Read fon Levíi ví 25 Bible Online

Levíi ví 25 - fon bible

Levíi ví 25

¹ Mawu Mavɔmavɔ ɖɔ nú Mɔyízi ɖo Sinayíi só jí ɖɔ

²é ní ɖɔ nú Izlayɛ́li ví lɛ́ɛ ɖɔ: “Hwenu e mi ná jɛ to e ná ná mi wɛ un ɖe ɔ́ mɛ ɔ́, é jɛ hwe tɔn nu ɔ́, mi ná nɔ́ ná gbɔjɛ ayǐkúngban ɔ́; mi ná nɔ́ bló mɔ̌ dó kpa susu nú nyɛ Mawu Mavɔmavɔ.

³Mi ná nɔ́ sɔ́ xwe ayizɛ́n ɖó te, bó ná nɔ́ dó nǔ dó gle mitɔn lɛ́ɛ mɛ, bó ná nɔ́ jlá ala nú vǐwuntín mitɔn lɛ́ɛ, bó ná nɔ́ ya jinukún mitɔn lɛ́ɛ.

⁴Lo ɔ́, mi ná sɔ́ xwe tɛ́nwegɔ́ ɔ́ ɖó vo nú nyɛ Mawu Mavɔmavɔ. Xwe énɛ́ ɔ́ xwe ɔ́, mi ná ná gbɔjɛ ayǐkúngban mitɔn ɔ́. Mi ɖó ná dó nǔ dó gle mitɔn mɛ ǎ, mi ka ɖó ná jlá ala nú vǐwuntín mitɔn lɛ́ɛ ǎ.

⁵Mi ná ya nǔkún e ná nɔ yě ɖóɖó bó wú lɛ́ɛ lɔ ǎ. Mi ka ná ba vǐwun e ko zin ɖo vǐwuntín e mi ma jlá ala ná ǎ lɛ́ɛ jí ɔ́ ǎ, ɖó mi ɖó ná ná gbɔjɛ́ ayǐkúngban ɔ́ bǐ sésé, bó ná wa nǔ ɖěbǔ ɖ'é jí ǎ. Gbɔjɛ sín xwe wɛ xwe énɛ́ ɔ́ ná nyí.

⁶Amɔ̌, nǔ e ná nɔ yě ɖóɖó bó wú ɖo ayǐkúngban ɔ́ jí ɖo xwe ɔ́ mɛ lɛ́ɛ ɔ́, mi sixú ɖu. Mi ná ɖu bɔ mɛsɛntɔ́ mitɔn lɛ́ɛ ná ɖu, bɔ azɔ̌watɔ́ mitɔn kpó jǒnɔ e ɖo mi gɔ́n lɛ́ɛ kpó ná ɖu.

⁷Kanlin mitɔn lɛ́ɛ lɔ ná ɖu nǔ énɛ́ lɛ́ɛ; gběkanlin e ɖo to mitɔn mɛ lɛ́ɛ lɔ ná ɖu.”

⁸“Mi yi to e ná ná mi wɛ un ɖe ɔ́ mɛ ɔ́, mi ná xa gbɔjɛzán xwe tɛ́nwe; hǔn mi ná xa xwe tɛ́nwe tɛ́nwe donu tɛ́nwe; é bló xwe kanɖé tɛ́nnɛ (49).

⁹Énɛ́ ɔ́ gúdo ɔ́, azǎn wǒgɔ́ ɔ́ e ɖo sun tɛ́nwegɔ́ ɔ́ mɛ ɔ́, azǎn énɛ́ ɔ́ e nyí hwɛsúnsún sín kɔ nú mɛ zán ɖaxó ɔ́, mi ná kún lanzo gbɔn to ɔ́ bǐ mɛ.

¹⁰Énɛ́ ɔ́, mi ná jlá ɖɔ è nǐ ɖe to ɔ́ mɛ nu lɛ́ɛ bǐ nyi te. È nǎ sun nyǐ xwe énɛ́ ɔ́ ɖɔ ‘Awǎjijɛxwe’. Xwe énɛ́ ɔ́ xwe ɔ́, mɛ ɖokpó ɖokpó ná yí ayǐkúngban tɔn, bó ná yi hɛ̌nnu tɔn mɛ. Xwe kanɖé wǒgɔ́ (50) ɔ́ ná nyí xwe bɔ mi ná ɖe ɖó vo nú mì.

¹¹Mi ná nɔ́ ɖu ‘Awǎjijɛxwe’ ɔ́ xwe kanɖé wǒ (50) mɛ kanɖé wǒ (50) mɛ. Xwe énɛ́ ɔ́ xwe ɔ́, mi ná dó nǔkún ǎ, mi ka ná ya nǔkúnflá éé wú ɖo gle mitɔn mɛ lɛ́ɛ dó agɔ̌ mɛ ǎ, mi ka ná gbɛ vǐwun ɖo vǐwuntín e mi má jlá ɖa ná ǎ lɛ́ɛ jí ǎ,

¹²ɖó ‘Awǎjijɛxwe’ wɛ, bɔ mi ná mɔ dó mɔ xwe ɖeɖóvo. Lo ɔ́, mi ná ba nǔ e ná nyɔ́ ɖo gle mitɔn mɛ lɛ́ɛ ɖu.

¹³“ ‘Awǎjijɛxwe’ ɔ́ bǐ mɛ ɔ́, mɛ ɖokpó ɖokpó ná yí ayǐkúngban tɔn.

¹⁴Hǔn nú mi xɔ ayǐkúngban ɖo to mitɔn mɛ nu ɖé sí, abǐ mi sa ayǐkúngban ɖé n'i ɔ́, mi ma hízí i ó.

¹⁵Nú mi ja ayǐkúngban xɔ gbé ɖo to mitɔn mɛ nu sí ɔ́, xwe nabí e kpo bɔ è nǎ ɖu ‘Awǎjijɛxwe’ ɔ́ wɛ mi ná kpɔ́n dó xɔ, bɔ éyɛ́ ná kpɔ́n xwe nabí e a nǎ dó ya jinukún ɖo gle ɔ́ jí cóbɔ ‘Awǎjijɛxwe’ ɔ́ ná wá ɔ́ dó sa.

¹⁶Nú xwe e kpo ɔ́ sukpɔ́ ɔ́, akwɛ́ e mi ná dó xɔ ɔ́ ná sukpɔ́. Nú xwe e kpo ɔ́ má sukpɔ́ ǎ ɔ́, akwɛ́ e mi ná dó xɔ ɔ́ ná hwe, ɖó azɔn nabí e mi ná ya jinukún ɔ́ sa xá mi wɛ è ɖe.

¹⁷Mɛ ɖokpó má ɖo mi mɛ bó hízí nɔzo tɔn ó. Mi ɖi xɛsi nú nyɛ Mawu mitɔn, ɖó nyɛ wɛ nyí Mawu Mavɔmavɔ, Mawu mitɔn.

¹⁸Mi nyi sɛ́n ce lɛ́ɛ, bó bló nǔ e un zɔ́n mi lɛ́ɛ ganjí; énɛ́ ɔ́, mi ná vo ɖo to ɔ́ mɛ.

¹⁹Énɛ́ ɔ́, ayǐkúngban ná ná jinukún, bɔ mi ná ɖu, bɔ é ná kpé mi kpo, bɔ mi ná vo ɖo to ɔ́ mɛ.

²⁰“Mi sixú kanbyɔ́ miɖée ɖɔ: Xwe tɛ́nwe mɛ xwe tɛ́nwe mɛ ɔ́, nú mǐ má dó nǔkún ǎ ɔ́, étɛ́ mǐ ná ɖu?

²¹Énɛ́ ɔ́ wú ɔ́, nyɛ Mawu Mavɔmavɔ ɔ́, un ná kɔn nyɔ̌ná dó jǐ mitɔn, bɔ ji ná jɛ nú mi ɖo xwe ayizɛ́ngɔ́ ɔ́ mɛ. Un ná ɖe gbe nú ayǐkúngban ɔ́, bɔ é ná ná jinukún e mi ná ɖu nú xwe atɔn ɔ́ mi.

²²Xwe tántɔngɔ́ ɔ́ mɛ ɔ́, mi ná lɛ́ dó nǔ. Amɔ̌, xwe énɛ́ ɔ́ mɛ ɔ́, jinukún e mi ya ɖo xwe ayizɛ́ngɔ́ ɔ́ mɛ ɔ́ ɖu wɛ mi ná kpo ɖe, ɖó é ná kpo ɖo así mitɔn ganjí káká yi kpé dó jinukún e mi ná ya ɖo xwe tɛ́nnɛgɔ́ ɔ́ mɛ ɔ́ nu.”

²³“È sixú sa ayǐkúngban ɖé bǐ gbídígbídí ǎ, ɖó ayǐkúngban ɔ́, ce wɛ, bɔ midɛɛ lɛ́ɛ ká nyí jǒnɔ ɖo to ce mɛ; mi ná nɔ fínɛ́ káká sɔ́yi ǎ.

²⁴Énɛ́ ɔ́ wú ɔ́, mi ná ɖó sɛ́n ayǐ, gbɔn fí bǐ, ɖo to e ná ná mi wɛ un ɖe ɔ́ mɛ, bɔ sɛ́n ɔ́ ná ná acɛ mɛ ɖokpó ɖokpó, bɔ é hɛn ɔ́, é ná vɔ́ ayǐkúngban e é sa ɔ́ xɔ.

²⁵“Nú nɔví mitɔn ɖé jɛ ya mɛ, bó sa ayǐkúngban tɔn ɖě ɔ́, mɛ e nyí mɛ tɔn bó sɛkpɔ́ ɛ ganjí, bó ɖó acɛ, bó hɛn ɔ́ é ná vɔ́ ayǐkúngban ɔ́ xɔ ɔ́ ná wá, bó ná vɔ́ ayǐkúngban ɔ́ xɔ ɖo mɛ e é sa xá ɔ́ sí.

²⁶Nú mɛɖé má ka ɖó mɛɖé bɔ é ná vɔ́ ayǐkúngban e é sa ɔ́ xɔ ǎ, bónú é ɖésú ká ba akwɛ́ tɔn bó ná vɔ́ xɔ ɔ́,

²⁷é ná kpɔ́n xwe nabí e kpo bɔ è nǎ ɖu ‘Awǎjijɛxwe’ ɔ́, bó ná ná akwɛ́ tɔn ɛ, bó ná yí ayǐkúngban tɔn.

²⁸Nú é má ká mɔ nǔ e é ná dó sú axɔ́ ɔ́ ná ɔ́ ǎ ɔ́, ayǐkúngban ɔ́ ná kpo ɖo mɛ e xɔ ɔ́ tɔn nyí wɛ káká yi jɛ ‘Awǎjijɛxwe’ ɔ́ mɛ. Xwe énɛ́ ɔ́ xwe ɔ́, ayǐkúngbannɔ ɔ́ ná yí ayǐkúngban tɔn.

²⁹“Nú mɛɖé sa xwé tɔn ɖo toxo e è mɛ ahohó lɛ́ lɛ̌ dó lɛ́ɛ ɖě mɛ ɔ́, xwe e xwe é sa ɔ́ wɛ é ná ɖó acɛ bó ná vɔ́ xɔ. Acɛ e é ɖó bó ná dó vɔ́ nǔ e é sa ɔ́ xɔ ɔ́ ɖo te káká nú xwe ɖokpó.

³⁰Lo ɔ́, nú é má kó vɔ́ xɔ ǎ, bɔ é bló xwe ɖokpó gbánwúngbánwún ɔ́, hǔn é húzú mɛ e xɔ ɔ́ kpódó vǐ tɔn lɛ́ɛ kpó tɔn káká sɔ́yi. Yě sɔ́ ná sɔ́ jó ‘Awǎjijɛxwe’ ɔ́ mɛ ǎ.

³¹Amɔ̌, xwé e è sa ɖo gletoxo e è ma mɛ ahohó lɛ́ lɛ̌ dó ǎ lɛ́ɛ mɛ ɔ́, lě e è nɔ vɔ́ ayǐkúngban xɔ gbɔn ɔ́ wɛ è nǎ vɔ́ xɔ gbɔn. Ényí mɛ e sa ɔ́ má vɔ́ xɔ ǎ káká bɔ ‘Awǎjijɛxwe’ wá ɔ́, mɛ e xɔ ɔ́ ná tɔ́n sín mɛ.

³²“Levíi ví lɛ́ɛ ɔ́, yě ɖó acɛ hwebǐnu, bó ná vɔ́ xwé yětɔn e ɖo Levíi sín toxo lɛ́ɛ mɛ é xɔ.

³³É ná bó nyí Levíi ví ɖěvo wɛ xɔ xwé lɛ́ɛ ɖě ‘Awǎjijɛxwe’ ɔ́ mɛ ɔ́, xwé ɔ́ ná húzú mɛ e sí é xɔ ɖe ɔ́ tɔn; ɖó xwé e ɖo Levíi toxo ɔ́ mɛ lɛ́ɛ wɛ nyí Levíi ví lɛ́ɛ tɔn ɖo Izlayɛ́li to ɔ́ mɛ.

³⁴È nǎ sa gle e lɛ́ lɛ̌ dó toxo yětɔn lɛ́ɛ ǎ, ɖó yětɔn wɛ gle énɛ́ lɛ́ɛ nyí káká sɔ́yi.”

³⁵ “Nú nɔví towe ɖo akpá towe bó jɛ ya mɛ, bɔ nǔɖé má sɔ́ ɖo así tɔn ǎ ɔ́, a nǎ hɛn sɔ ɛ. É ná bó nyí jǒnɔ abǐ mɛ e ná nɔ akpá towe káká jɛ hwe ɖé nu ɔ́ wɛ ɔ́, a nǎ hɛn sɔ ɛ bɔ é ná nɔ akpá towe.

³⁶A nǎ nya nǔ n'i bó byɔ́ d'é jí ǎ, a ka ná sa akwɛ́ n'i ǎ; a nǎ ɖi xɛsi nú nyɛ Mawu towe, bɔ nɔzo towe ná nɔ akpá towe.

³⁷ Nú akwɛ́ wɛ mi nya n'i hǔn, mi ma byɔ́ ɛ akwɛ́ví ó; é nyí nǔɖuɖu wɛ mi nya n'i hǔn, mi ma byɔ́ ɖɔ é ní ná émí d'é jí ó.

³⁸Nyɛ wɛ nyí Mawu Mavɔmavɔ, Mawu mitɔn. Nyɛ wɛ ɖe mi tɔ́n sín Ejípu, bó ná ná Kanáa to ɔ́ mi, bó ná nyí Mawu mitɔn.”

³⁹ “Nú to mitɔn mɛ nu ɖé jɛ ya mɛ, bó sɔ́ éɖée sa nú mi, bó ná nyí mɛsɛntɔ́ mitɔn ɔ́, mi ma zɔ́n kannumɔ zɔ́ ɛ ó.

⁴⁰Lo ɔ́, mi hɛn ɛ ɖi azɔ̌watɔ́ e ɖo azɔ̌ wa nú mi wɛ, bɔ mi ɖo axɔ́ sú i wɛ, abǐ jǒnɔ e ɖo mi gɔ́n ɔ́ ɖɔhun. É ná ɖo azɔ̌ wa nú mi wɛ káká jɛ ‘Awǎjijɛxwe’ ɔ́ mɛ.

⁴¹Xwe énɛ́ ɔ́ xwe ɔ́, mi ná jó e, bó ná jó vǐ tɔn lɛ́ɛ lɔmɔ̌. É ná lɛ́ kɔ yi hɛ̌n tɔn nu, bó ná yi tɔ́ tɔn lɛ́ɛ yíkúngban jí.

⁴²Đó mɛsɛntɔ́ ce e un ɖe sín Ejípu lɛ́ɛ wɛ; è nǎ sa yě kannumɔ ɖɔhun ǎ.

⁴³Mi ma hɛn yě syɛ́nsyɛ́n ó. Mi ná ɖi xɛsi nú nyɛ Mawu mitɔn.

⁴⁴“Nú mi ɖo kannumɔ ba wɛ ɔ́, akɔta e lɛ́ lɛ̌ dó mi lɛ́ɛ mɛ wɛ mi ná xɔ ɖe.

⁴⁵Mi sixú lɛ́ xɔ ɖo jǒnɔ e ɖo to mitɔn mɛ lɛ́ɛ sín vǐ lɛ́ɛ sí, abǐ jǒnɔ e kó húzú xwénu lɛ́ɛ sín vǐ lɛ́ɛ sí; yě ná nyí mitɔn.

⁴⁶É wá yá ɔ́, mi ná jó yě dó nú vǐ mitɔn súnnu lɛ́ɛ, bɔ yě ná ɖu gǔ yětɔn. Yě ná nyí vǐ mitɔn súnnu lɛ́ɛ tɔn. Yě ná nyí kannumɔ mitɔn káká sɔ́yi. Amɔ̌, mɛ ɖěbǔ ní má ɖo mi mɛ, bó hɛn nɔví tɔn Izlayɛ́li ví lɛ́ɛ ɖě syɛ́nsyɛ́n ó.

⁴⁷“Mǐ ní ɖɔ jǒnɔ e wá cí to mitɔn mɛ lɛ́ɛ ɖě jɛ dɔkun, bɔ nɔví mitɔn ɖě jɛ ya mɛ, bó sɔ́ éɖée sa n'i, abǐ é sɔ́ éɖée sa nú jǒnɔ e kó húzú xwénu lɛ́ɛ ɖě.

⁴⁸Ényí nǔ ɖo mɔ̌ ɔ́, to mitɔn mɛ nu énɛ́ ɔ́ ɖó acɛ bɔ è nǎ vɔ́ ɛ xɔ. Nɔví tɔn lɛ́ɛ ɖě sixú vɔ́ ɛ xɔ.

⁴⁹Nú nɔví tɔn ɖě má vɔ́ ɛ xɔ ǎ ɔ́, atagán tɔn abǐ ataví tɔn ɖé, abǐ vǐ yětɔn súnnu ɖé sixú vɔ́ ɛ xɔ; abǐ mɛ tɔn ɖěvo ɖé sixú vɔ́ ɛ xɔ. Nú é ɖésúnɔ ɖó hlɔ̌nhlɔ́n tɔn ɔ́, é sixú vɔ́ éɖée xɔ.

⁵⁰Nú è nǎ vɔ́ ɛ xɔ ɔ́, é kpó mɛ e xɔ ɛ ɔ́ kpó ná xa xwe nabí e é kó bló ɖo gɔ̌n tɔn ɔ́ kpó xwe nabí e kpo bɔ è nǎ byɔ́ ‘Awǎjijɛxwe’ ɔ́ mɛ é kpó. Xwe nabí e é bló ɔ́ wɛ è nǎ xwedó bó dó lɛ́n axɔ́ e é ná sú ɔ́. É ná lɛ́n akwɛ́ ɔ́ dó gbeɖokpókwɛ́ e è nɔ sú azɔ̌watɔ́ ɔ́ jí.

⁵¹Nú xwe e kpo bɔ è nǎ byɔ́ ‘Awǎjijɛxwe’ ɔ́ mɛ ɔ́ lɛ́ sukpɔ́ ɔ́, akwɛ́ e mɛ e xɔ ɛ ɔ́ su ɔ́ wɛ è nǎ kpɔ́n dó lɛ́n akwɛ́ nabí e è nǎ dó vɔ́ ɛ xɔ é.

⁵²Nú xwe nabí e kpo bɔ è nǎ byɔ́ ‘Awǎjijɛxwe’ ɔ́ mɛ ɔ́ má ká sɔ́ sukpɔ́ ǎ ɔ́, é ná lɛ́n akwɛ́ ɔ́, bó ná sú nabí e ná sɔgbe xá xwe nabí e kpo ɔ́.

⁵³Nú mɛɖé ma ka vɔ́ ɛ xɔ ǎ, bɔ é kpo ɖo gǎn tɔn ɔ́ xwé ɔ́, é ná nɔ́ mɔ ɛ dó mɔ azɔ̌watɔ́ e è nɔ sú axɔ́ xwe mɛ xwe mɛ ɔ́. Mi ma lɔn nú gǎn tɔn hɛn ɛ syɛ́nsyɛ́n ó.

⁵⁴Nú è ma vɔ́ to mitɔn mɛ nu ɔ́ xɔ ǎ káká bɔ ‘Awǎjijɛxwe’ ɔ́ wá ɔ́, è nǎ jó e, bó ná jó vǐ tɔn lɛ́ɛ.”

⁵⁵“Mi ná nɔ́ nyi sɛ́n énɛ́ lɛ́ɛ, ɖó mɛsɛntɔ́ ce lɛ́ɛ wɛ mi Izlayɛ́li ví lɛ́ɛ nyí. Mɛsɛntɔ́ ce e un ɖe tɔ́n sín Ejípu lɛ́ɛ wɛ mi nyí. Nyɛ wɛ nyí Mawu Mavɔmavɔ, Mawu mitɔn.”