Read fon Jelemíi 36 Bible Online

Jelemíi 36 - fon bible

Jelemíi 36

¹ Hwenu e Joziyási ví Yoyakímu ɖo xwe ɛnɛ bló wɛ ɖo axɔ́súzinkpo Judáa tɔn jí ɔ́ wɛ Mawu Mavɔmavɔ ɖɔ xó nú Jelemíi. É ɖɔ n'i ɖɔ:

²“Xó e ɖɔ nú we wɛ un ɖe dó Izlayɛ́li kpó Judáa kpó, kpódó akɔta lɛ́ɛ kpó wú sín axɔ́sú Joziyási hwenu ɔ́, sɔ́ anyǔwéma ɖokpó bó vlɔ́n, bó wlán bǐ d'é jí.

³Bóyá Judáa ví lɛ́ɛ se nǔ nyanya e un jló ná wa xá yě lɛ́ɛ ɔ́, yě sixú jó gbɛ nyanya e zán wɛ yě ɖe ɔ́ dó, bɔ un ná zé hwɛ e yě hu lɛ́ɛ kpó nǔ e yě wa nyi do lɛ́ɛ kpó kɛ yě.”

⁴Ée Jelemíi se mɔ̌ ɔ́, é ylɔ́ Baalúki Nɛliya ví ɔ́, lobo ɖɔ xó e Mawu Mavɔmavɔ ɖɔ n'i lɛ́ɛ ɖokpó ɖokpó n'i, bɔ Baalúki dó bǐ wěma mɛ.

⁵Énɛ́ ɔ́ gúdo ɔ́, Jelemíi ɖɔ nú Baalúki ɖɔ: “È gbɛ̌ nú mì ɖɔ nyi ní má yi Mawu Mavɔmavɔ xwé ó, hǔn un sixú yi dɔ̌n ǎ.

⁶Hwɛ na yi, bɔ xó e Mawu Mavɔmavɔ ɖɔ bɔ un wlí ɖɔ nú we, bɔ a wlǎn lɛ́ɛ ɔ́, a na xa nú mɛ lɛ́ɛ ɖo Mawu Mavɔmavɔ xwé, gbe e gbe yě ná ɖo nu blá wɛ é. A nǎ xa ɖo Judáanu e na gosín toxo yětɔn mɛ bó wá lɛ́ɛ nukɔn, bɔ yě lɔ na se.

⁷Vlafo, yě sixú sa vo nú Mawu Mavɔmavɔ bɔ é ná se, bɔ mɛ ɖokpó ɖokpó ná jó gbɛ nyanya e zán wɛ é ɖe ɔ́ dó. Đó xomɛsin e jí Mawu Mavɔmavɔ ɖe ɔ́ syɛ́n ɖésú; adǎn yětɔn e gblɔ́n wɛ é ɖe ɔ́ vɛ́ jlɛ́.”

⁸Baalúki bló nǔ e gbeyíɖɔ Jelemíi ɖɔ n'i lɛ́ɛ bǐ. É yi Mawu Mavɔmavɔ xwé gbe, bó zé gbe d'aga bó xa Mawu Mavɔmavɔ xó e yě wlán ɖó anyǔwéma ɔ́ jí é.

⁹Hwenu e Joziyási ví Yoyakímu ɖo xwe atɔ́ɔ́n bló wɛ ɖo axɔ́súzinkpo Judáa tɔn jí ɔ́ wɛ nǔ énɛ́ ɔ́ ɖo jijɛ wɛ, ɖo sun tɛ́nnɛgɔ́ ɔ́ mɛ. È ylɔ̌ Jeluzalɛ́mu to ɔ́ bǐ kplé, bó ylɔ́ Judáanu lɛ́ɛ bǐ kplé, bɔ yě ɖo nu blá wɛ ɖo Mawu Mavɔmavɔ nukɔn.

¹⁰Xɔ ɖokpó ɖo Mawu xwé ɔ́ gbe; wěgbójínɔtɔ́ Gemaliyáhu sín xɔ wɛ. Gemaliyáhu ɔ́, Cafáni ví wɛ. Xɔ ɔ́ ɖo hɔntogbó yɔ̌yɔ́ ɔ́ kpá, ɖo sinsɛnxɔ ɔ́ sín kɔ́xota e ɖo aga ɔ́ jí. Dɔ̌n wɛ Baalúki nɔ bó zé gbe dó jǐ, bó xa Jelemíi xó e yě wlán dó anyǔwéma ɔ́ jí é.

¹¹Mikayehu, Gemaliyáhu ví, Cafáni vívú ɔ́ se Mawu Mavɔmavɔ xó e Baalúki xa é bǐ.

¹²Énɛ́ ɔ́, é yi wěgbójínɔtɔ́ Elicama sín xɔ mɛ, ɖo hɔnmɛ. Gǎn hɔn-yitɔ́ lɛ́ɛ bǐ ɖo kplé jí ɖo Elicama xɔ sá: wěgbójínɔtɔ́ Elicama ɔ́, Deláyahu Cemayahu ví ɔ́, Ɛlunatáni Akubɔ́ɔ ví ɔ́, Gemaliyáhu Cafáni ví ɔ́, Sedesíyasi Hananiyahu ví ɔ́ kpódó gǎn hɔn-yitɔ́ ɖé lɛ́ɛ kpó.

¹³Énɛ́ ɔ́, xó e Baalúki Nɛliya vívú ɔ́ sɔ́ gbe dó jǐ bó xa nú togun ɔ́ ɖo anyǔwéma ɔ́ jí ɔ́, Mikayehu wlí bǐ ɖɔ nú yě.

¹⁴Lo ɔ́, gǎn hɔn-yitɔ́ lɛ́ɛ ɖó gbe kpɔ́, bó sɛ́ Yexudi dó Baalúki, ɖɔ é ní yi ɖɔ n'i ɖɔ é ní zé wěma e é xa nú togun ɔ́, lobo wá. Yexudi ɔ́, Nɛtaniyahu ví wɛ, bó nyí Cɛlɛmiyahu vívú, lobo nyí Kúcí vívú vivu. Ée Yexudi yi ɖɔ nú Baalúki ɔ́, é zé wěma ɔ́ nǔgbó, bó ɖidó gɔ̌n yětɔn.

¹⁵Ée Baalúki wá ɔ́, yě ɖɔ n'i ɖɔ: “Jǐnjɔ́n ayǐ bó xa wěma ɔ́ nú mǐ nǎ se.” Bɔ Baalúki xa wěma ɔ́ nú yě.

¹⁶Ée yě se xó lɛ́ɛ bǐ ɔ́, xɛsi jɛ yě jí, bɔ yě nɔ́ kpɔ́n yěɖée, lobo ɖɔ nú Baalúki ɖɔ: “Mǐ ɖó ná wlí xó énɛ́ lɛ́ɛ bǐ ɖɔ nú axɔ́sú ɔ́.”

¹⁷Énɛ́ ɔ́ gúdo ɔ́, yě kanbyɔ́ Baalúki ɖɔ: “A sixú tín lě e a wlǎn nǔ énɛ́ lɛ́ɛ bǐ gbɔn é mɛ nú mǐ a?”

¹⁸Énɛ́ ɔ́, Baalúki ɖɔ nú yě ɖɔ: “Jelemíi wɛ ɖɔ xó énɛ́ lɛ́ɛ bǐ nú mì; é ɖo ɖiɖɔ wɛ ɔ́, un nɔ ɖo ɖokpó ɖokpó wlán dó anyǔwéma élɔ́ jí wɛ, kpódó kwéle kpó.”

¹⁹Gǎn hɔn-yitɔ́ lɛ́ɛ ɖɔ nú Baalúki ɖɔ: “Hwi kpó Jelemíi kpó bǐ ní yi hɔn hwlá, bónú mɛ ɖěbǔ ní ma tunwun fí e mi ɖe ɔ́ ó.”

²⁰Gǎn hɔn-yitɔ́ lɛ́ɛ jó wěma ɔ́ dó nyi wěgbójínɔtɔ́ Elicama xɔ mɛ dɔ̌n, bó yi axɔ́sú ɔ́ sín kɔ́xota ɖo hɔnmɛ, bó wlí nǔ e jɛ é bǐ ɖɔ n'i.

²¹Énɛ́ ɔ́, axɔ́sú ɔ́ ɖɔ nú Yexudi ɖɔ é ní yi zé wěma ɔ́ wá, bɔ é yi zé wěma ɔ́ ɖo Elicama xɔ mɛ, bó sɔ́ gbe dó jǐ bó jɛ xixa jí ɖo axɔ́sú ɔ́ kpó gǎn hɔn-yitɔ́ e ɖo gɔ̌n tɔn lɛ́ɛ bǐ kpó nukɔn.

²²Sun tɛ́nnɛgɔ́ ɔ́ mɛ wɛ è ɖe hwenɛ́nu, bɔ axɔ́sú ɔ́ ɖo ayǐjínjɔ́n ɖo xwé e gbe é nɔ́ nɔ avivɔ hwenu é, bó ɖo myɔ xú wɛ.

²³Énɛ́ ɔ́, nú Yexudi xa wěma ɔ́ sín akpáxwé atɔn abǐ ɛnɛ ɔ́, axɔ́sú ɔ́ nɔ́ sɔ́ jǐví bó nɔ́ sɛ́n, bó nɔ́ sɔ́ dó myɔ ɔ́ mɛ; mɔ̌ bló wɛ é ɖe káká bó dó wěma ɔ́ bǐ zo.

²⁴Axɔ́sú ɔ́ kpó azaglɔ́gán tɔn lɛ́ɛ kpó mɔ nǔ jɛ nǔ e è wlǎn ɔ́ mɛ ganjí; xɛsi ka ɖi yě ǎ, yě vún awu dó kɔ nú yěɖée dó ɖe xlɛ́ ɖɔ wǔ kú émí ǎ.

²⁵Ɛlunatáni kpó Deláyahu kpó, kpódó Gemaliyáhu kpó ɖɔ nǔ bǐ nú axɔ́sú ɔ́ ɖɔ é ní má dó wěma ɔ́ zo ó có axɔ́sú ɔ́ se xó yětɔn ǎ.

²⁶É nyɔ́ wa ɔ́, gbe wɛ é ná vǐ tɔn kpó Yelaximɛyɛ́li ɔ́, kpó Selayahu, Azliyɛ́li ví ɔ́ kpó, kpó Cɛlɛmiyahu, Avudéɛli ví ɔ́ kpó ɖɔ yě ní wlí wěgbójínɔtɔ́ Baalúki kpódó gbeyíɖɔ Jelemíi kpó. Lo ɔ́, Mawu Mavɔmavɔ zé yě hwlá.

²⁷Ée axɔ́sú ɔ́ dó wěma e jí Baalúki wlán xó e Jelemíi ɖɔ n'i lɛ́ɛ dó é zo ɔ́, Mawu Mavɔmavɔ ɖɔ nú Jelemíi ɖɔ:

²⁸“Lɛ̌ sɔ́ anyǔwéma ɖěvo bó vlɔ́n, bó wlán xó e ɖo wěma nukɔn tɔn e Judáa xɔ́sú Yoyakímu dó zo ɔ́ jí lɛ́ɛ d'é jí.

²⁹Énɛ́ ɔ́ gúdo ɔ́, a nǎ ɖɔ dó Judáa xɔ́sú Yoyakímu wú ɖɔ: “Xó e Mawu Mavɔmavɔ ɖɔ ɔ́ ɖíe: ‘Jelemíi wlán dó anyǔwéma jí ɖɔ Babilɔ́nu xɔ́sú ɔ́ ná wá gba to élɔ́ dandan, lobo ná sú gbɛtɔ́ kpó kanlin kpó sín kún dó. Lo ɔ́, Yoyakímu gbɛ́ nǔ nú Jelemíi bó dó wěma ɔ́ zo.

³⁰Énɛ́ wú ɔ́, Mawu Mavɔmavɔ ɖɔ dó Yoyakímu wú ɖɔ: Yoyakímu ví ɖě ná yi Davídi zinkpo jí ǎ. Cyɔ tɔn ná nɔ agě jí, bɔ hwe ná hun d'é jí, bɔ ahǔn na nɔ ja d'é jí.

³¹Un ná wa nǔ xá é kpódó vǐ tɔn lɛ́ɛ kpó azaglɔ́gán tɔn lɛ́ɛ kpó ɖó hwɛ yětɔn lɛ́ɛ wútu. Awě e sín adǎn e un gblɔ́n nú yě, bɔ yě má ké ya ná ǎ lɛ́ɛ ɔ́, un ná sɛ́ dó yě kpódó Jeluzalɛ́munu lɛ́ɛ kpó, kpódó Judáanu lɛ́ɛ bǐ kpó.’ ”

³²Jelemíi lɛ́ sɔ́ anyǔwéma ɖěvo, bó vlɔ́n, bó sɔ́ jó nú wěgbójínɔtɔ́ Baalúki, lobo lɛ́ ɖɔ xó e ɖo wěma nukɔn tɔn e Yoyakímu dó zo ɔ́ jí lɛ́ɛ bǐ nú Baalúki, bɔ é wlán xó e Jelemíi ɖɔ lɛ́ɛ ɖokpó ɖokpó ɖ'é jí. Xó mɔ̌hun gěgé ɖěvo lɛ́ɛ lɛ́ ɖo wěma ɔ́ jí.