Read fon Jelemíi 44 Bible Online

Jelemíi 44 - fon bible

Jelemíi 44

¹Judáanu lɛ́ɛ hɔn yi cí Ejípu toxo ɖé lɛ́ɛ mɛ; toxo lɛ́ɛ wɛ nyí Migidɔ́lu, Tapanɛ́si kpó Mɛfísi kpó; mɛɖé lɛ́ɛ ká hɔn yi cí Patlɔ́si gbé jí ɖo Ejípu dɔ̌n; Mawu ɖɔ xó sɛ́ dó yě gbɔn Jelemíi jí. Bɔ Jelemíi ɖɔ nú yě ɖɔ:

²“Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: ‘Mi mɔ awě e un sɛ́ dó Jeluzalɛ́mu kpó Judáa toxo ɖě lɛ́ɛ kpó é. Toxo énɛ́ lɛ́ɛ bǐ wɛ ko gba égbé din; bǐ kó jɛ vɔ̌.

³Nǔ nyanya e mɛ e ɖo toxo énɛ́ mɛ lɛ́ɛ wa bó dó xomɛsin nú mì é wɛ zɔ́n. Yě nɔ́ xwlé zǎlínkpɔ́n vodún, bó nɔ́ sɛn yě. Lo ɔ́, yě ká kpé nǔɖé xá vodún énɛ́ lɛ́ɛ ɖ'ayǐ ǎ, mi kpó tɔ́gbó mitɔn lɛ́ɛ kpó tunwun yě ɖ'ayǐ ǎ.

⁴Nyɛ ɔ́, un ka nɔ gɔn gbeyíɖɔ ce lɛ́ɛ sɛ́ dó mi ǎ, un nɔ sɛ́ yě dó mi, bónú mi na jó walɔ nyanya énɛ́ lɛ́ɛ e un gbɛ́ wǎn ná lɛ́ɛ dó.

⁵Lo ɔ́, mi ɖótó yě ǎ, mi ké ya ná ǎ, mi jó gbɛ nyanya e zán wɛ mi ɖe ɔ́ dó ǎ, mi gɔn zǎlínkpɔ́n xwlé vodún ǎ.

⁶Ée mi bló mɔ̌ ɔ́, un gbɔ bo ɖe xomɛsin ce kpó adǎn ce kpó xlɛ́ gbɔn Judáa toxo lɛ́ɛ mɛ, bó ɖe xlɛ́ gbɔn Jeluzalɛ́mu li lɛ́ɛ jí. Dǒglin kɛ́ɖɛ́ wɛ kpo ɖo te, nǔ bǐ wɛ gúdú lě e é ɖe gbɔn égbé din é.’ ”

⁷Jelemíi lɛ́ ɖɔ: “Din ɔ́, Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖo nǔ élɔ́ lɛ́ɛ kanbyɔ́ mi wɛ: ‘Étɛ́wú mi ka ɖo nǔ wa dó miɖée wú wɛ sɔ́ mɔ̌? Mi jló ná sú Judáa ví súnnu, nyɔ̌nu, dɔ̌nkpɛvú kpó yɔkpɔ́vú kpó sín kún dó wɛ a? Mi jló nú donu mitɔn ɖě ná kpo ǎ wɛ a?

⁸Étɛ́wú mi nɔ wa nǔ dó dó xomɛsin nú mì mɔ̌? Mi nɔ xwlé zǎlínkpɔ́n vodún ɖo Ejípu fí e mi hɔn wá cí é. Mi jló ná sú miɖée sín kún dó, lobo ná húzú awě kpó hɛ̌n kpó sín kpɔ́ndéwú, ɖo akɔta e ɖo gbɛ ɔ́ mɛ lɛ́ɛ tɛ́ntin wɛ a?

⁹Nǔ baɖabaɖa e tɔ́gbó mitɔn, Judáa xɔ́sú lɛ́ɛ kpó asi yětɔn lɛ́ɛ kpó dó sin, kpódó ée mi kpó asi mitɔn lɛ́ɛ kpó dó sin ɖo Judáa, bó dó sin ɖo Jeluzalɛ́mu li lɛ́ɛ jí lɛ́ɛ kpó ɔ́, mi wɔn yě wɛ a?

¹⁰Káká jɛ égbé din ɔ́, mɛ ɖěbǔ ko sɔ́ éɖée hwe ǎ, mɛ ɖěbǔ ɖó sísí nú mì ǎ. Un kplɔ́n nǔ yě, bó dó sɛ́n nú yě, lě e un bló gbɔn nú mi kpó tɔ́gbó mitɔn lɛ́ɛ kpó ɔ́, yě mɛ ɖěbǔ ká bló nǔ e un ɖɔ é ǎ.’ ”

¹¹“Énɛ́ wú wɛ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ: ‘Un jló ná sɛ́ awě dó mi, bó ná sú Judáa togun ɔ́ sín kún dó.

¹²Un ná kplá Judáanu e kpo bó hɔn yi Ejípu lɛ́ɛ, bɔ mi bǐ ná kú. Ejípu wɛ mi nǎ kú jɛ. Ahwan kpó adɔ kpó ná gbo xó mitɔn, mi bǐ ná kú, bɛ́ sín yɔkpɔ́vú jí káká jɛ mɛxó jí. Mɔ̌ wɛ mi ná kú gbɔn, bɔ è ja nu dó mɛ gbé ɔ́, è ja nǔ baɖabaɖa ɖé sín xó ɖɔ gbé ɔ́, è ja hɛ̌nnú ɖé, abǐ winnyánú ɖé sín xó ɖɔ gbé ɔ́, mi wú wɛ è nǎ nɔ́ jlɛ́ dó.

¹³Un ná dɔn tó nú mi mɛ e wá cí Ejípu lɛ́ɛ, lě e un zé ahwan, adɔ kpódó jɛmɛjí kpó dó dɔn tó nú Jeluzalɛ́munu lɛ́ɛ gbɔn é.

¹⁴Mɛ ɖěbǔ ná sixú hɔn ɖo mi mɛ e wá cí Ejípu fí lɛ́ɛ mɛ ǎ, mi mɛ ɖěbǔ ná gló nǔ e ná jɛ ɔ́ ǎ. Judáa to e ɖó nukún wɛ mi ɖe ɖɔ émí ná lɛ́ kɔ wá mɛ gbe ɖokpó ɔ́ ná gló mi bǐ; mɛ ɖokpó ɖokpó ɖé lɛ́ɛ jɛ́n ná lɛ́ kɔ wá ɖo mi mɛ.’ ”

¹⁵Judáanu e wá cí Patlɔ́si ɖo Ejípu lɛ́ɛ bǐ ɖɔ xó nú Jelemíi. Yě mɛ e tunwun ganjí ɖɔ asi émítɔn lɛ́ɛ nɔ́ xwlé zǎlínkpɔ́n vodún lɛ́ɛ bǐ ɖo fínɛ́ lɛ́ɛ é. Nyɔ̌nu lɛ́ɛ lɔmɔ̌ kplé ɖo fínɛ́ bó sukpɔ́ ɖésú. Súnnu lɛ́ɛ ɖɔ n'i ɖɔ:

¹⁶“A nɔ ɖɔ émí ɖo xó ɖɔ nú mǐ wɛ dó Mawu Mavɔmavɔ nyíkɔ mɛ; mǐdɛɛ lɛ́ɛ ká jló ná ɖótó we ǎ.

¹⁷Nǔ e mǐ kó zé nu mǐtɔn dó ɖɔ ɔ́ wɛ mǐ jló ná bló, é wɛ nyí ɖɔ mǐ nǎ xwlé zǎlínkpɔ́n vodún Axɔ́si jǐxwé tɔn ɔ́, mǐ ná ba ahan n'i, lě e mǐ kpó mɛ mǐtɔn lɛ́ɛ, axɔ́sú mǐtɔn lɛ́ɛ, kpódó gǎn mǐtɔn lɛ́ɛ kpó nɔ́ bló gbɔn ɖo Judáa, bó nɔ́ bló gbɔn ɖo Jeluzalɛ́mu li lɛ́ɛ jí ɖ'ayǐ é. Hwenu e mǐ nɔ́ wa nǔ gbɔn mɔ̌ ɔ́, mǐ nɔ́ mɔ nǔ bó nɔ́ ɖu, bó nɔ́ gɔ́ xo, mǐ nɔ́ ɖu gbɛ, adǎn ɖěbǔ nɔ́ gbo mǐ ǎ.

¹⁸Amɔ̌, sín hwenu e mǐ ma sɔ́ xwlé zǎlínkpɔ́n ɖě vodún Axɔ́si jǐxwé tɔn ɔ́ ǎ, bó má sɔ́ nɔ́ ba ahan ɖě n'i ǎ ɔ́, nǔ bǐ hán mǐ, ahwan kpó adɔ kpó hu mǐ.”

¹⁹Ée súnnu lɛ́ɛ ɖɔ mɔ̌ ɔ́, nyɔ̌nu lɛ́ɛ ɖɔ nú Jelemíi ɖɔ: “Hwenu e mǐ ɖo zǎlínkpɔ́n xwlé vodún Axɔ́si jǐxwé tɔn ɔ́ wɛ ɔ́, é má nyí asú mǐtɔn lɛ́ɛ jɛ́n yí gbe nú mǐ ǎ cé? Yě tunwun ganjí ɖɔ vodún Axɔ́si jǐxwé tɔn ɔ́, atá e mǐ nɔ́ xwlé e ɔ́, akpajlɛ́ tɔn wɛ; yě tunwun ɖɔ é wɛ mǐ nɔ́ lɛ́ ba ahan ná.”

²⁰Lo ɔ́, Jelemíi ɖɔ nú súnnu kpó nyɔ̌nu kpó e ɖɔ xó n'i lɛ́ɛ bǐ ɖɔ:

²¹“Zǎlínkpɔ́n e mi kpó tɔ́gbó mitɔn lɛ́ɛ kpó axɔ́sú mitɔn lɛ́ɛ kpó gǎn mitɔn lɛ́ɛ kpó, kpódó togun ɔ́ bǐ kpó nɔ́ dó zo gbɔn Judáa toxo lɛ́ɛ mɛ, bó nɔ́ dó zo ɖo Jeluzalɛ́mu li lɛ́ɛ jí ɖ'ayǐ ɔ́, mi tunwun ɖɔ Mawu Mavɔmavɔ flín ǎ cé? É wɔn wɛ mi vɛdó a?

²²Éeǒ, nǔ e wa wɛ mi ɖe nɛ́ lɛ́ɛ kpé kɔ nú Mawu Mavɔmavɔ, walɔ mitɔn baɖabaɖa nɛ́ lɛ́ɛ cikɔ n'i. Énɛ́ ɔ́ wútu wɛ to mitɔn gba, bó jɛ vɔ̌. È ja nǔ baɖabaɖa ɖě ɖɔ gbé ɔ́, è nǎ nɔ xa to mitɔn dó ná kpɔ́ndéwú; mɛ bǐ wɛ mɔ ɖó mɔ̌.

²³Vodún lɛ́ɛ e mi sá vɔ̌ ná ɔ́ wú wɛ awě élɔ́ ɖo mi xo wɛ égbé din, mi hu hwɛ dó Mawu Mavɔmavɔ ɖó mi ɖótó nǔ e é ɖɔ nú mi ɔ́ ǎ, mi ké ya nú nǔ e é kplɔ́n mi é ǎ, mi nyi sɛ́n e é dó nú mi lɛ́ɛ ǎ, mi wa nǔ e é zɔ́n mi lɛ́ɛ ǎ.”

²⁴Jelemíi lɛ́ ɖɔ nú togun ɔ́ bǐ, súnnu kpó nyɔ̌nu kpó ɖɔ: “Mi Judáanu e ɖo Ejípu lɛ́ɛ, mi ɖótó xó e Mawu Mavɔmavɔ ɖɔ é:

²⁵Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖo ɖiɖɔ nú mi wɛ ɖɔ: ‘Mi kpó asi mitɔn lɛ́ɛ kpó ɖɔ gbɛ na bo gbɔn ɖě ɔ́, émí ná ɖe akpá ɖěɖě émí dó nú vodún Axɔ́si jǐxwé tɔn lɛ́ɛ, émí ná xwlé zǎlínkpɔ́n ɛ, lobo ná ba ahan n'i. Mi ɖɔ mɔ̌ bó ká bló nǔgbó. É nyɔ́, nǔ e mi ɖɔ ɔ́, mi bo bló kpowun!

²⁶Amɔ̌, mi bǐ ní ɖótó xó e ɖɔ nú mi wɛ un ɖe ɔ́ ganjí, nyɛ Mawu Mavɔmavɔ ɔ́ wɛ ɖo xó ɖɔ nú mi wɛ. Nyǐkɔ ce ɖaxó ɔ́ wɛ un xwlé nú mi, Judáanu ɖěbǔ ná ɖo Ejípu fí, bó ná ja nǔ xwlé gbé, bó ná ɖɔ émí xwlé Mawu e ɖo gbɛ tɛgbɛ é, émí xwlé Mawu Mavɔmavɔ ǎ; un sɔ́ ná se mɔ̌ ɖo nu yětɔn gbeɖé ǎ.

²⁷Un ná wa nǔ xá mi, un ná wa ɖagbe nú mi ǎ, un ná jó dó ǎ. Ahwan kpó adɔ kpó ná hu mi Judáanu e ɖo fí lɛ́ɛ bǐ, mi bǐ nǎ vɔ.

²⁸Mi mɛ kpɛ e ná kpo, bɔ ahwan ma ná hu ǎ lɛ́ɛ ná lɛ́ kɔ sín Ejípu fí, bó ná yi xwé. Mi ná kpɔ́n ɖɔ nǔ e un ɖɔ ɔ́ má ná jɛ a jí, abǐ nǔ e mi ɖɔ ɔ́ wɛ ná jɛ.

²⁹Xó e nyɛ Mawu Mavɔmavɔ ɖo ɖiɖɔ nú mi wɛ ɔ́ ɖíe: Un na wa nǔ xá mi ɖo fí, un na ná xlɛ̌ ɖokpó mi, énɛ́ ɔ́, mi ná mɔ ɖɔ un na wa nǔ e un ɖɔ un na wa xá mi ɔ́ nǔgbó. Xlɛ̌ e ná ná mi wɛ un ɖe ɔ́ ɖíe:

³⁰ Un ná jó Ejípu xɔ́sú Hofla nú kɛntɔ́ tɔn lɛ́ɛ, un ná jó e nú mɛ e ɖo kú tɔn ba wɛ lɛ́ɛ, bɔ yě ná wlí i. Un ná jó e, lě e un jó Judáa xɔ́sú Sedesíyasi nú kɛntɔ́ tɔn Babilɔ́nu xɔ́sú Nabukodonɔzɔ́ɔ gbɔn ɔ́. Xó e nyɛ Mawu Mavɔmavɔ ɖɔ ɔ́ nɛ́.’ ”