Read fon Jelemíi 13 Bible Online

Jelemíi 13 - fon bible

Jelemíi 13

¹Mawu Mavɔmavɔ ɖɔ nú mì ɖɔ: “Yi xɔ gǒjíblánú ɖokpó lobo sin; ma ka zé dó sin mɛ ó.”

²Ée Mawu Mavɔmavɔ ɖɔ mɔ̌ ɔ́, un yi xɔ gǒjíblánú ɔ́ lě e é ɖɔ gbɔn ɔ́, bó sɔ́ sin.

³Mawu Mavɔmavɔ ka lɛ́ ɖɔ nú mì ɖɔ:

⁴“Đe gǒjíblánú e a xɔ bo sin ɔ́, bó yi Efláti tɔ ɔ́ nu, bó sɔ́ dó sónu mɛ.”

⁵Énɛ́ ɔ́, un ɖe gǒjíblánú ɔ́, bó sɔ́ yi sɛxwe ɖo Efláti tɔ ɔ́ nu, lě e Mawu Mavɔmavɔ ɖɔ nú mì gbɔn é.

⁶É kó lín ɖaxó, bɔ Mawu Mavɔmavɔ lɛ́ wá ɖɔ nú mì ɖɔ: “Sɔ́ nǔ bó yi Efláti tɔ ɔ́ nu, bó yi sɔ́ gǒjíblánú e un ɖɔ hwi sɔ́ sɛxwe é.”

⁷Bɔ un yi Efláti tɔ ɔ́ nu, bó kíjé fí e un zé gǒjíblánú ɔ́ sɛxwe ɖó é; un mɔ bó sɔ́, bɔ é kó gblé bǐ; è sɔ́ sixú zé dó wa nǔɖé ná ǎ.

⁸Mawu Mavɔmavɔ lɛ́ ɖɔ xó nú mì.

⁹Xó e é ɖɔ ɔ́ ɖíe: “Lě e gǒjíblánú ɔ́ gblé gbɔn ɔ́, mɔ̌ wɛ un ná kɔ́n wi sín ta nú Judáa bɔ é ná gblé; un ná kɔ́n wi ɖaxó e ɖo ta nú Jeluzalɛ́mu ɔ́ síin.

¹⁰Togun baɖabaɖa wɛ, é nɔ́ gbɛ́ gbe nú mì. Nǔ e é xwe ɔ́ wɛ é nɔ́ wa; é nɔ́ sɛn vodún: é nɔ́ xwlé vɔ̌sánú yě, é nɔ́ ɖe kɔ́ nú yě. Togun nɛ́ ɔ́ ní cí gǒjíblánú élɔ́ ɖɔhun; é má sɔ́ nyí nǔɖé wá nú gbeɖé ó.

¹¹Lě e è nɔ sin gǒjíblánú dó alin syɛ́nsyɛ́n ɔ́, mɔ̌ wɛ un dɔn Izlayɛ́li ví lɛ́ɛ kpódó Judáa ví lɛ́ɛ kpó dó wǔ syɛ́nsyɛ́n. Un bló mɔ̌ bónú yě ná nyí togun ce, bó sɔ́ nyǐkɔ ce yi jǐ, bó nyí susu ce, bó nyí acɔ́ɖónú ce. Lo ɔ́, yě ɖótó mì ǎ. Xó e nyɛ Mawu Mavɔmavɔ ɖɔ ɔ́ nɛ́.”

¹²Mawu ɖɔ nú mì ɖɔ: “A nǎ ɖɔ xó élɔ́ nú yě. Đɔ nú yě ɖɔ nyɛ Mawu Mavɔmavɔ, Mawu Izlayɛ́li tɔn ɖɔ: ‘Vɛ̌ɛn ná gɔ́ zɛ̌n bǐ.’ Énɛ́ ɔ́, yě ná ɖɔ nú we ɖɔ: ‘Mǐ tunwun ɖɔ vɛ̌ɛn ná gɔ́ zɛ̌n sín!’

¹³Yě ɖɔ mɔ̌ hǔn ɖɔ nú yě ɖɔ nyɛ Mawu Mavɔmavɔ ɖɔ: ‘Un na ná vɛ̌ɛn to élɔ́ mɛ nu lɛ́ɛ. Un na ná vɛ̌ɛn axɔ́sú e ɖo Davídi zinkpo jí é; un ná ná vɔ̌sánú-xwlémawutɔ́ lɛ́ɛ, bó ná ná gbeyíɖɔ lɛ́ɛ kpó Jeluzalɛ́munu lɛ́ɛ bǐ kpó, bɔ yě ná nu mú.

¹⁴Un na gba ta yětɔn ɖě dó ɖě wú. Un na dɔn tɔ́ kpó vǐ kpó sín ta kpé go. Un na jó yě ɖě dó ǎ; mɛɖé sín nǔ ká ná blá wǔ nú mì ǎ; kɛnklɛ́n ná nɔ mɛ ǎ; nǔ ɖěbǔ na ɖó mì te, bɔ un ná gɔn kún yětɔn sú dó ǎ. Xó e nyɛ Mawu Mavɔmavɔ ɖɔ ɔ́ nɛ́.’ ”

¹⁵Mi ɖótó te bó se xó e ɖɔ nú mì wɛ Mawu Mavɔmavɔ ɖe é; mi ma nɔ́ yi go ó. Mawu Mavɔmavɔ wɛ ɖo xó ɖɔ nú mi wɛ.

¹⁶Mi kpa susu nú Mawu Mavɔmavɔ, Mawu mitɔn cóbónú é ná dɔn mi dó ablu mɛ; mi kpa susu n'i cóbó ná jɛ afɔ gba dó só wú jí, ɖo ablu mɛ. Mi ná ɖo te kpɔ́n wěziza, Mawu Mavɔmavɔ ka ná sɔ́ dó húzú zǐnflú gɔngɔn, é ná sɔ́ dó húzú ablu ɖaxó.

¹⁷Ényí mi ma ɖótó Mawu ǎ ɔ́, un ná nɔ nǔglɔ́ bó ya avǐ, ɖó go e yí wɛ mi ɖe ɔ́ wú. Un ná kun ɖasin cɛɖɛcɛɖɛ, ɖó ahwan na wlí togun Mawu Mavɔmavɔ tɔn.

¹⁸Mawu ɖɔ nú mì ɖɔ: Jelemíi, ɖɔ nú axɔ́sú ɔ́ kpó na kpɔjitɔ́ ɔ́ kpó ɖɔ: “Mi jínjɔ́n kɔ́ mɛ! Đó jɛ̌gbákún e ɖo ta mitɔn e j'ayǐ.

¹⁹Toxo e ɖo to ɔ́ sín afɔligbé lɛ́ɛ bǐ sín hɔntogbó wɛ è sú bɔ mɛɖé sixú hun ǎ. Judáa to ɔ́ bǐ wɛ ahwan wlí, to ɔ́ jɛ vɔ̌ bǐ.”

²⁰“Jeluzalɛ́mu, jlɔ̌ kɔ bó kpɔ́n: kɛntɔ́ towe lɛ́ɛ gosín totaligbé jǎwe. Fítɛ́ togun e è zé dó así nú we ɔ́ ka ɖe? Fítɛ́ ahwan e a nɔ dó yi go na ɔ́ ka ɖe?

²¹Hwi ɖésú wɛ dɔn togun ɖé lɛ́ɛ dó gbɛ̌ mɛ. Hwenu e togun énɛ́ lɛ́ɛ ka ná sí te dó jǐ towe bó ná jɛ gǎn ɖu nú we jí ɔ́, étɛ́ a nǎ ɖɔ? Hwenɛ́nu ɔ́, a nǎ mɔ wǔvɛ́ nyɔ̌nu e jɛ flú mɛ é ɖɔhun.

²²A nǎ wá kanbyɔ́ hwiɖée ɖɔ: ‘Aniwú nǔ mɔ̌hun ká ɖo gbigbo mì wɛ?’ Tunwun ɖɔ hwɛ tobutóbú e a nɔ hu lɛ́ɛ wú wɛ. Hwɛ towe lɛ́ɛ wú wɛ è tún avɔ sín alin nú we ɖo togun mɛ. Hwɛ towe lɛ́ɛ wú wɛ è hwlɛ́n kan xá we.

²³Etiopíinu ɖé sixú ɖyɔ́ anyǔ tɔn a? Abǐ kpɔ sixú ɖyɔ́ hwɛkan tɔn a? Gbeɖé kpɔ́n! Ényí mɔ̌ hǔn, mi mɛ e nɔ ɖo nǔ nyanya wa wɛ lɛ́ɛ ɔ́, mi sixú wa nǔ ɖagbe ǎ.

²⁴Un ná gba mi dó gbɔn gbětótló mɛ jɔhɔn d'alɔ nǔywɛ́ mɛ, bó fúnfún ɖɔhun.

²⁵Nǔ e ɖo te kpɔ́n we ɔ́ nɛ́, nǔ e ná wa xá we wɛ un ɖe ɔ́ nɛ́! Đó a wɔn mì; a sɔ́ jiɖiɖe towe ɖó vodún jí.

²⁶Un na kplɔ́ avɔ towe dó jǐ káká yi nukún mɛ, bɔ mɛ bǐ ná mɔ hɛ̌n towe.

²⁷Yéége! A nɔ ɖo afɔ dó gbě wɛ, a nɔ ɖo axi ylɔ́ wɛ, a nɔ ɖo aga lɛ wɛ, winnyánú wɛ. Un mɔ vodún, nǔ baɖabaɖa lɛ́ɛ gbɔn só ta só ta; un mɔ gbɔn gle mɛ gle mɛ. Jeluzalɛ́mu, heelúnú tɛ́ ɖíe! A jlǒ ná slá wǔ nú hwiɖée ǎ! Káká jɛ hwetɛ́nu wɛ é ná lɛ́ nɔ mɔ̌ nú we yi jɛ?”