Read fon Jelemíi 1 Bible Online

Jelemíi 1 - fon bible

Jelemíi 1

¹Xó e Jelemíi Ilukyahu ví ɔ́ ɖɔ lɛ́ɛ wɛ ɖo wěma élɔ́ mɛ. Jelemíi ɔ́, vɔ̌sánú-xwlémawutɔ́ lɛ́ɛ sín hɛ̌nnu mɛ wɛ é jɔ ɖe. Anatɔ́ti toxo mɛ wɛ é nɔ́ nɔ, ɖo akɔta Bɛnjamɛ́ɛ tɔn sín ayǐkúngban jí.

² Xwe e xwe Joziyási Judáa xɔ́sú, Amɔ́ni ví ɔ́ ɖo xwe wǒ-atɔn bló ɖo gǎn jí é wɛ Mawu Mavɔmavɔ ɖɔ xó nú Jelemíi azɔn nukɔntɔn.

³ Mawu Mavɔmavɔ lɛ́ ɖɔ xó n'i hwenu e Yoyakímu Joziyási ví ɔ́ lɔ wá ɖo axɔ́sú ɖu ɖo Judáa to ɔ́ nu wɛ é. É ɖɔ xó n'i azɔn gǔdo gúdo tɔn ɔ́ hwenu e Sedesíyasi e nyí Joziyási ví ɖěvo ɔ́ lɔ wá ɖo axɔ́sú ɖu wɛ ɖo Judáa to ɔ́ nu ɔ́, ɖo xwe tɔn wǒ-ɖokpógɔ́ ɔ́ sín sun atɔ́ɔ́ngɔ́ ɔ́ mɛ. Hwenɛ́nu wɛ è kplá Jeluzalɛ́munu lɛ́ɛ yi kannumɔgbénu, bɔ axɔ́súɖuɖu Sedesíyasi tɔn fó.

⁴Xó e Mawu ɖɔ nú mì é ɖíe:

⁵“Cóbónú un ná bló we dó nɔ towe xomɛ ɔ́, un ko tunwun we; cóbónú a nǎ jɛ te sín nɔ towe xomɛ ɔ́, un ko sɔ́ we ɖó vo, bɔ a nǎ wa azɔ̌ nú mì; un sɔ́ we bɔ a nǎ nyí gbeyíɖɔ ce nú akɔta lɛ́ɛ.”

⁶Ée Mawu ɖɔ mɔ̌ ɔ́, un ɖɔ: “Yéége Aklúnɔ, Mawu Mavɔmavɔ, un ma nyɔ́ xó ɖɔ nɛ́! Yɔkpɔ́vú wɛ nú mì.”

⁷Bɔ Mawu Mavɔmavɔ ɖɔ nú mì ɖɔ: “Ma ɖɔ émí nyí yɔkpɔ́vú ó; mɛ e gɔ́n un ná sɛ́ we dó lɛ́ɛ ɔ́, a nǎ yi bǐ gɔ́n bó ná ɖɔ nǔ e un zɔ́n we lɛ́ɛ bǐ nú yě.

⁸Ma ɖi xɛsi nú yě ó, ɖó un ɖo kpɔ́ xá we; un ná hwlɛ́n we gán. Nyɛ Mawu Mavɔmavɔ wɛ ɖɔ mɔ̌ nú we.”

⁹Énɛ́ ɔ́, Mawu Mavɔmavɔ dlɛ́n alɔ, bó ɖó nu ce wú, bó ɖɔ nú mì ɖɔ: “Énɛ́! Un sɔ́ xó ce lɛ́ɛ dó nu towe mɛ.

¹⁰Kpɔ́n! Égbé din ɔ́, un sɔ́ we ɖó akɔta lɛ́ɛ kpó axɔ́súɖuto lɛ́ɛ kpó nu: un ná acɛ we bɔ a nǎ hɔn yě atín ɖɔhun, a nǎ mu yě zin dɛ́ atín ɖɔhun; a nǎ hɛn nǔ gblé, a nǎ dó nǔ ahannya; a nǎ gbá xɔ, a nǎ tun atín.”

¹¹Xó e Mawu Mavɔmavɔ lɛ́ ɖɔ nú mì ɔ́ ɖíe: “Jelemíi, étɛ́ mɔ wɛ a ka ɖe nɛ́?” Bɔ un yí gbe n'i ɖɔ amaditín sín ala wɛ, atín e nɔ ɖo gbesisɔ mɛ bó nɔ́ yá wǔ gba sɛ́ é.

¹²Bɔ Mawu Mavɔmavɔ ɖɔ nú mì ɖɔ: “A mɔ ganjí, ɖó un nɔ ɖo gbesisɔ mɛ, bɔ un ɖɔ nǔɖé ɔ́ un nɔ bló ɖ'é jí.”

¹³Mawu Mavɔmavɔ lɛ́ ɖɔ nú mì azɔn wegɔ́ ɖɔ: “Étɛ́ mɔ wɛ a ka ɖe nɛ́?” Bɔ un yí gbe n'i ɖɔ: “Un mɔ ganzɛ́n ɖokpó, bɔ nǔ e ɖ'é mɛ ɔ́ ɖo agbǎn hun wɛ. É nya dó kɛ́n sín totaligbé tunta mì.”

¹⁴Ée un ɖɔ mɔ̌ ɔ́, Mawu Mavɔmavɔ ɖɔ nú mì ɖɔ: “Totaligbé wɛ awě ná gosín bó ná wá gba mɛ e ɖo Judáa to ɔ́ mɛ lɛ́ɛ bǐ.

¹⁵Nyɛ Mawu Mavɔmavɔ ɖo ɖiɖɔ wɛ ɖɔ: Un ná ylɔ́ togun ɖěɖě e ɖo axɔ́súɖuto e ɖo totaligbé lɛ́ɛ mɛ lɛ́ɛ bǐ; yě ná wá bɔ axɔ́sú yětɔn lɛ́ɛ ɖokpó ɖokpó ná sɔ́ zinkpo tɔn ɖó Jeluzalɛ́mu toxo ɔ́ sín hɔntogbó lɛ́ɛ jí. Yě ná xá ahohó tɔn lɛ́ɛ, bó ná tɔ́n ahwan Judáa toxo lɛ́ɛ bǐ.

¹⁶Un na bló mɔ̌ dó dɔn tó nú toví lɛ́ɛ, ɖó hwɛ e yě hu ɔ́ wú: yě jǒ mì dó; yě dó zǎlínkpɔ́n zo nú vodún; yě ɖe kɔ́ nú nǔ e yě sɔ́ alɔ yě ɖésúnɔ tɔn dó bló lɛ́ɛ.

¹⁷Jelemíi, hwɛ ɔ́, sí te, sɔ́ nǔ bó ná yi ɖɔ nǔ e un zɔ́n we lɛ́ɛ nú yě. Ma ɖi xɛsi ɖo nukɔn yětɔn ó, é má nyí mɔ̌ ǎ ɔ́, un ná dó xɛsi we ɖo nukɔn yětɔn.

¹⁸Éɖíe, égbé din ɔ́, un ná hlɔ̌nhlɔ́n we bɔ a nǎ syɛ́n toxo e è mɛ ahohó lɛ́ lɛ̌ dó é ɖɔhun; a nǎ syɛ́n ahohó ɖɔhun; a nǎ syɛ́n gandotín ɖɔhun; a nǎ syɛ́n ganvɔdó ɖɔhun. Mɔ̌ wɛ a nǎ nɔ ɖo to ɔ́ bǐ nukɔn: Judáa xɔ́sú lɛ́ɛ, gǎn hɔn-yitɔ́ lɛ́ɛ, vɔ̌sánú-xwlémawutɔ́ lɛ́ɛ kpó toví lɛ́ɛ bǐ kpó nukɔn.

¹⁹Yě ná tɔ́n ahwan we, yě ká ná kpé wǔ we ǎ, ɖó un ɖo kpɔ́ xá we bó ná hwlɛ́n we gán. Nyɛ Mawu Mavɔmavɔ wɛ ɖɔ mɔ̌ nú we.”