Read fon Jelemíi 47 Bible Online

Jelemíi 47 - fon bible

Jelemíi 47

¹ Cóbónú Ejípu xɔ́sú ɔ́ ná yi gba Gaza ɔ́, Mawu Mavɔmavɔ ɖɔ xó nú Jelemíi dó Filisitɛ́ɛn lɛ́ɛ wú. É ɖɔ n'i ɖɔ:

²“Tɔ ɖé sí te sín totaligbé ja, tɔ ɔ́ ɖo yiyi wɛ ɔ́, é nɔ́ ɖo gǐgɔ́ d'é jí wɛ. Zaanɖé kpowun ɔ́, adǎn e jí tɔ ɔ́ ɖe ɔ́ syɛ́n bǐ. Tɔ ɔ́ gba toxo lɛ́ɛ, bɔ mɛ e ɖo toxo lɛ́ɛ mɛ lɛ́ɛ bǐ kú tɔ. Mɛ bǐ ɖo xó sú wɛ, to ɔ́ bǐ ɖo nǔwamɛhan ji wɛ.

³È ɖo sɔ́ lɛ́ɛ sín afɔ gbe se wɛ, ahwankɛkɛ́ví lɛ́ɛ ɖo gbǐgbó wɛ, ahwankɛkɛ́fɔ lɛ́ɛ ɖo zǐngídi ɖú wɛ. Tɔ́ sɔ́ flín vǐ ǎ, nɔ lɔ ká sɔ́ flín vǐ ǎ. Awakanmɛ kú yě bǐ.

⁴Azǎn e gbe Filisitɛ́ɛn lɛ́ɛ bǐ ná sú kún dó é wɛ su. Énɛ́ wú wɛ mɛɖé sɔ́ ɖe, bó ná gɔ́ alɔ nú Tíi kpó Sidɔ́ɔn kpó ǎ. Đó Mawu Mavɔmavɔ na vívá kún nú Filisitɛ́ɛn lɛ́ɛ bǐ, yě mɛ e gán ɖo tɔtɛ́ntinto Kafutɔ́ɔ tɔn mɛ lɛ́ɛ bǐ.

⁵Gaza to ɔ́ bǐ nǎ xwlɛ́ ta, aluwɛ mɛ wɛ yě ɖe. Acikelɔ́ni toxo ɔ́ bǐ nǎ cí tóó, mi gbɛtɔ́ sakasaka ví e kpo ɖo gbɛ lɛ́ɛ, káká jɛ hwetɛ́nu wɛ mi ka ná já wǔtu mitɔn yi ɖó?

⁶Mi nɔ ɖɔ: ‘Kóóyi nya! Hwǐ Mawu Mavɔmavɔ tɔn, nǔ nɔ́ cikɔ nú we ǎ wɛ a? Byɔ̌ akún mɛ, nɔ xwíí, gbɔjɛ́ ɖě!’

⁷Nɛ̌ é ná gbɔjɛ́ gbɔn? Mawu Mavɔmavɔ wɛ ɖɔ nǔ e é ná wa lɛ́ɛ n'i, bó sɛ́ ɛ dó xutó, bó sɛ́ ɛ dó Acikelɔ́ni. Mawu wɛ sɛ́ ɛ dó.”