Read fon Jelemíi 7 Bible Online

Jelemíi 7 - fon bible

Jelemíi 7

¹Xó e Mawu Mavɔmavɔ ɖɔ nú Jelemíi é ɖíe:

²“Yi cí Mawu Mavɔmavɔ xwé ɔ́ sín hɔnta bó jlá xó élɔ́: Judáanu e mi, mi mɛ e nɔ gbɔn hɔntogbó élɔ́ lɛ́ɛ nu, bó nɔ́ yi ɖe kɔ́ nú Mawu Mavɔmavɔ lɛ́ɛ, mi ɖótó Mawuxó!

³Mawu Mavɔmavɔ Nǔbǐwúkpétɔ́ ɔ́, Mawu Izlayɛ́li tɔn ɖɔ: Mi húzú jijɔ, mi ɖyɔ́ walɔ; énɛ́ ɔ́, un ná jó mi dó, bɔ mi ná nɔ to mɛ fí.

⁴Mɛblɛ́blɛ́ sín xó e sú wɛ è nɔ ɖe, bo nɔ ɖɔ: ‘Xwé e gbe Mawu Mavɔmavɔ nɔ nɔ ɔ́ ɖíe ɖo fí e, Mawu Mavɔmavɔ xwé ɔ́ ɖíe, fí e Mawu Mavɔmavɔ xwé ɔ́ ɖe ɔ́ jɛ́n ɖíe’ é ɔ́, mi ma gán jɛ wú ó.

⁵Ényí mi húzú jijɔ, bɔ walɔ mitɔn lɛ́ɛ ɖyɔ́ ɔ́, ényí mi nɔ wa nǔ ɖó sɛ́nxwi jí nú miɖée ɔ́,

⁶ényí mi ma nɔ táfú tɔ́cyɔvǐ ǎ, asúkúsi ǎ, jǒnɔ e ɖo to mitɔn mɛ lɛ́ɛ ǎ ɔ́, ényí mi ma nɔ kɔn xomɛvɔ́nɔ sín kanjɔ kɔn nyi ayǐ ɖo fí ǎ ɔ́, ényí mi ma nɔ sɛn vodún lɛ́ɛ dó ba xó dó kɔ nú miɖée ǎ ɔ́,

⁷un ná jó mi dó, bɔ mi na nɔ to mɛ fí, to élɔ́ e un ná tɔ́gbó mitɔn lɛ́ɛ sín do bɔ è ná nyí yětɔn káká sɔ́yi ɔ́ mɛ.

⁸“Mi ɖíe ká gán jɛ mɛblɛ́blɛ́ xó, xó ma ɖó ta ɖé e sú wɛ è ɖe ɔ́ wú e.

⁹Étɛ́! Mi ná nɔ ɖo ajo ja wɛ, mi ná nɔ ɖo mɛ hu wɛ, mi ná nɔ ɖo aga lɛ wɛ, mi ná nɔ ɖo nyǐkɔ ce xwlé dó wǔvɔ́ wɛ, mi ná nɔ ɖo zǎlínkpɔ́n dó zo nú vodún Baalu wɛ, mi ná nɔ ɖo vodún e mi ma tunwun kpɔ́n ǎ lɛ́ɛ sɛn wɛ!

¹⁰Mi ná nɔ ɖo nǔ énɛ́ lɛ́ɛ bló wɛ, bó ká ná nɔ́ lɛ́ kɔ wá gɔ̌n ce, ɖo xwé élɔ́ e è sɔ́ ɖó vo nú mì ɔ́ gbe, bó ná nɔ́ ɖɔ: ‘Éénɛ́, mǐ gǎn!’ Mi nɔ bló mɔ̌, bó nɔ́ mɔ tɛn bó nɔ́ dó nǔ nyanya e jló mi lɛ́ɛ bǐ sin.

¹¹ Xwé élɔ́ e è sɔ́ ɖó vo nú mì ɔ́, é má nyí ajotɔ́ lɛ́ɛ sín avatɛn wɛ mi dó mɔ a? Nyɛ Mawu Mavɔmavɔ ɖésú wɛ mɔ mɔ̌. Xó e nyɛ Mawu Mavɔmavɔ ɖɔ ɔ́ nɛ́.

¹² “Mi bo yi Silóo, fí e xwé ce nɔ ɖ'ayǐ é, bó kpɔ́n lě e un hánnyá Silóo énɛ́ gbɔn é. Adǎka e xo wɛ togun ce Izlayɛ́li ɖe ɔ́ wú wɛ un wa nǔ gbɔn mɔ̌.

¹³É nyɔ́! Nǔ nyanya e é wa ɔ́ wɛ mi lɔ wa. Un ɖɔ mɔ̌ nú mi, bó fɔ́n bó nɔ́ ɖo ɖiɖɔ nú mi wɛ, mi ka ɖótó mì ǎ; un ylɔ́ mi, mi ka sɔ nú mì ǎ.

¹⁴Énɛ́ ɔ́ wú wɛ xwé élɔ́ e è sɔ́ ɖó vo nú mì ɔ́, xwé élɔ́ e wú mi gán jɛ ɔ́, tɛn élɔ́ e un ná tɔ́gbó mitɔn lɛ́ɛ, bó ná mi lɔmɔ̌ ɔ́, un ná wa nǔ tɔn lě e un wa Silóo sín nǔ gbɔn é.

¹⁵Un ná nya mi dó zɔ, lě e un nya nɔví mitɔn Eflayímu ví énɛ́ lɛ́ɛ bǐ gbɔn é.”

¹⁶Mawu Mavɔmavɔ ɖɔ: “Jelemíi, hwɛ ɔ́, ma xo ɖɛ dó togun élɔ́ ta mɛ ó; ma sa vo nú mì ɖó ta yětɔn mɛ ó! Ma ka byɔ́ nǔɖé mì nú yě ó; ma jɛ kɔ nú mì ɖó ta yětɔn mɛ ó, ɖó un ná ɖótó we ǎ.

¹⁷A mɔ nǔ e dó sin wɛ yě ɖe gbɔn Judáa toxo lɛ́ɛ mɛ é ǎ cé? A lɛ̌ mɔ éé jlɛ́ wɛ yě ɖe gbɔn Jeluzalɛ́mu sín ali lɛ́ɛ jí é ǎ cé?

¹⁸ Vǐ lɛ́ɛ nɔ yi cyán nakí, nú tɔ́ yětɔn lɛ́ɛ ná bɔ myɔ; nɔ yětɔn lɛ́ɛ nɔ wún linfín, bó nɔ́ nya, bó nɔ́ ɖa wɔ̌xúxú nú Axɔ́si jǐxwé tɔn. Yě nɔ́ ba ahan nú vodún lɛ́ɛ. Yě nɔ́ bló nǔ énɛ́ dó dó xomɛsin nú nyɛ Mawu Mavɔmavɔ.

¹⁹Bɔ un nɔ ɖɔ: Nyɛ wú wa nǔ dó wɛ yě ɖe a? Gbeɖé, yě ɖésúnɔ wú wa nǔ dó wɛ yě ɖe, amɔ̌, yě ná ɖu winnyá.”

²⁰Énɛ́ ɔ́ wú wɛ nyɛ Aklúnɔ Mavɔmavɔ ɖɔ: “Xomɛsin ce ná jɛ te dó toxo élɔ́ jí bó ná syɛ́n ɖésú: alɔ ce na jɛ gbɛtɔ́ kpó kanlin kpó, atín kpó nǔ e ayǐkúngban nɔ na lɛ́ɛ kpó bǐ wú. Xomɛsin ce ná cí zo e ma nɔ cí gbeɖé ǎ ɔ́ ɖɔhun.”

²¹“Xó e nyɛ Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖɔ ɔ́ ɖíe: Kanlin e mi na dó sá vɔ̌ e è nɔ dó zo lɛ́ɛ, kpó kanlin e mi na hu dó sá vɔ̌ xolólo lɛ́ɛ kpó lɛ́ɛ ɔ́, mi xo bǐ sín lan kplé bó ɖu kpowun.

²²Đó gbe e gbe un kplá tɔ́gbó mitɔn lɛ́ɛ sín Ejípu tomɛ ɔ́, un zɔ́n yě ɖɔ yě ní hu kanlin dó sá vɔ̌ e è nɔ dó zo lɛ́ɛ nú mì ǎ, un zɔ́n yě ɖɔ yě ní hu kanlin dó sá vɔ̌ xolólo lɛ́ɛ nú mì ǎ.

²³Nǔ e un zɔ́n yě ɔ́ ɖíe: un ɖɔ nú yě ɖɔ yě ní se xó ce, bónú má nyí Mawu yětɔn, bɔ yě ná nyí togun ce. Ali e un ɖe nú yě ɔ́, yě ní gbɔn ali ɔ́ tlélé, bónú nǔ nǎ nyɔ́ nú yě.

²⁴Yě ká se ǎ, yě ɖǒtó xó ce ǎ. Nǔ e yě xwe ɔ́ wɛ yě wa; linlin nyanya yětɔn lɛ́ɛ wɛ yě xwedó. Gǔdo wɛ yě yi, yě yi nukɔn ǎ.

²⁵Sín gbe e gbe tɔ́gbó mitɔn lɛ́ɛ gosín Ejípu ɔ́, un fɔ́n ɔ́ un nɔ ɖo mɛsɛntɔ́ ce gbeyíɖɔ lɛ́ɛ sɛ́ dó mi wɛ káká wá jɛ égbé.

²⁶Mi ká se ǎ, mi ɖótó xó ce ǎ, nǔ e mi xwe ɔ́ jɛ́n mi wa. Mi gbɛ́ hɛn hú tɔ́gbó mitɔn lɛ́ɛ.”

²⁷Mawu ɖɔ: “Jelemíi, a na bó ɖɔ xó énɛ́ lɛ́ɛ bǐ nú yě ɔ́, yě ná ɖótó we ǎ. A na bó sú xó bó ɖɔ xó nú yě ɔ́, yě ná kɛ nu d'é mɛ nú we ǎ.

²⁸Énɛ́ ɔ́ wú ɔ́, gbɔ bo ɖɔ nú yě ɖɔ: togun e ma nɔ ɖótó Mawu Mavɔmavɔ, Mawu tɔn ǎ ɔ́ wɛ mi nyí; togun e ma nɔ se nǔ e Mawu tɔn gbɛ́ n'i lɛ́ɛ ǎ ɔ́ wɛ mi nyí. Nǔgbó ɖiɖɔ vɛ́ mi. Nǔgbó ɖě ɖo nu mitɔn ǎ.”

²⁹Mawu Mavɔmavɔ ɖɔ: “Judáa togun e mi, mi jó ɖa dó nyi ta dó ɖe xlɛ́ ɖɔ è sɔ́ mi ɖo vo nú mì, mi kpa bǐ, bó bɛ́ kɔ́n nyi gbě. Mi nɔ só tá bó dó gbɛvíhan. Đó mi dó xomɛsin nú mì, un sɔ́ ba mi ǎ, un ɖe alɔ sín kan mitɔn mɛ.

³⁰“Judáanu e mi, mi dó nǔ e ma nyɔ́ nukún ce mɛ ǎ lɛ́ɛ sin. Mi bɛ́ bǒcyɔ mitɔn lɛ́ɛ wá ɖó xwé ce gbe, xwé e è sɔ́ ɖó vo nú mì é gbe, lobo ɖu su nú xwé ce. Xó e nyɛ Mawu Mavɔmavɔ ɖɔ ɔ́ nɛ́.

³¹ Mi lí vodún ɖo Tafɛ́ti, ɖo Hinnɔ́ɔ tɔdo ɔ́ mɛ, lobo nɔ dó vǐ mitɔn súnnu kpó nyɔ̌nu kpó zo ɖo fínɛ́ dó sá vɔ̌. Un ka zɔ́n nú mɔ̌ ɖé mi ǎ; é wá ayi mɛ nú mì gbeɖé kpɔ́n lɔ ǎ.

³²“Énɛ́ ɔ́ wú ɔ́, ayǐ ɖokpó ná wá hɔ́n, bɔ mɛɖé sɔ́ ná ɖɔ: ‘Tafɛ́ti’ ɖíe, ‘Hinnɔ́mu tɔdo’ ɖíe ǎ; è nǎ ɖɔ: ‘Mɛ huhu sín tɔdo’ ɖíe. Fínɛ́ wɛ è nǎ ɖi mɛ kúkú lɛ́ɛ ɖó, ɖó tɛn sɔ́ ná tíin ɖo fí ɖěvo ǎ.

³³Cyɔ mitɔn lɛ́ɛ ná húzú nǔɖuɖu nú aklasú lɛ́ɛ kpó ayǐsájɛ lɛ́ɛ kpó. Mɛ ɖěbǔ ná nya yě ǎ.

³⁴ Mɛ ɖé sɔ́ ná se xwe ɖuɖu, awǎjijɛ, alɔwlíhan ɖě ɖo Judáa toxo lɛ́ɛ mɛ ǎ, è nǎ se ɖo Jeluzalɛ́mu sín ali lɛ́ɛ ɖě xo ǎ. Un ná ɖó bǐ te, ɖó to ɔ́ bǐ ná gba hánnyá.”