Read fon Jelemíi 22 Bible Online

Jelemíi 22 - fon bible

Jelemíi 22

¹Mawu Mavɔmavɔ ɖɔ nú Jelemíi ɖɔ: “Yi Judáa xɔ́sú ɔ́ hɔnmɛ; a jɛ dɔ̌n ɔ́, a nǎ ɖɔ xó.

²A nǎ ɖɔ: ‘Judáa xɔ́sú, ɖǒtó xó e Mawu Mavɔmavɔ ɖɔ é. Hwi mɛ e ɖo axɔ́sú Davídi zinkpo jí é, gǎn hɔn-yitɔ́ towe lɛ́ɛ, togun towe kpó mi mɛ e nɔ gbɔn hɔntogbó élɔ́ lɛ́ɛ nu, bó nɔ́ byɔ́ hɔn ɔ́ mɛ lɛ́ɛ kpó, mi bǐ ní ɖótó xó e Mawu Mavɔmavɔ ɖɔ é!’

³É ɖɔ mi wa nǔ kpó hwɛjijɔ kpó, mi wa nǔ ɖó sɛ́nxwi jí. Mi hwlɛ́n mɛ e dó ya ná wɛ è ɖe é gán ɖo mɛ e ɖo ya dó n'i wɛ é lɔ mɛ. Mi ma dó ya nú jǒnɔ ó; mi má dó ya nú tɔ́cyɔvǐ ó; mi ma ka do ya nú asúkúsi ó. Mi ma xo dǎka yě wú ó; mi má sɔ́ kɔn xomɛvɔ́nɔ ɖé sín kanjɔ kɔn nyi ayǐ ɖo fí ó.

⁴É ɖɔ nú mǐ bló mɔ̌ ɔ́, axɔ́súzinkpo Davídi tɔn kún ná nɔ vɔ̌ gbeɖé ó, axɔ́sú e ɖo zinkpo ɔ́ jí ɔ́ na nɔ zɔn sɔ́ jí, abǐ kɛkɛ́ví mɛ, bó ná nɔ gbɔn hɔntogbó élɔ́ lɛ́ɛ nu. Gǎn hɔn-yitɔ́ Judáa tɔn lɛ́ɛ lɔ ná nɔ́ gbɔn hɔntogbó lɛ́ɛ nu, bɔ togun ɔ́ lɔ ná nɔ́ gbɔn hɔntogbó lɛ́ɛ nu.

⁵ Amɔ̌, é ɖɔ nú mi ma ka ɖótó xó émítɔn ǎ ɔ́, xwé élɔ́ bǐ ná gba hánnyá; xó e Mawu Mavɔmavɔ xwlé é ɖésúnɔ bó ɖɔ ɔ́ nɛ́.

⁶“Xó e Mawu Mavɔmavɔ ɖɔ dó Judáa xɔ́sú ɔ́ sín hɔnmɛ wú ɔ́ ɖíe: Galadi zungbó ɖɔhun wɛ a cí ɖo nukún ce mɛ nǔgbó; a cí Libáan só ɖɔhun ɖo nukún ce mɛ nǔgbó. Amɔ̌, din ɔ́, un ná sɔ́ we dó húzú gbětótló, toxo e mɛ mɛɖé má ɖe ǎ é.

⁷Un sɛ́ kɛntɔ́, nǔhɛngblétɔ́ ɖé lɛ́ɛ dó we, bɔ yě bǐ ná hɛn ahwanfunnú yětɔn yětɔn; yě ná gbo sɛ́dlutín ɖagbe ɖagbe lɛ́ɛ, bó dó zo.

⁸“Akɔta gěgé ná gbɔn toxo élɔ́ mɛ, bó ná nɔ ɖɔ nú yěɖée ɖɔ: ‘Étɛ́wú Mawu Mavɔmavɔ ka wa toxo ɖaxó élɔ́ sín nǔ gbɔn lě?’

⁹Bɔ è nǎ yí gbe nú yě ɖɔ: ‘Akɔ e Mawu Mavɔmavɔ, Mawu yětɔn jɛ xá yě bɔ yě má nɔ́ nɔ gbejí ná ǎ ɔ́ wú wɛ nǔ cí mɔ̌. Yě jɛ kpo ɖo vodún lɛ́ɛ nukɔn bó sɛn yě.’ ”

¹⁰Judáanu e mi, axɔ́sú Joziyási kú, mi ma ka ví i ó; mi ma sa vo dó ta tɔn mɛ ó. Lo ɔ́, mi ví axɔ́sú Calúmu; éyɛ́ xweyǐgbe, é sɔ́ ná lɛ́ kɔ wá to e mɛ è ji i ɖe é gbeɖé ǎ.

¹¹ É wɛ jɛ tɔ́ tɔn Joziyási e ma sɔ́ ɖo fí din ǎ é sín do mɛ. Mawu Mavɔmavɔ ɖɔ dó wǔ tɔn ɖɔ: “É sɔ́ ná lɛ́ kɔ wá gbeɖé ǎ.

¹²É ná kú ɖo fí e ahwan wlí i xwe é; é sɔ́ ná mɔ to tɔn kpɔ́n gbeɖé ǎ.”

¹³Mawu ɖɔ: “Heelú we Yoyakímu, a ɖo xwé ɖagbe gbá nú hwiɖée wɛ; a ka nɔ xwedó hwɛjijɔ ǎ. A nɔ ɖo xwé ɖě gbá ɖó ɖě jǐ wɛ, mɛ wɛ a ka nɔ táfú dó gbá xwé towe lɛ́ɛ. A nɔ sɔ́ mɛ lɛ́ɛ dó wa azɔ̌ ná, a ka nɔ sú axɔ́ yě ǎ; yě nɔ́ wa azɔ̌ nú we vɔ̌nu.

¹⁴A ɖɔ: ‘Un ná mɛ hɔnmɛ ɖokpó, bɔ xɔ e ná nɔ aga lɛ́ɛ ná gbló ɖésú.’ A tɔ́n flɛtɛ́li d'é wú kɔn nyi kpɔ́, a tɛ́ sɛ́dlu xwlɛ d'é wú gbɔn fí bǐ, bó sá sɛn vɔvɔ d'é wú.

¹⁵A jlǒ na ɖé xlɛ́ ɖɔ émí nyí axɔ́sú wú wɛ a yí wǎn nú sɛ́dlutín a? A jlǒ na ɖé xlɛ́ ɖɔ émí gbɔn vo nú mɛ ɖě lɛ́ɛ wú wɛ a yí wǎn nú sɛ́dlutín a? Hwenu e tɔ́ towe ɖo zinkpo ji ɔ́, é nɔ ɖu nǔ ǎ cé? É nɔ́ nu ahan ǎ cé? É ká nɔ́ xwedó hwɛjijɔ lě e un ba gbɔn ɔ́, bɔ nǔ nyɔ́ n'i.

¹⁶É nɔ́ gbo hwɛ nú wamamɔnɔ lɛ́ɛ kpó lelenɔ lɛ́ɛ kpó, bɔ nǔ nyɔ́ n'i. Mɛ e ɖo nǔ wa gbɔn mɔ̌ wɛ ɔ́, é ɖo ɖiɖe xlɛ́ wɛ ɖɔ émí tunwun mì ganjí. Xó e nyɛ Mawu Mavɔmavɔ ɖɔ ɔ́ nɛ́.

¹⁷Amɔ̌, hwɛ ɔ́, nǔ e ná wa ɖagbe nú hwi ɖokpó ɔ́ jɛ́n nɔ myá nukún nú we. Lě e a na wa gbɔn bó hu xomɛvɔ́nɔ ɔ́ jɛ́n nɔ ɖo ayi mɛ nú we; lě e a nǎ xo dǎka, lobo táfú mɛ gbɔn ɔ́ te jɛ́n a nɔ ɖe.”

¹⁸ Énɛ́ wú wɛ nyɛ Mawu Mavɔmavɔ ɖɔ dó Judáa xɔ́sú Yoyakímu, Joziyási ví ɔ́ wú ɖɔ: “É kú ɔ́, mɛɖé ná ví i ɖo yɔdo tɔn nu ǎ. Mɛ ɖé ná ɖɔ: ‘Yéége nɔví ce!’ ‘Áo gǎn ce!’ ‘Áo sɛ́mɛɖó ce!’ È nǎ se mɔ̌ ǎ.

¹⁹È nǎ ɖi i kanlin ɖɔhun. È nǎ dɔn ɛ gbɔn kɔ́ mɛ, bó dɔn ɛ nyi Jeluzalɛ́mu toxo ɔ́ gúdo.”

²⁰Mawu ɖɔ: “Jeluzalɛ́mu, yi Libáan sókan mɛ bó sú xó, yi Basáni sókan mɛ bó sú cáxóxowǒóo, yi Avalímu sókan mɛ bó dó axwá, ɖó mɛ e yi wǎn nú we lɛ́ɛ bǐ wɛ è gblé gbɛ dó ná.

²¹Hwenu e ayi towe j'ayǐ ɔ́, un ɖó afɔ afɔ jí nú we, a ka ba na se xó ce ǎ. Mɔ̌ bló wɛ a ɖe sín vǔ, bó se xó ce nǔgbó ǎ.

²²Mɛ e nyí gǎn lɛ́ɛ ɔ́, jɔhɔn ná za yě; ahwan ná wlí mɛ e yí wǎn nú we lɛ́ɛ bǐ. Énɛ́ ɔ́, a na ɖu winnyá, wi towe ná kɔ́n, ɖó dǎka e a xo lɛ́ɛ wú.

²³Égbé din ɔ́, a nɔ nɔ Libáan sókan mɛ, a xo adɔ̌ towe nyi sɛ́dlutín jí aga ɖéé; amɔ̌, hwenu e wǔvɛ́ ná wá fyán we ɔ́, a nǎ jɛ aɖǔkún ɖu jí. A nǎ mɔ wǔvɛ́ nyɔ̌nu jɛ flú mɛ ɖɔhun.”

²⁴ Mawu Mavɔmavɔ ɖɔ nú Jelemíi ɖɔ é ní ɖɔ nú Yoyakini Judáa xɔ́sú, Yoyakímu ví ɔ́ ɖɔ: “A na bo cí alɔkɛ́ e nɔ ɖo alɔ aɖisí nú mɛ bɔ è nɔ dó ɖó wuntun nǔ ná ɔ́ ɖɔhun nú mì ɔ́, un na ɖe we sín alɔ.

²⁵Un na jó we nú mɛ e ɖo kú towe ba wɛ lɛ́ɛ. Un ná jó we nú mɛ e nukɔn a nɔ sísɔ́ ɖe lɛ́ɛ. Un na jó we nú Nabukodonɔzɔ́ɔ, Babilɔ́nu xɔ́sú ɔ́ kpó ahwanfuntɔ́ tɔn lɛ́ɛ kpó.

²⁶Un ná nya we; un ná nya hwi kpó nɔ towe kpó sɛ́ dó to e mi ma tunwun ǎ é mɛ, bɔ mi bǐ nǎ kú ɖo dɔ̌n.

²⁷Mi yi to ɔ́ mɛ ɔ́, to mitɔn mɛ ná jló mi. Mi ka ná sixú lɛ́ kɔ wá ǎ.”

²⁸È na nɔ kanbyɔ́ ɖɔ: “Étɛ́! Yoyakini sín nǔ wɛ è wa zɛ̌n ɖɔhun mɔ̌ a? Nǔ tɔn wɛ è wa zɛ̌n ɖé ján ɖɔhun kpowun mɔ̌ a? Zɛ̌n tló ɖé kpowun abǐ nǔ ma xɔ akwɛ́ ɖé kpowun ɖɔhun mɔ̌ a? Étɛ́wú è ka sɔ́ é kpó vǐ tɔn lɛ́ɛ kpó nyi dó gbě? Étɛ́wú è sɔ́ yě nyi dó to e yě ma tunwun ǎ é mɛ?”

²⁹Áo to ce! To ce! Đǒtó Mawu Mavɔmavɔ!

³⁰Mawu Mavɔmavɔ ɖɔ: “Mi wlán nya élɔ́ sín nyǐkɔ dó wěma mɛ, mi wlán: ‘É ji vǐ kpɔ́n ǎ. É xo gbɛ tɔn kpo.’ Mi ná wlán mɔ̌, ɖó vǐ tɔn lɛ́ɛ ɖěbǔ ná yi axɔ́súzinkpo Davídi tɔn jí, bó ná ɖu axɔ́sú ɖo Judáa ǎ.”