Read fon Jelemíi 8 Bible Online

Jelemíi 8 - fon bible

Jelemíi 8

¹Mawu Mavɔmavɔ ɖɔ: “Hwe énɛ́ ɔ́ nu ɔ́, è nǎ yi bɛ́ gǎn Judáa tɔn lɛ́ɛ sín xú sín yɔdo mɛ: è nǎ yi bɛ́ axɔ́sú lɛ́ɛ sín xú, gǎn hɔn-yitɔ́ lɛ́ɛ sín xú, vɔ̌sánú-xwlémawutɔ́ lɛ́ɛ sín xú, gbeyíɖɔ lɛ́ɛ sín xú, bó ná bɛ́ Jeluzalɛ́munu lɛ́ɛ sín xú,

²bó tɛ́ xú énɛ́ lɛ́ɛ gbɔn fí bǐ; è nǎ tɛ́ ɖó hwe kpó sun kpó sunví lɛ́ɛ bǐ kpó nukɔn; nǔ énɛ́ lɛ́ɛ wɛ mɛ énɛ́ lɛ́ɛ yí wǎn ná bó sɛn. Nǔ énɛ́ lɛ́ɛ wɛ yě xwedó, nǔ énɛ́ lɛ́ɛ wɛ yě nɔ́ kan nǔ byɔ́, nǔ énɛ́ lɛ́ɛ wɛ yě nɔ́ ɖe kɔ́ ná hwenu e yě ɖo gbɛ é. Mɛ ɖé ná ɖ'alɔ xú énɛ́ lɛ́ɛ wú ǎ; mɛɖé ká ná ɖi yě ǎ; yě ná nyí zunkɔ́ kpowun ɖo ayǐkúngban jí.

³Mɛ e ka ná kpo ɖo gbɛ ɖo togun dídá élɔ́ mɛ lɛ́ɛ ɔ́, fí e un ná gba yě dó kpé lɛ́ɛ ɔ́, kú ná nyɔ́ hú gbɛ nú yě ɖo fínɛ́; Nyɛ Mawu Mavɔmavɔ Nǔbǐwúkpétɔ́ ɔ́ wɛ ɖɔ mɔ̌.”

⁴“Jelemíi, a nǎ ɖɔ nú yě ɖɔ nyɛ Mawu Mavɔmavɔ ɖɔ: È jɛ ayǐ ɔ́, è sɔ́ nɔ́ sí te ǎ cé? Fí e è xwe ɔ́ bú dó mɛ ɔ́, fí e è gosín ɔ́ nɔ́ bú dó mɛ wɛ a?

⁵Bɔ étɛ́wú Jeluzalɛ́mu togun ɔ́ ka bú ali, bó ká ná lɛ́ kɔ bɔ é gló? Yě kpo ɖo yěɖée blɛ́ wɛ ɖo vodún yětɔn lɛ́ɛ gúdo bó gbɛ́ kɔ lɛ́ wá gɔ̌n ce.

⁶Un ɖo tó ɖó xó e ɖɔ wɛ yě ɖe ɔ́ ganjí: xó yětɔn xwe ali ǎ. Yě ɖěbǔ ba ná jó nǔ nyanya e wa wɛ yě ɖe ɔ́ dó ǎ. Mɛ ɖé ká ɖɔ: ‘Étɛ́ un ka wa nɛ́’ ǎ. Yě bǐ lɛ́ bɔ wezun nyi do, sɔ́ ɖo ahwangbénu ɖɔhun.

⁷Aɖɔwé lɛ́ɛ tunwun hwenu e yě ná wá dó ɔ́; axwá lɛ́ɛ, azɔnxɛ lɛ́ɛ kpó tátábolí lɛ́ɛ kpó lɔ tunwun hwenu e yě nɔ́ wá dó ɔ́; togun ce ɔ́ ká tunwun tito e un zé ɖ'ayǐ lɛ́ɛ ɖěbǔ ǎ!”

⁸Nɛ̌ mi ka sixú ɖɔ nǔnywɛ́tɔ́ wɛ émí nyí, ɖɔ sɛ́n Mawu Mavɔmavɔ tɔn ɔ́ ɖo émí lɔ mɛ gbɔn? Nɛ̌ mi ná ɖɔ mɔ̌ gbɔn? Mi sixú ɖɔ mɔ̌ ǎ, ɖó mɛ e wlán sɛ́n lɛ́ɛ ɔ́, ahizinɔ wɛ nú yě; yě húzú ada nú sɛ́n ɔ́.

⁹Nǔnywɛ́tɔ́ lɛ́ɛ ɖu winnyá bǐ, ahwi xo yě, yě sɔ́ mɔ; ɖó yě hu tɛ́ nú Mawu Mavɔmavɔ xó ɔ́, bɔ nǔnywɛ́ tɛ́ yě ká ɖó lo?

¹⁰ Mawu ɖɔ: “Yě bǐ wɛ dɔkun gbo vɛ̌, bɛ́ sín yɔkpɔ́vú jí káká yi mɛxó jí. Gbeyíɖɔ kpó vɔ̌sánú-xwlémawutɔ́ kpó bǐ wɛ nɔ xo awo. Énɛ́ ɔ́ wú wɛ un ná sɔ́ asi yětɔn lɛ́ɛ jó nú mɛ ɖěvo lɛ́ɛ, bó sɔ́ gle yětɔn lɛ́ɛ jó nú mɛ e ná wá vɔ yě lɛ́ɛ.

¹¹ Awě e ɖo togun ce xo wɛ ɔ́, yě sɔ́ dó ylɔ́ nǔɖé ǎ; bó nɔ́ ɖɔ: ‘Nǔ bǐ ɖo yiyi wɛ linsinlinsin’, nǔ ɖěbǔ ká ɖo yiyi wɛ ǎ.

¹²Winnyá wɛ ɖó ná hu yě ɖó nǔ baɖabaɖa e yě dó sin lɛ́ɛ wú. Winnyá ká hu yě lɔ vɔ́vɔ́ ǎ. Énɛ́ wú wɛ yě ná j'ayǐ kpó mɛ e ɖo ayǐ jɛ wɛ lɛ́ɛ kpó. Hwenu e un ná wa nǔ xá yě ɔ́, yě ná mɔ yěɖée ɖo kɔ́ mɛ. Nyɛ Mawu Mavɔmavɔ ɔ́ wɛ ɖɔ mɔ̌.” Mawu mɔ nǔ e ba wɛ é ɖe ɖo togun ɔ́ sí ɔ́ ɖo así tɔn ǎ

¹³Mawu Mavɔmavɔ ɖɔ: “Nú un ɖo nǔɖé ba ɖo yě gɔ́n wɛ ɔ́, un nɔ mɔ ǎ. Un nɔ mɔ vǐwun ɖěbǔ ɖo vǐwungbo lɛ́ɛ mɛ ǎ; un mɔ fígi ɖěbǔ ɖo fígitín lɛ́ɛ jí ǎ; atín bǐ wɛ mlú ɖa. Un gbɔ bo jó bǐ nú aligbɔntɔ́ lɛ́ɛ.”

¹⁴Togun ɔ́ ɖɔ: “Étɛ́wú mǐ ká ɖo ayǐjínjɔ́n fí din? Mi xo miɖée kplé nú mǐ ná yi toxo e è mɛ ahohó lɛ́ lɛ̌ dó lɛ́ɛ mɛ, bó ná yi nɔ te kpɔ́n kú ɖo dɔ̌n, ɖó Mawu Mavɔmavɔ, Mawu mǐtɔn ɔ́, kú wɛ é jó mǐ ná; sin e é ná mǐ bɔ mǐ nu ɔ́, nǔ wɛ è d'é mɛ, ɖó mǐ hu hwɛ dó e.

¹⁵Fífá wɛ mǐ ɖo te kpɔ́n, nǔ ɖagbe ɖě ká wá ǎ. Mǐ ɖo nukún ɖó wɛ ɖɔ azɔn mǐtɔn ná gbɔ, awě wɛ ká wá xo mǐ.

¹⁶Kɛntɔ́ mǐtɔn lɛ́ɛ jǎwe, bó kó ɖo Dan. Sɔ́ yětɔn lɛ́ɛ gbɔjɛ́ lě ɔ́, è nɔ se sín káká dɔ̌n. Yě sú xó ɔ́, ayǐkúngban ɔ́ bǐ nɔ dán wǔ. Kɛntɔ́ mǐtɔn lɛ́ɛ jǎwe, bó ná wá gba to mǐtɔn, bó hɛn nǔ e ɖ'é mɛ lɛ́ɛ bǐ gblé: yě ná gba toxo mǐtɔn lɛ́ɛ bǐ, yě ná gblé gbɛ dó nú mɛ bǐ.”

¹⁷Mawu ɖɔ: “Un ná sɛ́ dan dó mi, un ná sɛ́ amǎsɛ́ dó mi, mɛ ɖěbǔ ná sixú bló nǔɖé dó hɛn yě ɖó te nú yě ná gɔn mi ɖu ǎ; yě ná ɖu mi jɛ́n wɛ; nyɛ Mawu Mavɔmavɔ wɛ ɖɔ mɔ̌.”

¹⁸Jelemíi ɖɔ: “Un vo ɖo ayi mɛ ǎ. Nǔ e ná xo hwihwɛ́ mì é ɖě ká ɖe ǎ.

¹⁹Togun ce ɖo xó sú wɛ sín to línlín mɛ bó nɔ́ ɖɔ: ‘Mawu Mavɔmavɔ ka sɔ́ ɖo Sinyɔ́ɔ ǎ wɛ a? Sinyɔ́ɔ sɔ́ ɖó axɔ́sú ǎ cé?’ ” Mawu ɖɔ: “Étɛ́wú yě ká sɛn vodún dó dó xomɛsin nú mì? Yě sɛn nǔ énɛ́ lɛ́ɛ e to ɖěvo mɛ nu lɛ́ɛ nɔ́ sɔ́ alɔ yětɔn dó bló bɔ é má ká nyí nǔɖé ǎ lɛ́ɛ dó dó xomɛsin nú mì?”

²⁰Jelemíi ɖɔ: “È ko sɔ́ nǔkún fó, hwenu e è nɔ sɔ́ nǔkún dó ɔ́ kó ɖo vivɔ wɛ, mǐ ká kó mɔ hwlɛngán ǎ.

²¹Adǎn e ɖo togun ce gbo wɛ ɔ́ gba lanmɛ nú mì. Wǔ kú mì, ahwi xo mì.

²²Atínkɛn e nɔ dɛn wǔ nú mɛ é ɖě ɖo Galadi to ɔ́ mɛ ǎ cé? Dotóo ɖě ɖo fí ǎ cé? Bɔ étɛ́wú togun ce sín azɔn ma ka gbɔ ǎ?

²³Nú mɛɖé sixú sɔ́ ta ce dó húzú tɔjɔtɛn din ɔ́, nú mɛ ɖé sixú sɔ́ nukún ce dó húzú tɔsisa din ɔ́, un ná ya avǐ zǎn kéze, bó ná ví mɛ e kú ɖo togun ce mɛ lɛ́ɛ.”