Read fon Levíi ví 22 Bible Online

Levíi ví 22 - fon bible

Levíi ví 22

¹Mawu Mavɔmavɔ ɖɔ nú Mɔyízi ɖɔ:

²“Đɔ nú Aalɔ́ɔn kpó vǐ tɔn súnnu lɛ́ɛ kpó ɖɔ yě ní cɔ́ yěɖée dó nǔ e Izlayɛ́li ví lɛ́ɛ ɖe ɖó vo nú mì lɛ́ɛ wú; yě táá hɛn nyǐkɔ ce blí. Nyɛ wɛ nyí Mawu Mavɔmavɔ.

³Đɔ nú yě ɖɔ: “Mɛ ɖěbǔ e ná ɖo vǐ mitɔn lɛ́ɛ mɛ ɖo jijimɛ lɛ́ɛ bǐ mɛ, bó ná ɖo mɛ blíblí lɔ jí, bó ná sɛkpɔ́ nǔ e Izlayɛ́li ví lɛ́ɛ ɖe ɖó vo nú nyɛ Mawu Mavɔmavɔ ɔ́, è nǎ ɖe mɛ énɛ́ ɔ́ sín nukɔn ce. Nyɛ wɛ nyí Mawu Mavɔmavɔ.

⁴Mɛ e ná ɖo yě mɛ, bɔ gudu ná ɖo wǔ tɔn, abǐ é ná ɖo glɔ̌ zɔn ɖé jɛ wɛ ɔ́, mɛ ɔ́ ɖó ná ɖu nǔ e è ɖe ɖó vo nú mì lɛ́ɛ ɖě káká jɛ hwenu e é ná húzú mɛ mímɛ́ dó é ǎ. Mɔ̌ ɖokpó ɔ́ wɛ é ná nyí nú mɛ e ɖ'alɔ cyɔ ɖé wú, bó húzú mɛ blíblí é; mɔ̌ ɖokpó ɔ́ wɛ é ná lɛ́ nyí nú mɛ e súnnusin nɔ́ wá yi sín glɔ̌ ná é.

⁵Mɔ̌ ɖokpó ɔ́ wɛ é ná nyí nú mɛ e ná ɖ'alɔ nǔvínúví, abǐ mɛ blíblí alɔkpa ɖěbǔ wǔ, bó húzú mɛ blíblí é.

⁶Mɛ e ná ɖ'alɔ nǔ énɛ́ lɛ́ɛ ɖě wú ɔ́ ná nyí mɛ blíblí káká jɛ gbadanu; wǔ jɛ́n é ná lɛ bǐ hwɛ̌, cóbó ná sixú ɖu nǔ e è ɖe ɖó vo nú mì lɛ́ɛ.

⁷Nú hwe yi xɔ tlóló ɔ́, é ná húzú mɛ mímɛ́, bó ná ɖu nǔ e è ɖe ɖó vo nú mì lɛ́ɛ, ɖó nǔ tɔn ɖuɖu wɛ.

⁸Vɔ̌sánú-xwlémawutɔ́ ɖó ná ɖu kanlin e kú ɔ́, abǐ éé gběkanlin ɖé vún ɖu ɔ́ sín lan ǎ. É táá húzú mɛ blíblí. Nyɛ wɛ nyí Mawu Mavɔmavɔ.

⁹“Vɔ̌sánú-xwlémawutɔ́ lɛ́ɛ ɖó ná nyi sɛ́n ce; yě má gba sɛ́n ce bó dɔn hwɛ dó kɔ nú yěɖée bó kú ó. Mawu Mavɔmavɔ wɛ un nyí; nyɛ wɛ ɖe yě ɖó vo nú azɔ̌ ce.

¹⁰“Mɛ yǎyá ɖěbǔ ɖó ná ɖu nǔ e è ɖe ɖó vo nú mì ɔ́ ǎ; é sixú nyí ylɔ̌ wɛ è ylɔ̌ ɛ, abǐ é sixú nyí mɛ e nɔ wa azɔ̌ nú vɔ̌sánú-xwlémawutɔ́ ɔ́ bɔ è nɔ sú axɔ́ é ɖě; é ná ɖu ǎ.

¹¹Amɔ̌, nú vɔ̌sánú-xwlémawutɔ́ xɔ kannumɔ ɖé, abǐ è ji i ɖo xwé tɔn gbe ɔ́, kannumɔ ɔ́ sixú ɖu nǔɖuɖu e nyí vɔ̌sánú-xwlémawutɔ́ ɔ́ tɔn é. Mɔ̌ ɖokpó ɔ́, mɛsɛntɔ́ e è ji ɖo vɔ̌sánú-xwlémawutɔ́ ɔ́ xwé ɔ́ lɔmɔ̌ ná ɖu.

¹²Nú vɔ̌sánú-xwlémawutɔ́ ɔ́ sín vǐ nyɔ̌nu ɖé da mɛ yǎyá ɖé ɔ́, é sixú ɖu nǔ e è jɔ ɖo nǔ e è ɖe ɖó vo nú mì lɛ́ɛ jí ɔ́ ǎ.

¹³Lo ɔ́, vɔ̌sánú-xwlémawutɔ́ ɔ́ sín vǐ nyɔ̌nu e nyí asúkúsi, abǐ éé asú tɔn gbɛ́, bɔ é má ɖó vǐ ǎ bó lɛ́ wá jɛ tɔ́ tɔn xwé, lě e é kó ɖe gbɔn ɖ'ayǐ cóbó yi da asú ɔ́, é sixú ɖu tɔ́ tɔn sín nǔɖuɖu. Mɛ yǎyá ɖěbǔ sixú ɖu ǎ.

¹⁴“Nú mɛɖé má tunwun ǎ, bó ɖu nǔ e è ɖe ɖó vo nú mì ɔ́, mɛ ɔ́ ná sú nǔ e é ɖu ɔ́ sín axɔ́ vɔ̌sánú-xwlémawutɔ́ ɔ́, bó ná ná vlɔ̌ ɖó atɔ́ɔ́n tɔn d'é jí.

¹⁵“Nǔníná e Izlayɛ́li ví lɛ́ɛ sɔ́ ɖó vo nú nyɛ Mawu Mavɔmavɔ lɛ́ɛ ɔ́, vɔ̌sánú-xwlémawutɔ́ lɛ́ɛ ɖó ná ɖu su nú nǔ e yě jɔ ɖ'é mɛ lɛ́ɛ ǎ.

¹⁶Hǔn nú vɔ̌sánú-xwlémawutɔ́ lɛ́ɛ má nɔ lě e yě ɖó ná nɔ cóbó ɖu nǔɖuɖu mɔ̌hun ɔ́ ǎ, lobo ɖu ɔ́, hwɛ wɛ yě dó kɔ nú Izlayɛ́li ví lɛ́ɛ. Nyɛ wɛ nyí Mawu Mavɔmavɔ. Nyɛ wɛ ɖe yě ɖó vo nú azɔ̌ ce.”

¹⁷Mawu Mavɔmavɔ ɖɔ nú Mɔyízi ɖɔ

¹⁸é ní ɖɔ nú Aalɔ́ɔn kpó vǐ tɔn lɛ́ɛ kpó, kpódó Izlayɛ́li ví lɛ́ɛ bǐ kpó ɖɔ: “Mǐ ní ɖɔ mɛ ɖé ɖo mi mɛ, bó jló ná xwlé vɔ̌ e è nɔ dó zo ɔ́ mì; mɛ ɔ́ sixú nyí Izlayɛ́li ví, abǐ é sixú nyí jǒnɔ bó ɖo Izlayɛ́li; é sixú nyí ɖɔ akpá ɖé wɛ é jló ná dó ɖe ná, abǐ é jló ná xwlé mì kpó jlǒ é ɖésúnɔ tɔn kpó.

¹⁹É nyí mɔ̌ wɛ ɔ́, kanlin asú e má ɖó blɔ̌ ɖo wǔ ǎ é wɛ é ná dó sá ná; é sixú nyí nyibú, lɛ̌ngbɔ́, abǐ gbɔ̌ yǎyá; blɔ̌ ɖó ná nɔ wǔ tɔn ǎ; énɛ́ ɔ́, un ná yí kanlin ɔ́.

²⁰ Mi ná zé kanlin e wú blɔ̌ ɖe ɔ́ ɖěbǔ dó sá vɔ̌ ná ǎ; ɖó nú mi bló mɔ̌ ɔ́, un ná yí vɔ̌ ɔ́ ǎ.

²¹Mǐ ní lɛ́ ɖɔ mɛɖé jló ná sɔ́ nyibú abǐ gbɔ̌ dó sá kɔnɖókpɔ́ vɔ́ nú nyɛ Mawu Mavɔmavɔ; é sixú nyí ɖɔ akpá ɖé wɛ é jló ná dó ɖe ná, abǐ é jló ná xwlé mì kpó jlǒ é ɖésúnɔ tɔn kpó; blɔ̌ ɖěbǔ ɖó ná nɔ kanlin ɔ́ wú ǎ; énɛ́ ɔ́, un ná yí vɔ̌ tɔn.

²²Mi bó ma hɛn kanlin nukúntíntɔ́nnɔ, abǐ afɔkponɔ, abǐ éé gblé wǔ é, abǐ éé ɖó akli, abǐ éé nǔ tɔ́n ɖo wǔ tɔn é ɖě wá vɔ̌sákpe ce jí dó sá vɔ̌ e è nɔ dó zo ɔ́ ná nú mì ó.

²³Nú ényí ɖɔ a nǎ sá vɔ̌ ɖé nú mì kpódó hwi ɖésúnɔ sín jlǒ kpó ɔ́, a sixú zé nyibú, abǐ lɛ̌ngbɔ́ e wǔjɔnú tɔn ɖě ɖi ga hú ɖě, abǐ ée ɖě hwe gli hú ɖě ɔ́ dó sá ná. Amɔ̌, a nǎ zé kanlin mɔ̌hunkɔtɔn dó ɖe akpá ná ǎ. Nyɛ Mawu Mavɔmavɔ ná yí ǎ.

²⁴Kanlin e è gba ajiglokwín ná é, abǐ éé sín ajiglokwín li é, abǐ kanlin e è sá ɔ́, abǐ éé sín ajiglokwín e è sɛ́n síin ɔ́, mi ma hɛn ɖě wá nú nyɛ Mawu Mavɔmavɔ gbeɖé ó. È nǎ bló nǔ mɔ̌hunkɔtɔn ɖo to mitɔn mɛ ǎ.

²⁵Mi ma ka yí kanlin mɔ̌hunkɔ lɛ́ɛ ɖě ɖo jǒnɔ ɖé sí, bó dó sá vɔ̌ nú nyɛ Mawu mitɔn ó. Wǔ énɛ́ ɔ́ e è gblě yě ɔ́, blɔ̌ wɛ nyí ɖo yě wú. Nú mi zé kanlin mɔ̌hunkɔtɔn ɖé dó sá vɔ̌ nú mì ɔ́, un ná yí ǎ.”

²⁶Mawu Mavɔmavɔ ɖɔ nú Mɔyízi ɖɔ:

²⁷“Nú è ji nyibúví, abǐ gbɔ̌ví ɖé ɔ́, è nǎ jó e dó nyi nɔ tɔn gɔ́n nú azǎn tɛ́nwe. Bɛ́ sín azǎn tántɔngɔ́ ɔ́ gbe ɔ́, è sixú zé dó sá vɔ̌ e è nɔ dó zo ɔ́ nú mì.

²⁸Mi ma ka hu nyibú asi, abǐ gbɔ̌ asi kpó vǐ tɔn kpó gbe ɖokpó ɔ́ ó.

²⁹“Nú mi ɖo vɔ̌ sá nú mì wɛ, bó ɖo han ji dó kpa susu nú mì wɛ ɔ́, mi nɔ bló bónú é ní sɔgbe xá tito ɔ́; énɛ́ ɔ́, un ná yí.

³⁰Mi ɖu kanlin e mi sá vɔ̌ ná ɔ́ sín lan gbe e gbe mi hu é; mi ma jó ɖě dó nú ayǐ hɔ́n dó ó. Nyɛ wɛ nyí Mawu Mavɔmavɔ.

³¹“Mi kpé nukún dó sɛ́n ce lɛ́ɛ wú bó nyi ganjí; nyɛ wɛ nyí Mawu Mavɔmavɔ.

³²Mi ma hɛn nyǐkɔ ce blí ó. Un jló ɖɔ mi Izlayɛ́li ví lɛ́ɛ ní tunwun ɖɔ mɛ mǐmɛ́ wɛ un nyí. Nyɛ wɛ nyí Mawu Mavɔmavɔ e sɔ́ mi bɔ mi ná nyí togun ɖe ɖó vo é.

³³Un ɖe mi tɔ́n sín Ejípu, bó ná nyí Mawu mitɔn. Nyɛ wɛ nyí Mawu Mavɔmavɔ.”