Read fon Jelemíi 43 Bible Online

Jelemíi 43 - fon bible

Jelemíi 43

¹Xó e Mawu Mavɔmavɔ ɖɔ nú Jelemíi ɖɔ é ní ɖɔ nú togun ɔ́, Jelemíi ɖɔ bǐ nú yě. Ée Jelemíi ɖɔ xó fó ɔ́,

²Azalya Hocaya ví ɔ́, kpó Yoxanáni Kaleyaxi ví ɔ́ kpó mɛ ɖě lɛ́ɛ bǐ kpó syɛ́n ta, bó ɖɔ nú Jelemíi ɖɔ: “Adingban ɖó wɛ a ɖe. Mawu Mavɔmavɔ, Mawu mǐtɔn wɛ ɖɔ nú we ɖɔ hwi ní ɖɔ nú mǐ ɖɔ mǐ ní ma yi Ejípu bó nɔ dɔ̌n ó ǎ, adingban wɛ.

³Baalúki Nɛliya ví ɔ́ wɛ ɖe we kpé nú mǐ, bó ná mɔ tɛn bó jó mǐ nú Babilɔ́nunu lɛ́ɛ, bɔ yě ná hu mǐ, abǐ yě ná kplá mǐ yi Babilɔ́nu gǎnnugǎnnu.”

⁴Énɛ́ ɔ́, Yoxanáni Kaleyaxi ví ɔ́, kpó ahwanfuntɔ́ lɛ́ɛ sín gǎn ɖě lɛ́ɛ kpó, kpódó mɛ e xwedó yě lɛ́ɛ kpó ɖěbǔ nɔ Judáa lě e Mawu Mavɔmavɔ ɖɔ nú yě gbɔn ɔ́ ǎ.

⁵ Yě mɛ e kpo ɖo Judáa lɛ́ɛ yi Ejípu; yě mɛ e ahwan nya dó gbě bɔ yě lɛ́ kɔ wá Judáa lɛ́ɛ wɛ.

⁶Súnnu lɛ́ɛ, nyɔ̌nu lɛ́ɛ, yɔkpɔ́vú lɛ́ɛ, Judáa xɔ́sú ví nyɔ̌nu lɛ́ɛ, kpódó mɛ e è sɔ́ dó alɔ mɛ nú Gedaliyási Axikamu ví, Cafáni vívú ɔ́ lɛ́ɛ kpó yi; Nɛbuzaladáni, sɔ́ja e nɔ cɔ́ Babilɔ́nu xɔ́sú ɔ́ lɛ́ɛ sín gǎn ɔ́ wɛ sɔ́ yě dó alɔ mɛ nú Gedaliyási; yě kplá gbeyíɖɔ Jelemíi kpó Baalúki Nɛliya ví ɔ́ kpó, bó yi.

⁷Yě vɛ́ tóli nú Mawu Mavɔmavɔ; yě yi Ejípu, bó yi cí Tapanɛ́si toxo mɛ.

⁸Tapanɛ́si fínɛ́ wɛ Judáanu lɛ́ɛ ɖe, bɔ Mawu Mavɔmavɔ ɖɔ xó nú Jelemíi; é ɖɔ n'i ɖɔ:

⁹“Cyán awǐnnya kloklo kpɛɖé, ɖó alɔ towe wú, bó kun do dó kpe e è tɛ́ gbɔn Ejípu xɔ́sú ɔ́ sín azɔ̌xwé nukɔn lɛ́ɛ glɔ́ lobo ɖi yě. Blǒ ɖo Judáanu lɛ́ɛ bǐ nukún mɛ.

¹⁰A bló mɔ̌ ɔ́, a nǎ ɖɔ nú yě ɖɔ: ‘Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: Un ná zɔ́n bɔ è nǎ ylɔ́ mɛsɛntɔ́ ce Nabukodonɔzɔ́ɔ, Babilɔ́nu xɔ́sú ɔ́ nú mì; un ná zé axɔ́súzinkpo tɔn ɖó awǐnnya élɔ́ lɛ́ɛ e a dǒ do lɛ́ɛ jí, é ná dó goxɔ tɔn ɖó awǐnnya lɛ́ɛ jí.

¹¹É ná wá, bó ná gba to élɔ́, bɔ mɛ e ná kú lɛ́ɛ ná kú, mɛ e è nǎ wlí yi lɛ́ɛ ɔ́, è nǎ wlí yě yi, mɛ e ahwan ná hu lɛ́ɛ ɔ́, ahwan ná hu.

¹²Un ná dó nǔmɛsɛn e ɖo Ejípu lɛ́ɛ sín xwé zo. Nabukodonɔzɔ́ɔ ná dó vodún lɛ́ɛ zo, abǐ é sixú bɛ́ yě yi to tɔn mɛ. É ná ɖe ɖɛ dɔkun e ɖo Ejípu lɛ́ɛ ɖokpó ɖokpó, lě e kanlinnyitɔ́ nɔ́ ɖe ɖɛ jɔ̌ sín avɔ mɛ é ɖɔhun. É bló mɔ̌ ɔ́, é ná yi bɔ mɛ ɖěbǔ ná kɛ nu dó wǔ tɔn ǎ.

¹³É ná gba bǒcyɔ e ɖo Heliopolísi ɖo Ejípu fí lɛ́ɛ, bó ná dó nǔmɛsɛn sín xwé lɛ́ɛ zo.’ ”