Read fon Levíi ví 17 Bible Online

Levíi ví 17 - fon bible

Levíi ví 17

¹Mawu Mavɔmavɔ ɖɔ nú Mɔyízi ɖɔ

²é ní ɖɔ nú Aalɔ́ɔn kpódó vǐ tɔn súnnu lɛ́ɛ kpó, kpódó Izlayɛ́li ví lɛ́ɛ bǐ kpó ɖɔ:

³“Izlayɛ́li ví ɖé jló ná zé nyibú, abǐ lɛ̌ngbɔ́, abǐ gbɔ̌ dó sá vɔ̌ ná ɖo fí e yě ɖó gɔnu ɖó ɔ́, abǐ é ná tɔ́n sín fí e yě ɖó gɔnu ɖó ɔ́,

⁴bó má to zé wá goxɔ ɔ́ lihɛ́nnu, bó zé xwlé Mawu Mavɔmavɔ hwɛ̌ ǎ ɔ́, é hu hwɛ, ɖó hun e é kɔn nyi ayǐ é wú; è nǎ ɖe e sín togun ɔ́ mɛ.

⁵Sɛ́n énɛ́ ɔ́ ná zɔ́n bɔ Izlayɛ́li ví lɛ́ɛ ná nɔ́ gbo gbe kanlin lɛ́ɛ ɖo fí ɖé kpowun ǎ; lo ɔ́, yě ná nɔ́ kplá yě wá nú vɔ̌sánú-xwlémawutɔ́ ɔ́, ɖo goxɔ ɔ́ lihɛ́nnu, bɔ é ná dó sá kɔnɖókpɔ́ vɔ́ ɔ́ nú Mawu Mavɔmavɔ.

⁶Vɔ̌sánú-xwlémawutɔ́ ɔ́ ná mi hun ɔ́ dó vɔ̌sákpe e ɖo goxɔ ɔ́ nukɔn ɔ́ wú, bó ná dó jǒ ɔ́ zo, bɔ wǎn tɔn ná nyɔ́ se nú Mawu Mavɔmavɔ.

⁷Énɛ́ ɔ́, yě sɔ́ ná nɔ́ sá vɔ̌ nú nǔɖoyɛswímɛ e ɖo gběhan mɛ, bɔ yě nɔ́ sɛn gɔ́ nú mì lɛ́ɛ ǎ. Sɛ́n énɛ́ ɔ́ ná nɔ ayǐ nú yě kpódó kúnkan yětɔn lɛ́ɛ kpó káká sɔ́yi.

⁸“Hǔn, a nǎ ɖɔ nú yě ɖɔ nú Izlayɛ́li ví ɖé, abǐ jǒnɔ e ɖo mi mɛ lɛ́ɛ ɖě ná sá vɔ̌ e è nɔ dó zo ɔ́, abǐ vɔ̌ ɖěvo ɔ́,

⁹é ɖó ná zé wá goxɔ ɔ́ nukɔn, bɔ è nǎ xwlé Mawu Mavɔmavɔ; é má bló mɔ̌ ǎ ɔ́, è nǎ ɖe e sín mi mɛ.

¹⁰ “Nú Izlayɛ́li ví ɖé abǐ jǒnɔ e ɖo mi mɛ lɛ́ɛ ɖě ɖu hun ɔ́, é ná bó nyí hun alɔkpa ɖěbǔ wɛ ɔ́, nyɛ Mawu Mavɔmavɔ ná húzú kpan nukɔn ɛ, bó ná ɖe e sín Izlayɛ́li togun ɔ́ mɛ.

¹¹Đó hun mɛ wɛ gbɛ ɖe. Nyɛ Mawu Mavɔmavɔ ɔ́, un ná mi bɔ mi ná zán ɖo vɔ̌sákpe jí, bɔ é ná súnsún hwɛ sín kɔ nú mi, bɔ mi ná nɔ gbɛ. Nǔgbó ɔ́, hun wɛ è nɔ dó súnsún hwɛ sín kɔ nú mɛ, ɖó é mɛ wɛ gbɛ ɖe.

¹²Énɛ́ ɔ́ wú wɛ nyɛ Mawu Mavɔmavɔ ɔ́ ɖo ɖiɖɔ nú mi Izlayɛ́li ví lɛ́ɛ wɛ ɖɔ, mi mɛ ɖěbǔ ní má ɖu hun ó, jǒnɔ e ɖo mi mɛ lɛ́ɛ lɔ ɖěbǔ ní má ɖu ó.

¹³“Nú Izlayɛ́li ví ɖé, abǐ jǒnɔ e ɖo mi mɛ lɛ́ɛ ɖě nya gbě, bó hu kanlin abǐ xɛ e má vɛ́ mɛ ǎ ɔ́ ɖě ɔ́, é ná lúlú hun tɔn kɔn nyi kɔ́ mɛ, bó kplɔ́ kɔ́ d'é jí.

¹⁴Đó nǔ ɖo gbɛ lɛ́ɛ ɔ́, hun e ɖo lan yětɔn mɛ ɔ́ mɛ wɛ gbɛ yětɔn ɖe. Énɛ́ ɔ́ wú wɛ nyɛ Mawu Mavɔmavɔ ɔ́, un ɖɔ nú Izlayɛ́li ví lɛ́ɛ ɖɔ yě kún ɖó ná ɖu nǔ ɖo gbɛ ɖěbǔ sín hun ó, ɖó hun e ɖo nǔ ɖo gbɛ ɖěbǔ sín lanmɛ ɔ́ mɛ wɛ gbɛ tɔn ɖe. Mɛ ɖěbǔ ɖu hun ɔ́, è nǎ ɖe e sín Izlayɛ́li togun ɔ́ mɛ.

¹⁵“Nú Izlayɛ́li ví lɛ́ɛ ɖě, abǐ jǒnɔ e ɖo mi mɛ lɛ́ɛ ɖě ɖu kanlin e nɔ é ɖóɖó bó kú, abǐ éé gběkanlin ɖé vún ɖu ɔ́ sín lan ɔ́, mɛ ɔ́ ɖó ná nya avɔ tɔn lɛ́ɛ, bó ná lɛ wǔ; é ká ná nyí mɛ blíblí káká jɛ gbadanu. Énɛ́ ɔ́ gúdo ɔ́, é ná húzú mɛ mímɛ́.

¹⁶Nú é má ka nya avɔ tɔn lɛ́ɛ, bó lɛ wǔ ǎ ɔ́, hwɛ tɔn ná nɔ kɔ n'i.”