Read fon Levíi ví 27 Bible Online

Levíi ví 27 - fon bible

Levíi ví 27

¹Mawu Mavɔmavɔ ɖɔ nú Mɔyízi ɖɔ

²é ní ɖɔ nú Izlayɛ́li ví lɛ́ɛ ɖɔ: “Nú mɛɖé dó gbɛtɔ́ sín akpá nú nyɛ Mawu Mavɔmavɔ ɔ́, mɛ ɔ́ sixú ná akwɛ́, bó dó ɖe akpá e é dó ɔ́ ná.

³Akwɛ́ e é ná ná dó ɖe akpá e é dó ɔ́ ná ɔ́ ɖíe: “Nú súnnu sín akpá wɛ é dó, bɔ súnnu ɔ́ sín xwe bɛ́ sín xwe ko yi xwe kanɖé ko (60) ɔ́, gankwɛ́ kanɖé wǒ (50) wɛ é ná ná, bɔ gankwɛ́ ɖokpó ɖokpó ná sɔgbe xá éé è nɔ zán ɖo Mawu xwé gbe é.

⁴Nú é ká nyí nyɔ̌nu sín akpá wɛ é dó, bɔ nyɔ̌nu ɔ́ sín xwe bɛ́ sín ko yi kanɖé wǒ (50) ɔ́, é ná sú gankwɛ́ gban (30).

⁵“Nú é nyí ɖɔ yɔkpɔ́vú súnnu sín akpá wɛ é dó, bɔ vǐ ɔ́ sín xwe bɛ́ sín xwe atɔ́ɔ́n yi ko ɔ́, é ná sú gankwɛ́ ko. Nú é ká nyí yɔkpɔ́vú nyɔ̌nu sín akpá wɛ é dó, bɔ vǐ ɔ́ sín xwe bɛ́ sín atɔ́ɔ́n yi ko ɔ́, é ná sú gankwɛ́ wǒ.

⁶“Nú vǐ ɔ́ nyí súnnu, bɔ xwe tɔn bɛ́ sín sun ɖokpó yi xwe atɔ́ɔ́n ɔ́, é ná sú gankwɛ́ atɔ́ɔ́n. Nú é ká nyí nyɔ̌nu wɛ, bɔ xwe tɔn bɛ́ sín sun ɖokpó yi xwe atɔ́ɔ́n ɔ́, é ná sú gankwɛ́ atɔn.

⁷“Nú mɛ ɔ́ kó ɖó hú xwe kanɖé ko (60), bó nyí súnnu ɔ́, é ná sú gankwɛ́ afɔtɔn. Nú é ká nyí nyɔ̌nu wɛ ɔ́, é ná sú gankwɛ́ wǒ.

⁸“Nú mɛɖé má ɖó akwɛ́ nabí e xó è ɖɔ ɔ́ ǎ ɔ́, mɛ ɔ́ ɖó ná kplá mɛ e sín akpá é dó ɔ́ yi vɔ̌sánú-xwlémawutɔ́ ɔ́ gɔ́n, bɔ éyɛ́ ná kpɔ́n nabí e ɖo mɛ e d'akpá ɔ́ sí ɔ́, bó ná ɖɔ nabí e é ná sú ɔ́ n'i.

⁹“Nú é ká nyí ɖɔ kanlin sín akpá wɛ mɛ ɔ́ dó, bɔ kanlin ɔ́ sɔgbe xá éé è nǎ dó sá vɔ̌ nú Mawu Mavɔmavɔ ɔ́, hǔn kanlin ɔ́ húzú kanlin ɖeɖóvo.

¹⁰È ɖǒ acɛ bó sixú zé kanlin ɖěvo dó ɖyɔ́ ná ǎ. Nú kanlin ɔ́ nyí kanlin ɖagbe kpódó é má nyí ɖagbe kpó ɔ́, è ɖǒ ná ɖyɔ́ ǎ. Nú mɛɖé ká ɖyɔ́ jɛ́n wɛ ɔ́, hǔn kanlin we lɛ́ɛ bǐ húzú nyɛ Mawu Mavɔmavɔ ɔ́ tɔn.

¹¹“Nú kanlin ɔ́ ká nyí kanlin e vɛ́ mi, bɔ é má jɛ xá ɖɔ è nǐ zé dó sá vɔ̌ nú nyɛ Mawu Mavɔmavɔ ǎ ɔ́, kanlinnɔ ɔ́ ɖó ná kplá yi vɔ̌sánú-xwlémawutɔ́ ɔ́ gɔ́n,

¹²bɔ éyɛ́ ná kpɔ́n ɖɔ kanlin ɔ́ nyí kanlin ɖagbe abǐ kanlin blɔ̌ ɖo wǔ wɛ ají, bó ná sun axi ná; akwɛ́ e é ɖɔ ɔ́ wɛ mɛ ɔ́ ná sú.

¹³Nú ényí ɖɔ kanlinnɔ ɔ́ jló ná vɔ́ kanlin ɔ́ xɔ ɔ́, é ná sú akwɛ́ nabí e vɔ̌sánú-xwlémawutɔ́ ɔ́ ɖɔ ɔ́, bó ná ná akwɛ́ ɔ́ sín mǎ ɖó atɔ́ɔ́n d'é jí.

¹⁴“Nú mɛ ɖé sɔ́ xwé tɔn ɖó vo nú nyɛ Mawu Mavɔmavɔ ɔ́, vɔ̌sánú-xwlémawutɔ́ ɔ́ ná kpɔ́n ɖɔ xwé ɔ́ ɖo ganjí, abǐ nǔɖé jɛ do ɖ'é wú ají, bó ná sun axi ná; akwɛ́ nabí e é ɖɔ ɔ́ wɛ è nǎ sú dó xɔ xwé ɔ́.

¹⁵Nú mɛ e tɔn xwé ɔ́ nyí ɔ́ jló ná vɔ́ xwé tɔn xɔ ɔ́, é ná sú akwɛ́ nabí e vɔ̌sánú-xwlémawutɔ́ ɔ́ ɖɔ ɔ́, bó ná ná akwɛ́ ɔ́ sín mǎ ɖó atɔ́ɔ́n d'é jí, bɔ xwé ɔ́ ná húzú étɔn.

¹⁶“Nú mɛɖé sɔ́ gle tɔn ɖó vo nú nyɛ Mawu Mavɔmavɔ ɔ́, è nǎ kpɔ́n lě e ɔ́ji e è nǎ dó d'é jí ɔ́ ná sukpɔ́ gbɔn ɔ́, bó ná sun axi. Nú ɔ́ji ɔ́ yi kilóo afɔɖé kanwe ko (300) ɔ́, è nǎ nɔ́ sú gankwɛ́ kanɖé wǒ (50).

¹⁷Nú é nyí ɖɔ ‘Awǎjijɛxwe’ ɔ́ mɛ wɛ è sɔ́ gle ɔ́ ɖó vo nú nyɛ Mawu Mavɔmavɔ ɔ́, akwɛ́ nabí e xó è ko ɖɔ ɔ́ jɛ́n è nǎ sú.

¹⁸Nú ‘Awǎjijɛxwe’ ɔ́ ká kó wá yi cóbɔ è sɔ́ gle ɔ́ ɖó vo nú mì ɔ́, vɔ̌sánú-xwlémawutɔ́ ɔ́ ná kpɔ́n xwe nabí e kpo bɔ ‘Awǎjijɛxwe’ ɖěvo ná wá ɔ́, bó ná ɖe akwɛ́ ɔ́ kpo, bó lɛ́n.

¹⁹“Nú glenɔ ɔ́ jló ná vɔ́ gle tɔn xɔ ɔ́, é ná sú akwɛ́ e xó vɔ̌sánú-xwlémawutɔ́ ɔ́ ɖɔ ɔ́, bó ná ná akwɛ́ ɔ́ sín mǎ ɖó atɔ́ɔ́n d'é jí, bɔ gle ɔ́ ná lɛ́ nyí étɔn.

²⁰“Nú glenɔ ɔ́ má vɔ́ gle tɔn e é kó ɖe ɖó vo nú mì ɔ́ xɔ ǎ, bó ká sɔ́ sa xá mɛ ɖěvo ɔ́, é ɖésú sɔ́ ɖó acɛ bó ná vɔ́ xɔ ǎ.

²¹‘Awǎjijɛxwe’ ɔ́ mɛ ɔ́, gle énɛ́ ɔ́ ná húzú nyɛ Mawu Mavɔmavɔ tɔn, bó ná nyí vɔ̌sánú-xwlémawutɔ́ lɛ́ɛ tɔn; gle e è sɔ́ ɖó vo nú nyɛ Mawu Mavɔmavɔ bɔ é ná nyí ce káká sɔ́yi ɔ́ wɛ é ná nyí.

²²“Nú mɛɖé sɔ́ gle e é xɔ bɔ é má nyí gǔ tɔn wɛ é ɖu ǎ ɔ́ ɖó vo nú nyɛ Mawu Mavɔmavɔ ɔ́,

²³vɔ̌sánú-xwlémawutɔ́ ɔ́ ná kpɔ́n xwe nabí e kpo bɔ ‘Awǎjijɛxwe’ ɖěvo ná wá ɔ́, bó ná sun axi gle ɔ́, bɔ mɛ e sɔ́ gle ɔ́ ɖó vo nú mì ɔ́, ná sú akwɛ́ e xó è ɖɔ ɔ́ gbe nɛ́ gbe, gbe nɛ́ gbe. È nǎ sɔ́ akwɛ́ ɔ́ ɖó vo nú nyɛ Mawu Mavɔmavɔ.

²⁴Amɔ̌, nú é wá jɛ ‘Awǎjijɛxwe’ mɛ ɔ́, gle ɔ́ ná lɛ́ jɛ mɛ e tɔn é nyí jɛ nukɔn ɔ́ sí; é wɛ nyí mɛ e ɖu gǔ tɔn é.

²⁵“Ényí è sun axi nǔ lɛ́ɛ ɔ́, akwɛ́ e è nɔ zán ɖo Mawu xwé gbe ɔ́ wɛ è nǎ zě dó xɔ. Akwɛ́ ɔ́ ɖokpó nɔ́ da glǎmu wǒ.”

²⁶Mawu Mavɔmavɔ ɖɔ: “Mɛ ɖé má sɔ́ vǐ nukɔntɔn e kanlin tɔn ji ɔ́ ɖó vo nú nyɛ Mawu Mavɔmavɔ bó ɖɔ é ɖésú wɛ jló ó; ɖó nukɔn ví bǐ wɛ kó nyí nyɛ Mawu Mavɔmavɔ tɔn. É ná bó nyí nyibúví, abǐ gbɔ̌ví ɔ́, nyɛ Mawu Mavɔmavɔ tɔn wɛ é kó nyí.

²⁷Nú kanlin e vɛ́ yě ɔ́ sín vǐ wɛ ɔ́, è nǎ kpɔ́n akwɛ́ nabí e kanlin ví ɔ́ ná xɔ é, bɔ é jló kanlinnɔ ɔ́, é ná ná bó ná lɛ́ ná akwɛ́ ɔ́ vlɔ̌ ɖó atɔ́ɔ́n tɔn d'é jí dó vɔ́ kanlin ví ɔ́ xɔ. Nú é má vɔ́ xɔ ǎ ɔ́, vɔ̌sánú-xwlémawutɔ́ ɔ́ ná sa xá mɛ ɖěvo yí axi e é sun é.

²⁸ “Mɔ̌ ɖokpó ɔ́, nǔ e mɛɖé sɔ́ ɖó vo nú nyɛ Mawu Mavɔmavɔ ɔ́, è sixú sa ǎ, è ka sixú vɔ́ xɔ ǎ; é sixú nyí gbɛtɔ́, é sixú nyí kanlin, é sixú nyí gle. Hǔn nǔ e mɛɖé sɔ́ ɖó vo nú nyɛ Mawu Mavɔmavɔ ɔ́, é ná nyí ce káká sɔ́yi.

²⁹É ná bó nyí gbɛtɔ́ wɛ è sɔ́ ɖó vo nú nyɛ Mawu Mavɔmavɔ ɔ́, è sixú vɔ́ ɛ xɔ ǎ; hu jɛ́n è nǎ hu i.

³⁰ “Nǔ e nyɔ́ ɖo gle mɛ lɛ́ɛ bǐ sín mǎɖówǒ wɛ nyí nyɛ Mawu Mavɔmavɔ ɔ́ tɔn. É sixú nyí jinukún, é sixú nyí atínsínsɛ́n; nǔ wɛ nyí bɔ è sɔ́ ɖó vo nú nyɛ Mawu Mavɔmavɔ.

³¹Nú mɛɖé jló ná vɔ́ nǔ e sín mǎ ɖó wǒ é ná lɛ́ɛ ɖě xɔ ɔ́, mɛ ɔ́ ná ná akwɛ́ nabí e nǔ ɔ́ xɔ é, bó ná lɛ́ ná akwɛ́ ɔ́ vlɔ̌ ɖó atɔ́ɔ́n d'é jí.

³²Nyibú abǐ gbɔ̌ sín mǎ ɖó wǒ ɔ́, kanlinnɔ ɔ́ ná xa kanlin tɔn lɛ́ɛ; é ná xa wǒ wǒ, bó ka ná nɔ́ sɔ́ lɛ̌ngbɔ́nyitɔ́kpogɛ tɔn dó ɖó wuntun wǒgɔ́ lɛ́ɛ, bó ná sɔ́ ɖó vo nú nyɛ Mawu Mavɔmavɔ.

³³È nǎ kpɔ́n ɖɔ kanlin ɔ́ nyí kanlin ɖagbe abǐ nyanya bó ná ɖyɔ́ ǎ. Nú è ka sɔ́ kanlin ɖě dó ɖyɔ́ ɖě ɔ́, è ɖǒ ná sɔ́ kanlin we lɛ́ɛ bǐ ɖó vo nú nyɛ Mawu Mavɔmavɔ, è ká ná sixú vɔ́ ɖě xɔ ǎ.”

³⁴Sɛ́n e Mawu Mavɔmavɔ dó nú Izlayɛ́li ví lɛ́ɛ gbɔn Mɔyízi jí, ɖo Sinayíi só jí lɛ́ɛ nɛ́.