Read fon Jelemíi 3 Bible Online

Jelemíi 3 - fon bible

Jelemíi 3

¹Mawu Mavɔmavɔ ɖɔ: ényí mɛ ɖé nya asi tɔn bónú é yi da súnnu ɖěvo ɔ́, asú tɔn xóxó ɔ́ nɔ́ lɛ́ lɛ́ kɔ yi nyɔ̌nu ɖokpó énɛ́ ɔ́ gɔ́n wɛ a? Nǔ cí mɔ̌ ɔ́, su wɛ è ɖu nú to ɔ́ nɛ́ ǎ cé? Izlayɛ́li, hwɛ ɔ́, xɔnnɔ towe e ɖó xó xá we din lɛ́ɛ ko sukpɔ́ bɔ a nǎ lɛ́ lɛ́ kɔ wá gɔ̌n ce wɛ a? Xó e nyɛ Mawu Mavɔmavɔ ɖɔ ɔ́ nɛ́.

²Izlayɛ́li, sɔ́ kɔ dó jǐ bó kpɔ́n só lɛ́ɛ jí. Fítɛ́ ká kpo bɔ a ma ko dó afɔ gbě ɖe ǎ? A jǐnjɔ́n alitó, bó ɖo te kpɔ́n súnnu agalɛtɔ́ towe lɛ́ɛ, mɛ e nɔ ɖo gbětótló mɛ lobo nɔ ɖo te kpɔ́n mɛ e na jɛ mɔ tɔn mɛ é ɖɔhun. A zě aga towe kpó adǎka towe kpó dó ɖu su nú to ɔ́.

³É sín énɛ́ ɔ́ wú bɔ jǐ gbɛ́ jija, xwejí ja ǎ. Lo ɔ́, a ɖǒ wunhínhɔ́n ná agalɛtɔ́ ɖɔhun; a jlǒ ná yí gbe ɖɔ émí wa nǔ nyi do ǎ.

⁴Din ɔ́, a ka nɔ ɖo xó sú ylɔ́ mì wɛ ɖɔ: “Daá ce, kpɛxɔ́ntɔn ce wɛ a nyǐ!

⁵Xomɛ sin dó mì wɛ jɛ́n a nǎ ɖe tɛgbɛ a? A nǎ jó xomɛsin ɔ́ dó gbeɖé ǎ cé?” Mɔ̌ jɛ́n a nɔ ɖɔ, a ka fɔ́n bó gɔn nǔ nyanya wa gbeɖé ǎ; azɔ̌ towe wɛ é kó nyí.

⁶ Hwenu e Joziyási ɖo axɔ́sú ɖu wɛ ɔ́, Mawu Mavɔmavɔ ɖɔ nú mì ɖɔ: “A mɔ nǔ e Izlayɛ́li gbejímánɔtɔ́ ɔ́ bló é a? É dó afɔ gbě gbɔn só bǐ jí, gbɔn atínmú bǐ sá.

⁷Amɔ̌, nyɛ ɔ́, un ka mɔ ɖɔ ée Izlayɛ́li dó nǔ énɛ́ lɛ́ɛ bǐ sin din é ɔ́, é ná lɛ́ kɔ wá gɔ́n ce. É ká lɛ́ kɔ wá ǎ mɛ! Nɔví tɔn Judáa afɔdógbětɔ́ ɔ́ ka mɔ nǔ énɛ́ lɛ́ɛ bǐ.

⁸Un nya Izlayɛ́li gbejímánɔtɔ́ ɔ́, ɖó afɔ e é dó gbě ɔ́ wú, lobo wlán wěma dó así n'i ɖɔ un gbɛ́ ɛ, có nɔví tɔn Judáa ɔ́ ɖi xɛsi ǎ mɛ! É lɔ yi dó afɔ gbě Izlayɛ́li ɖɔhun.

⁹Afɔ e Izlayɛ́li dó gbě bó ɖu winnyá ɔ́ wɛ nyí su bɔ é ɖu nú to ɔ́. É lɛ aga xá vodún e è sɔ́ awǐnnya dó lí lɛ́ɛ kpó ée è sɔ́ atín dó lí lɛ́ɛ kpó.

¹⁰Nǔ ɖo mɔ̌ có nɔví tɔn Judáa afɔdógbětɔ́ ɔ́ lɛ́ kɔ wá gɔ̌n ce kpó ayi tɔn bǐ kpó ǎ. Yɛmɛnú wɛ é wa.” Xó e Mawu Mavɔmavɔ ɖɔ ɔ́ nɛ́.

¹¹Mawu Mavɔmavɔ ɖɔ nú mì ɖɔ: “Nú è sɔ́ Izlayɛ́li gbejímánɔtɔ́ ɔ́ kpó Judáa afɔdógbětɔ́ ɔ́ kpó ɖó te ɔ́, è nǎ mɔ ɖɔ Izlayɛ́li kún wa nǔ nyi do sɔ mɔ̌ ó.

¹²Yi, yi bó sú xó sɛ́ dó totaligbé ɖɔ Mawu Mavɔmavɔ ɖɔ: ‘Izlayɛ́li gbejímánɔtɔ́! Lɛ̌ kɔ wá. Un ná sɔ́ nukún nyanya dó kpɔ́n we ǎ. Un nɔ kú nǔbláwǔ nú mɛ. Un na nɔ xomɛsin jí káká sɔ́yi ǎ.

¹³Vɛ̌ ko tunwun kpowun ɖɔ émí hu hwɛ; tunwun ɖɔ émí kún nɔ gbejí nú nyɛ Mawu Mavɔmavɔ, Mawu towe ó, tunwun ɖɔ émí nɔ hwlɛ́n dó vodún lɛ́ɛ gbɔn atínmú sá atínmú sá, tunwun ɖɔ émí kún ɖótó mì ó.’ ” Xó e Mawu Mavɔmavɔ ɖɔ ɔ́ nɛ́.

¹⁴Mawu Mavɔmavɔ ɖɔ: “Vǐ gbejímánɔtɔ́ e mi, mi lɛ́ kɔ wá gɔ̌n ce! Đó nyi wɛ ɖó mi. Un ná cyán mi kplé, un ná kplá mɛ ɖokpó abǐ mɛ we sín toxo mitɔn lɛ́ɛ ɖokpó ɖokpó mɛ, bó ná lɛ́ kplá sín hɛ̌nnu mitɔn lɛ́ɛ ɖokpó ɖokpó mɛ, lobo na kplá mi wa Sinyɔ́ɔ.

¹⁵Un na ná mi lɛ̌ngbɔ́nyitɔ́ e nɔ wa nǔ e jló mì lɛ́ɛ. Yě ná nɔ mi nu kpó nǔnywɛ́ kpó.

¹⁶“Hwenɛ́nu ɔ́, mi ná sukpɔ́ ɖo to ɔ́ mɛ, mi ná ji gba; è sɔ́ ná ɖɔ akɔjijɛgbá ce sín xó ɖě ǎ. È ka sɔ́ ná flín lɔ ǎ, xó tɔn ká sɔ́ ná nɔ ayi mɛ nú mɛɖé ǎ. Mɛ ɖé ká sɔ́ ná mɔ ɖɔ akɔjijɛgbá ɔ́ kún ɖo fínɛ́ ó ǎ; è ka sɔ́ ná bló ɖěvo ǎ.

¹⁷Hwe nɛ́ nu ɔ́, è nǎ ylɔ́ Jeluzalɛ́mu ɖɔ axɔ́súzinkpo Mawu Mavɔmavɔ tɔn. Akɔta lɛ́ɛ bǐ ná kplé ɖo fínɛ́ ɖo gɔ̌n ce. Yě sɔ́ ná xwedó ayixa baɖabaɖa e ɖo xo yětɔn mɛ lɛ́ɛ ɖě dó wa nǔ ǎ.

¹⁸Énɛ́ ɔ́, mi Judáa togun ɔ́ ná wá gɔ́ nú Izlayɛ́li togun ɔ́, bɔ mi bǐ nǎ zɔn kpɔ́ sín to e ɖo taligbé ɔ́ mɛ, fí e è kplá mi yi é, bó ná lɛ́ kɔ wá to élɔ́ e un ná tɔ́gbó mitɔn lɛ́ɛ ɔ́ mɛ.”

¹⁹Mawu ɖɔ: “Đ'ayǐ ɔ́, un nɔ ɖɔ un ná zé we bɔ hwi lɔ ná nyí vǐ nú mì, bɔ un ná ná we gbɛɖuto, to e nyɔ́ hú nǔ bǐ ɖo gbɛ ɔ́ mɛ e. Un nɔ ɖɔ a nǎ ylɔ́ mì ɖɔ tɔ́; un nɔ ɖɔ a kún sɔ́ ná lɛ́ kɔ sín gǔdo ce ɖě ó.

²⁰Amɔ̌, Izlayɛ́li, lě e nyɔ̌nu nɔ ɖo asúxwé bó nɔ́ dó afɔ gbě ɔ́, mɔ̌ wɛ a blǒ xá mì gbɔn. Xó e nyɛ Mawu Mavɔmavɔ ɖɔ ɔ́ nɛ́.

²¹È se xósúsú ɖé sín só jí aga: Izlayɛ́li ví lɛ́ɛ wɛ ɖo avǐ ya wɛ bó ɖo vo sa wɛ. Đó yě zɛ ali, yě wɔn nyɛ Mawu Mavɔmavɔ, Mawu yětɔn ɔ́.

²²Vǐ gbejímánɔtɔ́ e mi, mi lɛ́ kɔ wá! Gbejímánɔ sín azɔn e jɛ wɛ mi ɖe ɔ́, un ná gbɔ nú mi!” Togun ɔ́ ɖɔ: “Mǐ ɖíe! Mǐ ja gɔ̌n towe ɖó hwi wɛ nyí Mawu Mavɔmavɔ, Mawu mǐtɔn.

²³Vodún e mǐ sɛn gbɔn sókan mɛ sókan mɛ nɛ́ lɛ́ɛ ɔ́, mǐɖée wɛ mǐ blɛ̌; xó wɛ mǐ sú gbɔn só ta só ta dó wǔvɔ́. Hwi Mawu Mavɔmavɔ, Mawu mǐtɔn ɖokpó gɔ́n jɛ́n mǐ Izlayɛ́li ví lɛ́ɛ na mɔ hwlɛngán ɖe.

²⁴Sín vǔ mǐtɔn ɖokpóó ɔ́, vodún Baalu e mɛjitɔ́ mǐtɔn lɛ́ɛ nɔ sɛn ɔ́ zɔ́n bɔ nǔ e yě ɖó lɛ́ɛ bǐ vɔ: gbɔ̌ yětɔn kpó nyibú yětɔn kpó vɔ, vǐ súnnu yětɔn kpó vǐ nyɔ̌nu yětɔn kpó vɔ; sinsɛn yětɔn énɛ́ ɔ́, winnyánú wɛ.

²⁵Winnyá húzú adɔ̌zan nú mǐ, bɔ hɛ̌n nú e mǐ wa lɛ́ɛ nyí wǔcyɔ́n nú mǐ; ɖó mǐ hu hwɛ dó hwi Mawu Mavɔmavɔ, Mawu mǐtɔn. Tɔ́gbó mǐtɔn lɛ́ɛ bǐ hu hwɛ dó we sín vǔ yětɔn, bɔ mǐ lɔ ɖo hwɛ hu dó we wɛ sín vǔ mǐtɔn káká wá jɛ égbé. Mǐ hu hwɛ, mǐ se tónú nú xó e hwi Mawu Mavɔmavɔ, Mawu mǐtɔn ɖɔ nú mǐ ɔ́ ǎ.”