Read fon Jelemíi 4 Bible Online

Jelemíi 4 - fon bible

Jelemíi 4

¹Mawu Mavɔmavɔ ɖɔ: “Izlayɛ́li e, nú a lɛ̌ kɔ ɔ́, gɔ̌n ce wɛ a ɖǒ ná lɛ́ kɔ wá; nú a ɖe vodún suɖunú towe lɛ́ɛ sín nukɔn ce ɔ́, a sɔ́ ná flú ɖě ǎ.

²Hwe nɛ́ nu ɔ́, a nǎ xwlé nyɛ Mawu Mavɔmavɔ e ɖo gbɛ ɔ́, a nǎ xwlé nǔgbó nǔgbó tɔn, a nǎ xwlé ɖó sɛ́nxwi jí, a nǎ xwlé kpó ayi towe bǐ kpó. A blǒ mɔ̌ ɔ́, akɔta ɖě lɛ́ɛ na byɔ́ mì ɖɔ nyɛ ní xo ɖɛ dó émí jí, yě ná zé mì dó xɔ susu ná.

³ Nǔ e Mawu Mavɔmavɔ ɖɔ nú Judáanu lɛ́ɛ kpó Jeluzalɛ́munu lɛ́ɛ kpó é ɖíe; é ɖɔ: Mi xwa gle yɔ̌yɔ́ ɖokpó. Mi ma dó nǔkún nyi wunkan mɛ ó.

⁴Judáanu e mi! Jeluzalɛ́munu e mi! Mi ko gbo ada, amɔ̌, ada e mi gbo ɔ́ ní wa azɔ̌ ɖo ayi mitɔn lɔ wú, bónú mi jó gbɛ mitɔn bǐ dó nú mì. É má nyi mɔ̌ ǎ ɔ́, xomɛsin ce táá wá xɔ myɔ ɖɔhun. É ná xɔ myɔ ɖɔhun bɔ cící ná gló, ɖó lě e dǎka e mi xo lɛ́ɛ syɛ́n sɔ é wú.”

⁵Xó e mi ná ɖɔ gbɔn Judáa yíkúngban jí ɔ́ ɖíe, xó e mi ná jlá ɖo Jeluzalɛ́mu ɔ́ ɖíe, mi ɖɔ: Mi bǐ mi kún lanzo gbɔn to ɔ́ bǐ mɛ! Mi sú xó bó ɖɔ: Mi wá kplé miɖée ɖó toxo e è mɛ ahohó lɛ́ lɛ̌ dó lɛ́ɛ mɛ.

⁶Mi sɔ́ asyá dó jǐ ɖo Sinyɔ́ɔ! Mi hɔn! Mi ma nɔ te ó! Đó un sɛ́ awě ɖé dó sín totaligbé, nǔ baɖabaɖa wɛ.

⁷Kinnikínní tɔ́n sín zun tɔn mɛ, mɛ e nɔ gblé gbɛ dó nú akɔta lɛ́ɛ e ko gosín fí e é nɔ́ nɔ é, é jǎwe, é ná wá vɔ to mitɔn. É ná gba toxo mitɔn lɛ́ɛ bǐ, mɛɖé sɔ́ ná kpo ɖo toxo lɛ́ɛ mɛ ǎ.

⁸Énɛ́ ɔ́ wú ɔ́, mi cyɔ́n ati, mi ya avǐ, mi ná alě, ɖó xomɛ e Mawu Mavɔmavɔ sin dó mǐ ɔ́ ko vɔ ǎ.

⁹Mawu Mavɔmavɔ ɖɔ jí, gbe énɛ́ ɔ́ gbe ɔ́, axɔ́sú kpó gǎn hɔn-yitɔ́ kpó bǐ ná bɛ́ xɛsi. É ná kpácá vɔ̌sánú-xwlémawutɔ́ lɛ́ɛ, ado ná hu gbeyíɖɔ lɛ́ɛ.

¹⁰Lo ɔ́, un ɖɔ: “Yéége Aklúnɔ Mavɔmavɔ, a blɛ̌ togun élɔ́; a blɛ̌ Jeluzalɛ́mu; a ɖɔ mǐ na vo, hwǐ ɖíe ka ɖo kɔ mǐtɔn gúdo din e.”

¹¹Hwenɛ́nu ɔ́, Mawu ná ɖɔ nú Jeluzalɛ́munu lɛ́ɛ ɖɔ: “Jɔhɔn zozo e nɔ nyi ɖo sókan mɛ ɔ́ sí te sín gbětótló mɛ já, é ná nyi dó mi mɛ e nyí togun ce ɔ́ jí. É ká nyí jɔhɔn flɛ́flɛ́ e nɔ nyi bɔ è nɔ dó fún jinukún é ǎ.

¹²Jɔhɔn ɖaxó ɖé wɛ bɔ un sɛ́ dó sín gbětótló mɛ dɔ̌n, bɔ é jǎwe. Lo ɖó hwɛ nú mi wɛ un ɖe nɛ́.”

¹³Bɔ togun ɔ́ ná ɖɔ: “Mi kpɔ́n! Kɛntɔ́ ɖíe jǎwe jǐ wɔ̌ ɖɔhun e! Ahwanhún tɔn lɛ́ɛ ɖo zǐngídi jí jǎwe jɔhɔn ɖaxó ɖɔhun! Sɔ́ tɔn lɛ́ɛ kplɔ́ jǎwe gangan xwe nǔ sá gbe ɖɔhun! Heelú! Gbɛ mǐtɔn vɔ lo!”

¹⁴Mawu ná ɖɔ: “Jeluzalɛ́mu, ɖe linlin nyanya sín ayi mɛ, lobo gán. Káká hwetɛ́nu ayi towe ná nɔ jikwíkwí mɔ̌ yi jɛ?

¹⁵È ɖo xó ɖé se wɛ sín Dan gbé jí ɖɔ nǔ baɖabaɖa ɖé ná jɛ; Eflayímu sókan mɛ se xó ɔ́ sín wɛ è ɖe ɖo totaligbé.

¹⁶Mi ɖɔ nú akɔta lɛ́ɛ; mi nú Jeluzalɛ́munu bǐ ní tunwun: Kɛntɔ́ lɛ́ɛ gosín fímáyáfí ɖé bó wá; yě ɖo xó sú dó Judáa toxo lɛ́ɛ jí wɛ.

¹⁷Yě lɛ́ lɛ̌ dó Jeluzalɛ́mu toxo ɔ́ glecɔ́tɔ́ lɛ́ɛ lɛ́ lɛ̌ dó gle ɖɔhun. Gǔ e Jeluzalɛ́mu toxo ɔ́ fɔ́n dó jǐ ce ɔ́ wú wɛ un ɖɔ mɔ̌. Xó e nyɛ Mawu Mavɔmavɔ ɖɔ ɔ́ nɛ́.

¹⁸Jeluzalɛ́mu, nǔ e a dǒ sin lɛ́ɛ sín le nɛ́! Dǎka e a xo lɛ́ɛ sín le nɛ́! Awě e xo we ɔ́ vɛ́ dín. É hun káká yi ayi towe mɛ.”

¹⁹Adɔgo ce! Adɔgo ce! Un ɖo slósló ɖo wǔvɛ́ nu wɛ; hǔn ce nɔ́ xo káká bó nɔ́ ɖibla wɛ́n. Kotokítí tɛ́ ɖíe ɖo xo ce mɛ e! Un sixú nɔ xwíí ǎ; un se lanzo ɖo nǔ ɖɔ wɛ; un ɖo xósúsú se wɛ, mɛ ɖo ahwangbénu ɖɔhun.

²⁰È ɖɔ nǔ na gblé, bó ná lɛ́ gblé d'é jí. Nǔ e ɖo toxo ɔ́ mɛ lɛ́ɛ bǐ hánnyá. Goxɔ mǐtɔn bǐ gba ɖo cɛ́jú mɛ; xɔ mǐtɔn lɛ́ɛ bǐ mu ɖo nukún xwixwe ɖokpó mɛ.

²¹Káká hwetɛ́nu un ka ná mɔ ahwansyá yi jɛ? Káká hwetɛ́nu un ná ɖo lanzo gbe se wɛ yi jɛ?

²²Mawu ɖɔ: “Dandan mɛ ɔ́, togun ce ɔ́, taɖu wɛ é hun; é tunwun mì ǎ. Vǐ ɖé lɛ́ɛ wɛ yě nyǐ bó ɖó tamɛ ǎ. Yě bǐ ǎ; nǔ nyanya kɔn wɛ yě nɔ́ yá alɔ ɖe. Yě nyɔ́ nǔ ɖagbe wa ǎ.”

²³Un kpɔ́n ayǐkúngban ɔ́: ayǐkúngban ɔ́ ɖo mɔ̌ kpowun, nǔ ɖěbǔ ɖ'é jǐ ǎ. Un kpɔ́n jǐnukúnsin bó ba wěziza tɔn kpo.

²⁴Un kpɔ́n só lɛ́ɛ bó mɔ bɔ bǐ xo to. Kpó lɛ́ɛ bǐ nɔ sísɔ́.

²⁵Un kpɔ́n fí bǐ lɛ̌ dó, bɔ gbɛtɔ́ ɖěbǔ sɔ́ ɖe ǎ, xɛ lɛ́ɛ bǐ hɔn yi.

²⁶Un kpɔ́n fí bǐ, bɔ to énɛ́ e nyí atínsínsɛ́n gbo ɔ́ húzú gbětótló. È gba toxo tɔn lɛ́ɛ bǐ. Mawu Mavɔmavɔ sín xomɛsin wɛ jlɛ́ nǔ mɔ̌.

²⁷Xó e Mawu Mavɔmavɔ ɖɔ ɔ́ ɖíe: “To ɔ́ bǐ ná jɛ vɔ̌. Lo ɔ́, un ná gba nǔ e ɖo to ɔ́ mɛ lɛ́ɛ bǐ ǎ.

²⁸Énɛ́ wɛ zɔ́n bɔ to ɔ́ ɖo aluwɛ mɛ, bɔ jǐxwé dó ablu. Đó un ko ɖɔ lě e un ba gbɔn ɔ́ nɛ́. É ná wá vɛ́ nú mì ǎ, un sɔ́ ná lɛ́ wá jí ǎ.”

²⁹Hwenu e sɔ́xátɔ́ lɛ́ɛ kpó gǎdatɔ́ lɛ́ɛ kpó jǎwe, bɔ è se ɔ́, mɛ e ɖo to ɔ́ mɛ e bǐ hɔn. Mɛ ɖě hɔn byɔ́ zunkan mɛ, mɛ ɖě hɔn yi bɛ ɖó sókan mɛ. Mɛ bǐ hɔn sín toxo lɛ́ɛ mɛ; é sɔ́ kpo mɛ ɖěbǔ ǎ.

³⁰Jeluzalɛ́mu, hwi ɖíe è gba bǐ e! Nɛ̌ a ka ná wa nǔ gbɔn din? A nɔ dó awu ɖagbe ɖagbe lɛ́ɛ, a nɔ́ dó sikánú lɛ́ɛ; a nɔ tá nǔ dó nukún. A nɔ ɖo kan xo wɛ bó nɔ́ ɖo hwiɖée bló ɖó wɛ mɔ̌ có, nǔ yǎyá wa wɛ a ɖe; xɔnnɔ towe lɛ́ɛ ɖo xó towe ba wɛ ǎ, kú towe ba wɛ yě ɖe.

³¹Nǔgbó wɛ, un se mɛɖé ɖo xó sú wɛ nyɔ̌nu ɖo ajidonu ɖɔhun; é ɖo xó sú wɛ mɛ ja nukɔn ví jí gbé ɖɔhun. Sinyɔ́ɔ toxo, hwi wɛ ɖo xó sú wɛ. Hwi wɛ ɖo azɔn wɛn wɛ bó nɔ dlɛ́n alɔ bo nɔ ɖɔ: “Un jɛ mɛhutɔ́ lɛ́ɛ lɔ mɛ! Gbɛ ce vɔ!”