Read fon Levíi ví 26 Bible Online

Levíi ví 26 - fon bible

Levíi ví 26

¹ “Mi ma lí vodún ó, mi ma kpa bǒcyɔ abǐ akpajlɛ́ awǐnnya e yě tun te bó nɔ sɛn lɛ́ɛ tɔn ó. Mi má zé awǐnnya e wú è ɖe nǔ dó é ɖěbǔ ɖó to mitɔn mɛ bó sɛn ó, ɖó nyɛ wɛ nyí Mawu Mavɔmavɔ, Mawu mitɔn.

²“Mi ná nɔ́ nyi gbɔjɛzán ce lɛ́ɛ, bó ná nɔ́ ɖó sísí nú xwé ce. Nyɛ wɛ nyí Mawu Mavɔmavɔ.”

³ “Ényí mi nɔ nyi sɛ́n ce lɛ́ɛ ɔ́, ényí mi nɔ kpé nukún dó nǔ e un zɔ́n mi lɛ́ɛ wú bó nɔ bló ɔ́,

⁴é su jǐ hwenu ɔ́, un ná nɔ́ sɛ́ jǐ dó mi, ayǐkúngban ɔ́ ná nɔ́ ná jinukún, atín e ɖo zunkan mɛ lɛ́ɛ ná nɔ́ sɛ́n.

⁵Mi ná nɔ ɖo jinukún só wɛ káká jɛ vǐwun gbigbɛ hwenu; mi ná ɖo vǐwun gbɛ wɛ káká jɛ nǔkúndídó hwenu. Mi ná nɔ́ ɖu nǔ gɔ́ xo; mi ná vo ɖo to mitɔn mɛ.

⁶Un ná bló bɔ ayi ná j'ayǐ nú mi ɖo to ɔ́ mɛ. Nú mi dɔ́ amlɔ zǎn mɛ ɔ́, mɛ ɖěbǔ ná wá dó tagba nú mi ǎ. Un ná bló bɔ adǎnkanlin lɛ́ɛ bǐ ná gosín to ɔ́ mɛ. È nǎ wá fun ahwan xá mi ɖo to mitɔn mɛ ǎ.

⁷Mi ná tɔ́n ahwan kɛntɔ́ mitɔn lɛ́ɛ; mi ná jɛ gǔdo yětɔn, bɔ yě ná j'ayǐ ɖo nukɔn mitɔn.

⁸Mi mɛ atɔ́ɔ́n ná jɛ kɛntɔ́ kanwe ko (100) gúdo, bɔ yě ná j'ayǐ ɖo nukɔn mitɔn, bɔ mi mɛ kanwe ko (100) ná jɛ kɛntɔ́ děgba we afɔwó (10.000) gúdo, bɔ yě ná j'ayǐ ɖo nukɔn mitɔn.

⁹Un ná kpé nukún dó mi wú. Un ná bló bɔ mi ná ji bó gba kún. Un ná hɛn akɔ e un jɛ xá mi ɔ́ ɖó te.

¹⁰Jinukún mitɔn lɛ́ɛ ná sukpɔ́ káká bɔ éé mi sɔ́ ɖ'ayǐ lɛ́ɛ ná vɔ cóbɔ ɖěvo ná tɔ́n ǎ; é ná wá byɔ́ ɖɔ mi ní bɛ́ xóxó lɛ́ɛ síin lɔ, bɔ éé tɔ́n yɔ̌yɔ́ lɛ́ɛ ná mɔ tɛn.

¹¹Un ná bló nɔtɛn ce mímɛ́ ɔ́ ɖó tɛ́ntin mitɔn, bó ná lɛ́ kɔ sín mi gúdo ǎ.

¹² Un ná nɔ tɛ́ntin mitɔn. Un ná nyí Mawu mitɔn, bɔ mi ná nyí togun ce.

¹³Nyɛ wɛ nyí Mawu Mavɔmavɔ, Mawu mitɔn e ɖe mi tɔ́n sín Ejípunu lɛ́ɛ to mɛ é, bónú mi ma sɔ́ nyí kannumɔ yětɔn ó. Nyɛ wɛ flí agban yětɔn e ɖo kɔ mitɔn jí ɔ́ gba, bó bló bɔ mi ná nɔ́ tɛ afɔ ayǐ bó gó.”

¹⁴“Lo ɔ́, ényí mi ma nɔ ɖótó mì ǎ ɔ́, ényí mi ma nɔ wa nǔ énɛ́ lɛ́ɛ e un zɔ́n mi lɛ́ɛ bǐ ǎ ɔ́,

¹⁵ényí mi hɔn sɛ́n ce lɛ́ɛ nyi gbě ɔ́, ényí mi gbɛ́ wǎn nú tito ce lɛ́ɛ káká bó má nɔ́ bló nǔ e un zɔ́n lɛ́ɛ ǎ, lobo gbɛ́ akɔ e un jɛ xá mi ɔ́,

¹⁶nǔ e un ná dó sin xá mi ɔ́ ɖíe: “Un ná dó xɛsi ɖaxó ɖé mi, mi ná xú gǒ bɔ avivɔ ná nɔ́ sin mi. Nǔ énɛ́ lɛ́ɛ ná zɔ́n bɔ nukún mitɔn lɛ́ɛ sɔ́ ná nɔ́ mɔ nǔ ganjí ǎ, gbɛ mitɔn ná blá wǔ. Mi ná nɔ́ dó jinukún nyi gle mitɔn lɛ́ɛ jí; lo ɔ́, mi ná nɔ́ mɔ ɖěbǔ ǎ, ɖó kɛntɔ́ mitɔn lɛ́ɛ wɛ ná nɔ́ bɛ́ nǔ e tɔ́n ɖ'é mɛ lɛ́ɛ bǐ.

¹⁷Un ná húzú kpan nukɔn mi, bɔ kɛntɔ́ mitɔn lɛ́ɛ ná ɖu ɖo mi jí. Mɛ e gbɛ́ wǎn nú mi lɛ́ɛ ná kpa acɛ nú mi, bɔ mɛ ɖěbǔ ná bó ma ɖo nyinya mi wɛ ǎ ɔ́, mi ná nɔ́ ɖo hinhɔn wɛ.

¹⁸“Ényí un wa mɔ̌ xá mi bɔ mi ma ɖótó mì ǎ jɛ́n wɛ ɔ́, un ná dɔn tó nú mi azɔn tɛ́nwe ɖó hwɛ e mi hu lɛ́ɛ wú.

¹⁹Hlɔ̌nhlɔ́n e mi ɖó bó dó ɖo go yí wɛ ɔ́, un ná gba bǐ dó; un ná bló bɔ jǐnukúnsin mitɔn ná syɛ́n gan ɖɔhun. Akú ná ɖó bɔ ayǐkúngban mitɔn ná xú ganvɔ ɖɔhun.

²⁰Mi ná zán hlɔ̌nhlɔ́n mitɔn dó wǔvɔ́; ayǐkúngban mitɔn ná ná jinukún ǎ. Atín e ɖo ayǐkúngban jí lɛ́ɛ ná sɛ́n ǎ.

²¹“Ényí mi lɛ́ fɔ́n gǔ dó jǐ ce, bó má ba ná ɖótó mì ǎ ɔ́, un ná dɔn tó nú mi azɔn tɛ́nwe d'é jí, bɔ é ná sɔgbe xá hwɛ e mi hu lɛ́ɛ.

²²Un ná sɛ́ gběkanlin lɛ́ɛ dó mi, bɔ yě ná hu vǐ mitɔn lɛ́ɛ, bó ná sú kanlin mitɔn lɛ́ɛ sín kún dó, bɔ é ná kpo mi mɛ kpɛɖé bɔ è sɔ́ ná mɔ mɛ ɖé ɖo ali mitɔn lɛ́ɛ jí ǎ.

²³“Ényí tó e un dɔn nú mi nɛ́ lɛ́ɛ má húzú mi ǎ ɔ́, ényí mi lɛ́ kpo ɖo gǔ fɔ́n dó jǐ ce wɛ jɛ́n wɛ ɔ́,

²⁴nyɛ ná fɔ́n gǔ dó mi jí, bó ná lɛ́ vɔ́ dɔn tó nú mi azɔn tɛ́nwe ɖó hwɛ e mi hu lɛ́ɛ wú.

²⁵Un ná bló bɔ è nǎ tɔ́n ahwan mi, bó ná dó ba hlɔn, ɖó akɔjijɛ ce e mi hɛn gba ɔ́ wú. Mi na bo hɔn yi cí toxo mitɔn e ahohó lɛ́ lɛ̌ dó lɛ́ɛ mɛ ɔ́, un ná nɔ́ sɛ́ jɛmɛjí dó tɛ́ntin mitɔn, bɔ kɛntɔ́ mitɔn lɛ́ɛ ná kpé mi wú.

²⁶Un ná tɛ nǔɖuɖu mi. Nyɔ̌nu wǒ wɛ ná ɖa wɔ̌xúxú mitɔn ɖo myɔkpó ɖokpó géé mɛ, bó ná bɛ́ wá nú mi, bɔ mi ná má, bɔ é ná hwe káká, bɔ mi ɖu ɔ́, mi ná gɔ́ xo ǎ.

²⁷“Ényí un dó nǔ énɛ́ lɛ́ɛ bǐ sin xá mi, bɔ mi ma ɖótó mì ǎ, bó lɛ́ ɖo gǔ fɔ́n dó jǐ ce wɛ jɛ́n wɛ ɔ́,

²⁸nyɛ ɖésúnɔ lɔmɔ̌ ná fɔ́n gǔ dó mi jí, kpó xomɛsin ɖé kpó, bó ná lɛ́ dɔn tó nú mi azɔn tɛ́nwe ɖó hwɛ e mi hu lɛ́ɛ wú.

²⁹Mi ná ɖu vǐ e mi ɖésúnɔ ji lɛ́ɛ sín lan.

³⁰Un ná gbɛ́ wǎn nú mi. Un ná gba vodún xwé mitɔn e ɖo só jí lɛ́ɛ; un ná mu vɔ̌sákpe e jí mi nɔ dó zǎlínkpɔ́n zo ɖe lɛ́ɛ. Un ná bɛ́ cyɔ mitɔn lɛ́ɛ kplé ɖó vodún mitɔn e è gba hánnyá lɛ́ɛ jí.

³¹Un ná bló bɔ toxo mitɔn lɛ́ɛ ná jɛ vɔ̌. Un ná gba vodúnxɔ mitɔn lɛ́ɛ hánnyá, bó sɔ́ ná se vɔ̌ wǎnɖagbenɔ mitɔn lɛ́ɛ ɖě sín wǎn ǎ.

³²Nyɛ ɖésú wɛ ná gba to ɔ́, bɔ é ná zɛ hǔn nú kɛntɔ́ mitɔn e ná wá nɔ to ɔ́ mɛ lɛ́ɛ ɖésú.

³³Midɛɛ lɛ́ɛ ɔ́, un ná gba mi dó gbɔn akɔta lɛ́ɛ mɛ, bɔ ahwan ná ɖo mi nya kpé wɛ. È nǎ gba to mitɔn, bɔ toxo mitɔn lɛ́ɛ ná jɛ vɔ̌.

³⁴“Énɛ́ ɔ́, xwe nabí e mi nǎ hɔn yi cí kɛntɔ́ mitɔn lɛ́ɛ to mɛ xɔ lɛ́ɛ bǐ ɔ́, to mitɔn e mi jó dó ɔ́ ná gbɔjɛ́ ɖó gbɔjɛ e mi má ná ɛ ɖ'ayǐ ǎ é tɛnmɛ.

³⁵Hǔn, ayǐkúngban mitɔn ná gbɔjɛ́ ɖó gbɔjɛ e mi ma ná ɛ, hwenu e mi ɖo to ɔ́ mɛ ǎ lɛ́ɛ tɛnmɛ.

³⁶“Mɛ e ná gán ɖo nǔ énɛ́ lɛ́ɛ mɛ ɖo mi mɛ, ɖo kɛntɔ́ mitɔn lɛ́ɛ sín tomɛ lɛ́ɛ ɔ́, un ná bló bɔ yě ná ɖo síja jí; jɔhɔn nyi bónú ama yǎyá ɖɔ nǔ ɔ́, yě ná hɔn. Yě ná hɔn káká bó ná j'ayǐ, ahwan wɛ ɖo yě nya wɛ ɖɔhun. Mɛ ɖé ká ɖo yě nya wɛ ǎ.

³⁷Yě ná nɔ xo za nú yěɖée ɖi ahwan wɛ ɖo yě nya wɛ ɖɔhun, có mɛɖé ká ɖo yě nya wɛ ǎ. Mi ná sixú nɔ te ɖo kɛntɔ́ mitɔn lɛ́ɛ nukɔn ǎ.

³⁸Mi ná kú jɛ mɛ ɖěvo tomɛ fí e mi ɖe lɛ́ɛ; kɛntɔ́ mitɔn lɛ́ɛ sín tomɛ wɛ è nǎ ɖi mi dó.

³⁹Mɛ e ná gán ɖo kɛntɔ́ sí ɖo mi mɛ lɛ́ɛ ná xú gǒ ɖo kɛntɔ́ yětɔn lɛ́ɛ sín tomɛ, ɖó hwɛ e yě hu lɛ́ɛ kpó hwɛ e tɔ́gbó yětɔn lɛ́ɛ hu lɛ́ɛ kpó wú.”

⁴⁰“Mɛ e ka ná gán lɛ́ɛ ná yí hwɛ e yě hu lɛ́ɛ kpó hwɛ e tɔ́gbó yětɔn lɛ́ɛ hu lɛ́ɛ kpó sín gbe. Yě ná yí agɔ e yě jɛ dó mì lɛ́ɛ, kpó gǔ e yě fɔ́n dó jǐ ce lɛ́ɛ kpó sín gbe.

⁴¹Yě ná mɔ ɖɔ hwɛ énɛ́ lɛ́ɛ e émí hu lɛ́ɛ wɛ zɔ́n bɔ nyɛ lɔmɔ̌ fɔ́n gǔ dó émí jí, bó kplá émí yi kɛntɔ́ émítɔn lɛ́ɛ sín tomɛ. Énɛ́ ɔ́, yě mɛ tótlítɔ́ énɛ́ lɛ́ɛ ná hwíhwɛ́ yěɖée, bó ná yí gbe nú tó e ná dɔn nú yě wɛ è ɖe ɖó hwɛ e yě hu ɔ́ wú é.

⁴² Un ná flín akɔ e un jɛ xá Jakɔ́bu, Izáki kpó Ablaxámu kpó é; un ná flín to ɔ́.

⁴³É ka ɖo mɔ̌ có to ɔ́ ná ko jɛ vɔ̌ hwɛ̌ bɔ ayǐkúngban ɔ́ ná gbɔjɛ́ bǐ. Énɛ́ ɔ́, sɛ́n ce e yě gba lɛ́ɛ kpó nǔ e un zɔ́n yě bɔ yě má wa ǎ lɛ́ɛ kpó ɔ́, un ná dɔn tó tɔn nú yě.

⁴⁴É ɖo mɔ̌ có, hwenu e yě ná ɖo kɛntɔ́ yětɔn lɛ́ɛ sín tomɛ ɔ́, un ná jó yě dó ɖó mɔ̌ nu ǎ; un ná ɖe kɔ sín yě wú ǎ; un ná sú kún yětɔn dó ǎ; un ná gba akɔ e un jɛ xá yě ɔ́ ǎ, ɖó nyɛ wɛ nyí Mawu Mavɔmavɔ, Mawu yětɔn.

⁴⁵Un ná flín akɔ e un jɛ xá tɔ́gbó yětɔn lɛ́ɛ ɔ́ ɖó ɖagbe yětɔn wú. Yě wɛ un ɖe tɔ́n sín Ejípu, ɖo akɔta ɖě lɛ́ɛ nukún mɛ, bó ná nyí Mawu yětɔn. Nyɛ wɛ nyí Mawu Mavɔmavɔ.”

⁴⁶Sɛ́n e Mawu Mavɔmavɔ dó nú Izlayɛ́li ví lɛ́ɛ, nǔ e é zɔ́n yě lɛ́ɛ, kpódó nǔ e é kplɔ́n yě lɛ́ɛ kpó gbɔn Mɔyízi jí ɖo Sinayíi só ɔ́ jí lɛ́ɛ nɛ́.