Read fon Jelemíi 20 Bible Online

Jelemíi 20 - fon bible

Jelemíi 20

¹Vɔ̌sánú-xwlémawutɔ́ Pacehúu, Imumɛ́ɛ ví ɔ́ wɛ kpa acɛ dó mɛ e nɔ kpé nukún dó Mawu Mavɔmavɔ xwé ɔ́ wú lɛ́ɛ nu; é se xó énɛ́ lɛ́ɛ e gbeyíɖɔ Mawu tɔn Jelemíi ɖɔ é.

²Ée é se ɔ́, é wlí Jelemíi bó nyi zo n'i, bó blá ɛ dó atín wú. Atín ɔ́ ɖo hɔntogbó e è nɔ ylɔ́ ɖɔ Bɛnjamɛ́ɛ Hɔntogbó ɔ́ kpá. Hɔntogbó ɔ́ ɖo aga, ɖo Mawu Mavɔmavɔ xwé gbe.

³Ayǐhɔ́ngbe tɔn ɔ́, Pacehúu tún Jelemíi, bɔ Jelemíi ɖɔ n'i ɖɔ: “Pacehúu wɛ nyí nyǐkɔ e Mawu Mavɔmavɔ ná we é ǎ, ‘Xɛsiɖofíbǐ’ wɛ nyǐkɔ towe nyí.

⁴Đó Mawu Mavɔmavɔ ɖɔ: ‘Un ná dó xɛsi nú we; un ná dó xɛsi nú hwi kpó xɔ́ntɔn towe lɛ́ɛ bǐ kpó. Kɛntɔ́ yětɔn lɛ́ɛ ná tɔ́n ahwan yě bó hu yě, bɔ a nǎ mɔ kpó nukún towe kpó. Un na jó Judáa to ɔ́ bǐ nú Babilɔ́nu xɔ́sú ɔ́, bɔ é ná wlí ahwankannumɔ yětɔn yi to tɔn mɛ, abǐ é ná hu yě ɖó hwǐ wú.

⁵Dɔkun e nyí toxo élɔ́ tɔn lɛ́ɛ, nǔ e toxo élɔ́ jɛ dɛ̌n lobo wa lɛ́ɛ, nǔ e vɛ́ nú toxo élɔ́ lɛ́ɛ kpó dɔkun e nyí Judáa xɔ́sú lɛ́ɛ tɔn lɛ́ɛ kpó ɔ́, un ná jó bǐ nú kɛntɔ́ yětɔn lɛ́ɛ, bɔ yě ná bɛ́ bǐ hɛn yi Babilɔ́nu.

⁶Pacehúu, ahwan ná wlí hwi kpó mɛ e ɖo xwé towe gbe lɛ́ɛ bǐ kpó yi Babilɔ́nu; a nǎ kú ɖo dɔ̌n, bɔ è nǎ ɖi we. È nǎ ɖi xɔ́ntɔn towe lɛ́ɛ ɖó dɔ̌n. Xɔ́ntɔn towe énɛ́ lɛ́ɛ e a ɖǒ adingban ná ɖɔ xó e Mawu sɔ́ dó nu nú émí ɔ́ ɖɔ nú yě wɛ émí ɖe lɛ́ɛ.’ ”

⁷Mawu Mavɔmavɔ, a ɖɔ xó nú mì káká, bɔ un gbɔ bo jó gbe. A hɛn mì kpó hlɔ̌nhlɔ́n kpó, a hú gǎn mì. Ayǐ hɔn tɛgbɛ ɔ́, un nɔ nyí nǔkiko; mɛ bǐ wɛ nɔ gbɔ aca ta ce.

⁸Un hun nu ce hweɖěbǔnu bó ja xó ɖɔ gbé ɔ́, xó wɛ un nɔ sú bó nɔ ɖɔ è ɖo alǎnnú wa wɛ! Un nɔ sú xó bó nɔ ɖɔ è ɖo nǔ hɛn gblé wɛ! Ayǐhɔ́ngbe ayǐhɔ́ngbe ɔ́, un nɔ dó wɛn towe yě. Un ka dó ɔ́, yě nɔ́ cá mì ko; yě nɔ́ bɔ zun nyi gǒ mɛ nú mì.

⁹Ényí un ɖɔ nú nyiɖée ɖɔ: “Din ɔ́, un sɔ́ ná sɔ́ Mawu Mavɔmavɔ xó dó hǔn mɛ ɖě ǎ, un sɔ́ ná ɖɔ xó ɖě dó nyǐkɔ tɔn mɛ ǎ.” Un ɖɔ mɔ̌ ɔ́, é nɔ́ cí ɖɔ myɔ wɛ ɖo xo ce mɛ, bó ɖo jiji wɛ ɖɔhun, bɔ un nɔ tɛ́nkpɔ́n bó ná dɛ ɖ'é nu, un ka nɔ kpé wú ǎ.

¹⁰Mɛ gěgé ɖo xó nyanya ɖɔ dó wǔ ce wɛ, bɔ un se. Yě nɔ́ ylɔ́ mì ɖɔ: “Xɛsiɖofíbǐ.” Mɛ ɖé lɛ́ɛ nɔ́ ɖɔ: “Mǐ ní ɖe e gba!” Mɛ ɖěvo lɛ́ɛ nɔ́ ɖɔ: “Nǔgbó wɛ, mǐ ní ɖe e gba!” Xɔ́ntɔn ce lɛ́ɛ ɖésú nɔ́ ɖo cícɔ́ mì wɛ, bó ná kpɔ́n ɖɔ nyi ná ɖe afɔ nyi do a jí. Yě nɔ́ ɖɔ: “É lóó ká jɛ mɛ, nú mǐ nǎ bló n'i nɛ́! Mǐ nǎ ba hlɔn.”

¹¹Lo ɔ́, Mawu Mavɔmavɔ, a dǒ hlɔ̌nhlɔ́n, bó ɖo ahwan fun nú mì wɛ. Yě mɛ e ɖo ya dó nú mì wɛ lɛ́ɛ ɔ́, yě wɛ ná klɛ́n afɔ. É ná gbo dó yětɔn jí ǎ. Yě ná ba nu tɔn kpo bó ɖu winnyá; wi ná kɔ́n sín ta nú yě káká sɔ́yi; mɛ ɖěbǔ ná wɔn ǎ.

¹²Mawu Mavɔmavɔ Nǔbǐwúkpétɔ́, a nɔ gbéjé gbɛtɔ́ kpɔ́n. A nɔ mɔ nǔ jɛ mɛ xomɛ, a nɔ tunwun nǔ e lin wɛ gbɛtɔ́ ɖe ɖo ayi tɔn mɛ é. Un na kpɔ́n lě e a nǎ ba hlɔn nú mì gbɔn é, ɖó hwi wɛ un jó gbɛ ce ná.

¹³Mi ji han bó kpa Mawu Mavɔmavɔ, ɖó é hwlɛ́n lelenɔ sín mɛdídá lɛ́ɛ fɛn mɛ.

¹⁴ Heelú azǎn e gbe è ji mì é; azǎn e gbe nɔ ce ji mì ɔ́, mɛɖé ní má ɖɔ azǎn énɛ́ ɔ́ sín nǔ ɖagbe ó.

¹⁵Heelú mɛ e yi dó wɛn tɔ́ ce ɖɔ è ji vǐ súnnu ɖokpó n'i bɔ xomɛ hun i é.

¹⁶Mɛ énɛ́ ní cí toxo e Mawu Mavɔmavɔ vívá kún ná, bɔ é ma ka sɔ́ wá vɛ́ n'i ǎ é ɖɔhun. Zǎnzǎn ɔ́, gbɛvíhan wɛ é ná se. Hwe mɛ ɔ́, ahwan zǐngídi wɛ é ná se.

¹⁷Nú gbɔ wɛ è ko gbɔ bo hu mì dó nɔ ce xo mɛ ɔ́, é ná nyɔ́! Nɔ ce na ko húzú yɔdo ce, lobo ná hɛn mì dó adɔgo tɔn mɛ káká sɔ́yi.

¹⁸Étɛ́wú un ka tɔ́n sín xo tɔn mɛ bó wá ɖo wǔvɛ́ kpó aluwɛ kpó mɛ lě? Étɛ́wú un tɔ́n sín xo tɔn mɛ bó wá ɖo hɛ̌n ɖu wɛ lě?