Read fon Levíi ví 6 Bible Online

Levíi ví 6 - fon bible

Levíi ví 6

¹Mawu Mavɔmavɔ ɖɔ nú Mɔyízi ɖɔ

²é ní ɖɔ nú Aalɔ́ɔn kpó vǐ tɔn súnnu lɛ́ɛ kpó ɖɔ: “Sɛ́n e ɖɔ xó dó vɔ̌ e è nɔ dó zo ɔ́ wú ɔ́ ɖíe: Vɔ̌ e è nɔ dó zo ɔ́ ná nɔ vɔ̌sákpe e jí è nɔ dó vɔ̌ zo ɖe ɔ́ jí zǎn mɛ, káká bɔ ayǐ ná hɔ́n, bɔ myɔ ɔ́ ɖó ná ɖo jiji wɛ ɖo vɔ̌sákpe ɔ́ jí.

³Vɔ̌sánú-xwlémawutɔ́ ɔ́ ná dó awu tɔn gaga ɔ́, bó ná dó gbagwé; lɛ̌ɛnkanvɔ wɛ è dǒ tɔ awu ɔ́. Myɔ e mɛ è dǒ vɔ̌ ɔ́ zo ɖe, ɖo vɔ̌sákpe ɔ́ jí ɔ́, é ná bɛ́ afín tɔn, bó ná kɔn ɖó vɔ̌sákpe ɔ́ kpá.

⁴Énɛ́ ɔ́ gúdo ɔ́, é ná ɖe awu tɔn lɛ́ɛ, bó ná dó ɖěvo lɛ́ɛ, bó ná ɖe afín ɔ́ sín fí e yě ɖó gɔnu ɖó é, bó sɔ́ ɖó tɛn mímɛ́ ɖé mɛ.

⁵Myɔ ɔ́ ná ɖo jiji wɛ ɖo vɔ̌sákpe ɔ́ jí; é ɖó ná cí ǎ. Zǎnzǎn tɛgbɛ lɛ́ɛ bǐ ɔ́, vɔ̌sánú-xwlémawutɔ́ ɔ́ ná nɔ́ to nakí d'é mɛ, bó ná nɔ́ to vɔ̌ e è nɔ dó zo lɛ́ɛ d'é jí, lobo ná dó kanlin e è dǒ sá kɔnɖókpɔ́ vɔ́ lɛ́ɛ sín jǒ lɛ́ɛ zo.

⁶Myɔ ná ɖo jiji wɛ hwebǐnu ɖo vɔ̌sákpe ɔ́ jí; é ɖó ná cí gbeɖé ǎ.”

⁷Mawu Mavɔmavɔ ɖɔ: “Sɛ́n e ɖɔ xó dó nǔníná jinukún tɔn lɛ́ɛ wú ɔ́ ɖíe: Aalɔ́ɔn sín vǐ súnnu lɛ́ɛ ná nɔ́ zé nǔníná jinukún tɔn lɛ́ɛ wá nú Mawu Mavɔmavɔ ɖo vɔ̌sákpe ɔ́ nukɔn.

⁸Vɔ̌sánú-xwlémawutɔ́ ɔ́ ná wún nǔníná ɔ́ sín linfín alɔgogo ɖokpó, bɔ è nǎ kó zé ami dó nya linfín ɔ́, bó ná zé zǎlínkpɔ́n e ɖo nǔníná ɔ́ jí é bǐ, bó ná dó bǐ zo ɖo vɔ̌sákpe ɔ́ jí, bɔ é ná nyí vɔ̌ wǎnɖagbenɔ e nyí flǐnnú nú Mawu Mavɔmavɔ é.

⁹Aalɔ́ɔn kpó vǐ tɔn súnnu lɛ́ɛ kpó ná ɖu nǔníná e ná kpo ɔ́. Yě ná dǒ tɔ́n mɛ có bó ɖu ǎ. Yě ná ɖu ɖo goxɔ ɔ́ sín kɔ́xota; ɖó tɛn mímɛ́ wɛ.

¹⁰Hǔn è nǎ dǒ tɔ́n mɛ có bó ɖa ǎ. Kanta e un ná yě ɖo nǔ e è nǎ mì bɔ è dǒ zo ɔ́ mɛ ɔ́ nɛ́. Nǔ mímɛ́ titewungbe ɖokpó wɛ nǔ énɛ́ ɔ́ nyí hwɛsɔ́kɛmɛvɔ́ abǐ hwɛxɔ́súsú vɔ́ ɖɔhun.

¹¹Aalɔ́ɔn ví súnnu lɛ́ɛ kɛ́ɖɛ́ wɛ ná ɖu, ɖó nǔníná énɛ́ ɔ́ e kpo ɔ́ wɛ nyí yětɔn káká sɔ́yi. Énɛ́ ɔ́ wú ɔ́, mɛ ɖěvo ɖěbǔ ɖ'alɔ wú ɔ́, mɛ ɔ́ ná húzú mɛ mímɛ́.”

¹²Mawu Mavɔmavɔ ɖɔ nú Mɔyízi ɖɔ:

¹³“Bɛ́ sín gbe e gbe è nǎ kɔn ami dó ta nú Aalɔ́ɔn kpó vǐ tɔn súnnu lɛ́ɛ kpó ɔ́, nǔníná jinukún tɔn sín linfín kilóo atɔn wɛ yě ná nɔ dó sá vɔ̌ ná gbe ɖokpó; yě ná nɔ́ zán linfín ɔ́ vlɔ̌ zǎnzǎn, vlɔ̌ gbadanu.

¹⁴Ami wɛ è nǎ dǒ nya linfín ɔ́ ná, bó dó ɖa wɔ̌xúxú tɔn ɖo nǔɖazɛ́n wɛnjɛ mɛ, bó ná hɛn wá. A nǎ fɛ́n wínníwínní, cóbó zé wá xwlé Mawu Mavɔmavɔ, bɔ é ná nyí nǔníná e sín wǎn nɔ́ nyɔ́ se n'i é.

¹⁵“Aalɔ́ɔn ví súnnu e è nǎ kɔn ami dó ta ná, bɔ é ná nɔ tɛn tɔn mɛ ɔ́, ná nɔ́ sá vɔ̌ énɛ́. Sɛ́n tɛgbɛ tɔn ɖé wɛ é nyí. Vɔ̌ ɔ́ blěbǔ tɔn wɛ è nǎ dó zo ɖo Mawu Mavɔmavɔ nukɔn.

¹⁶Hǔn, vɔ̌sánú-xwlémawutɔ́ sá nǔníná jinukún tɔn vɔ́ ɖěbǔ dó é ɖésúnɔ tamɛ ɔ́, blěbǔ tɔn wɛ è nǎ dó zo; è nǎ ɖu ɖěbǔ ǎ.”

¹⁷Mawu Mavɔmavɔ ɖɔ nú Mɔyízi ɖɔ,

¹⁸ní ɖɔ nú Aalɔ́ɔn kpó vǐ tɔn súnnu lɛ́ɛ kpó ɖɔ: “Sɛ́n e ɖɔ xó dó hwɛsɔ́kɛmɛvɔ́ wú ɔ́ ɖíe: fí e è nɔ gbo gbe kanlin e è nǎ dó sá vɔ̌ e è nɔ dó zo ɔ́ ɖe ɔ́, wɛ è nǎ gbo gbe kanlin e è nǎ dó sá hwɛsɔ́kɛmɛvɔ́ ɔ́ ɖe, ɖo Mawu Mavɔmavɔ nukɔn: nǔ mímɛ́ titewungbe ɖokpó wɛ é nyí.

¹⁹Vɔ̌sánú-xwlémawutɔ́ e ná xwlé kanlin e è dǒ sá hwɛsɔ́kɛmɛvɔ́ ɔ́ ná ɔ́ ná ɖu lan tɔn. É ná ɖu ɖo goxɔ ɔ́ sín kɔ́xota, ɖó tɛn mímɛ́ wɛ.

²⁰Nǔ ɖěbǔ yagba kanlin ɔ́ sín lan wú ɔ́, é ná húzú nǔ mímɛ́. Ényí kanlin ɔ́ sín hun kɔn nyi awu ɖé mɛ ɔ́, tɛn mímɛ́ mɛ wɛ è nǎ gbo fí e hun ɔ́ kɔn nyi ɔ́ nya ɖe.

²¹È nǎ gba kozɛ́n e mɛ è ɖa kanlin ɔ́ ɖe ɔ́. É ká nyí ganvɔzɛ́n mɛ wɛ è ɖa ɖe ɔ́, è nǎ sɔn ganjí, bó klɔ́ ganjí.

²²Mɛ e nyí súnnu ɖo hɛ̌nnu e nɔ wa vɔ̌sánú-xwlémawutɔ́ zɔ́ lɛ́ɛ mɛ lɛ́ɛ kɛ́ɖɛ́ wɛ ná ɖu kanlin ɔ́ sín lan. Nǔ mímɛ́ titewungbe ɖokpó wɛ é nyí.

²³Amɔ̌, kanlin e è nǎ dó sá hwɛsɔ́kɛmɛvɔ́ ná, bó ná hɛn hun tɔn wá goxɔ ɔ́ mɛ, bó ná dó súnsún hwɛ sín kɔ nú mɛ ɖo tɛn mímɛ́ ɔ́ mɛ ɔ́, è nǎ ɖu lan tɔn ɖěbǔ ǎ; zo wɛ è nǎ dó, bɔ é ná fyɔ́ bǐ.”