Read fon Levíi ví 2 Bible Online

Levíi ví 2 - fon bible

Levíi ví 2

¹Mawu Mavɔmavɔ ɖɔ: “Ényí mɛ ɖé jló ná hɛn nǔníná jinukún tɔn ɖé wá nú Mawu Mavɔmavɔ ɔ́, mɛ ɔ́ ní hɛn linfín; é ní kɔn ami dó linfín ɔ́ jí, bó hɛn zǎlínkpɔ́n d'é jí,

²bó ná zé wá nú Aalɔ́ɔn sín vǐ súnnu vɔ̌sánú-xwlémawutɔ́ lɛ́ɛ. È nǎ wún linfín e jí è kɔn ami dó ɔ́ alɔgogo ɖokpó, bɔ zǎlínkpɔ́n ɔ́ bǐ ná jɛ jí, bɔ vɔ̌sánú-xwlémawutɔ́ lɛ́ɛ ɖokpó ná dó zo ɖo vɔ̌sákpe ɔ́ jí, bɔ é ná nyí flǐnnú ɖé nú Mawu Mavɔmavɔ. Énɛ́ wɛ nyí vɔ̌ e è nɔ dó zo, bɔ é nɔ́ fyɔ́ bǐ, bɔ wǎn tɔn nɔ́ yi Mawu Mavɔmavɔ gɔ́n, bó nɔ́ nyɔ́ se n'i é.

³Nǔníná e ná kpo ɔ́ ná nyí Aalɔ́ɔn kpó vǐ tɔn súnnu lɛ́ɛ kpó tɔn. Nǔ mímɛ́ ɖaxó ɖé wɛ é nyí, ɖó vɔ̌ e è xwlé Mawu Mavɔmavɔ ɔ́ mɛ wɛ è ɖe sín.

⁴“Nú é ká nyí nǔ e è ɖa ɖo myɔkpó mɛ ɔ́ ná ná Mawu Mavɔmavɔ wɛ è ɖe ɔ́, è nǎ zé linfín e mɛ è ma dó tɔ́n ǎ é dó ɖa atá tɔ́n má ɖ'é mɛ, bɔ è zě ami dó nya ná, abǐ acɔnmɔ e mɛ tɔ́n má ɖe ǎ é, bɔ è nǎ sá ami dó.

⁵Nú é ká nyí nǔ e è ɖa ɖo ganzɛ́n wɛnjɛ mɛ ɔ́ ná ná Mawu Mavɔmavɔ wɛ è ɖe ɔ́, é ní nyí linfín e è nya kpó ami kpó bɔ tɔ́n má ɖ'é mɛ ǎ é.

⁶È nǎ já, bó ná lɛ́ kɔn ami d'é jí. Nǔníná jinukún tɔn ɖokpó wɛ é nyí.

⁷Nú é ká nyí nǔ e è ɖa ɖo ganzɛ́n mɛ ɔ́ ná ná Mawu Mavɔmavɔ wɛ è ɖe ɔ́, linfín e è nya kpó ami kpó ɔ́ wɛ è nǎ dó ɖa ná.

⁸È nǎ hɛn nǔníná e è ɖa ɔ́ wá nú Mawu Mavɔmavɔ. Vɔ̌sánú-xwlémawutɔ́ ɔ́ wɛ è nǎ zé ná, bɔ é ná zé yi vɔ̌sákpe ɔ́ jí.

⁹Nǔ e è jlǒ ná xwlé Mawu Mavɔmavɔ bɔ é ná nyí flǐnnú n'i ɔ́, vɔ̌sánú-xwlémawutɔ́ ɔ́ ná ɖe ɖ'é mɛ, bó ná dó zo ɖo vɔ̌sákpe ɔ́ jí. Énɛ́ wɛ nyí vɔ̌ e è nɔ dó zo bɔ é nɔ́ fyɔ́ bǐ, bɔ wǎn tɔn nɔ́ yi Mawu Mavɔmavɔ gɔ́n, bó nɔ́ nyɔ́ se n'i é.

¹⁰Nǔníná e ná kpo ɔ́, ná nyí Aalɔ́ɔn kpó vǐ tɔn súnnu lɛ́ɛ kpó tɔn. Nǔ mímɛ́ ɖaxó ɖé wɛ é nyí, ɖó vɔ̌ e è xwlé Mawu Mavɔmavɔ ɔ́ mɛ wɛ è ɖe sín.

¹¹“Tɔ́n ná ɖo nǔníná e mi ná xwlé Mawu Mavɔmavɔ lɛ́ɛ ɖěbǔ mɛ ǎ; nǔgbó ɔ́, nǔníná e è nǎ dó zo ɖo Mawu Mavɔmavɔ nukɔn lɛ́ɛ ɔ́, mi ná dó tɔ́n abǐ wǐin ɖěbǔ mɛ gbeɖé ǎ.

¹²É ka ɖo mɔ̌ có mi sixú dó tɔ́n abǐ wǐin jinukún nukɔntɔn sín nǔníná e mi hɛn wá nú Mawu Mavɔmavɔ ɔ́ mɛ. Lo ɔ́, è sixú sɔ́ dó sá vɔ̌ e è nɔ dó zo ɔ́ ná ɖo vɔ̌sákpe jí, bɔ é ná nyí nǔníná wǎnɖagbenɔ ǎ.

¹³“È nǎ dó jɛ nǔníná jinukún tɔn lɛ́ɛ bǐ mɛ. È nǎ dó vɛ̌ ná gbeɖé, bó gɔn dǐd'é mɛ ǎ, ɖó é wɛ nyí akɔ e Mawu jɛ xá mi ɔ́ sín xlɛ̌. Énɛ́ ɔ́ wú wɛ è nǎ hɛn jɛ dó nǔníná lɛ́ɛ bǐ jí.

¹⁴“Ényí jinukún mitɔn nukɔntɔn lɛ́ɛ wɛ nyí nǔníná jinukún tɔn e mi ná ná Mawu Mavɔmavɔ ɔ́, jinukún yɔ̌yɔ́ e ɖo gotín nu lɛ́ɛ wɛ mi ná mɛ bó ná glín.

¹⁵Có bó ná zé yi ɔ́, mi ná kɔn ami d'é jí, bó ná zé zǎlínkpɔ́n gɔ́ ná. Nǔníná jinukún tɔn ɖokpó wɛ é ná nyí.

¹⁶Vɔ̌sánú-xwlémawutɔ́ ɔ́ ná dó jinukún e è glǐn ɔ́ ɖě zo kpó zǎlínkpɔ́n ɔ́ bǐ kpó, bɔ é ná nyí flǐnnú ɖé nú Mawu Mavɔmavɔ. Nǔníná e è nɔ dó zo ɖo Mawu Mavɔmavɔ nukɔn ɔ́ ɖokpó wɛ é nyí.”