Read fon Jelemíi 34 Bible Online

Jelemíi 34 - fon bible

Jelemíi 34

¹ Axɔ́sú Babilɔ́nu tɔn Nabukodonɔzɔ́ɔ tɔ́n ahwan Jeluzalɛ́mu kpó Judáa toxo ɖě lɛ́ɛ kpó. É kplá ahwangɔnu tɔn bǐ: É cyán sɔ́ja gbɔn axɔ́súɖuto lɛ́ɛ bǐ mɛ, bó cyán gbɔn togun e ɖo acɛ tɔn mɛ lɛ́ɛ mɛ. Hwe énɛ́ nu wɛ Mawu Mavɔmavɔ ɖɔ xó élɔ́ nú Jelemíi.

²“Xó e nyɛ Mawu Mavɔmavɔ, Mawu Izlayɛ́li tɔn ɖɔ é ɖíe: un jló ná sɛ́ we dó Judáa xɔ́sú Sedesíyasi gɔ́n; yi mɔ ɛ, bó ɖɔ n'i ɖɔ Mawu Mavɔmavɔ ɖɔ un ná jó toxo élɔ́ nú Babilɔ́nu xɔ́sú ɔ́, bɔ é ná dó zo.

³Hwɛ ɔ́, a sixú gló e ǎ; è nǎ wlí we, bó ná jó we n'i. A ɖǒ ná yi mɔ ɛ, bɔ mi ná kpan nukɔn miɖée, bɔ a nǎ sɔ́ nu towe dó ɖɔ lě e a wa nǔ gbɔn é n'i cóbó ná yi Babilɔ́nu.

⁴“Axɔ́sú Sedesíyasi, nǔ ka ɖo mɔ̌ có, ényí a wa nǔ e un ɖɔ nú we ɔ́, a nǎ kú hwǐ kú ǎ. Nyɛ Mawu Mavɔmavɔ ɔ́ wɛ ɖɔ mɔ̌ nú we.

⁵Alɔ wɛ a ɖó ná ɖó kɔ bó kú, bɔ è nǎ wa nǔ towe lě e è wa tɔ́gbó towe e ɖu axɔ́sú dó nukɔn nú we lɛ́ɛ tɔn gbɔn é. È nǎ dó zǎlínkpɔ́n zo ɖo cyɔ towe nu, bó ji nǔwamɛhan dó ví we ɖɔ: ‘Cóxóxowǒóo, zǎn kú ɖo hɔnmɛ!’ Nyɛ Mawu Mavɔmavɔ wɛ ɖɔ mɔ̌ nú we.”

⁶Wɛn e gbeyíɖɔ Jelemíi dó Judáa xɔ́sú Sedesíyasi é nɛ́. Jeluzalɛ́mu wɛ nǔ énɛ́ ɔ́ ɖo jijɛ ɖe wɛ.

⁷Hwenɛ́nu ɔ́, ahwangɔnu Babilɔ́nu xɔ́sú ɔ́ tɔn ɖo ahwan fun xá Jeluzalɛ́mu kpódó Judáa toxo e è mɛ ahohó lɛ́ lɛ̌ dó lɛ́ɛ wɛ. Toxo lɛ́ɛ wɛ nyí Lakíci kpó Azeka kpó.

⁸Axɔ́sú Sedesíyasi jɛ akɔ ɖokpó xá Jeluzalɛ́munu lɛ́ɛ, bó ɖɔ nú yě ɖɔ mɛ e nyí kannumɔ lɛ́ɛ bǐ jɛ yěɖée sí. Hwe énɛ́ nu wɛ Mawu Mavɔmavɔ ɖɔ xó ɖokpó nú Jelemíi.

⁹Eblée súnnu abǐ nyɔ̌nu e ɖo mɛ kannu lɛ́ɛ bǐ jɛ yěɖée sí; énɛ́ ɔ́, mɛ ɖé sɔ́ ná zé nɔví tɔn Judáanu dó ɖó kannumɔ ná ǎ.

¹⁰Togun ɔ́ bǐ kpó gǎn yětɔn lɛ́ɛ kpó yí gbe bó ná jó kannumɔ yětɔn súnnu kpó nyɔ̌nu kpó, bó sɔ́ ná sɔ́ yě dó ɖó kannumɔ gbeɖé ǎ. Nǔgbó ɔ́, yě jǒ mɛ e nyí kannumɔ lɛ́ɛ bǐ.

¹¹Ée é ká wá yá ɔ́, yě lɛ́ húzú gbe, bó lɛ́ wlí mɛ lɛ́ɛ, bó sɔ́ yě dó húzú kannumɔ ná gǎnnugǎnnu.

¹²Énɛ́ ɔ́, Mawu Mavɔmavɔ ɖɔ nú Jelemíi ɖɔ:

¹³“Xó e Mawu Mavɔmavɔ, Mawu Izlayɛ́li tɔn ɖɔ ɔ́ ɖíe: Nyɛ lɔmɔ̌ jɛ akɔ ɖokpó xá tɔ́gbó mitɔn lɛ́ɛ, hwenu e un ɖe yě tɔ́n sín Ejípu, fí e yě ɖo mɛ kannu ɖe é.

¹⁴ Un ɖɔ nú yě ɖɔ: ényí nɔví mitɔn Eblée ɖé sɔ́ éɖée sa nu mi, bó húzú kannumɔ mitɔn, bó wa azɔ̌ nú mi xɔ xwe ayizɛ́n ɔ́, xwe tɛ́nwegɔ́ ɔ́ mɛ ɔ́, mi ná jó e dó bɔ é ná jɛ éɖée sí. Lo ɔ́ tɔ́gbó mitɔn lɛ́ɛ ɖótó mì ǎ; nǔ e un ɖɔ ɔ́ nyí nǔɖé nú yě ǎ.

¹⁵Amɔ̌, midɛɛ lɛ́ɛ ɔ́, zǐnzán mitɔn gbɔn vo nú yětɔn. Mi mɛ ɖokpó ɖokpó kó jó kannumɔ mitɔn lɛ́ɛ dó bɔ yě jɛ yěɖée sí, káká bɔ mi jɛ akɔ ɖokpó dó nǔ énɛ́ tamɛ, ɖo xwé e è sɔ́ ɖó vo nú mì ɔ́ gbe.

¹⁶Nǔ e nylá ɖ'é mɛ ɔ́, mi lɛ́ húzú gbe, bó hu tɛ́ nú mì, ɖó mi ko jó kannumɔ mitɔn súnnu kpó nyɔ̌nu kpó dó, bɔ yě jɛ jlokoko bó ɖidó fí e jló yě lɛ́ɛ. É ká lɛ́ wá yá bɔ mi yi wlí yě, bó lɛ́ sɔ́ yě dó húzú kannumɔ gǎnnugǎnnu.”

¹⁷“Énɛ́ wú ɔ́, xó e Mawu Mavɔmavɔ ɖɔ ɔ́ ɖíe: Mɛ ɖokpó ɖokpó ɖó ná jó kannumɔ tɔn dó, kannumɔ tɔn e nyí nɔví tɔn, bó nyí nɔzo tɔn é dó, bɔ é ná jɛ jlokoko, lo ɔ́, mi se xó ce ǎ. Énɛ́ ɔ́ wú wɛ nyɛ Mawu Mavɔmavɔ ná sɛ́ ahwan dó mi, bó sɛ́ adɔ dó mi, bó sɛ́ jɛmɛjí dó mi. Un ná wa mɔ̌ xá mi, bɔ axɔ́súɖuto e ɖo gbɛ ɔ́ mɛ lɛ́ɛ ɖěbǔ mɔ mi ɔ́, hǔn tɔn ná zɛ.

¹⁸“Un ná wa nǔ xá yě mɛ e má nyibúví ɖó we, bó gbɔn tɛ́ntin tɔn dó jɛ akɔ ɖo nukɔn ce, bó ma ká nɔ gbejí nú akɔ e yě jɛ é ǎ lɛ́ɛ é.

¹⁹Un ná wa nǔ xá gǎn hɔn-yitɔ́ Judáa tɔn lɛ́ɛ, Jeluzalɛ́mu tɔn lɛ́ɛ, gǎn e nɔ wa azɔ̌ ɖo axɔ́sú ɔ́ xwé lɛ́ɛ, vɔ̌sánú-xwlémawutɔ́ lɛ́ɛ kpó mɛ e ɖo togun ɔ́ mɛ, bó gbɔn nyibúví e è mǎ ɖó we é tɛ́ntin bó dín é bǐ kpó.

²⁰Un ná jó yě nú kɛntɔ́ yětɔn lɛ́ɛ, mɛ e ɖo kú yětɔn bá wɛ lɛ́ɛ, bɔ cyɔ yětɔn ná húzú nǔɖuɖu nú xɛ e nɔ gbɔn jǐ lɛ́ɛ kpódó kanlin e ɖo ayǐkúngban jí lɛ́ɛ kpó.

²¹Mɔ̌ ɖokpó ɔ́, un ná jó Judáa xɔ́sú Sedesíyasi kpó gǎn hɔn-yitɔ́ tɔn lɛ́ɛ kpó nú kɛntɔ́ yětɔn lɛ́ɛ, mɛ e ɖo kú yětɔn bá wɛ lɛ́ɛ. Un na jó yě nú axɔ́sú Babilɔ́nu tɔn sín ahwangɔnu. Égbé din ɔ́, ahwangɔnu énɛ́ sɔ́ ɖo tagba dó nú mi wɛ ǎ;

²²amɔ̌, un ɖe gbe, bɔ é ná lɛ́ wá tɔ́n ahwan toxo élɔ́, bó ná yí, bó ná dó zo. Un na zé Judáa toxo lɛ́ɛ dó húzú gbětótló, bɔ toxo lɛ́ɛ bǐ ná jɛ vɔ̌.” Xó e Mawu Mavɔmavɔ ɖɔ é nɛ́.