Read fon Jelemíi 42 Bible Online

Jelemíi 42 - fon bible

Jelemíi 42

¹Yoxanáni Kaleyaxi ví ɔ́, kpó ahwanfuntɔ́ lɛ́ɛ sín gǎn ɖě lɛ́ɛ kpó, kpó Azalya Hocaya ví ɔ́ kpó, kpódó mɛ e xwedó yě lɛ́ɛ bǐ kpó, bɛ́ sín yɔkpɔ́vú jí káká yi jɛ mɛxó jí bǐ zɔn kpɔ́,

²bó yi mɔ gbeyíɖɔ Mawu tɔn Jelemíi, bó ɖɔ n'i ɖɔ: “Kɛnklɛ́n bó bló nǔ e na byɔ́ we wɛ mǐ ɖe ɔ́ nú mǐ. Sa vo nú Mawu Mavɔmavɔ, Mawu towe dó mǐ mɛ élɔ́ lɛ́ɛ e kpo ɖo gbɛ lɛ́ɛ bǐ tamɛ. Mǐ sukpɔ́ hú lě ɖ'ayǐ, mǐ mɛ e kpo din lɛ́ɛ ɔ́, bǐ ɖíe mɔ wɛ a ko ɖe e.

³Mawu Mavɔmavɔ, Mawu towe ní xlɛ́ ali e mǐ ná gbɔn é mǐ; é ní ɖɔ nǔ e mǐ ná wa é nú mǐ.”

⁴Ée yě ɖɔ mɔ̌ ɔ́, gbeyíɖɔ Mawu tɔn Jelemíi ɖɔ nú yě ɖɔ: “Un se xó e mi ɖɔ é. Un na sa vo nú Mawu Mavɔmavɔ, Mawu mǐtɔn lě e mi ɖɔ gbɔn ɔ́. É ká ɖɔ xó ɖé ɔ́, un ná ɖɔ bǐ nú mi, un ná hwlá ɖěbǔ dó mi ǎ.”

⁵Énɛ́ ɔ́, yě ɖɔ nú Jelemíi ɖɔ: “Mǐ yí gbe, mǐ nǎ bló nǔ e Mawu Mavɔmavɔ, Mawu towe ná ɖɔ nú we ɔ́ bǐ ɖ'é jí pɛ́pɛ́pɛ́. Mawu Mavɔmavɔ, Mawu towe ɔ́, éyɛ́ mɛ e nyí nǔgbóɖɔtɔ́, bó nyí gbejínɔtɔ́ ɔ́ ní se akpá e dó nú we wɛ mǐ ɖe é.

⁶Mǐ wɛ ɖɔ nú we ɖɔ hwi ní kan xó byɔ́ Mawu Mavɔmavɔ, Mawu mǐtɔn nú mǐ. Hǔn nǔ e é na ɖɔ ɔ́ nyɔ́ mǐ nukún mɛ kpó é nylá mǐ nukún mɛ kpó ɔ́, mǐ ɖǒ ná bló. Nǔ ɖǒ ná nyɔ́ nú mǐ, ɖó nǔ e Mawu Mavɔmavɔ, Mawu mǐtɔn ɖɔ é wɛ mǐ bló.”

⁷Ée yě ɖɔ xó nú Jelemíi ɔ́, é bló azǎn wǒ bɔ Mawu Mavɔmavɔ ɖɔ xó n'i.

⁸Énɛ́ ɔ́, Jelemíi ylɔ́ Yoxanáni Kaleyaxi ví ɔ́ kpó gǎn ɖě lɛ́ɛ kpó, kpódó mɛ e xwedó yě lɛ́ɛ bǐ kpó, bɛ́ sín yɔkpɔ́vú jí káká yi jɛ mɛxó jí.

⁹É ɖɔ nú yě ɖɔ: “Mi zɔ́n mì ɖɔ má kan nǔ byɔ́ Mawu Mavɔmavɔ, Mawu Izlayɛ́li tɔn nú émí; xó e é ɖɔ ɔ́ ɖíe:

¹⁰‘Ényí mi nɔ to mitɔn mɛ ɔ́, un ná vɔ́ mi gbá xɔ ɖɔhun, un sɔ́ ná gba mi xɔ ɖɔhun ǎ. Un ná vɔ́ mi tun atín ɖɔhun, un sɔ́ ná hɔn mi atín ɖɔhun ǎ. Awě e un sɛ́ dó mi ɔ́ ná lɛ́ vɛ́ nú mì.

¹¹Din ɔ́, mi ma sɔ́ ɖi xɛsi ɖěbǔ nú Babilɔ́nu xɔ́sú ɔ́ ó. Nyɛ Mawu Mavɔmavɔ wɛ ɖɔ mɔ̌ nú mi; mi ma ɖi xɛsi n'i ó, ɖó un ɖo kpɔ́ xá mi, un ná hwlɛ́n mi, un ná yí mi sín alɔ tɔn mɛ.

¹²Un ná bló bɔ é na yí wǎn nú mi, nǔ mitɔn nǎ blá wǔ n'i, bɔ é ná jó mi dó bɔ mi na lɛ́ kɔ wá ayǐkúngban mitɔn jí.’ ”

¹³“Lo ɔ́, ényí mi ma bló nǔ e Mawu Mavɔmavɔ, Mawu mitɔn ɖɔ é ǎ, bó ɖɔ: mǐ nǎ nɔ to élɔ́ mɛ fí ǎ, gbeɖé,

¹⁴mi gbɔ bó yí Ejípu ɔ́, é nyɔ́ hú. Ahwan ɖě ɖo dɔ̌n ǎ, mǐ ná se lanzo sín gbe e nɔ ɖe xlɛ́ ɖɔ ahwan bɛ́ ɔ́ ɖě ɖo dɔ̌n ǎ, adɔ ɖě ná dó ya nú mǐ ɖo Ejípu ǎ. Dɔ̌n wɛ mǐ na yí nɔ.

¹⁵Ényí mi ɖɔ mɔ̌ ɔ́, mi mɛ e kpo ɖo Judáa lɛ́ɛ ɔ́, mi ɖótó xó e Mawu Mavɔmavɔ ɖɔ é. Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: ‘Ényí mi ɖɔ émí ná yi Ejípu jɛ́n wɛ, bó hɔn yi dɔ̌n nǔgbó ɔ́,

¹⁶ahwan e ɖi xɛsi ná wɛ mi ɖe ɔ́, ná wá gba mi ɖo dɔ̌n, adɔ e hɔn ná wɛ mi ɖe ɔ́ ná wá hɛn mi ɖo dɔ̌n, bɔ mi ná kú jɛ dɔ̌n.

¹⁷Mɛ e ná xwe nǔ, bó ná yi Ejípu lɛ́ɛ ɔ́, ahwan, adɔ kpódó jɛmɛjí kpó ná hu yě. Awě e un ná sɛ́ dó yě lɛ́ɛ ɔ́, mɛ ɖěbǔ na gló ɖo yě mɛ ǎ.’ ”

¹⁸Jelemíi lɛ́ vɔ́ ɖɔ: “Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: ‘Ényí mi yi Ejípu ɔ́, lě e un ɖe xomɛsin ce kpó adǎn ce kpó xlɛ́ Jeluzalɛ́munu lɛ́ɛ gbɔn ɔ́, wɛ un ná ɖe xlɛ́ mi lɔmɔ̌. Bɔ è ja nu dó mɛ ɖé gbé ɔ́, è ja nǔ baɖabaɖa ɖé sín xó ɖɔ gbé ɔ́, è ja hɛ̌nnú ɖé abǐ winnyánú ɖé sín xó ɖɔ gbé ɔ́, mi wú wɛ è nǎ nɔ́ jlɛ́ dó. Mi ka sɔ́ ná mɔ to élɔ́ ɖó nukún wú gbeɖé ǎ.’ ”

¹⁹Jelemíi lɛ́ ɖɔ: “Judáanu lɛ́ɛ mi, mi mɛ e kpo lɛ́ɛ ɔ́, Mawu Mavɔmavɔ gbɛ́ nú mi ɖɔ mi ma yi Ejípu ó. Mi ní ka tunwun ganjí ɖɔ un ɖɔ nú mi égbé din.

²⁰Mi ɖésúnɔ wú wa nǔ dó wɛ mi ka ɖe, ɖó mi ɖɔ nú mì ɖɔ: ‘Sa vo nú Mawu Mavɔmavɔ, Mawu mǐtɔn dó ta mǐtɔn mɛ, bó ɖɔ nǔ e é ɖɔ ɔ́ bǐ nú mǐ, bónú mǐ ná bló.’

²¹Égbé din ɔ́, un ka ɖɔ nǔ e Mawu Mavɔmavɔ, Mawu mǐtɔn ɖɔ ɔ́ nú mi, mi ka ɖótó ǎ, mi ka yí gbe nú nǔ e é ɖɔ nú mì ɖɔ nyi ní ɖɔ nú mi lɛ́ɛ ɖěbǔ ǎ.

²²Hǔn mi bo tunwun égbé din ɖɔ ahwan, adɔ, kpódó jɛmɛjí kpó ná hu mi ɖo to e mɛ nɔ gbé mi xwe é.”