Read fon Jelemíi 15 Bible Online

Jelemíi 15 - fon bible

Jelemíi 15

¹ Mawu Mavɔmavɔ ɖɔ nú mì ɖɔ: “Mɔyízi kpó Samuwɛ́li kpó ná bó wá sa vo nú mì dó togun élɔ́ tamɛ ɔ́, un ná húzú nǔ e un lin ná wá xá togun élɔ́ ɔ́ ǎ. Jelemíi, nya yě sín nukɔn ce, yě ní yi.

² Nú yě kan byɔ́ we ɖɔ: ‘Fítɛ́ mǐ ká ná yi’ hǔn, ɖɔ nú yě ɖɔ nyɛ Mawu Mavɔmavɔ ɖɔ: ‘Mɛ e ná kú lɛ́ɛ ná kú; mɛ e ahwan ná hu lɛ́ɛ ɔ́, ahwan ná hu; mɛ e ná kú adɔ lɛ́ɛ ɔ́, ná kú adɔ; mɛ e ahwan ná wlí lɛ́ɛ ɔ́, ahwan ná wlí.’

³“Awě alɔkpa alɔkpa ɛnɛ wɛ un ná sɛ́ dó yě. Un ná sɛ́ ahwan dó yě, bɔ ahwan ná hu yě. Un ná sɛ́ cukú dó yě, bɔ cukú ná dɔn lan yětɔn gbɔn kɔ́ mɛ. Un ná sɛ́ xɛ e nɔ sá nǔ lɛ́ɛ dó yě; un ná sɛ́ adǎnkanlin lɛ́ɛ dó yě; yě ná vún lan yětɔn ɖu, bó ná sú kún yětɔn dó.

⁴ Énɛ́ ɔ́, nú togun e ɖo ayǐkúngban ɔ́ jí lɛ́ɛ mɔ yě lě ɔ́, xɛsi ná jɛ yě jí, bɔ yě ná jɛ sísɔ́sísɔ́ jí. Nǔ e Manasée, Judáa xɔ́sú, Ezekiyási ví ɔ́ dó sin ɖo Jeluzalɛ́mu ɔ́, nǔ e ná gbo yě ɖ'é mɛ ɔ́ nɛ́.”

⁵Mawu Mavɔmavɔ ɖɔ: “Jeluzalɛ́mu, mɛ̌ nǔ towe ká ná blá wǔ ná? Mɛ̌ ká ná ví we? Mɛ̌ ká ná jɛ tagba bó ná kan we byɔ́?

⁶A jǒ mì dó, a lɛ̌ kɔ sín gúdo ce. Amɔ̌, alɔ ce jɛ wǔ towe; un ná sú kún towe dó; fí e un kú nú blá wǔ nú we yi jɛ ɔ́ kpé.

⁷Jeluzalɛ́mu, vǐ towe lɛ́ɛ ɔ́, jinukún ɖɔhun wɛ un ná fún yě, ɖo to ɔ́ sín toxo lɛ́ɛ ɖokpó ɖokpó mɛ, bó ná gba yě dó. Un ná tɛ ví yě bó ná vɔ kún yětɔn. Đó yě lɛ́ kɔ sín hwɛ yětɔn lɛ́ɛ gúdo ǎ.

⁸Asúkúsi towe lɛ́ɛ sukpɔ́ hú kɔ́ e ɖo xutó é. Hwemɛ cíɖíɖí wɛ awě xo nyɔ̌nu e ɖó vǐ wínnyáwínnyá bɔ yě yi ahwan fun gbe lɛ́ɛ. Un dó xɛsi ɖaxó ɖé yě ajijimɛ.

⁹Nyɔ̌nu e ji vǐ tɛ́nwe ɔ́ ba éɖée kpo; gbɛ tɔn sɔ́ nyí nǔɖé wa nǔ ǎ; kéze kpo ɖo te bɔ hwe tɔn cí. É ɖu winnyá, bó flú. Jeluzalɛ́mu, vǐ towe e kpó ɖo gbɛ lɛ́ɛ ɔ́, un ná jó yě, bɔ yě ná kú ɖo ahwangbénu ɖo kɛntɔ́ yětɔn lɛ́ɛ nukɔn; Xó e nyɛ Mawu Mavɔmavɔ ɖɔ ɔ́ nɛ́.”

¹⁰Nɔ ce, adǎn nǎ gbo mì wú wɛ a ji mì a! Mɛ bǐ wɛ gbɛ́ wǎn nú mì ɖo to ɔ́ bǐ mɛ, bó nɔ́ ɖo xó ba mì wɛ. Un nya nǔɖé ɖo mɛɖé sí ǎ, un ka yí nǔɖé ɖo mɛɖé sí ǎ, nǔ ɖo mɔ̌ có, mɛ bǐ gbɛ́ wǎn nú mì.

¹¹Mawu Mavɔmavɔ ka ɖɔ: “Un zin alɔ dó akɔ́n ɖɔ un ná hwlɛ́n we gán, bɔ nǔ na nyɔ́ nú we. Un zin alɔ dó akɔ́n ɖɔ hwenu e nukún ná myá kɛntɔ́ towe lɛ́ɛ, abǐ hwenu e yě ná ɖo aluwɛ mɛ ɔ́, yě ná wá sa vo nú we.

¹²Gan ɖě sixú hɛn ganwlíwlí wɛ́n a? Gan ɖě sixú hɛn ganvɔ wɛ́n a?”

¹³Mawu ɖɔ: “Judáa, nǔ e nyí towe lɛ́ɛ, dɔkun towe lɛ́ɛ ɔ́, un ná jó bǐ nú kɛntɔ́ vɔ̌nu, bɔ kɛntɔ́ ná vɔ bǐ, ɖó hwɛ e a hu gbɔn ayǐ towe lɛ́ɛ bǐ jí lɛ́ɛ wú.

¹⁴Un ná jó we nú kɛntɔ́, bɔ a nǎ nɔ kɛntɔ́ kan nu, ɖo to e a ma tunwun ǎ ɔ́ mɛ. Đó xomɛ sin mì, bɔ xo ce mɛ nɔ hun agbǎn; un ná fyɔ́ we.”

¹⁵Mawu Mavɔmavɔ, hwi wɛ tunwun nǔ bǐ! Ma wɔn mì ó, ba hlɔn nú mì ɖo kɛntɔ́ ce lɛ́ɛ gɔ́n. A yá wǔ sin xomɛ dó mɛ e ɖo ya dó nú mì wɛ lɛ́ɛ ǎ, énɛ́ wɛ zɔ́n bɔ un ɖo wǔvɛ́ mɔ wɛ. Ma lɔn nú é nɔ mɔ̌ sɔ́ yi ó. Mawu Mavɔmavɔ, a tunwun ɖɔ hwi wú wɛ un ɖo winnyá élɔ́ lɛ́ɛ bǐ mɔ wɛ.

¹⁶Nú xó ɖé tɔ́n sín nu towe mɛ bó jɛ tó ce mɛ lě ɔ́, tlóló jɛ́n un nɔ wɔ ɖu; xó towe nɔ́ dó xomɛhunhun nú mì, bó nɔ ná awǎjijɛ mì. Mawu Mavɔmavɔ, Mawu Nǔbǐwúkpétɔ́, nyǐkɔ towe wɛ ɖo wǔ ce.

¹⁷Un yi jínjɔ́n mɛcákotɔ́ lɛ́ɛ sín ahwan mɛ ǎ; un yi jínjɔ́n ahwan yětɔn mɛ, bó j'awǎ xá yě ǎ. A zě hlɔ̌nhlɔ́n towe dó ɖe mì ɖó zɔ nú yě, ɖó xomɛsin towe gɔ́ ayi ce.

¹⁸Étɛ́wú ya ce ma ka ná gbokɔ ǎ? Étɛ́wú akpa ce ka ɖo nǔ wa xá mì wɛ, bó má ka ná kú ǎ? Mawu Mavɔmavɔ, a na wa yɛ nú mì tɔ e wú è nɔ ɖeji dó bó ká nɔ́ yi ba sin kpo ɖ'é mɛ é ɖɔhun wɛ a?

¹⁹Ée un ɖɔ mɔ̌ ɔ́, Mawu Mavɔmavɔ ɖɔ nú mì ɖɔ: “Ényí a lɛ́ kɔ wá ɔ́, un ná yí we, bɔ a nǎ nɔ wa azɔ̌ nú mì. Ényí a ɖo gbesisɔ mɛ bó ná nɔ́ ɖɔ xójɔxó, bó ná jó xógblóɖiɖɔ dó ɔ́, a nǎ lɛ́ nyí gbeyíɖɔ ce. Amɔ̌, hwi wɛ ka na lɛ́ kɔ yi Judáanu lɛ́ɛ gɔ̌n ǎ, yě wɛ na lɛ́ kɔ wá gɔ̌n towe.

²⁰Un na bló bɔ a nǎ syɛ́n ɖo nukɔn yětɔn; a nǎ cí ganvɔdó ɖɔhun, yě ná tɔ́n ahwan we, yě ká ná kpé wǔ we ǎ. Đó un ɖo kpɔ́ xá we, bó ná hwlɛ́n we; un yí we sín fɛ́n yětɔn mɛ. Xó e nyɛ Mawu Mavɔmavɔ ɖɔ ɔ́ nɛ́.

²¹Un nǎ hwlɛ́n we gǎn sín mɛdídá lɛ́ɛ lɔ mɛ; un ná ɖe we sín dǎkaxotɔ́ lɛ́ɛ lɔ mɛ.”