí ɖo zǎlínkpɔ́nfyɔ́nú ɔ́ mɛ, ɖo Mawu Mavɔmavɔ nukɔn fínɛ́; azizɔ e ná tɔ́n sín mɛ ɔ́ ná cyɔ́n akɔjijɛgbá ɔ́ kpó nusú tɔn kpó; énɛ́ ɔ́, Aalɔ́ɔn sɔ́ ná kú ǎ.

¹⁴É ná zé alɔví dó nyibúsú ɔ́ sín hun mɛ, bó ná mi dó akɔjɛgbánusú ɔ́ wú ɖo nukɔn azɔn ɖokpó, bó ná mi dó kɔ́ mɛ azɔn tɛ́nwe ɖo akɔjijɛgbá ɔ́ nukɔn.

¹⁵ Énɛ́ ɔ́ gúdo ɔ́, é ná gbo gbe gbǎgbá e è sɔ́ ɖó te nú togun ɔ́ sín hwɛsɔ́kɛmɛ ɔ́, bó ná zé hun tɔn yi xɔmɛgbovɔ ɔ́ gúdo, bó ná zán lě e é zán nyibúsú ɔ́ sín hun gbɔn é.

¹⁶Mɔ̌ wɛ é ná bló lě e è nɔ bló gbɔn ɔ́ dó slá wǔ nú tɛn mímɛ́ bǐ ɔ́, ɖó nǔblíblí e Izlayɛ́li ví lɛ́ɛ wa é kpó sɛ́n e yě gba lɛ́ɛ kpó wú káká jɛ hwɛ e yě hu lɛ́ɛ bǐ jí. É ná slá wǔ nú fí e kpo ɖo goxɔ ɔ́ mɛ ɔ́ lɔ, ɖó mɛ blíblí lɛ́ɛ tɛ́ntin wɛ goxɔ ɔ́ ɖe.

¹⁷Sín hwenu e Aalɔ́ɔn ná yi slá wǔ nú tɛn mímɛ́ bǐ ɔ́ káká jɛ hwenu e é ná tɔ́n dó ɔ́, mɛ ɖěbǔ ɖó ná ɖo goxɔ ɔ́ mɛ ǎ. É ná bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́ dó sá vɔ̌ e nɔ́ súnsún hwɛ sín kɔ nú mɛ ɔ́ dó é ɖésúnɔ ta mɛ, bó ná sá dó xwédo tɔn ta mɛ, bó sá dó Izlayɛ́li togun ɔ́ bǐ ta mɛ.

¹⁸É ná tɔ́n sín goxɔ ɔ́ mɛ bó ná yi vɔ̌sákpe e ɖo Mawu Mavɔmavɔ nukɔn ɔ́ kɔn, bó ná bló lě e è nɔ bló gbɔn, bó nɔ́ xwlé vɔ̌sánú Mawu Mavɔmavɔ ɔ́ dó slá wǔ nú vɔ̌sákpe ɔ́. É ná wún nyibúsú ɔ́ kpódó gbǎgbá ɔ́ kpó sín hun, bó ná sá dó vɔ̌sákpe ɔ́ sín zo lɛ́ɛ wú lɛ́ lɛ̌ dó.

¹⁹É ná zé alɔví tɔn dó hun ɔ́ mɛ, bó ná mi dó vɔ̌sákpe ɔ́ wú azɔn tɛ́nwe; énɛ́ ɔ́, é ná slá wǔ n'i, bɔ é ná húzú nǔ mímɛ́, ɖó Izlayɛ́li ví lɛ́ɛ hɛn ɛ blí, ɖó hwɛ e yě hu lɛ́ɛ wú.

²⁰“Nú Aalɔ́ɔn slá wǔ nú tɛn mímɛ́ bǐ ɔ́ fó, bó slá wǔ nú fí e ɖo goxɔ ɔ́ mɛ ɔ́ fó, lobo slá wǔ nú vɔ̌sákpe ɔ́ fó ɔ́, é ná ɖɔ bɔ è nǎ dɔn gbǎgbá e kpo ɖo gbɛ ɔ́ sɛ wá.

²¹É ná fɔ alɔ tɔn we lɛ́ɛ ɖó ta nú gbǎgbá ɔ́, bó ná ɖɔ nǔblíblí e Izlayɛ́li ví lɛ́ɛ wa lɛ́ɛ bǐ, kpó sɛ́n e yě gba lɛ́ɛ bǐ kpó, káká jɛ hwɛ e yě hu lɛ́ɛ bǐ jí, dó gbǎgbá ɔ́ jí, bó ná ɖíɖá hwɛgban tɔn ɛ, lobo ná ɖe mɛ ɖokpó, bɔ é ná kplá gbǎgbá ɔ́ yi gbětótló mɛ, bó ná jó e dó.

²²Lě e gbǎgbá ɔ́ ná bɛ́ hwɛ e Izlayɛ́li ví lɛ́ɛ hu lɛ́ɛ bǐ yi axéko ɖé jí gbɔn ɔ́ nɛ́. “Nú è kplá gbǎgbá ɔ́ ɖidó gbětótló mɛ tlóló ɔ́,

²³ Aalɔ́ɔn ná lɛ́ kɔ wá goxɔ ɔ́ kɔn, bó ná ɖe awu e é dó bó byɔ́ tɛn mímɛ́ bǐ ɔ́ mɛ lɛ́ɛ kɔn nyi fínɛ́.

²⁴É ná lɛ wǔ ɖo tɛn mímɛ́ ɖé mɛ, bó ná fɔ avɔ tɔn lɛ́ɛ dó. Énɛ́ ɔ́ gúdo ɔ́, é ná tɔ́n, bó ná bló lě e è nɔ bló gbɔn bó nɔ́ xwlé vɔ̌sánú Mawu Mavɔmavɔ ɔ́ dó sá vɔ̌ e è nɔ dó zo ɔ́ dó é ɖésúnɔ ta mɛ, bó sá dó togun ɔ́ ta mɛ, bɔ é ná súnsún hwɛ sín kɔ nú é ɖésúnɔ kpó togun ɔ́ kpó.

²⁵Énɛ́ ɔ́ gúdo ɔ́, é ná dó kanlin e è dǒ sá hwɛsɔ́kɛmɛvɔ́ ná ɔ́ sín jǒ zo ɖo vɔ̌sákpe ɔ́ jí.

²⁶“Mɛ e kplá gbǎgbá e nyí Azazɛ́li tɔn ɔ́ yi gbětótló mɛ ɔ́ ɖó ná nya avɔ tɔn lɛ́ɛ, bó ná lɛ wǔ, cóbó ná byɔ́ fí e yě ɖǒ gɔnu ɖó é.

²⁷ Nyibúsú kpó gbǎgbá kpó e è dǒ sá hwɛsɔ́kɛmɛvɔ́ ɔ́ ná, bó zé hun yětɔn yi goxɔ ɔ́ mɛ, bó dó súnsún hwɛ sín kɔ nú togun ɔ́ lɛ́ɛ ɔ́, è ɖǒ ná bɛ́ yě sín fí e yě ɖǒ gɔnu ɖó ɔ́, bó ná fyɔ́ anyǔ yětɔn kpódó lan yětɔn kpó, kpódó mǐ yětɔn kpó.

²⁸Mɛ e fyɔ́ nǔ énɛ́ lɛ́ɛ ɔ́ ɖó ná nya avɔ tɔn lɛ́ɛ, bó ná lɛ wǔ, cóbó ná byɔ́ fí e yě ɖǒ gɔnu ɖó é.

²⁹ “Sɛ́n ɖokpó wɛ nyí sɛ́n énɛ́ ɔ́, bɔ mi ná nɔ́ nyi; hǔn azǎn wǒgɔ́ ɔ́ e ɖo sun tɛ́nwegɔ́ ɔ́ mɛ ɔ́ gbe ɔ́, mi kpódó Izlayɛ́li ví lɛ́ɛ kpó, kpódó jǒnɔ e ɖo to mitɔn mɛ lɛ́ɛ kpó ná blá nu. Mi ná wa azɔ̌ ɖěbǔ ǎ. Mi ná nyi sɛ́n énɛ́ ɔ́ káká sɔ́yi.

³⁰Gbe énɛ́ ɔ́ gbe wɛ è nǎ bló lě e è nɔ bló gbɔn dó súnsún hwɛ bǐ sín kɔ nú mɛ ɔ́, bɔ mi ná húzú mɛ mímɛ́ ɖo Mawu Mavɔmavɔ nukɔn.

³¹Mi ɖó ná zé azǎn énɛ́ ɔ́ dó ɖó gbɔjɛzán ná; mi ná wa nǔ ɖěbǔ ǎ; mi ná blá nu. Mi ná nyi sɛ́n énɛ́ ɔ́ káká sɔ́yi.

³²“Mɛ e è nǎ dó ami ta ná, bó ná sɔ́ ɛ ɖó tɔ́ tɔn tɛnmɛ, bɔ é ná wa vɔ̌sánú-xwlémawutɔ́ ɖaxó zɔ́ ɔ́ wɛ ná nɔ́ bló lě e è nɔ bló gbɔn dó súnsún hwɛ sín kɔ nú mɛ é. É ná nɔ́ dó nǔ e è sɔ́ ɖó vo nú Mawu Mavɔmavɔ lɛ́ɛ; lɛ̌ɛnkanvɔ wɛ è dǒ tɔ nǔ énɛ́ lɛ́ɛ ná.

³³É ná slá wǔ nú tɛn mímɛ́ bǐ ɔ́, bó ná slá wǔ nú fí e kpo ɖo goxɔ ɔ́ mɛ ɔ́, bó ná slá wǔ nú vɔ̌sákpe ɔ́, bó ná bló lě e è nɔ bló gbɔn ɔ́ dó súnsún hwɛ sín kɔ nú vɔ̌sánú-xwlémawutɔ́ lɛ́ɛ kpó togun ɔ́ bǐ kpó.

³⁴“Sɛ́n ɖé wɛ sɛ́n énɛ́ ɔ́ nyí, bɔ mi ná nɔ́ nyi káká sɔ́yi, bɔ azɔn ɖokpó ɖo xwe ɖokpó mɛ ɔ́, è nǎ nɔ́ sá vɔ̌ e nɔ súnsún hwɛ sín kɔ nú mɛ ɔ́ dó Izlayɛ́li togun ɔ́ bǐ ta mɛ.” Ée Mɔyízi ɖɔ xó énɛ́ lɛ́ɛ nú Aalɔ́ɔn ɔ́, Aalɔ́ɔn bló nǔ e Mawu Mavɔmavɔ ɖɔ nú Mɔyízi é.