Read fon Jelemíi 48 Bible Online

Jelemíi 48 - fon bible

Jelemíi 48

¹ Xó e Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ dó Mɔwabu wú é ɖíe: “Awě tɛ́ ɖíe ká xo mɛ e ɖo Nɛbo toxo ɔ́ mɛ lɛ́ɛ e! È gba toxo yětɔn bǐ. Ahwi xo Kiliyatayimu toxo ɔ́, din ɔ́, kɛntɔ́ lɔ mɛ wɛ é ɖe. Ahwi xo toxo énɛ́ e mɛ kɛntɔ́ ma nɔ́ sixú byɔ́ gbeɖé ǎ é, é ɖu winnyá, è gba to ɔ́ bǐ.

²Mɔwabunu lɛ́ɛ sín susu vɔ, kɛntɔ́ lɛ́ɛ ɖo wě baɖabaɖa ɖe dó mi wú wɛ ɖo Hɛcibɔ́ni; yě nɔ́ ɖɔ: ‘Mi wa mǐ yi sú Mɔwabunu lɛ́ɛ sín kún dó sín ayǐkúngban ɔ́ jí.’ Madumɛ́ɛnu lɛ́ɛ mi, ahwan ná gba mi lɔ. Kɛntɔ́ kó ɖo ali jí ja mi gɔ́n.

³È nɔ se xósúsú sín Holonayímu toxo mɛ ɖɔ: ‘Heelú, è ɖo nǔ gba wɛ!’

⁴Mɔwabu to ɔ́ gba hánnyá. Xó e sú wɛ Mɔwabunu lɛ́ɛ ɖe ɔ́, è nɔ se ɖo káká Sowáa.

⁵Mɛ e kpo ɖo gbɛ lɛ́ɛ ɖo Luxíti kpó ɔ́ fán wɛ ɖasin ɖo nukún mɛ. È ka ɖo te jɛ sín Holonayímu só ɔ́ jí wɛ ɔ́, è nɔ se mɛ lɛ́ɛ ɖo alě ná wɛ ɖɔ:

⁶‘Mi hɔn sín fí! Mɛ ɖokpó ɖokpó ní hwlɛ́n ta tɔn! Mi yi ba tɛn ɖo gbětótló mɛ.’

⁷Mɔwabu, a ɖeji dó nǔ e a wa lɛ́ɛ kpó dɔkun towe lɛ́ɛ kpó wú. Énɛ́! Alɔ nɛ́ jɛ hwi lɔ wú nɛ́! Vodún Kemɔci ɖésú ɔ́, è kplá é kpódó hunnɔ tɔn lɛ́ɛ kpó hunví tɔn nukúnɖéjí lɛ́ɛ kpó bǐ yi kannumɔgbénu.

⁸Nǔhɛngblétɔ́ ɔ́ byɔ́ toxo ɖokpó ɖokpó mɛ, toxo ɖěbǔ gló e ǎ. È gba nǔ e ɖo tɔdo mɛ lɛ́ɛ, bó gba éé ɖo só ta lɛ́ɛ bǐ.” Xó e nyɛ Mawu Mavɔmavɔ ɖɔ ɔ́ nɛ́.

⁹Mi ba awa nú Mɔwabu nú é zɔn, bó yi cí jɔmɛ. Toxo tɔn lɛ́ɛ bǐ ná jɛ vɔ̌, è sɔ́ ná mɔ mɛ ɖěbǔ ɖo toxo lɛ́ɛ mɛ ǎ.

¹⁰Mɛ e ma nɔ lébe nú nyɛ Mawu Mavɔmavɔ sín azɔ̌ ǎ lɛ́ɛ ɔ́, un ná dó nu yě. Mɛ e ma nɔ fun ahwan nú mì ǎ lɛ́ɛ ɔ́, un ná dó nu yě.

¹¹Mawu ɖɔ: “Mɔwabu ɔ́, vivo mɛ jɛ́n é ɖe sín do; ahwan sɛ tɛn nú mɛ tɔn lɛ́ɛ kpɔ́n ǎ. Mɛ ɖěbǔ húzú i sín zɛ̌n e mɛ é ɖe ɔ́ dó zɛ̌n ɖěvo mɛ kpɔ́n ǎ. É cí vɛ̌ɛn e è sɔ́ ɖ'ayǐ é ɖɔhun. Nyɛ Mawu ɖɔ: vɛ̌ɛn ɖagbe nyí wɛ jɛ́n é ɖe tɛgbɛ; é ɖyɔ́ wǎn ǎ.

¹²“Énɛ́ ɔ́ wú wɛ nyɛ Mawu Mavɔmavɔ ɖɔ: ayǐ ɖé lɛ́ɛ ná wá hɔ́n, bɔ un ná sɛ́ mɛ dó, bɔ yě ná húzú i sín zɛ̌n e mɛ é ɖe ɔ́ dó zɛ̌n ɖěvo mɛ, bɔ zɛ̌n e mɛ é ɖe ɖ'ayǐ ɔ́ ná jɛ vɔ̌, bɔ yě ná gba hánnyá.

¹³Vodún Kemɔci ná dó winnyá Mɔwabu, lě e Izlayɛ́li togun ɔ́ ɖeji dó Betɛ́li sín vodún wú bó ɖu winnyá é.”

¹⁴Mawu ɖɔ: “Mɔwabunu lɛ́ɛ mi, mi nɔ ɖɔ ahwanfuntɔ́ syɛ́nsyɛ́n wɛ émí nyí; émí kó sɔ́ ahwannú bó ko ɖo acéjí; nɛ̌ mi ka ná ɖɔ mɔ̌ gbɔn?

¹⁵Kɛntɔ́ e ɖo Mɔwabu to ná gba wɛ ɔ́ kó xwe toxo tɔn lɛ́ɛ gba gbé. Dɔ̌nkpɛvú tɔn ahwanfuntɔ́ syɛ́nsyɛ́n lɛ́ɛ ɔ́, è kplá yě xwe huhu gbé ɖo ahwangbénu.” Xó e Axɔ́sú ɖaxó, Mawu Mavɔmavɔ Nǔbǐwúkpétɔ́ ɔ́ ɖɔ é ɖíe:

¹⁶Mɔwabu ko ja gbigba gbé. Awě e ɖo nǎ xo e wɛ ɔ́ ɖo wezun nu jǎwe.

¹⁷Mi mɛ e sɛkpɔ́ ɛ lɛ́ɛ, mi ya avǐ n'i. Mi mɛ e tunwun i lɛ́ɛ, mi ɖɔ: “Nɛ̌ makpo syɛ́nsyɛ́n énɛ́ ná wɛ́n gbɔn? Nɛ̌ axɔ́súkpogɛ énɛ́ ná wɛ́n gbɔn?”

¹⁸Divɔ́ni toxo, gbɔ bo gosín gǎn tɛnmɛ; yi jínjɔ́n zunkɔ́ta. Mɛ e ɖo Mɔwabu toxo gba wɛ ɔ́ ja gɔ̌n towe; é ɖo ahohó towe lɛ́ɛ mu wɛ.

¹⁹Alowɛ́ɛnu lɛ́ɛ mi, mi yi cí alitó bó kpɔ́n mɛ e ɖo hinhɔn wɛ lɛ́ɛ; mi kan nǔ e jɛ bɔ yě ɖo hinhɔn wɛ ɔ́ byɔ́ yě.

²⁰Mi kan mɔ̌ byɔ́ yě ɔ́, yě ná ɖɔ nú mi ɖɔ: “Mɔwabu to ɔ́ ɖu winnyá, Mɔwabu to ɔ́ gba hánnyá bǐ.” Mi sú xó, mi dó axwá. Mi jlá gbɔn Aanɔ́ni gbé ɔ́ bǐ jǐ ɖɔ Mɔwabu gba.

²¹Nǔgbó wɛ, Mawu ɖo tó dɔn nú toxo e ɖo só jí lɛ́ɛ wɛ; toxo lɛ́ɛ ɖíe: Holɔ́ni, Yaxisa, Mɛfáti,

²²Divɔ́ni, Nɛbo, Bɛti-Divlatayímu,

²³Kiliyatayimu, Bɛti-Gamulu, Bɛti-Mɛwɔ́ni,

²⁴Keliyɔ́ti kpó Bosla kpó. É ɖo tó dɔn nú Mɔwabu toxo e sɛkpɔ́ lɛ́ɛ kpó éé lín lɛ́ɛ kpó bǐ wɛ.

²⁵“Mɔwabu vɔ da, acɛ tɔn vɔ bǐ.” Xó e Mawu Mavɔmavɔ ɖɔ ɔ́ nɛ́.

²⁶Mɔwabu mɔ ɖɔ émí hú gǎn Mawu Mavɔmavɔ. Ényí mɔ̌ hǔn, mi ná ɛ ahan nú é nu mú. É ní vi, bó blí gbo gbɔn mɛ babá ɖɔhun. É ní húzú nǔkiko.

²⁷Hwɛ ɔ́, Izlayɛ́li húzú nǔkiko nú we ɖo fí ǎ cé? Ajotɔ́ lɛ́ɛ mɛ wɛ a nɔ lɛ́n Izlayɛ́li dó, lobo ja xó ɖɔ dó wǔ tɔn gbé hweɖěbǔnu ɔ́, a nɔ mi ta.

²⁸Mɔwabunu e mi, mi tɔ́n sín toxo lɛ́ɛ mɛ, mi yi cí sóxo mɛ. Mi ní cí ahwannɛ́ e bló adɔ̌ tɔn ɖó sóxo mɛ ɔ́ ɖɔhun.

²⁹Mǐ tunwun lě e Mɔwabu nɔ mɔ éɖée gbɔn é, lě e é nɔ ɖó ta hǎ gbɔn é, lě e é nɔ tɛ afɔ ayǐ gbɔn é, lě e é nɔ yí go gbɔn é, lě e é nɔ́ mɔ éɖée hú mɛ bǐ gbɔn é, mǐ tunwun bǐ.

³⁰Mawu Mavɔmavɔ ɖɔ: “Un tunwun ɖɔ Mɔwabu nɔ́ zɛn nǔ, é nɔ́ flé nu. Lo ɔ́, é ká zé nǔɖé ɔ́, é nɔ́ yi ta ǎ.

³¹Énɛ́ ɔ́ wú wɛ un nɔ dó gbɛvíhan dó Mɔwabu ta mɛ. Un nɔ sú xó dó Mɔwabu to ɔ́ bǐ ta mɛ; un nɔ ná alě, ɖó Kíi-Ɛlɛ́sinu lɛ́ɛ sín nǔbláwǔ.

³²Vǐwun Sivuma tɔn, un ya avǐ nú we hú éé un ya nú Yazɛ́ɛ é. Vǐwun Sivuma tɔn, a nyi kan káká yi Xu kúkú ɔ́ gúdo. A nyi kan káká yi Yazɛ́ɛ. Amɔ̌, nǔhɛngblétɔ́ ɔ́ ká byɔ́ vǐwun e è gbɛ lɛ́ɛ mɛ bó hɛn bǐ gblé.

³³Xomɛ sɔ́ hun glesi ɖěbǔ ɖo Mɔwabu gbé jí ǎ; yě mɛ ɖěbǔ sɔ́ j'awǎ ǎ. Vɛ̌ɛn vɔ ɖo gbǎ lɛ́ɛ bǐ mɛ. Mɛ e ná li vǐwun é ɖěbǔ ɖe ǎ. Nǔ víví nú mɛ sín han bǐ yi xɔ.”

³⁴Hɛcibɔ́ninu lɛ́ɛ ɖo xó sú wɛ. È se gbe yětɔn ɖo káká Eleale. È se ɖo káká Yaxisa, è se ɖo káká Sowáa, bó se ɖo káká Holonayímu kpó Eglati-Celiciya kpó. Tɔ e ɖo Nimulímu lɛ́ɛ lɔ sɔ́ ɖo sisa wɛ ǎ.

³⁵“Mɛ e ɖo Mɔwabu, bó nɔ́ sá vɔ̌ nú nǔmɛsɛn yětɔn lɛ́ɛ gbɔn só jí só jí lɛ́ɛ ɔ́, un na sú yě bǐ sín kún dó.” Xó e Mawu Mavɔmavɔ ɖɔ ɔ́ nɛ́.

³⁶Énɛ́ ɔ́ wú wɛ ayi ce bǐ fan dó Mɔwabu ta mɛ, è ɖo nǔwamɛhan ji dó kpete mɛ wɛ ɖɔhun. Yéége, ayi ce fan è ɖo nǔwamɛhan ji dó kpete mɛ wɛ ɖɔhun dó Kíi-Ɛlɛ́sinu lɛ́ɛ ta mɛ, ɖó dɔkun e yě bɛ́ kplé lɛ́ɛ bǐ yi.

³⁷Mɛ bǐ xwlɛ́ ta, bó xwlɛ́ atán, bó já alɔkpákpá mɛ, bó fɔ ati kplá dó ɖe xlɛ́ ɖɔ émí ɖo aluwɛ mɛ.

³⁸È ɖo alě ná wɛ ɖo tokplétɛn Mɔwabu tɔn lɛ́ɛ, è ɖo alě ná wɛ ɖo xɔ bǐ ta, ɖó un gba Mɔwabu, zɛ̌n e è ma sɔ́ jló ná zán ǎ é ɖɔhun. Xó e nyɛ Mawu Mavɔmavɔ ɖɔ ɔ́ nɛ́.

³⁹Mi kpɔ́n lě e Mɔwabu gba gbɔn é. Mi dó gbɛvíhan n'i; mi kpɔ́n lě e é ɖu winnyá bó lɛ́ kɔ gbɔn é. Mɔwabu húzú nǔkiko, é húzú nǔ baɖabaɖa nú to e lɛ́ dó e lɛ́ɛ.

⁴⁰Xó e Mawu Mavɔmavɔ ɖɔ é ɖíe: “Kɛntɔ́ zɔn gangan hɔ̌nsúhɔ́nsú ɖɔhun, bó kɛ awa ɖo Mɔwabu ta nu.

⁴¹Kɛntɔ́ ná yí toxo lɛ́ɛ; toxo e è mɛ ahohó lɛ́ lɛ̌ dó lɛ́ɛ bǐ ná jɛ kɛntɔ́ lɔ mɛ. Gbe nɛ́ gbe ɔ́, ahwanfuntɔ́ syɛ́nsyɛ́n lɛ́ɛ bǐ sín ayi ná fun nyɔ̌nu e jɛ flú mɛ ɔ́ ɖɔhun.

⁴²Énɛ́ ɔ́, Mɔwabu ná gba bǐ; é sɔ́ ná nyí togun ɖo te ǎ, ɖó é mɔ ɖɔ émí hú gǎn nyɛ Mawu Mavɔmavɔ.”

⁴³“Mɔwabunu e mi, adohuhu, do gɔngɔn kpó mɔ kpó wɛ ɖo te kpɔ́n mi.

⁴⁴Mɛ e ado na hu bɔ é ná hɔn ɔ́ ná jɛ do mɛ. É ká dó gǎn bó tɔ́n ɔ́, é ná jɛ mɔ mɛ. Đó xwe énɛ́ ɔ́, tó dɔn nú mɛ sín xwe wɛ é ná nyí nú Mɔwabu. Xó e nyɛ Mawu Mavɔmavɔ ɖɔ ɔ́ nɛ́.

⁴⁵Mɛ e ná hɔn lɛ́ɛ ɔ́, nǔ ná ci kɔ nú yě, bɔ yě ná ɖɔ émí ná hwlá cí Hɛcibɔ́ni. Lo ɔ́, myɔ ɖokpó ná wlí ɖo Hɛcibɔ́ni to ɔ́ mɛ, ɖo axɔ́sú Sihɔ́ni sín hɔnmɛ. Zo ɔ́ ná fyɔ́ zǐngídiɖútɔ́ énɛ́ lɛ́ɛ sín to, bɛ́ sín to ɔ́ sín dogbó lɛ́ɛ jí káká wá to ɔ́ tɛ́ntin.

⁴⁶Mɔwabunu e mi, heelú mi! Vodún Kemɔci togun e mi, mi dɔn bǐ. Ahwan wlí vǐ mitɔn súnnu kpó nyɔ̌nu kpó yi.

⁴⁷Amɔ̌, ayǐ ɖo hǐnhɔ́n wɛ ɔ́, un ná zé yě ɖó ninɔmɛ e mɛ yě nɔ ɖ'ayǐ xóxó é. Xó e nyɛ Mawu Mavɔmavɔ ɖɔ ɔ́ nɛ́.” Lě e Mawu gbo Mɔwabu sín hwɛ gbɔn ɔ́ nɛ́.