Read fon Jelemíi 19 Bible Online

Jelemíi 19 - fon bible

Jelemíi 19

¹Mawu Mavɔmavɔ ɖɔ nú Jelemíi ɖɔ: “Yi zɛ̌nmɛtɔ́ xwé bó xɔ tɔyizɛ́n ɖokpó, bó kplá tomɛxó ɖé lɛ́ɛ kpó vɔ̌sánú-xwlémawutɔ́ ɖé lɛ́ɛ kpó,

² lobo gbɔn Zɛ̌nxwɛ Hɔntogbó ɔ́ sín ali nu, bó yi Hinnɔ́ɔ tɔdo mɛ. A jɛ dɔ̌n ɔ́, a na ɖɔ xó e un ná ɖɔ nú we ɔ́.

³A nǎ ɖɔ: Judáa xɔ́sú e mi, Jeluzalɛ́munu e mi, mi ɖótó xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́, é ɖɔ: Un ná dó nǔ nyanya ɖé sin ɖo to élɔ́ mɛ, bɔ mɛɖé se ɔ́ tó tɔn ná sú gbɔn.

⁴Yě jǒ mì dó; yě hɛn tɛn élɔ́ mɛ gblé; yě hɛn gblé káká bɔ è mɔ ɔ́, è sɔ́ tunwun ɖɔ tɛn élɔ́ wɛ ǎ; yě dǒ zǎlínkpɔ́n zo nú vodún lɛ́ɛ ɖo fí. Yě ká tunwun vodún énɛ́ lɛ́ɛ kpɔ́n ǎ; tɔ́gbó yětɔn lɛ́ɛ tunwun ǎ; axɔ́sú Judáa tɔn lɛ́ɛ lɔ ka tunwun ǎ, yě kɔn xomɛvɔ́nɔ sín kanjɔ kɔn nyi ayǐ ɖo fí, bɔ é sa tɔ.

⁵ Yě lí vodún Baalu, bó nɔ dó vǐ yětɔn lɛ́ɛ zo dó sá vɔ̌ n'i. Nyɛ zɔ́n nǔ mɔ̌hunkɔtɔn kpɔ́n gbeɖé ǎ; un ka ɖɔ xó tɔn nú mɛɖé ǎ; ayixa mɔ̌hunkɔtɔn ká wá xo ce mɛ lɔ gbeɖé ǎ.

⁶“Énɛ́ ɔ́ wú wɛ nyɛ Mawu Mavɔmavɔ ɖɔ é ná jɛ hwe ɖé nu, bɔ è sɔ́ ná ylɔ́ fí élɔ́ ɖɔ ‘Tafɛ́ti’ abǐ ‘Hinnɔ́ɔ tɔdo’ ɖě ǎ. Lo ɔ́, è nǎ nɔ ylɔ́ ɖɔ: ‘Mɛ huhu tɔdo’.

⁷Un ná zin toxóɖɔgbɛ́ Judáa tɔn kpó Jeluzalɛ́mu tɔn kpó dɛ́. Un ná sɛ́ kɛntɔ́ yětɔn lɛ́ɛ dó, bɔ yě ná tɔ́n ahwan yě bó hu yě. Un ná zɔ́n mɛ e ma mɔ yě gbɔ ǎ lɛ́ɛ, bɔ yě ná hu yě; un ná ná cyɔ yětɔn aklasú lɛ́ɛ kpó ayǐsájɛ lɛ́ɛ kpó, bɔ yě ná vún ɖu.

⁸Un ná wa nǔ xá toxo élɔ́, bɔ mɛ e na mɔ lɛ́ɛ ɔ́ ná sɔ́ alɔ ɖó nu. Mɛ e ɖo dǐndín wɛ lɛ́ɛ mɔ ɔ́, avuvɔfún ná blá yě, yě ná sá heelú.

⁹Kɛntɔ́ e ɖo kú yětɔn ba wɛ lɛ́ɛ ná xá toxo yětɔn bó ná tɔ́n ahwan yě. Ya ná blá ta nú mɛ e ɖo toxo ɔ́ mɛ lɛ́ɛ, káká bɔ yě ná nɔ ɖu vǐ yě ɖésúnɔ tɔn lɛ́ɛ, bó ná nɔ́ vún nɔzo yětɔn lɛ́ɛ ɖu.

¹⁰“A ɖɔ mɔ̌ ɔ́, a na hɛn tɔyizɛ́n ɔ́ gba, ɖo mɛ e kpó hwi kpó zɔn wá lɛ́ɛ nukún mɛ,

¹¹bó ná ɖɔ nú yě ɖɔ: Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe, é ɖɔ: Un ná gba togun élɔ́ kpó toxo élɔ́ kpó tɔyizɛ́n ɖɔhun, bɔ xó bǐ ná fó. “Tafɛ́ti fí wɛ è na ɖi cyɔ lɛ́ɛ ɖó, ɖó tɛn sɔ́ ná tíin ɖo fí ɖěvo ǎ.

¹²Mɔ̌ wɛ un na bló gbɔn xá toxo élɔ́ kpó mɛ e ɖo toxo ɔ́ mɛ lɛ́ɛ kpó. Un ná húzú toxo ɔ́, bɔ é ná cí Tafɛ́ti tɔdo élɔ́ ɖɔhun. Xó e nyɛ Mawu Mavɔmavɔ ɖɔ ɔ́ nɛ́.

¹³Xwé e ɖo Jeluzalɛ́mu lɛ́ɛ kpó Judáa xɔ́sú lɛ́ɛ sín xwé kpó ná húzú nǔ blíblí Tafɛ́ti tɔdo élɔ́ ɖɔhun, ɖó xwé énɛ́ lɛ́ɛ bǐ sín xɔ ta wɛ yě nɔ́ dó zǎlínkpɔ́n zo nú nǔɖíɖó sɛ́xwé tɔn lɛ́ɛ gbɔn, bó nɔ́ ba ahan nú vodún lɛ́ɛ gbɔn.”

¹⁴Jelemíi lɛ́ kɔ sín Tafɛ́ti tɔdo mɛ, fí e Mawu Mavɔmavɔ sɛ́ ɛ dó ɖɔ é ní yi ɖɔ xó dó nyǐkɔ émítɔn mɛ ɖe é; ée é lɛ́ kɔ wá ɔ́, é cí kɔ́xota ɖo Mawu Mavɔmavɔ xwé ɔ́ gbe, bó ɖɔ nú togun ɔ́ bǐ ɖɔ:

¹⁵“Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ ɖíe, é ɖɔ: ‘Nǔ e un ɖɔ un na dó sín xá toxo élɔ́ kpó toxo e lɛ́ lɛ̌ dó e lɛ́ɛ kpó ɔ́, un na dó bǐ sin xá yě. Đó yě ci ta mɛ; yě ɖótó xó ce ǎ.’ ”