Read fon Jelemíi 14 Bible Online

Jelemíi 14 - fon bible

Jelemíi 14

¹Mawu Mavɔmavɔ ɖɔ xó nú Jelemíi dó akú e ɖó é wú.

²É ɖɔ n'i ɖɔ: “Judáa to ɔ́ ɖo aluwɛ mɛ; toxo tɔn lɛ́ɛ ɖo nǔwamɛxɔmɛ, wǔ kú yě, yě blá wǔ. Jeluzalɛ́mu ɖo xó sú wɛ bɔ gbe tɔn ɖo zɔ yi wɛ.

³Gǎn lɛ́ɛ nɔ sɛ́ mɛsɛntɔ́ yětɔn lɛ́ɛ dó tɔ nu, bónú yě ná yi dun sin, yě ká nɔ́ mɔ sin ɖě ɖo tɔ ɔ́ mɛ ǎ, yě nɔ́ yi flú, bó nɔ́ lɛ́ kɔ asígbá alɔgbá kpó winnyá kpó, lobo nɔ cyɔ́n alɔ nukún mɛ.

⁴Ayǐkúngban ɔ́ zɛ, ɖó jǐ kwín ɖokpó sɔ́ ja ɖo to ɔ́ mɛ ǎ. Awakanmɛ kú glesi lɛ́ɛ, bɔ yě nɔ́ cyɔ́n alɔ nukún mɛ.

⁵Zungbɔ́ e ɖo gběhan mɛ lɛ́ɛ ɖésúnɔ ji vǐ bó nɔ jó dó, ɖó ama ɖě sɔ́ ɖě ǎ.

⁶Tócí gbě tɔn lɛ́ɛ nɔ́ yi cí só jí, bó nɔ́ ɖo jɔ xwí wɛ avǔn gbě tɔn ɖɔhun. Yě nɔ́ ɖo nukún dó gbɛ mɛ kpɔ́n wɛ, bó nɔ́ ɖo gběhan bá wɛ, káká bɔ nukún yětɔn nɔ vɛ́.”

⁷Togun ɔ́ ɖɔ: “Mawu Mavɔmavɔ, ényí nǔ e mǐ wa nyi do lɛ́ɛ na bó ɖó hwɛ nú mǐ hǔn, kɛnklɛ́n bó kpɔ́n dó nyǐkɔ towe wú, bó bló gbɔn ɖě nú mǐ, ɖó agɔ e mǐ jɛ dó we lɛ́ɛ gégé; hwɛ wɛ mǐ hu dó we.

⁸Hwi mɛ e Izlayɛ́li ɖo nukún ɖó wɛ é, hwi mɛ e adǎn gbo e ɔ́, a nɔ ɖe e sín mɛ é ɔ́, étɛ́wú a ka ná cí jǒnɔ ɖɔhun din ɖo to ɔ́ mɛ? Étɛ́wú a nǎ cí alitanu e zǎn kú dó, bɔ é dɔ́ ayǐ bó fɔ́n bó ɖidó é ɖɔhun?

⁹Étɛ́wú a nǎ cí mɛ ma kpé nǔɖé wú ɖɔhun? Étɛ́wú a nǎ cí mɛ e è ylɔ́ ɖɔ nǔsúɖaxó, bɔ é má ká kpé nǔɖé wǔ bó ná hwlɛ́n mɛ gán ǎ é ɖɔhun? Mawu Mavɔmavɔ, a ka ɖo tɛ́ntin mǐtɔn sín! Towe wɛ mǐ nyí hǔn! Bo ma jó mǐ dó ó.”

¹⁰Xó e Mawu Mavɔmavɔ ɖɔ dó togun tɔn wú ɔ́ ɖíe, é ɖɔ: “Wezun kán yi dě yi dě wɛ nɔ víví nú yě. Yě nɔ́ sixú hwíhwɛ́ hǔn bó nɔ tɛndo ɖokpó mɛ ǎ.” Mawu Mavɔmavɔ ɖɔ mɔ̌ ɖó nǔ yětɔn nyɔ́ nukún tɔn mɛ ǎ; é wɔn hwɛ e yě hu lɛ́ɛ ǎ; é ná dɔn tó tɔn nú yě.

¹¹É ɖɔ nú mì ɖɔ: “Jelemíi, ma xo ɖɛ dó togun énɛ́ tamɛ ó;

¹²yě ná bó blá nu ɔ́, un ná ɖótó vosisa yětɔn ǎ. Yě ná bó sá vɔ̌ e è nɔ dó zo ɔ́, yě ná bó ná nǔ mì ɔ́, nǔ yětɔn ná nyɔ́ nukún ce mɛ ǎ. Đó un jló ná sɔ́ ahwan kpó adɔ kpó azɔn kpó dó fó xó yětɔn.”

¹³Ée Mawu ɖɔ mɔ̌ ɔ́, un ɖɔ: “Yéége! Aklúnɔ Mavɔmavɔ! Gbeyíɖɔ lɛ́ɛ ko ɖɔ nú yě ɖɔ hwi ɖɔ ahwan kún ná wá to yětɔn mɛ gbeɖé ó; adɔ kún ná tɔ́n ɖo to yětɔn mɛ gbeɖé ó. Yě ɖɔ nú yě ɖɔ hwi ɖɔ émí ná ayi j'ayǐ yě bɔ nǔ bǐ na vɔ́ ɖ'é wú.”

¹⁴Énɛ́ ɔ́ gúdo ɔ́, Mawu Mavɔmavɔ ɖɔ nú mì ɖɔ: “Gbeyíɖɔ énɛ́ lɛ́ɛ ɔ́, yě nɔ́ zé nyǐkɔ ce ɖó nu bo nɔ ɖó adingban nú mi. Nyi wɛ ka sɛ́ yě dó fí ɖé ǎ; un zɔ́n nǔɖé yě ǎ; un ka ɖɔ xó ɖě nǔ yě ǎ. Nǔ e yě nɔ́ mɔ bó nɔ́ ɖɔ lɛ́ɛ ɔ́, adingban kɛ́ɖɛ́ wɛ. Nǔ e ná wá jɛ, bɔ yě ɖɔ lɛ́ɛ bǐ wɛ nyí nǔ yǎyá; xó e jló yě ɔ́ wɛ yě nɔ́ kpa bó nɔ́ ɖɔ nú mi.

¹⁵Énɛ́ ɔ́ wú wɛ nyɛ Mawu Mavɔmavɔ ɖɔ: gbeyíɖɔ e un ma sɛ́ dó ǎ, bɔ yě ká nɔ́ ɖɔ xó dó nyǐkɔ ce mɛ, bó nɔ́ ɖɔ: ahwan ná byɔ́ to élɔ́ mɛ ǎ, adɔ ka ná tɔ́n ɖo fí ǎ lɛ́ɛ ɔ́, gbeyíɖɔ énɛ́ lɛ́ɛ ɔ́, ahwan ná ɖo yě hu wɛ, adɔ ná ɖo yě hu wɛ, káká bɔ yě bǐ nǎ vɔ.

¹⁶Mɛ e yě ká nɔ́ ɖó adingban ná lɛ́ɛ ɔ́, adɔ kpó ahwan kpó wɛ ná hu yě tɛ́ gbɔn Jeluzalɛ́mu sín ali lɛ́ɛ jí. Mɛ ɖěbǔ ná ɖe bó ná sɔ́ yě yi ɖi ǎ; è nǎ ɖi asi yětɔn lɛ́ɛ ǎ, è ka ná ɖi vǐ yětɔn súnnu abǐ nyɔ̌nu ǎ. Dǎka e yě nɔ́ xo ɔ́ yě ná sún sin tɔn.

¹⁷Jelemíi, ɖɔ nú yě ɖɔ émí ɖo avǐ ya wɛ ɖasin hoho zǎn kéze, magbokɔ. Đó è dó nǔ togun émítɔn bɔ é syɛ́n ɖésú, akpá ɖaxó wɛ jɛ wǔ tɔn,

¹⁸ɖɔ ée émí yi gle mɛ é ɔ́, ahwan ko hu gbɛtɔ́ kɔn nyi kpɔ́, émí wá toxo mɛ é ɔ́, adɔ ko hu gbɛtɔ́ tɛ́ kpaɖaɖa. Gbeyíɖɔ lɛ́ɛ kpó vɔ̌sánú-xwlémawutɔ́ lɛ́ɛ kpó ɖésú ɖo wezun jí ɖo to ɔ́ mɛ. Yě kún sɔ́ tunwun nǔ e wa wɛ yě ɖě ɔ́ ó.”

¹⁹Judáa togun ɔ́ ɖɔ: “Mawu, a jǒ mǐ dó bǐ wɛ a? Wǎn wɛ a gbɛ́ nú Sinyɔ́ɔ ɔ́ din a? Étɛ́wú a ka gblé wǔ mǐ, bɔ akpa jɔmakú jɛ mǐ wǔ lě? Ayi j'ayǐ ɖó nukún wɛ mǐ ɖe, nǔ ɖagbe ɖě ká ɖo wǐwá wɛ ǎ. Azɔn mǐtɔn ní gbɔ ɖó nukún wɛ mǐ ɖe, awě kɛ́ɖɛ́ wɛ ká ɖo mǐ xo wɛ.

²⁰Mawu Mavɔmavɔ, mǐ tunwun ɖɔ mǐ xo dǎka, mǐ tunwun ɖɔ tɔ́gbó mǐtɔn lɛ́ɛ wa nǔ nyi do. Mǐ lɔ hu hwɛ dó we.

²¹Kpɔ́n dó nyǐkɔ towe wú, bó má jó mǐ dó ó. Ma sɔ́ axɔ́súzinkpo towe susunɔ ɔ́ xo kɔ́ ó. Ma wɔn akɔ e a jɛ xá mǐ ɔ́ ó; ma hɛn gblé ó.

²²Vodún e togun ɖě lɛ́ɛ nɔ sɛn ɔ́ ɖě nɔ́ ná jǐ a? Abǐ jǐnukúnsin wɛ nɔ́ ná jǐ a? É má nyí hwɛ Mawu Mavɔmavɔ, Mawu mǐtɔn ɔ́ wɛ nɔ ná a ce? Mǐ ɖo nukún ɖó we wɛ, ɖó hwi wɛ nɔ bló nǔ énɛ́ lɛ́ɛ bǐ.”