Read fon Jelemíi 33 Bible Online

Jelemíi 33 - fon bible

Jelemíi 33

¹Hwenu e Mawu Mavɔmavɔ ɖɔ xó nú Jelemíi azɔn wegɔ́ ɔ́, é kpo ɖo gankpá mɛ, ɖo sɔ́ja e nɔ cɔ́ axɔ́sú ɔ́ lɛ́ɛ sín kɔ́xota.

²Xó e Mawu Mavɔmavɔ ɖɔ ɔ́ ɖíe; Mawu Mavɔmavɔ e bló ayǐkúngban, bó ɖó tɛn ná ɔ́, éyɛ́ mɛ e nyǐkɔ tɔn nɔ́ nyí Mawu Mavɔmavɔ ɔ́, xó e é ɖɔ é ɖíe:

³“Sú xó ylɔ́ mì, un nǎ sɔ́ nú we; nǔ ɖaxó ɖaxó, nǔ e ɖo hwlǎhwlá bɔ a ma tunwun ǎ lɛ́ɛ ɔ́, un nǎ ɖɔ yě nú we.

⁴Xó e Nyɛ Mawu Mavɔmavɔ, Mawu Izlayɛ́li tɔn ɖɔ dó xwé e ɖo toxo élɔ́ mɛ lɛ́ɛ kpódó Judáa xɔ́sú lɛ́ɛ sín xwé lɛ́ɛ kpó wú é ɖíe: è nǎ xá toxo ɔ́ bó tɔ́n ahwan toxo ɔ́, bó gba xwé lɛ́ɛ.

⁵Mi má xaji ɖɔ émí ná fun ahwan xá Babilɔ́nunu e wá tɔ́n ahwan mi lɛ́ɛ é ó; mi bló mɔ̌ ɔ́, un ná hu gbɛtɔ́ tɛ́ gbɔn toxo ɔ́ mɛ ɖó nǔ nyanya e mi wa bɔ xomɛ mitɔn sin mì lɛ́ɛ wú. Jeluzalɛ́munu lɛ́ɛ dó nǔ nyanya sin káká bɔ un ɖe alɔ sín toxo yětɔn wú.

⁶“É ká ɖo mɔ̌ có un ná kpé nukún dó toxo ɔ́ wú lě e è nɔ kpé nukún dó mɛ e gblé wǔ é wú ɔ́ ɖɔhun. Un ná gbɔ azɔn n'i, bɔ é ná jɛ te. Un ná ná fífá kpó ayij'ayǐ kpó mɛ e ɖo toxo ɔ́ mɛ lɛ́ɛ.

⁷Un ná lɛ́ sɔ́ togun Judáa tɔn ɔ́, kpó togun Jeluzalɛ́mu tɔn kpó sí te; un ná lɛ́ sɔ́ yě ɖó tɛn e mɛ yě kó ɖe ɖ'ayǐ ɔ́ mɛ.

⁸Un ná súnsún hwɛ e yě hu dó mì lɛ́ɛ bǐ, bɔ gǔ e yě fɔ́n dó jǐ ce tɛnmɛ tɛnmɛ ɔ́, un ná zé bǐ kɛ yě, lobo ná zé yě dó húzú mɛ mímɛ́.

⁹Hwenɛ́nu lo ɔ́, un ylɔ́ Jeluzalɛ́mu sín nyǐkɔ ɔ́, é ná nɔ́ víví nú mì. É wɛ un ná nɔ́ dó ba acɔ́ ná ɖo akɔta e ɖo ayǐkúngban ɔ́ jí lɛ́ɛ bǐ nukɔn. Hwenu e akɔta lɛ́ɛ na se ɖagbe e wa nú Jeluzalɛ́mu gbé un ja ɔ́, xɛsi ná ɖi yě, bɔ yě ná sísɔ́. Nú yě mɔ nyɔ̌ná e un ná Jeluzalɛ́mu ɔ́, kpó lě e nǔ tɔn lɛ́ɛ ɖo nukɔn yi gbɔn wɛ ɔ́ kpó ɔ́, ado ná hu yě.”

¹⁰Mawu Mavɔmavɔ ɖɔ: “Mi Judáanu lɛ́ɛ ɔ́, mi nɔ ɖɔ to émítɔn gba, gbɛtɔ́ ɖě kún sɔ́ ɖo to ɔ́ mɛ ǎ. Nǔgbó wɛ, Judáa toxo lɛ́ɛ kpó Jeluzalɛ́mu sín ali lɛ́ɛ kpó bǐ jɛ vɔ̌; nǔ ɖěbǔ sɔ́ ɖo gbɛ ɖo to ɔ́ mɛ ǎ, gbɛtɔ́ bǐ kú, kanlin bǐ kú.

¹¹ Amɔ̌, din ɔ́, è nǎ lɛ̌ se bɔ è nǎ ɖo xwe ɖu wɛ bó ɖo awǎ jɛ wɛ, bó ná lɛ́ se mɛ e wlí alɔ yɔ̌yɔ́ lɛ́ɛ ɖo han ji wɛ. È nǎ lɛ́ se bɔ mɛ lɛ́ɛ ná ɖo han ji wɛ ɖɔ: ‘Mi kpa Mawu Mavɔmavɔ, Nǔbǐwúkpétɔ́ ɔ́, ɖó é nyɔ́. Wǎn yíyí tɔn ɖó dogbó ǎ.’ È nǎ lɛ́ se mɛ lɛ́ɛ ɖo han ji wɛ xwe vɔ̌ sá gbé ɖo Mawu Mavɔmavɔ xwé. Đó nyɛ Mawu Mavɔmavɔ ná lɛ́ sɔ́ to élɔ́ ɖó lě e é kó ɖe ɖ'ayǐ é.” Mawu Mavɔmavɔ wɛ ɖɔ mɔ̌.

¹²Xó e Mawu Mavɔmavɔ Nǔbǐwúkpétɔ́ ɖɔ é ɖíe: “To élɔ́ e jɛ vɔ̌, bɔ è ma sɔ́ nɔ́ mɔ gbɛtɔ́ kpó kanlin kpó ɖěbǔ ɖe ǎ é mɛ jɛ́n è nǎ lɛ́ mɔ kanlinnyitɔ́ lɛ́ɛ ɖe, bɔ yě ná nɔ́ kpé nukún dó lɛ̌ngbɔ́ yětɔn lɛ́ɛ kpó gbɔ̌ yětɔn lɛ́ɛ kpó wú zǎn mɛ.

¹³È nǎ lɛ́ mɔ kanlinnyitɔ́ bɔ yě ná ɖo lɛ̌ngbɔ́ yětɔn lɛ́ɛ kpó gbɔ̌ yětɔn lɛ́ɛ kpó xa wɛ, ɖo toxo e ɖo só jí lɛ́ɛ kpó toxo e ɖo dodomɛ lɛ́ɛ mɛ, bó ná mɔ ɖo toxo e ɖo tofɔligbé lɛ́ɛ kpó toxo e ɖo Bɛnjamɛ́ɛ gbé ɔ́ jí lɛ́ɛ kpó mɛ, bó ná lɛ́ mɔ ɖo tokpɔnla lɛ́ɛ kpó toxo e ɖo Judáa lɛ́ɛ kpó mɛ.” Xó e Mawu Mavɔmavɔ ɖɔ ɔ́ nɛ́.

¹⁴ Mawu Mavɔmavɔ ɖɔ: “Azǎn e gbe un ná ɖe akpá e un dó nú Izlayɛ́li togun ɔ́ kpó Judáa togun ɔ́ kpó é ja.

¹⁵Hwenɛ́nu su ɔ́, un ná sɛ́ Davídi ví nǔgbó ɖokpó dó. É ná xwedó sɛ́n dó wa nǔ ɖo to ɔ́ mɛ, bó na nɔ́ wa nǔ lě e un jló gbɔn é.

¹⁶Énɛ́ ɔ́, axɔ́súɖuto Judáa tɔn ná jɛ éɖée sí; Jeluzalɛ́mu ná mɔ agbɔ̌n bó vo. Hwenɛ́nu ɔ́, è nǎ nɔ́ ylɔ́ Jeluzalɛ́mu ɖɔ: ‘Mawu Mavɔmavɔ wɛ nyí hwɛjijɔ mǐtɔn.’ ”

¹⁷Đó xó e Mawu Mavɔmavɔ ɖɔ é ɖíe: “Axɔ́sú Davídi ná ba vǐ tɔn e ná nɔ Izlayɛ́li zinkpo jí ɔ́ kpo gbeɖé ǎ.

¹⁸ Mɔ̌ ɖokpó ɔ́, vɔ̌sánú-xwlémawutɔ́ Levíi ví ná hán gbeɖé ǎ; Levíi ví ɖě ná tíin dandan, bó ná ɖo gɔ̌n ce, bó ná xwlé vɔ̌sánú blěbǔ mì, bó ná nɔ́ xwlé vɔ̌ e è nɔ dó zo é mì, bɔ azɔ tɔn ná nɔ́ si wá gɔ̌n ce; é ná nɔ́ xwlé kɔnɖókpɔ́ vɔ́ mì.”

¹⁹Mawu Mavɔmavɔ ɖɔ nú Jelemíi ɖɔ:

²⁰“Nyɛ Mawu Mavɔmavɔ wɛ ɖo xó ɖɔ wɛ; mi sixú gba akɔ e un jɛ xá kéze kpó zǎn kpó é ǎ; mi sixú gba bɔ é su hwenu e zǎn nɔ́ kú ɔ́, zǎn ná gɔn kúkú, bɔ é su hwenu e ayǐ nɔ́ hɔ́n ɔ́, ayǐ ná gɔn hǐnhɔ́n a?

²¹Mɔ̌ ɖokpó ɔ́, akɔ e un jɛ xá mɛsɛntɔ́ ce Davídi ɔ́ sixú ɖo nǎ gblé wɛ káká bónú vǐ e ná ɖu axɔ́sú ɖo do tɔn mɛ ɔ́ ná han ǎ. Akɔ e un ka jɛ xá vɔ̌sánú-xwlémawutɔ́ Levíi ví lɛ́ɛ ɔ́ sixú ɖo nǎ gblé wɛ bónú yě ná gɔn azɔ̌ ce wa ǎ.

²²Un ná bló bɔ mɛsɛntɔ́ ce Davídi sín ví lɛ́ɛ kpódó Levíi ví e nɔ́ xwlé vɔ̌sánú mì lɛ́ɛ kpó ná gba kún; yě ná sukpɔ́ sunví e ɖo jǐxwé lɛ́ɛ ɖɔhun, è nǎ sixú xa yě ǎ; yě ná sukpɔ́ nyɛ̌kɛ́n e ɖo xutó é ɖɔhun.”

²³Mawu Mavɔmavɔ ɖɔ xó nú Jelemíi, bó ɖɔ:

²⁴“Nǔ e ɖɔ wɛ mɛ lɛ́ɛ ɖe ɔ́, a se ǎ cé? Yě nɔ́ ɖɔ nyi ɖe alɔ sín togun we e un sɔ́ lɛ́ɛ sín kan mɛ; yě ɖɔ nyi ɖe alɔ sín Judáa kpó Jeluzalɛ́mu kpó sín kan mɛ. Yě mɛ e nɔ ɖo mɔ̌ ɖɔ wɛ lɛ́ɛ sɔ́ nɔ́ mɔ togun ce dó mɔ akɔta ná ǎ, yě nɔ́ ké ya n'i ǎ.

²⁵Lo ɔ́, xó e un ɖɔ é ɖíe: un jɛ akɔ xá zǎn kpó kéze kpó; un ɖɔ lě e jǐnukúnsin kpó ayǐkúngban kpó ná wa nǔ gbɔn é nú yě.

²⁶Ée nǔ ɖo mɔ̌ ɔ́, è sixú lin ɖɔ nyi ná jó Jakɔ́bu sín vǐ lɛ́ɛ kpó mɛsɛntɔ́ ce Davídi sín ví lɛ́ɛ kpó dó a? Abǐ è sixú lin ɖɔ gǎn e ná kpa acɛ dó Ablaxámu ví lɛ́ɛ, Izáki ví lɛ́ɛ kpó Jakɔ́bu ví lɛ́ɛ kpó nu lɛ́ɛ ɔ́, un kún ná zé ɖo yě mɛ ó a? “Un sixú bló mɔ̌ gbeɖé kpɔ́n ǎ! Un yí wǎn nú yě ɖésú. Un ná lɛ́ sɔ́ yě ɖó lě e yě kó ɖe ɖ'ayǐ é.”