Read fon Jelemíi 23 Bible Online

Jelemíi 23 - fon bible

Jelemíi 23

¹Mawu Mavɔmavɔ ɖɔ: “Heelú lɛ̌ngbɔ́nyitɔ́ e má nɔ́ kpé nukún dó lɛ̌ngbɔ́ ce lɛ́ɛ wú ǎ, bɔ yě gba dó lɛ́ɛ.

²Énɛ́ ɔ́ wú wɛ nyɛ Mawu Mavɔmavɔ, Mawu Izlayɛ́li tɔn ɖɔ xó dó lɛ̌ngbɔ́nyitɔ́ énɛ́ lɛ́ɛ wú; un ɖɔ: ‘Mi gba lɛ̌ngbɔ́ ce lɛ́ɛ dó, mi nya yě. Mi kpé nukún dó yě wú ǎ. Énɛ́ wú ɔ́, un na dɔn tó nú mi, ɖó dǎka mitɔn lɛ́ɛ wú.’ Xó e nyɛ Mawu Mavɔmavɔ ɖɔ ɔ́ nɛ́.

³“Lɛ̌ngbɔ́ ce e kpo lɛ́ɛ ɔ́, nyɛ ɖésú ná yi xo yě kplé gbɔn to e mɛ un fúnfún yě gbɔn lɛ́ɛ mɛ. Un na kplá yě wá kpó yětɔn mɛ, bɔ yě ná ji, bó ná gba kún.

⁴Un na fɔ lɛ̌ngbɔ́nyitɔ́ ɖagbe ɖó lɛ̌ngbɔ́ ce lɛ́ɛ nu, bɔ yě ná nɔ kplá yě yi amagbo mɛ, yě sɔ́ ná ɖi xɛsi nú nǔɖé ǎ; awě ɖě sɔ́ ná xo yě ǎ, yě ɖěbǔ ná hwe ǎ. Xó e nyɛ Mawu Mavɔmavɔ ɖɔ ɔ́ nɛ́.”

⁵ Mawu Mavɔmavɔ ɖɔ: “Ayǐ ɖé ná wá hɔ́n, bɔ un na bló bɔ vǐ ayijlɔ́jlɔ́nɔ ɖokpó ná jɔ ɖo Davídi kún mɛ. É ná ɖu axɔ́sú ɖo to mɛ fí; é ná ɖó nǔnywɛ́. É ná nɔ xwedó hwɛjijɔ; é ná nɔ́ wa nǔ ɖó sɛ́nxwi jí.

⁶Axɔ́sú énɛ́ hwenu ɔ́, Judáa ví lɛ́ɛ ná mɔ hwlɛngán, Izlayɛ́li ví lɛ́ɛ ná vo ɖo to yětɔn mɛ; è nǎ nɔ́ ylɔ́ axɔ́sú énɛ́ ɔ́ ɖɔ: ‘Mawu Mavɔmavɔ wɛ nyí hwlɛngán mǐtɔn.’

⁷“Mawu Mavɔmavɔ ɖɔ gbe ɖokpó ná wá su, bɔ mɛɖé sɔ́ ná xwlé nǔ dó nyǐkɔ ce mɛ ɖɔ: ‘Un xwlé Mawu Mavɔmavɔ nú we, é wɛ ɖe Izlayɛ́li ví lɛ́ɛ tɔ́n sín Ejípu’ ǎ.

⁸Lo ɔ́, è nǎ ɖɔ: ‘Un xwlé Mawu Mavɔmavɔ nú we, é wɛ ɖe Izlayɛ́li ví lɛ́ɛ tɔ́n sín to e ɖo taligbé ɔ́ mɛ, bó ɖe yě tɔ́n sín to ɖěvo e mɛ é gba yě dó gbɔn lɛ́ɛ bǐ mɛ bɔ yě lɛ́ kɔ wá to yětɔn mɛ.’ ”

⁹Xó e è ɖɔ dó gbeyíɖɔ Mawu tɔn nyí jɛ tɔ́ lɛ́ɛ wú lɛ́ɛ: Ayi ce bǐ wɛ gbadó ɖo xomɛ; xú ce bǐ xo to ɖo lanmɛ. Un cí ahannumúnɔ ɖɔhun, mɛ e nu ahan gɔ́ xo e ɖɔhun. Un cí mɔ̌, ɖó Mawu Mavɔmavɔ wú, ɖó xó e Mawu Mavɔmavɔ ɖɔ lɛ́ɛ wú. Nǔ e è nɔ ɖɔ dó gbeyíɖɔnyíjɛtɔ́ lɛ́ɛ wu ɔ́ ɖíe:

¹⁰“Mɛ e nɔ dó afɔ gbě lɛ́ɛ wɛ gɔ́ to ɔ́. To ɔ́ bǐ ɖo aluwɛ mɛ, ɖó Mawu dó nu to ɔ́. Ayǐkúngban wɛnjɛ e ɖo gbětótló mɛ é bǐ xú; nǔ nyanya wiwa wɛ yě nɔ́ hwlɛ́n dó, nǔ nyanya wiwa kɛ́ɖɛ́ wú jɛ́n yě nɔ́ ván kan dó.”

¹¹Mawu Mavɔmavɔ ɖɔ: “Gbeyíɖɔ kpó vɔ̌sánú-xwlémawutɔ́ kpó bǐ wɛ ɖu kpa. Un mɔ dǎka e yě nɔ́ xo ɔ́; yě nɔ́ xo dǎka káká bó nɔ lɛ́ wá xo ɖo xwé ce gbe.

¹²Énɛ́ ɔ́ wú wɛ ali e jí gbɔn wɛ yě ɖě ɔ́ ná ɖíɖí, é ná dó ablu. Đó xwe e xwe un na sɛ́ awě ɖé dó yě, bó dɔn tó nú yě ɔ́, yě ná sɔ́ ta yěɖée bó ná jɛ ayǐ. Xó e nyɛ Mawu Mavɔmavɔ ɖɔ ɔ́ nɛ́.”

¹³Mawu ɖɔ: “Gbeyíɖɔ Samalíi tɔn lɛ́ɛ ɔ́, nǔ wa zɛ jlɛ́ wǔ wɛ un mɔ ɖo yě sí. Vodún Baalu sí wɛ yě nɔ́ yí xó ɖe, bó nɔ́ ɖɔ lobo nɔ́ dɔn togun ce Izlayɛ́li bú ali.

¹⁴ Gbeyíɖɔ Jeluzalɛ́mu tɔn lɛ́ɛ ɔ́, nǔ e un ka nɔ mɔ ɖo yě sí ɔ́, nǔ baɖabaɖa wɛ, é vɛ́ jlɛ́. Afɔ wɛ yě nɔ́ dó gbě; yě nɔ́ nɔ adingban gbɛ mɛ. Adǎkaxotɔ́ lɛ́ɛ wɛ yě nɔ́ sɔ́ alɔ ná, bónú yě má jó adǎkaxixo dó ó. Nukún ce mɛ ɔ́, mɛ bǐ wɛ cí Sodɔ́mu nu lɛ́ɛ ɖɔhun; Jeluzalɛ́mu nu lɛ́ɛ lɔ cí Gomɔ́ɔ nu lɛ́ɛ ɖɔhun.

¹⁵Énɛ́ ɔ́ wú wɛ nyɛ Mawu Mavɔmavɔ, Mawu Nǔbǐwúkpétɔ́ ɔ́, un ɖɔ dó gbeyíɖɔ lɛ́ɛ wú ɖɔ: Un ná ná yě ama e vɛ́ dódó é; un ná ná yě sin e mɛ è kɔn nǔvɛ́nu dó é, bɔ yě ná nu. Đó gbeyíɖɔ Jeluzalɛ́mu tɔn lɛ́ɛ jí wɛ nǔ nyanya gbɔn, bó byɔ́ to ɔ́ mɛ.”

¹⁶Mawu Mavɔmavɔ, Mawu Nǔbǐwúkpétɔ́ ɔ́ ɖɔ: “Mi ma ɖótó gbeyíɖɔ e ɖo xó ɖɔ wɛ lɛ́ɛ ó. Nǔ e ma sixú jɛ ǎ lɛ́ɛ ɖɔ nú mi wɛ yě ɖe; nǔ e wá ayi yětɔn mɛ lɛ́ɛ wɛ yě nɔ́ ɖɔ nú mi, é nyí xó e nɔ tɔ́n sín nu ce mɛ ɔ́ wɛ yě nɔ́ ɖɔ ǎ.

¹⁷Yě nɔ́ ɖɔ nú mɛ e nɔ wa nǔ e yě xwe lɛ́ɛ ɖɔ: ‘Mawu Mavɔmavɔ ɖɔ: Mi bǐ ná vo.’ Yě nɔ́ ɖɔ nú mɛ e nɔ wa nǔ e jló yě lɛ́ɛ ɖɔ: ‘Nǔ ɖěbǔ ná wa mi ǎ.’

¹⁸Mɛ̌ kpó nyɛ Mawu Mavɔmavɔ kpó ká yi tagbesɔ ɖo yě mɛ? Mɛ̌ wɛ mɔ mì ɖo xó ɖɔ wɛ ɖo yě mɛ? Mɛ̌ wɛ ná ɖo yě mɛ, bó ná ɖɔ nyɛ ɖɔ xó bɔ émí se?”

¹⁹Jelemíi ɖɔ: “Éɖíe, jɔhɔn Mawu Mavɔmavɔ tɔn ɖo nǎ nyi wɛ, xomɛ sin Mawu Mavɔmavɔ. Jɔhɔn ɖaxó wɛ, é ɖo nyinyi wɛ jǎwe mɛdídá lɛ́ɛ gɔ́n.

²⁰Xomɛ e sin Mawu Mavɔmavɔ ɔ́ ɖo na fá wɛ ǎ. É ná fá káká cóbónú é ná wa nǔ e lɛ́n wɛ é ɖe é ǎ. Mi ná mɔ nǔ jɛ nǔ énɛ́ lɛ́ɛ bǐ mɛ gbe ɖokpó.”

²¹Mawu ɖɔ: “Gbeyíɖɔ énɛ́ lɛ́ɛ ɔ́, un sɛ́ yě dó fí ɖé ǎ, bɔ yě ká ɖo wezun nu; un ɖɔ xó ɖé nú yě ǎ, bɔ yě ká ɖo xó ɖɔ dó nu ce wɛ.

²²Ényí yě kó yi tagbesɔ xá mì wɛ ɔ́, yě ná kó se xó e un ɖɔ sɛ́ dó togun ce é. Yě ná ko se, bó ná ko ɖɔ nú togun ce bɔ é ná lɛ́ kɔ sín ali nyanya jí, lobo na jó dǎkaxixo dó.”

²³Mawu Mavɔmavɔ ɖɔ: “Mawu e un nyi ɔ́, nǔ e ɖo akpá ce lɛ́ɛ kɛ́ɖɛ́ wɛ un nɔ mɔ a? Un nyí Mawu e nɔ lɛ́ mɔ nǔ jɛ zɔ e ǎ cé?

²⁴Mɛ ɖé hɔn yi bɛ ɖo fí ɖé ɔ́, un nɔ mɔ ɛ jɛ́n wɛ. Un ɖo fí bǐ ɖo jǐxwé, bó lɛ́ ɖo fí bǐ ɖo ayǐkúngban ɔ́ jí. Xó e nyɛ Mawu Mavɔmavɔ ɖɔ ɔ́ nɛ́.”

²⁵Mawu ɖɔ: “Un se xó e ɖɔ wɛ gbeyíɖɔ lɛ́ɛ ɖé é. Gbeyíɖɔ e nɔ́ ɖo adingban ɖó dó nu ce wɛ ɖɔ: ‘Un kú dlɔ̌ ɖokpó! Un kú dlɔ̌ ɖokpó’ lɛ́ɛ ɔ́,

²⁶hwe étɛ́ nu wɛ yě ná jó adingbanɖíɖó dó? Gbeyíɖɔ énɛ́ lɛ́ɛ nɔ ɖo adingban ɖó nú mɛ lɛ́ɛ wɛ kpowun, yě nɔ́ ɖo xó kpa ɖɔ dó blɛ́ mɛ wɛ. Ani ka ɖo ayi yětɔn mɛ tawun?

²⁷Yě lɛ́n ɖɔ émí ná ɖe mì sín ayi mɛ nú togun ce, bó nɔ́ ɖo dlɔ̌ e yě kú bó ɖɔ ɔ́ wlí ɖɔ nú yěɖée wɛ, lě e togun ce sín tɔ́gbó lɛ́ɛ bló gbɔn, bó jó mì dó, bó xwedó vodún Baalu é.

²⁸Gbeyíɖɔ ɖé kú dlɔ̌ ɖé hǔn, é ní wlí ɖɔ bó! Nú un ka ɖɔ xó nú mɛ ɖé hǔn, mɛ ɔ́ ní ɖɔ lě e un ɖɔ gbɔn n'i ɔ́ pɛ́pɛ́pɛ́. È ma sɔ́ jinukún ɖó wɔn tɛnmɛ ó. Xó e nyɛ Mawu Mavɔmavɔ ɖɔ ɔ́ nɛ́.

²⁹Xó ce ɔ́, myɔ ɖɔhun wɛ é cí ǎ cé? Zǔnkpé e nɔ gba só é ɖɔhun wɛ é cí ǎ cé?

³⁰“Énɛ́ ɔ́ wú ɔ́, gbeyíɖɔ e nɔ fin mɛ ɖěvo xó bó nɔ́ ɖɔ, lobo nɔ ɖɔ xó ce wɛ lɛ́ɛ ɔ́, un ɖo yě ba wɛ vɛ́návɛ́ná.

³¹Gbeyíɖɔ e nɔ ɖɔ xó yě ɖésúnɔ tɔn, bó nɔ́ ɖɔ nyi wɛ ɖɔ lɛ́ɛ ɔ́, un ɖo yě ba wɛ vɛ́návɛ́ná. Xó e nyɛ Mawu Mavɔmavɔ ɖɔ ɔ́ nɛ́.

³²Yě mɛ gbeyíɖɔ énɛ́ lɛ́ɛ e nɔ ɖó adingban, bó nɔ́ ɖɔ émí kú dlɔ̌, bó nɔ́ wlí ɖɔ nú togun ce, bó ná dó dɔn ɛ bú ali lɛ́ɛ ɔ́, un ɖo yě ba wɛ vɛ́návɛ́ná. Adingban yětɔn lɛ́ɛ kpó xógbló yětɔn lɛ́ɛ kpó wɛ yě nɔ́ dó dɔn togun ce bú ali; un ka sɛ́ yě dó fí ɖé ǎ, un ka zɔ́n nǔɖé yě ǎ, yě ká ɖo nǔ ɖagbe ɖěbǔ wa nú togun élɔ́ wɛ ǎ. Xó e nyɛ Mawu Mavɔmavɔ ɖɔ ɔ́ nɛ́.”

³³Mawu Mavɔmavɔ ɖɔ nú Jelemíi ɖɔ: “Ényí gbeyíɖɔ ɖé, vɔ̌sánú-xwlémawutɔ́ ɖé abǐ mɛ ɖé kanbyɔ́ we ɖɔ: ‘Wɛn tɛ́ wɛ Mawu Mavɔmavɔ ka dó sɛ́ dó mǐ? Agban tɛ́ wɛ é ka sɔ́ ɖó ta nú mǐ’ hǔn, yǐ gbe nú mɛ ɔ́ ɖɔ: ‘Mawu Mavɔmavɔ ɖɔ: Midɛɛ lɛ́ɛ wɛ nyí agban bɔ un ná ɖe ɖɛ.’

³⁴Gbeyíɖɔ ɖé abǐ vɔ̌sánú-xwlémawutɔ́ ɖé, abǐ toví ɖé ɖɔ Mawu Mavɔmavɔ zé agban kpinkpɛn ɖó ta nú émí ɔ́, un ná dɔn tó n'i, bó dɔn nú xwé tɔn.

³⁵Nǔ e mi ɖó ná kanbyɔ́ miɖée ɔ́ wɛ nyí ɖɔ: ‘Sin tɛ́ Mawu Mavɔmavɔ ka ná? Nɛ̌ Mawu Mavɔmavɔ ka ɖɔ?’

³⁶Mɛ ɖé sɔ́ ná ɖɔ: ‘Mawu Mavɔmavɔ sín xó wɛ nyí agban bo ɖo kpinkpɛn émí wɛ’ ǎ. É má nyí mɔ̌ ǎ ɔ́, xó e mɛ ɔ́ ɖɔ ɔ́ ná húzú agban bo kpɛn mɛ ɔ́, ɖó mi húzú ada nú xó nyɛ Mawu gbɛɖe ɔ́ tɔn. Mi flí nyɛ Mawu Nǔbǐwúkpétɔ́, Mawu mitɔn ɔ́ sín xó xwe.

³⁷Nǔ e mi ná nɔ́ wa ɔ́ wɛ nyí ɖɔ mi ná nɔ́ kanbyɔ́ gbeyíɖɔ ɔ́ ɖɔ: ‘Sin tɛ́ Mawu Mavɔmavɔ ka ná nú xó lě? Nɛ̌ é ká ɖɔ?’

³⁸Un gbɛ́ nú mi ɖɔ mi ma sɔ́ ɖɔ Mawu Mavɔmavɔ dó agban kpinkpɛn ɖó ta nú émí ɖě ó; ényí mi ka gbɛ́ d'é wú jɛ́n wɛ ɔ́, xó e nyɛ Mawu Mavɔmavɔ ɖɔ é ɖíe:

³⁹‘Un ná dó kɔ mi mɛ agban ɖɔhun, bó ná sɔ́ mi nyi dó gbě, mi kpó toxo e un ná tɔ́gbó mitɔn lɛ́ɛ, bó ná mi lɔ é kpó.

⁴⁰Un ná dó winnyá mi; wi mitɔn ná kɔ́n, bɔ è nǎ wɔn ɔ́, é ná lín.’ ”