Read fon Jelemíi 49 Bible Online

Jelemíi 49 - fon bible

Jelemíi 49

¹ Xó e Mawu Mavɔmavɔ ɖɔ dó Amumɔ́ɔ ví lɛ́ɛ wú ɔ́ ɖíe: “Izlayɛ́li sɔ́ ɖó vǐ e ná ɖu toxo énɛ́ lɛ́ɛ sín gǔ ɔ́ ɖě ǎ wɛ a? Étɛ́wú vodún Milukɔ́mu ka klá jɛ Gadi yíkúngban ɔ́ nu ɖo Izlayɛ́li mɔ̌? Étɛ́wú Amumɔ́ɔ ví lɛ́ɛ wá cí toxo e ɖo Gadi yíkúngban jí lɛ́ɛ mɛ?”

²Énɛ́ ɔ́ wú wɛ nyɛ Mawu Mavɔmavɔ ɖɔ: “Ayǐ ɖé lɛ́ɛ ná hɔ́n, bɔ un ná zɔ́n bɔ ahwan ná tɔ́n, ahwan ná tɔ́n ɖo Amumɔ́ɔ ví lɛ́ɛ sín tota Hlaba ɔ́ mɛ, bɔ xósúsú ná ɖ'é nu. Hlaba ná húzú axéko. Gletoxo tɔn lɛ́ɛ bǐ ná fyɔ́. Hwenɛ́nu su ɔ́, Izlayɛ́li ná bɛ́ nǔ tɔn lɛ́ɛ, nǔ tɔn e Amumɔ́ɔ ví lɛ́ɛ ko fɔ ɖ'ayǐ lɛ́ɛ bǐ.” Xó e Mawu Mavɔmavɔ ɖɔ ɔ́ nɛ́.

³Hɛcibɔ́ninu lɛ́ɛ mi, mi ya avǐ, ɖó Ayíi to ɔ́ gba! Hlaba gletoxo mɛ nu lɛ́ɛ mi, mi sú xó, mi fɔ ati kplá dó ɖe xlɛ́ ɖɔ mi ɖo aluwɛ mɛ; mi dó gbɛvíhan, mi kan wezun gbɔn ɖisí amyɔ gbɔn gle lɛ́ɛ mɛ. Đó Milukɔ́mu vodún Amumɔ́ɔ ví lɛ́ɛ tɔn xwe kannumɔgbénu, é kpódó vɔ̌sátɔ́ tɔn lɛ́ɛ kpó hunnɔ tɔn lɛ́ɛ kpó.

⁴Hlaba, étɛ́wú a ɖo tɔdo towe zé dó yí go na wɛ? Đyɔ̌vǐ tótlítɔ́, a gán jɛ dɔkun e ɖo tɔdo towe ɖagbe ɖagbe ɔ́ mɛ lɛ́ɛ wú, bó ɖɔ: “Mɛ̌ ka sixú kpé wǔ ce?”

⁵Aklúnɔ, Mawu Mavɔmavɔ Nǔbǐwúkpétɔ́ ɔ́ ká ɖɔ: “Amumɔ́ɔ ví lɛ́ɛ mi, éɖíe, un ná dɔn xɛsi dó to mitɔn mɛ. Xɛsi ná gosín to e lɛ́ dó mi lɛ́ɛ bǐ mɛ, bó ná wá. Mi bǐ ná gba dó, mɛɖé ná kpɔ́n gúdo ǎ. Mɛ ɖěbǔ ná sixú kplé mɛ e hɔn lɛ́ɛ ǎ.

⁶Amɔ̌, énɛ́ jɛ wá yi ɔ́, un ná lɛ́ zé Amumɔ́ɔ ví lɛ́ɛ ɖó ninɔmɛ e mɛ yě kó nɔ ɖ'ayǐ xóxó é.” Xó e Mawu Mavɔmavɔ ɖɔ ɔ́ nɛ́.

⁷ Xó e Mawu Mavɔmavɔ Nǔbǐwúkpétɔ́ ɖɔ dó Edɔ́munu lɛ́ɛ wú ɔ́ ɖíe: “Nǔnywɛ́tɔ́ bǐ vɔ ɖo Temani wɛ a? Nǔtunwuntɔ́ lɛ́ɛ sín ayi fɛ́ da wɛ a? Nǔnywɛ́ yětɔn ɔ́, gúdo wɛ é ká yi a?

⁸Dedáninu lɛ́ɛ mi, mi lɛ́ kɔ, mi hɔn, mi hɔn yi hwlá cí sóxo mɛ. Din ɔ́, un ɖo Esawu sín vǐ lɛ́ɛ sín kún ná sú dó wɛ. Hwenu e un ná wa nǔ xá yě ɔ́ ɖíe.

⁹Edɔ́mu, vǐwungbɛtɔ́ lɛ́ɛ wá vǐwungbo towe mɛ ɔ́, yě na jó vǐwun ɖě dó wɛ a? Ajotɔ́ dɔn zǎn dó wǔ, bó yi ajo gbé ɔ́, nǔ e é sixú hɛn gblé lɛ́ɛ bǐ wɛ é nɔ́ hɛn gblé.

¹⁰Lo ɔ́, Esawu ví lɛ́ɛ e mi, nyɛ ɔ́, un ná ɖe mi nyi mɛ̌, un ná mɔ fí e mi nɔ hɔn hwlá cí lɛ́ɛ. Mi sɔ́ ná sixú hwlá cí fí énɛ́ lɛ́ɛ ɖě ǎ. Nǔ gblé dó mi kpó mɛ e jɔ ɖo kún mitɔn mɛ lɛ́ɛ kpó. Mi sɔ́ ná mɔ mɛɖé bɔ é ná d'alɔ mi ǎ.

¹¹Nú mi wá kú ɔ́, mɛ ɖěbǔ sɔ́ ná kpo bó ná kpé nukún dó vǐ mitɔn lɛ́ɛ wú ǎ, mɛ ɖěbǔ ká sɔ́ ná kpo bó ná ɖɔ asi mitɔn lɛ́ɛ ní ɖeji dó émí wú ǎ.”

¹²Xó e Mawu Mavɔmavɔ ɖɔ ɔ́ ɖíe: “Edɔ́mu, mɛ e ma ɖó ná nu wǔvɛ́ kɔ́fu ǎ lɛ́ɛ ná nu, bɔ è ná jó hwɛ dó wɛ a? È nǎ jó we dó gbeɖé ǎ, hwi lɔ ná nu.

¹³Un xwlé nyɛ ɖésúnɔ ɔ́ nú we ɖɔ tota towe Bosla kpó toxo towe lɛ́ɛ kpó ná húzú dǒglin, bó ná nɔ mɔ̌ káká sɔ́yi. È ja winnyánú ɖé, hɛ̌n nǔɖé, nǔ baɖabaɖa ɖé, abǐ nudómɛ sín xó ɖé ɖɔ gbé ɔ́, hwi wú wɛ è nǎ nɔ́ jlɛ́ dó. Xó e nyɛ Mawu Mavɔmavɔ ɖɔ ɔ́ nɛ́.”

¹⁴Mawu Mavɔmavɔ dó wɛn ɖé sɛ́ dó akɔta lɛ́ɛ bɔ nyi lɔ se. Mawu Mavɔmavɔ ɖɔ: “Mi kplé miɖée, bó sí te dó Edɔ́mu jí. Mi sí ahwan te dó jǐ tɔn.”

¹⁵Xó e Mawu ɖɔ dó Edɔ́mu wú ɔ́ ɖíe; é ɖɔ: “Edɔ́mu, un na sɔ́ we dó húzú akɔta kpɛví ɖo akɔta lɛ́ɛ bǐ tɛ́ntin; mɛ bǐ na gbɛ́ wǎn nú we.

¹⁶Hwiɖée mimɔ kpó goyíyí towe kpó dɔn we bú. Hwi wɛ nɔ nɔ sóxo mɛ, hwi wɛ nɔ nɔ só ta aga, a xo adɔ̌ towe ɖó jǐ gangan ɖɔhun, un ka na zé we wá do. Xó e nyɛ Mawu Mavɔmavɔ ɖɔ ɔ́ nɛ́.”

¹⁷“Edɔ́mu ná húzú zunkɔ́ta. Mɛ e ɖo dǐndín wɛ lɛ́ɛ mɔ ɔ́, avuvɔfún ná blá yě; yě ná sá heelú.

¹⁸ Lě e Sodɔ́mu kpó Gomɔ́ɔ kpó, kpódó toxo e ɖo akpá yětɔn lɛ́ɛ kpó gba bó hánnyá gbɔn ɔ́ wɛ é ná cí. Mɛ ɖěbǔ sɔ́ ná nɔ to ɔ́ mɛ ǎ, mɛɖé sɔ́ ná zɛ ali gbɔn fínɛ́ ǎ.” Xó e Mawu Mavɔmavɔ ɖɔ ɔ́ nɛ́.

¹⁹Lě e kinnikínní nɔ yi wu ɖo zunkan mɛ ɖo Judɛ́ɛn tɔ ɔ́ tó nú kanlin e ɖo gběhan mɛ lɛ́ɛ, bó nɔ́ wlí ɖě, bɔ ée kpo lɛ́ɛ nɔ́ gbadó gbɔn ɔ́, mɔ̌ wɛ un ná fyán Edɔ́mu to ɔ́ kpó toxo tɔn lɛ́ɛ kpó. Un ná gba mɛ bǐ dó sín fínɛ́, ɖo nukúnxwixwe ɖokpó mɛ, bó ná zé mɛ e un sɔ́ ɔ́ ɖó Edɔ́mu to ɔ́ nu. Mɛ̌ ka ɖó acɛ nyɛ ɖɔhun? Nú un wa nǔɖé ɔ́, mɛ̌ ka sixú kan nǔ e wú un wa mɔ̌ ɔ́ byɔ́ mì? Gǎn tɛ́ sixú nɔ te nukɔn ce?

²⁰Énɛ́ ɔ́ wú ɔ́, mi bo ɖótó gbeta e nyɛ Mawu Mavɔmavɔ ɖe tɔ́n dó Edɔ́mu wú é, bó ɖótó tito e un sɔ́ ɖó te nú mɛ e ɖo Temani gbé jí lɛ́ɛ é: È nǎ dɔn yě bǐ yi kanlin ɖɔhun, é ná gblá ǎ; è nǎ jó mɛ ɖěbǔ dó ǎ; è nǎ gba xwé yětɔn bǐ, nǔ wɛ nyí bó ná jɛ jɛ́n wɛ.

²¹Yě ná jɛ ayǐ, bɔ ayǐkúngban ná dán wǔ. Yě ná sú xó, bɔ è nǎ se gbe yětɔn ɖo káká Fántín xu ɔ́ kɔn.

²²Kpɔ́n kɛntɔ́ ɔ́! È nǎ ɖɔ gangan hɔ̌nsúhɔ́nsú wɛ zɔn, bó kɛ awa ɖó Bosla ta nu. Gbe nɛ́ gbe ɔ́, ahwanfuntɔ́ syɛ́nsyɛ́n Edɔ́mu tɔn lɛ́ɛ bǐ sín ayi ná fun nyɔ̌nu ɖo ajidonu ɖɔhun.

²³ Mawu ɖɔ xó dó Damási wú, é ɖɔ: “Mɛ e ɖo Hamáti toxo ɔ́ mɛ lɛ́ɛ kpó mɛ e ɖo Aapadu toxo ɔ́ mɛ lɛ́ɛ kpó ná se xó baɖabaɖa ɖokpó, bɔ xɛsi ɖaxó ɖé ná jɛ yě jí, bɔ yě ná ɖu hɛ̌n xoxónɔ. Xɛsi ɔ́ ná cí lě e xu nɔ ɖo adǎn jí bó má nɔ hwíhwɛ́ ǎ ɖɔhun.

²⁴Awakanmɛ kú Damásinu lɛ́ɛ bɔ yě lɛ́ kɔ, bó hɔn. Xɛsi jɛ yě jí, yě mɔ wǔvɛ́, bɔ ayi yětɔn fun nyɔ̌nu ɖo ajidonu ɖɔhun.

²⁵Toxo e nɔ dó xomɛhunhun nú mì ɔ́, toxo ɖaxó nɛ́ e xɔ susu sɔ mɔ̌ ɔ́, é wɛ è jó dó mɔ̌ a?

²⁶Nǔgbó wɛ, dɔ̌nkpɛvú tɔn lɛ́ɛ ná kú jɛ tokplétɛn lɛ́ɛ, ahwanfuntɔ́ tɔn lɛ́ɛ bǐ na kú gbe nɛ́ gbe. Xó e nyɛ Mawu Mavɔmavɔ Nǔbǐwúkpétɔ́ ɔ́ ɖɔ ɔ́ nɛ́.

²⁷Un ná dó Damási toxo ɔ́ zo, myɔ ná fyɔ́ axɔ́sú Bɛni-Hadadi sín hɔnmɛ.”

²⁸Mawu ɖɔ xó dó Kedáa kpó axɔ́súɖuto Hasɔ́ɔ́ tɔn lɛ́ɛ kpó wú; Babilɔ́nu xɔ́sú Nabukodonɔzɔ́ɔ wɛ yí fí énɛ́ lɛ́ɛ. Mawu Mavɔmavɔ ɖɔ: “Mi sí te dó Kedáa wú, bó tɔ́n ahwan ɛ. Mi fɔ gbětótló mɛ nu énɛ́ lɛ́ɛ sín nǔ bǐ.

²⁹Mi bɛ́ nǔ yětɔn lɛ́ɛ bǐ; mi bɛ́ goxɔ yětɔn lɛ́ɛ, kanlin yětɔn lɛ́ɛ, azava yětɔn lɛ́ɛ kpó lǎkúnmí yětɔn lɛ́ɛ kpó. Mi sú xó dó ta yětɔn ɖɔ: ‘Xɛsi ɖo fí bǐ.’

³⁰Hasɔ́ɔnu e mi! Mi hɔn, mi gba dó, mi yi cí sóxo mɛ. Xó e nyɛ Mawu Mavɔmavɔ ɖɔ ɔ́ nɛ́. Đó Babilɔ́nu xɔ́sú Nabukodonɔzɔ́ɔ sí te dó mi wú, é ko to lě e é ná wa nǔ mitɔn gbɔn é.”

³¹Mawu Mavɔmavɔ ɖɔ nú Babilɔ́nu xɔ́sú ɔ́ ɖɔ: “Sí te! Yi tɔ́n ahwan akɔta énɛ́ e ma ɖo nǔɖé lin kpɔ́n wɛ ǎ é; é nɔ́ mɔ ɖɔ nǔɖé kún sixú dó tagba nú émí ó; é ɖo xɛsi ɖi nú nǔɖé wɛ káká bó ná dó hɔn xɔnu ǎ. É yi cí zɔ nú mɛ bǐ. Yi tɔ́n ɛ ahwan.

³²Fɔ lǎkúnmí yětɔn lɛ́ɛ bǐ, bɛ̌ kanlin yětɔn lɛ́ɛ bǐ yi xwé. Yě mɛ énɛ́ lɛ́ɛ e nɔ xwlɛ́ gekplá yětɔn lɛ́ɛ ɔ́, un ná fún yě dó gbě. Un ná nɔ́ sɛ́ awě dó yě gbɔn zǔndohlando. Xó e nyɛ Mawu Mavɔmavɔ ɖɔ ɔ́ nɛ́.

³³Hasɔ́ɔ́ ná húzú adɔ̌tɛn nú avǔn gbě tɔn lɛ́ɛ; é ná húzú gbětótló, bó ná jɛ vɔ̌, lobo ná nɔ mɔ̌ káká sɔ́yi. Mɛ ɖěbǔ sɔ́ na nɔ to ɔ́ mɛ ǎ, mɛɖé sɔ́ ná zɛ ali gbɔn fínɛ́ ǎ.”

³⁴Hwenu e Judáa xɔ́sú Sedesíyasi jɛ gǎn ɖu jí ɔ́ wɛ Mawu Mavɔmavɔ ɖɔ xó nú gbeyíɖɔ Jelemíi dó Elámunu lɛ́ɛ wú.

³⁵Mawu Mavɔmavɔ Nǔbǐwúkpétɔ́ ɖɔ: “Un ná wɛ́n gǎ Elámu tɔn, hlɔ̌nhlɔ́n ɖaxó ɖokpó é wú é nɔ́ gán jɛ é!

³⁶Un ná sɛ́ jɔhɔn ɛnɛ dó sín wɛ̌kɛ́zo ɛnɛ lɛ́ɛ mɛ, bɔ jɔhɔn ɔ́ ná nyi dó Elámu to ɔ́ jí. “Un ná zé jɔhɔn énɛ́ lɛ́ɛ dó gba yě dó. Elámunu lɛ́ɛ ná hɔn yi akɔta lɛ́ɛ bǐ mɛ, è nǎ ba yě kpo ɖo akɔta ɖěbǔ mɛ ǎ.

³⁷Un ná dó xɛsi Elámunu lɛ́ɛ, bɔ yě ná sísɔ́ ɖo kɛntɔ́ yětɔn lɛ́ɛ nukɔn, yě mɛ e ɖo kú yětɔn bá wɛ lɛ́ɛ nukɔn. Un ná ɖo xomɛsin ɖaxó jí bó ná sɛ́ awě dó yě. Un ná ɖo ahwan fun xá yě wɛ káká bó ná sú kún yětɔn dó.

³⁸Un ná hu Elámu xɔ́sú ɔ́ kpó gǎn Elámu tɔn lɛ́ɛ kpó, lobo ná zé axɔ́súzinkpo ce ɖ'ayǐ ɖo Elámu to ɔ́ mɛ dɔ̌n. Xó e nyɛ Mawu Mavɔmavɔ ɖɔ ɔ́ nɛ́.

³⁹Amɔ̌, ayǐ ɖo hinhɔn wɛ ɔ́, un ná zé Elámunu lɛ́ɛ ɖó ninɔmɛ e mɛ yě nɔ ɖ'ayǐ xóxó é.” Xó e Mawu Mavɔmavɔ ɖɔ ɔ́ nɛ́.