Read fon Jelemíi 52 Bible Online

Jelemíi 52 - fon bible

Jelemíi 52

¹Xwe ko-nukún-ɖokpó wɛ Sedesíyasi ɖó bó yi zinkpo jí ɖo Jeluzalɛ́mu, bó ɖu axɔ́sú nú xwe wǒ-ɖokpó. Nɔ tɔn nɔ nyí Hamutálu; Yiimɛyahu Livunanu ɔ́ sín ví wɛ.

²Nǔ e má nyɔ́ Mawu Mavɔmavɔ nukún mɛ ǎ lɛ́ɛ wɛ é bló gbɔn ali bǐ xo Yoyakímu ɖɔhun, ɖě hwe ɖ'é mɛ ǎ.

³Énɛ́ ɔ́, nǔ e jɛ ɖo Jeluzalɛ́mu kpó Judáa kpó ɔ́ zɔ́n bɔ xomɛ sin Mawu Mavɔmavɔ bɔ é nya togun tɔn dó zɔ nú éɖée. Sedesíyasi wá fɔ́n gǔ dó Babilɔ́nu xɔ́sú Nabukodonɔzɔ́ɔ jí.

⁴ Hwenu e Sedesíyasi ɖo xwe tɛ́nnɛ bló wɛ ɖo zinkpo jí ɔ́, sun tɔn wǒgɔ́ ɔ́ mɛ, ɖo azǎn tɔn wǒgɔ́ ɔ́ gbe ɔ́, Nabukodonɔzɔ́ɔ, Babilɔ́nu xɔ́sú ɔ́ wá tɔ́n ahwan Jeluzalɛ́mu, é kpódó ahwangɔnu tɔn bǐ kpó. Yě wǎ ɖó gɔnu ɖó Jeluzalɛ́mu nukɔn bó xá toxo ɔ́, bó kun agbǒdo lɛ́ lɛ̌ dó.

⁵Yě xá toxo ɔ́ mɔ̌ káká jɛ hwenu e axɔ́sú Sedesíyasi ɖo xwe wǒ-ɖokpó bló wɛ ɖo zinkpo jí é.

⁶Énɛ́ ɔ́, adɔ tɔ́n ɖo toxo ɔ́ mɛ bó syɛ́n ɖésú, bɔ toví lɛ́ɛ sɔ́ mɔ nǔɖé ná ɖu ǎ. Sun ɛnɛgɔ́ ɔ́ e ɖo xwe énɛ́ mɛ ɔ́, azǎn tɔn tɛ́nnɛgɔ́ ɔ́ gbe ɔ́,

⁷ Babilɔ́nunu lɛ́ɛ tɔ́n ali ɖokpó dó ahohó e è mɛ lɛ́ lɛ̌ dó toxo ɔ́ é mɛ. Yě xá toxo ɔ́ mɔ̌ có ahwanfuntɔ́ Judáa tɔn lɛ́ɛ dɔn zǎn dó wǔ, bó hɔn gbɔn hɔntogbó e ɖo ahohó lɛ́ɛ tɛ́ntin ɖo axɔ́sú ɔ́ sín jikpá kpá é nu. Yě wlí ali e yi Judɛ́ɛn tɔdo ɔ́ mɛ é.

⁸Lo ɔ́, ahwangɔnu Babilɔ́nunu lɛ́ɛ tɔn lɛ́ɛ jɛ axɔ́sú Sedesíyasi gúdo, bó yi xwedó wǔ tɔn ɖo ayǐkúngban wɛnjɛ Jeliko tɔn jí; ahwanfuntɔ́ tɔn lɛ́ɛ bǐ hɔn jó e dó,

⁹bɔ yě wlí i bó kplá ɛ yi Babilɔ́nu xɔ́sú Nabukodonɔzɔ́ɔ gɔ́n ɖo Hlivla ɖo Hamáti tomɛ. Fínɛ́ wɛ Nabukodonɔzɔ́ɔ ɖó hwɛ nú Sedesíyasi ɖe.

¹⁰Nabukodonɔzɔ́ɔ hu Sedesíyasi ví lɛ́ɛ ɖo nukún tɔn mɛ. É ná gbe bɔ è hu gǎn Judáa tɔn lɛ́ɛ bǐ ɖo Hlivla.

¹¹ Énɛ́ ɔ́ gúdo ɔ́, é ná gbe bɔ è tɔ́n nukún Sedesíyasi tɔn we lɛ́ɛ, bó dó wlɔ ɛ, bó kplá ɛ yi Babilɔ́nu, bó sɔ́ ɛ sú dó ganxó, bɔ é nɔ fínɛ́ káká bó kú.

¹²Hwenu e Nabukodonɔzɔ́ɔ ɖo xwe afɔtɔn-nukún-ɛnɛ bló wɛ ɖo axɔ́súzinkpo Babilɔ́nu tɔn jí ɔ́, azǎn wǒgɔ́ ɔ́ e ɖo sun atɔ́ɔ́ngɔ́ ɔ́ mɛ ɔ́ gbe ɔ́, Nɛbuzaladáni ahwangán e nɔ́ nɔ axɔ́sú ɔ́ sín xwé gbe ɔ́ wá Jeluzalɛ́mu.

¹³ É dó Mawu Mavɔmavɔ xwé ɔ́ zo, bó dó hɔnmɛ ɔ́ kpó xwé e ɖo Jeluzalɛ́mu lɛ́ɛ bǐ kpó zo. Đo tají ɔ́, é dó gbɛtɔ́ nukúnɖéjí lɛ́ɛ sín xwé zo.

¹⁴Babilɔ́nu sín ahwangɔnu ɔ́ bǐ wɛ xwedó Nɛbuzaladáni, bó wá gba ahohó e è mɛ lɛ́ lɛ̌ dó Jeluzalɛ́mu lɛ́ɛ bǐ.

¹⁵Nɛbuzaladáni wlí wamamɔnɔ lɛ́ɛ kpó mɛ e kpo ɖo toxo ɔ́ mɛ lɛ́ɛ kpó, kpó mɛ e sɔ́ yěɖée jó nú Babilɔ́nu xɔ́sú ɔ́ lɛ́ɛ, kpó alɔlyɛ́nzɔ́watɔ́ e kpo ɖo to ɔ́ mɛ lɛ́ɛ kpó; é wlí mɛ e cí to ɔ́ mɛ lɛ́ɛ bǐ hɛn yi Babilɔ́nu.

¹⁶Amɔ̌, é jó wamamɔnɔ e ɖo to ɔ́ mɛ lɛ́ɛ ɖě dó, bɔ yědɛɛ lɛ́ɛ ná nɔ kpé nukún dó vǐwungbo lɛ́ɛ kpó gle lɛ́ɛ kpó wú.

¹⁷ Babilɔ́nunu lɛ́ɛ gba dotín e è sɔ́ ganvɔ dó bló ná ɖo Mawu Mavɔmavɔ xwé ɔ́ gbe lɛ́ɛ kpó ganvɔ basya e ɖo kɔ́xo jí é kpó kɛkɛ́ví lɛ́ɛ kpó hánnyá, bó bɛ́ ganvɔ lɛ́ɛ bǐ hɛn yi Babilɔ́nu.

¹⁸Yě bɛ́ nǔ e è zě ganvɔ dó bló bɔ è nɔ zán ɖo sinsɛn hwenu lɛ́ɛ bǐ: afíngannú lɛ́ɛ, afínbɛ́nú lɛ́ɛ, nǔ e è nɔ dó bló myɔ ɖó ná lɛ́ɛ, gannú lɛ́ɛ kpódó kɔ́fu lɛ́ɛ kpó.

¹⁹Nɛbuzaladáni lɛ́ fɔ nǔ e è zě siká kpó kpatágan kpó dó bló lɛ́ɛ; é fɔ basya lɛ́ɛ, zǎlínkpɔ́nfyɔ́nú lɛ́ɛ, gannú lɛ́ɛ, afíngannú lɛ́ɛ, zogbɛ́nhɛnnú lɛ́ɛ, agbǎn lɛ́ɛ, sinnuká lɛ́ɛ.

²⁰Nǔ énɛ́ lɛ́ɛ e Salomɔ́ɔ bló ɖó Mawu Mavɔmavɔ xwé gbe lɛ́ɛ kpɛn káká, bɔ è sixú da bó tunwun nabí e yě da é ǎ. Nǔ lɛ́ɛ wɛ nyí dotín we lɛ́ɛ, basya ɖaxó ɔ́ kpó ganvɔ nyibú wěwe e jí basya ɔ́ ɖe lɛ́ɛ kpó, kpódó kɛkɛ́ví lɛ́ɛ kpó.

²¹Dotín lɛ́ɛ ɖokpó ɖokpó sín jǐyiyi bló mɛ̌tlu tɛ́nnɛ, bɔ è zě kan bó lɛ́ dó; kan ɔ́ sín ga yi mɛ̌tlu ayizɛ́n. Dotín ɖokpó ɖokpó sín avɔsísɔ́ yi alɔbá ɛnɛ.

²²Ata ɖokpó sín jǐ yiyi bló mɛ̌tlu we adaɖé. È zě ganvɔ dó lɔn ganja, bó bló lɛ́ lɛ̌ dó ata e ɖo dotín ɖokpó ɖokpó jí é, bó zé ganvɔ dó bló glenádi ná, bó to lɛ́ lɛ̌ dó ata e ɖo dotín lɛ́ɛ jí é. Dotín wegɔ́ ɔ́ lɔ ɖó jlɛ ɖokpó ɔ́ lɛ́ɛ, glenádi ɖokpó ɔ́ lɛ́ɛ.

²³Glenádi kanwe afɔtɔn nukún ɖokpó (96) wú wɛ è mɔ nǔ jɛ ɖo xɔ ɔ́ wú. Glenádi e lɛ́ dó xɔ ɔ́ yi kanwe ko (100).

²⁴Nɛbuzaladáni ahwangán e kpa acɛ dó mɛ e nɔ cɔ́ axɔ́sú ɔ́ lɛ́ɛ nu ɔ́ kplá Selaya vɔ̌sánú-xwlémawutɔ́ ɖaxó ɔ́, bó kplá Sefaníyahu mɛ e bɔ dó wǔ tɔn é, kpódó vɔ̌sánú-xwlémawutɔ́ atɔn e nɔ́ nɔ ali nu lɛ́ɛ kpó.

²⁵Ée é wá toxo ɔ́ mɛ ɔ́, é wlí ahwangán e kpa acɛ dó sɔ́ja lɛ́ɛ nu é, bó wlí mɛ tɛ́nwe ɖo mɛ e kpó axɔ́sú ɔ́ kpó nɔ́ ɖe wě lɛ́ɛ mɛ, bó wlí ahwangán wěgbójínɔtɔ́ e nɔ́ yí mɛ dó ahwanmɛ é, bó lɛ́ wlí toví kanɖé ko (60) ɖo toxo ɔ́ mɛ gɔ́ ná.

²⁶Nɛbuzaladáni kplá mɛ e é wlí lɛ́ɛ hɛn yi Babilɔ́nu xɔ́sú ɔ́ gɔ́n ɖo Hlivla.

²⁷Babilɔ́nu xɔ́sú ɔ́ xo yě, bó hu yě bǐ ɖo fínɛ́ ɖo Hamáti to ɔ́ mɛ. Judáanu e è wlǐ hɛn yi to línlín ɖé mɛ lɛ́ɛ sín tan nɛ́.

²⁸Mɛ nabí e Nabukodonɔzɔ́ɔ wlí e ɖíe: Hwenu e é byɔ́ xwe tɛ́nwegɔ́ ɔ́ mɛ ɔ́, é wlí Judáanu afɔwó-afatɔ́n ko-nukún-atɔn (3.023).

²⁹Hwenu e é byɔ́ xwe afɔtɔn nukún atɔngɔ́ ɔ́ mɛ ɔ́, é wlí gbɛtɔ́ nǔwɔntɔn afɔɖé gban nukún we (832) ɖo Jeluzalɛ́mu.

³⁰Hwenu e axɔ́sú Nabukodonɔzɔ́ɔ byɔ́ xwe ko-nukún-atɔngɔ́ ɔ́ mɛ ɔ́, sɔ́ja mɛcɔ́tɔ́ lɛ́ɛ sín gǎn Nɛbuzaladáni ɔ́ wlí Judáanu nǔwɔntɔn kantɔn koatɔ́n (745). Bɔ mɛ e ahwan wlí lɛ́ɛ bǐ kplékplé bló gbɛtɔ́ děgba nǔwɔntɔn (4.600).

³¹Hwenu e Yoyakini ɖo xwe gbantɔ́n-nukún-we (37) bló wɛ ɖo gankpá mɛ ɔ́, sun wěwegɔ́ ɔ́ e ɖo xwe énɛ́ mɛ ɔ́, azǎn koatɔ́ngɔ́ (25) ɔ́ gbe ɔ́, Babilɔ́nu xɔ́sú Ewilu-Mɛlodaki ɖe Yoyakini Judáa xɔ́sú ɔ́ sín gankpá mɛ, bó ɖe winnyá n'i. Xwe e xwe Ewilu-Mɛlodaki yi zinkpo jí ɔ́ wɛ é ɖe e tɔ́n sín gankpá mɛ.

³²É ɖɔ xó nú Yoyakini kpó xomɛfífá kpó, bó sɔ́ ɛ ɖó tɛn ɖé mɛ, bɔ tɛn ɔ́ ɖo nukɔn nú axɔ́sú e kpó é kpó ɖo Babilɔ́nu lɛ́ɛ bǐ tɔn.

³³Axɔ́sú ɔ́ ná gbe ɖɔ è nǐ má sɔ́ dó gantɔ́wu nú Yoyakini ɖě ó, bɔ bɛ́ sín hwenɛ́nu ɔ́, é nɔ ɖu nǔ xá axɔ́sú ɔ́ tɛgbɛ tɛgbɛ.

³⁴Axɔ́sú ɔ́ nɔ ná nǔ e hu dó e lɛ́ɛ bǐ i ayǐhɔ́ngbe ayǐhɔ́ngbe. É gɔn nǐná ɛ gbeɖé káká có nú Yoyakini kú ǎ.