Read fon Jelemíi 32 Bible Online

Jelemíi 32 - fon bible

Jelemíi 32

¹ Hwenu e Judáa xɔ́sú Sedesíyasi ɖo xwe wǒ bló wɛ ɖo zinkpo jí ɔ́, Mawu Mavɔmavɔ ɖɔ xó nú Jelemíi. Hwenɛ́nu ɔ́, Nabukodonɔzɔ́ɔ Babilɔ́nu xɔ́sú ɔ́ ɖo xwe afɔtɔn-nukún-atɔn bló wɛ ɖo zinkpo jí.

²Hwenɛ́nu wɛ axɔ́sú Babilɔ́nu tɔn sín ahwangɔnu xá Jeluzalɛ́mu toxo ɔ́; gbeyíɖɔ Jelemíi ka ɖo gankpá mɛ ɖo axɔ́sú Judáa tɔn sín hɔnmɛ, ɖo fí e sɔ́ja e nɔ cɔ́ axɔ́sú ɔ́ lɛ́ɛ nɔ́ nɔ ɔ́ sín kɔ́xota.

³Judáa xɔ́sú Sedesíyasi wɛ wlí i ɖó fínɛ́, ɖó xó e Jelemíi ɖɔ dó Mawu nyíkɔ mɛ ɔ́ vɛ́ wǔ tɔn; xó é Jelemíi ɖɔ ɔ́ ɖíe: “Mawu Mavɔmavɔ ɖɔ: ‘Un ná jó Jeluzalɛ́mu nú Babilɔ́nu xɔ́sú ɔ́, bɔ é ná yí.

⁴Judáa xɔ́sú Sedesíyasi lɔ ná gló Babilɔ́nunu lɛ́ɛ ǎ, ɖó un ná jó e nú Babilɔ́nu xɔ́sú ɔ́, bɔ é ná yi Babilɔ́nu xɔ́sú ɔ́ nukɔn, bɔ yě ná kpé nu bo ɖɔ xó.

⁵Axɔ́sú Babilɔ́nu tɔn ná kplá Sedesíyasi yi Babilɔ́nu, bɔ é ná nɔ fínɛ́ káká jɛ hwenu e un ná flín i dó é. Ényí mi fun ahwan xá Babilɔ́nunu lɛ́ɛ ɔ́, é ná kpa mi gbeɖé kpɔ́n ǎ. Xó e nyɛ Mawu Mavɔmavɔ ɖɔ é nɛ́.’ ”

⁶Jelemíi ɖɔ: “Mawu Mavɔmavɔ ɖɔ nú mì ɖɔ:

⁷‘Éɖíe, Calúmu tɔ́ towe nɔví ví ɔ́, vǐ tɔn Hanamɛ́li ná wá mɔ we, bó ná ɖɔ nú we ɖɔ hwi ní xɔ gle émítɔn e ɖo Anatɔ́ti é, ɖó hwi wɛ nyí mɛ tɔn e sɛkpɔ́ ɛ ganjí é; hǔn hwi wɛ nyí mɛ nukɔntɔn e ɖó acɛ e ná vɔ́ gle ɔ́ xɔ é.’ ”

⁸Nǔgbó ɔ́, tɔ́ ce nɔví ví Hanamɛ́li ɔ́ wá gɔ̌n ce, lě e Mawu Mavɔmavɔ ɖɔ gbɔn é. É wá gɔ̌n ce ɖo fí e sɔ́ja e nɔ cɔ́ axɔ́sú ɔ́ lɛ́ɛ nɔ́ nɔ é sín kɔ́xota, bó ɖɔ: “Wǎ xɔ gle ce e ɖo Anatɔ́ti, ɖo Bɛnjamɛ́ɛ yíkúngban jí é, ɖó hwi wɛ nyí mɛ ce e sɛkpɔ́ mì ganjí é; hǔn hwi wɛ nyí mɛ nukɔntɔn e ɖó acɛ e ná vɔ́ gle ɔ́ xɔ é, bɔ é ná nyí towe.” Ée é ɖɔ mɔ̌ ɔ́, un mɔ ɖɔ Mawu Mavɔmavɔ wɛ ɖɔ xó nú mì nǔgbó.

⁹Un xɔ Hanamɛ́li sín gle e ɖo Anatɔ́ti é nǔgbó, bó sú axɔ́. Gankwɛ́ afɔtɔn-nukún-we wɛ un sú i.

¹⁰Un bló gle ɔ́ sín wěma ɖó we jí; un sú wěma ɔ́ ɖokpó ɖo kúnnuɖetɔ́ nukɔn, bó sɔ́ nǔ e un nɔ dó ɖó wuntun nǔ ná ɔ́ dó ɖó wuntun, bó da akwɛ́ e un dó xɔ gle ɔ́ ná é kpɔ́n ɖo gan jí.

¹¹Un zé wěma e un sú bó ɖó wuntun é, lě e sɛ́n ɔ́ kpódó walɔ mǐtɔn kpó ɖɔ gbɔn ɔ́, lobo sɔ́ ée è ma sú ǎ é lɔmɔ̌.

¹²Un bɛ́ wěma we lɛ́ɛ bǐ nú Baalúki Nɛliya ví, Maxiseya vívú ɔ́. Tɔ́ ce nɔví ví Hanamɛ́li e sa gle ɔ́ ɖo te, kúnnuɖetɔ́ ce e dó alɔ wěma ɔ́ mɛ lɛ́ɛ ɖo te, Judáanu e ɖo fí e sɔ́ja e nɔ cɔ́ axɔ́sú ɔ́ nɔ́ nɔ é sín kɔ́xota lɛ́ɛ bǐ ɖo fínɛ́.

¹³Un ɖɔ nú Baalúki ɖo mɛ bǐ nukún mɛ ɖɔ:

¹⁴“Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: ‘Zě wěma e è sú bó ɖó wuntun é kpódó ée ɖo nuvo e kpó, bó bɛ́ bǐ dó kozɛ́n ɖokpó mɛ, bónú yě ná nɔ ayǐ ganjí.’

¹⁵“Nyɛ Mawu Mavɔmavɔ Nǔbǐwúkpétɔ́ Mawu Izlayɛ́li tɔn ɖɔ: ‘É ná lɛ́ wá su gbe ɖokpó ɖo to mɛ fí, bɔ è nǎ lɛ̌ xɔ xwé, bó xɔ gle, bó xɔ vǐwungbo.’ ”

¹⁶Ée un zé wěma ɔ́ jó nú Baalúki Nɛliya ví ɔ́, un ɖɔ xó xá Mawu Mavɔmavɔ; un ɖɔ n'i ɖɔ:

¹⁷“Aklúnɔ Mavɔmavɔ, a sɔ́ hlɔ̌nhlɔ́n towe ɖaxó ɔ́ dó bló jǐnukúnsin kpó ayǐkúngban kpó dó ɖe gǎnhúnǔ towe xlɛ́. Nǔɖé syɛ́n bó hú gǎn we ǎ.

¹⁸A nɔ ɖe xomɛnyínyɔ́ towe xlɛ́ gbɛtɔ́ afatɔ́n (1.000) afatɔ́n (1.000) do mɔ̌kpán; amɔ̌, a nɔ lɛ́ dɔn tó nú mɛ lɛ́ɛ, ɖó hwɛ e mɛjitɔ́ yětɔn lɛ́ɛ hu é wú. Hwi wɛ nyí Mawu ɖaxó hlɔ̌nhlɔ́nnɔ ɔ́, nyǐkɔ towe nɔ́ nyí Mawu Mavɔmavɔ Nǔbǐwúkpétɔ́.

¹⁹Hwi wɛ ɖó tito ɖaxó ɖaxó lɛ́ɛ, bó nɔ́ kpé yě wǔ bó nɔ́ bló. A nɔ kpɔ́n nǔ e wa wɛ mɛ ɖokpó ɖokpó ɖe ɔ́ céɖécéɖé, lobo nɔ́ bló nǔ nú mɛ ɖokpó ɖokpó, bɔ é nɔ́ sɔgbe xá lě e é zán gbɛ tɔn gbɔn é, bó nɔ́ sɔgbe xá nǔ e é bló lɛ́ɛ.

²⁰“A jlɛ̌ nǔ tɛnmɛ tɛnmɛ lɛ́ɛ, bó bló nǔjíwǔ tɛnmɛ tɛnmɛ ɖo Ejípu, bó lɛ́ ɖ'é wú ɖo Izlayɛ́li, bó ɖ'é wú ɖo gbɛtɔ́ lɛ́ɛ tɛ́ntin káká wá jɛ égbé, bó dó jɛ nyǐkɔ lě e mɔ gbɔn wɛ è ɖe égbé din é.

²¹A jlɛ̌ nǔ ɖaxó ɖaxó, nǔ hu ado dó ɖe togun towe tɔ́n sín Ejípu; a blǒ mɔ̌ dó ɖe hlɔ̌nhlɔ́n towe kpó nǔwúkpíkpé towe kpó xlɛ́.

²²A dǒ akpá nú tɔ́gbó mǐtɔn lɛ́ɛ bó xwlé nǔ d'é jí ɖɔ émí ná ná yě to élɔ́; to élɔ́ e mɛ wǐin kpó anɔ̌sin kpó nɔ́ sa ɖe é, bó ka ná yě nǔgbó.

²³Yě wá yí to ɔ́. Amɔ̌, yě ɖótó gbe towe ǎ, yě nyi sɛ́n towe ǎ. Nǔ e a ɖɔ yě ní wa lɛ́ɛ ɔ́, yě bló ǎ. Énɛ́ ɔ́ wú wɛ a sɛ́ nǔ nyanya e ɖo jijɛ wɛ égbé din ɔ́ bǐ dó.

²⁴“Din ɔ́, Babilɔ́nunu lɛ́ɛ ɖíe sɔ́ ahwannú, bó ɖo sisɛkpɔ́ toxo ɔ́ wɛ, bó ná wá yí toxo ɔ́. Hwǐ kpó adɔ kpó jɛmɛjí kpó wɛ yě jló ná dó yí toxo ɔ́; hwi ɖésú mɔ din ɖɔ nǔ e a ɖɔ ɔ́ jɛ.

²⁵Énɛ́! Toxo ɔ́ bǐ ɖíe ko ɖibla jɛ Babilɔ́nunu lɛ́ɛ lɔ mɛ e. Aklúnɔ, Mawu Mavɔmavɔ, nɛ̌ ká gbɔn bɔ a nǎ gbe mì ɖɔ nyi ní xɔ gle énɛ́, bó sú axɔ́ ɖo kúnnuɖetɔ́ nukɔn?”

²⁶Mawu Mavɔmavɔ ɖɔ nú Jelemíi ɖɔ:

²⁷“Nyɛ wɛ nyí Mawu Mavɔmavɔ, Mawu gbɛtɔ́ lɛ́ɛ bǐ tɔn. Nǔ ɖěbǔ gló mì ǎ.

²⁸ Énɛ́ wú wɛ nyɛ Mawu Mavɔmavɔ ɔ́, un na jó toxo élɔ́ nú Nabukodonɔzɔ́ɔ Babilɔ́nu xɔ́sú ɔ́ kpó ahwanfuntɔ́ tɔn lɛ́ɛ kpó, bɔ é ná yí.

²⁹Babilɔ́nunu e ɖo ahwan tɔ́n ɛ wɛ lɛ́ɛ ná byɔ́ toxo ɔ́ mɛ, bó ná dó toxo ɔ́ zo; ɖo tají ɔ́, xwé e gbe è nɔ dó zǎlínkpɔ́n zo nú vodún Baalu ɖe, bó nɔ ba ahan nú nǔmɛsɛn lɛ́ɛ ɖe, bó ná dó dó xomɛsin nú mì ɖe lɛ́ɛ ɔ́, Babilɔ́nunu lɛ́ɛ na dó bǐ zo.

³⁰“Đó Izlayɛ́li ví lɛ́ɛ kpó Judáanu lɛ́ɛ kpó ɔ́, sín vǔ wɛ yě kó ɖo nǔ e má nyɔ́ nukún ce mɛ ǎ lɛ́ɛ wa wɛ. Izlayɛ́li ví lɛ́ɛ ɔ́, nǔwiwa yětɔn lɛ́ɛ bǐ wɛ nɔ dó xomɛsin nú mì; nyɛ Mawu Mavɔmavɔ wɛ ɖɔ mɔ̌.

³¹Sín gbe e gbe è ɖǒ Jeluzalɛ́mu toxo ɔ́ ayǐ ɔ́ jɛ́n é kó ɖo xomɛsin dó nú mì wɛ, bó ɖo winnyá dó mì wɛ káká wá jɛ égbé; nǔ énɛ́ wɛ zɔ́n bɔ un ma sɔ́ jló ná mɔ ɛ ɖó nukún wú ǎ.

³²Nǔ nyanya e Izlayɛ́linu lɛ́ɛ kpó Judáanu lɛ́ɛ kpó wa ɔ́ vɛ́ nú mì. Nǔ e yě kpó axɔ́sú yětɔn lɛ́ɛ, gǎn yětɔn lɛ́ɛ, vɔ̌sánú-xwlémawutɔ́ yětɔn lɛ́ɛ, gbeyíɖɔ yětɔn lɛ́ɛ, Jeluzalɛ́munu lɛ́ɛ kpó Judáanu ɖě lɛ́ɛ kpó wa ɔ́ vɛ́ nú mì.

³³Yě mɛ énɛ́ lɛ́ɛ e ɖó ná wá gɔ̌n ce ɔ́ dó gǔdo mì. Un ka ná gɔn nǔ kplɔ́n yě ǎ; un dó vɛ̌ nú yě ǎ. Lo ɔ́, yě ɖótó mì ǎ; yě yí gbe bó yí kplɔ́n ǎ.

³⁴ Yě bɛ́ bǒcyɔ yětɔn lɛ́ɛ wá ɖó xwé ce gbe, xwé e è sɔ́ ɖó vo nú mì é gbe, lobo ɖu su nú xwé ce.

³⁵ Yě blǒ tɛnmɛ ɖó gbɔn tɔdo Hinnɔ́ɔ tɔn mɛ nú vodún Baalu, bó nɔ hu vǐ yětɔn súnnu kpó nyɔ̌nu kpó dó vodún Mɔlɛ́ki gbɔn fí énɛ́ lɛ́ɛ. Un ka zɔ́n nǔ mɔ̌hun yě gbeɖé kpɔ́n ǎ; un ka lin lɔ ɖɔ yě ná dó nǔ mɔ̌hun sin kpɔ́n ǎ. Nǔ baɖabaɖa énɛ́ lɛ́ɛ e yě dó sin ɔ́ dɔn togun Judáa tɔn dó hwɛ mɛ.

³⁶“Mi ɖɔ dó Jeluzalɛ́mu toxo ɔ́ wú ɖɔ ahwan, adɔ kpó jɛmɛjí kpó wɛ jó Jeluzalɛ́mu toxo ɔ́ nú Babilɔ́nu xɔ́sú ɔ́. É nyɔ́, din ɔ́, xó e nyɛ Mawu Mavɔmavɔ, Mawu Izlayɛ́li tɔn ɖó bó ná ɖɔ dó toxo élɔ́ wú ɔ́ nɛ́.

³⁷Đ'ayǐ ɔ́, un sin xomɛ dó toxo élɔ́ ɖésú; énɛ́ wú wɛ un ɖo xomɛsin jí bó gba yě dó gbɔn tomɛ tomɛ. Amɔ̌, din ɔ́, un ná xo yě kplé, un ná kplá yě wá fí, bɔ yě ná vo.

³⁸Énɛ́ ɔ́, yě ná lɛ́ nyí togun ce, bɔ un ná nyí Mawu yětɔn.

³⁹Un nǎ sɔ́ ayixa ɖokpó ɔ́ dó xomɛ nú yě, bó ná ná walɔ ɖokpó ɔ́ yě, bɔ yě ná nɔ́ ɖó sísí nú mì káká sɔ́yi; énɛ́ ɔ́, nǔ ná nyɔ́ nú yě, bó ná nyɔ́ nú vǐ yětɔn lɛ́ɛ.

⁴⁰Un zin alɔ dó akɔ́n ɖɔ un kún sɔ́ ná ɖe alɔ sín kan yětɔn mɛ ɖě ó; lo ɔ́, un ná wa ɖagbe nú yě. Énɛ́ ɔ́, wú ɔ́, un ná jɛ akɔ mavɔ mavɔ ɖokpó xá yě; un ná kplɔ́n yě bɔ yě ná ɖó sísí nú mì káká bó sɔ́ ná jó mì dó ɖě ǎ.

⁴¹Đagbe wa nú yě ná nɔ víví nú mì; un ná ɖó tɛnmɛ nú yě ɖó to ɔ́ mɛ fí kpó xomɛ kpó, bɔ yě ná nɔ to ɔ́ mɛ sɔ́yi.

⁴²“Xó e Mawu Mavɔmavɔ lɛ́ ɖɔ ɔ́ ɖíe: nyɛ wɛ sɛ́ awě ɖaxó énɛ́ dó bɔ é xo togun Judáa tɔn; mɔ̌ ɖokpó ɔ́, ɖagbe e sín akpá un dó nú yě ɔ́, nyɛ jɛ́n ná lɛ́ ná bǐ yě.

⁴³Mi nɔ ɖɔ: toxo élɔ́ ɔ́, Babilɔ́nunu lɛ́ɛ lɔ mɛ wɛ é ɖe; din ɔ́, gbětótló wɛ; mɛɖé sɔ́ ɖ'é mɛ ǎ, kanlin vɔ́vɔ́ ɖ'é mɛ ǎ. Mi nɔ ɖɔ mɔ̌ có è nǎ lɛ́ jɛ gle xɔ jí ɖo to énɛ́ mɛ.

⁴⁴Nǔgbó wɛ, è nǎ xɔ gle gbɔn Bɛnjamɛ́ɛ yíkúngban ɔ́ jí, bó xɔ gbɔn Jeluzalɛ́mu sín tokpɔnla ɔ́ mɛ, bó xɔ gbɔn Judáa toxo lɛ́ɛ mɛ, bó xɔ gbɔn toxo e ɖo só jí lɛ́ɛ mɛ, bó xɔ gbɔn toxo e ɖo dodomɛ lɛ́ɛ mɛ, bó xɔ gbɔn toxo ɔ́ sín afɔligbé. Énɛ́ ɔ́, è nǎ nɔ́ bló wěma e ɖe xlɛ́ ɖɔ è sa gle lɛ́ɛ ɖo kúnnuɖetɔ́ nukɔn bó sú axɔ́ bó ɖó wuntun. Un ná bló bɔ yě ná ɖó ninɔmɛ e yě kó ɖó ɖ'ayǐ é.” Xó e Mawu Mavɔmavɔ ɖɔ ɔ́ nɛ́.