Read fon Jelemíi 41 Bible Online

Jelemíi 41 - fon bible

Jelemíi 41

¹ Xwe énɛ́ ɔ́ sín sun tɛ́nwegɔ́ ɔ́ mɛ ɔ́, Yicimayɛ́li Nɛtaniya ví, Elicama vívú ɔ́ wá Gedaliyási gɔ́n ɖo Misipa. Yicimayɛ́li ɔ́, axɔ́sú kún mɛ é jɔ ɖe, bó nɔ axɔ́sú sín mɛ lɛ́ɛ mɛ. É kpódó gbɛtɔ́ wǒ kpó wɛ wá Gedaliyási gɔ́n. Hwenu e yě ɖo nǔ ɖu wɛ ɖo Gedaliyási xwé ɔ́,

²Yicimayɛ́li sí te, bɔ mɛ wǒ e kplá lɛ́ɛ lɔmɔ̌ sí te, bɔ yě bǐ kplé dó Gedaliyási bó hu i ɖó hwǐ wú. Lě e yě hu mɛ e Babilɔ́nu xɔ́sú ɔ́ zé ɖó to ɔ́ nu gbɔn ɔ́ nɛ́.

³Yicimayɛ́li lɛ́ hu Judáanu e ɖo Gedaliyási gɔ́n ɖo Misipa lɛ́ɛ bǐ; é hu Babilɔ́nunu ahwanfuntɔ́ e ɖo fínɛ́ lɛ́ɛ bǐ.

⁴È hu Gedaliyási ɔ́, é kó bló azǎn we, bɔ mɛ ɖěbǔ ka ko tunwun ǎ.

⁵Gbe nɛ́ gbe ɔ́, gbɛtɔ́ kanwe (80) gosín Sikɛ́mu, Silóo kpódó Samalíi kpó; yě hɛn nǔníná, kpó zǎlínkpɔ́n kpó, bó ná yi xwlé Mawu ɖo Mawu Mavɔmavɔ xwé. Yě xwlɛ́ atán yětɔn lɛ́ɛ, bó dó awu vúnvún, bó já wǔtu bǐ. Yě bló mɔ̌ dó ɖe xlɛ́ ɖɔ émí ɖo aluwɛ mɛ.

⁶Ée Yicimayɛ́li Nɛtaniya ví ɔ́ se ɖɔ mɛ ɖé lɛ́ɛ jǎwe ɔ́, é gosín Misipa, bó ɖidó yě kpé gbé kpó avǐ kpó. Ée é kpé yě ɔ́, é dó kɛnklɛ́n nú yě ɖɔ yě ní wá mǐ yi Gedaliyási Axikamu ví ɔ́ xwé.

⁷Lo ɔ́, ée yě jɛ toxo tɛ́ntin ɔ́, Yicimayɛ́li kpó ahwan tɔn lɛ́ɛ kpó gbo gbe mɛ gěgé ɖo yě mɛ, bó bɛ́ yě dó sitɛ́nu mɛ.

⁸É ká jó mɛ wǒ dó ɖo yě mɛ, ɖó yě ɖɔ n'i ɖɔ é ní má hu émí ó, émí hɛn nǔɖuɖu gban bó zé sɛxwe dó nǔkan mɛ fí ɖé; émí hɛn blěe, ɔ́ji, ami kpódó wǐin kpó. Ée yě ɖɔ mɔ̌ ɔ́, Yicimayɛ́li sɔ́ hu yě ǎ.

⁹Sitɛ́nu e mɛ Yicimayɛ́li bɛ́ mɛ e é wá hu gɔ́ nú Gedaliyási lɛ́ɛ sín cyɔ kɔn dó ɔ́, sitɛ́nu e axɔ́sú Asa kun hwenu e é kpó Izlayɛ́li xɔ́sú Baeca kpó ɖo ahwan fun wɛ é wɛ. Sitɛ́nu énɛ́ mɛ wɛ Yicimayɛ́li bɛ́ cyɔ lɛ́ɛ dó bɔ é gɔ́.

¹⁰Ée Yicimayɛ́li dó nǔ énɛ́ lɛ́ɛ sin ɔ́, é wlí mɛ e kpo ɖo Misipa lɛ́ɛ bǐ, káká jɛ axɔ́sú ɔ́ sín vǐ nyɔ̌nu lɛ́ɛ jí; è nǎ ɖɔ ɔ́, é wlí mɛ e Nɛbuzaladáni sɔ́ dó así nú Gedaliyási lɛ́ɛ bǐ sín kannumɔ, bó kplá ɖidó Amumɔ́ɔ ví lɛ́ɛ gɔ́n. Nɛbuzaladáni ɔ́, sɔ́ja e nɔ cɔ́ Babilɔ́nu xɔ́sú ɔ́ sín gǎn wɛ.

¹¹Yoxanáni Kaleyaxi ví ɔ́ kpódó ahwanfuntɔ́ lɛ́ɛ sín gǎn ɖě lɛ́ɛ e ɖo kpɔ́ xá ɛ lɛ́ɛ kpó se nǔ e Yicimayɛ́li Nɛtaniya ví ɔ́ dó sin é.

¹²Ée yě se mɔ̌ ɔ́, yě kplá ahwanfuntɔ́ yětɔn lɛ́ɛ bǐ, bó ɖidó ahwan fun xá Yicimayɛ́li gbé. Yě wá yi xwedó wǔ tɔn ɖo tɔ ɖaxó e ɖo Gabawɔ́ɔn é kpá.

¹³Ée mɛ e Yicimayɛ́li wlí lɛ́ɛ mɔ Yoxanáni kpó ahwanfuntɔ́ lɛ́ɛ sín gǎn ɖě lɛ́ɛ kpó ɔ́, é víví nú yě ɖésú.

¹⁴Mɛ énɛ́ lɛ́ɛ e Yicimayɛ́li kplá sín Misipa lɛ́ɛ bǐ lɛ́ kɔ, bó yi su Yoxanáni.

¹⁵Ée Yicimayɛ́li mɔ mɔ̌ ɔ́, é hɔn, é kpó mɛ tɔn tántɔn kpó, bó yi Amumɔ́ɔ ví lɛ́ɛ gɔ́n, bó gló Yoxanáni.

¹⁶Yoxanáni kpó gǎn ɖě lɛ́ɛ e zɔn xá ɛ lɛ́ɛ kpó kplá mɛ e Yicimayɛ́li hu Gedaliyási bó kplá sín Misipa lɛ́ɛ; é kplá ahwanfuntɔ́ lɛ́ɛ, nyɔ̌nu lɛ́ɛ, yɔkpɔ́vú lɛ́ɛ kpó agooɖojǐe lɛ́ɛ kpó. Yě nɔ́ Gabawɔ́ɔn ǎ,

¹⁷yě wlí ali, bó wá nɔ te ɖo jǒnɔyítɛn Kimuxámu tɔn, ɖo malín málín mɛ dó Bɛteleyɛ́mu, lobo ná dín yi Ejípu.

¹⁸Đó yě ko ɖo xɛsi ɖi nú Babilɔ́nunu lɛ́ɛ wɛ sín hwenu e Yicimayɛ́li hu Gedaliyási, mɛ e Babilɔ́nu xɔ́sú ɔ́ zé ɖó yě nu é.