Read fon Gbɛvíhan 4 Bible Online

Gbɛvíhan 4 - fon bible

Gbɛvíhan 4

¹Áo! Siká ɔ́ kú awi! Gan ɖagbe ɖagbe ɔ́ sɔ́ nɔ́ kɔ́n ǎ. Awǐnnya e è fɔ ɖó vo nú Mawu lɛ́ɛ fúnfún gbɔn alitó alitó.

²Sinyɔ́ɔnu mɛjɔmɛ, siká akú lɛ́ɛ ɔ́, nɛ̌ è ka sixú mɔ yě dó mɔ kozɛ́n yǎyá ɖé gbɔn? Nǔ e zɛ̌nmɛtɔ́ zé alɔ tɔn dó bló ná é!

³Avǔn gbě tɔn lɛ́ɛ ɔ́, yě ji vǐ ɔ́, yě nɔ́ tunwun ɖɔ émí wɛ nyí nɔ yětɔn, bó nɔ́ ná anɔ̌ vǐ lɛ́ɛ. Lo ɔ́, vǐnɔ alɔkpa e togun ce nyí ɔ́, un tunwun ǎ; é dá hú gowungo gbětótló mɛ tɔn.

⁴Kɔ xú vǐ ɖo anɔ̌nu lɛ́ɛ káká bɔ ɖɛ̌ yětɔn tɛ́ dó ɖɛxwɛ wú. Yɔkpɔ́vú lɛ́ɛ nɔ́ ɖo nǔɖuɖu byɔ́ wɛ, mɛ ɖěbǔ ká nɔ́ ná yě ǎ.

⁵Yě mɛ e nɔ ɖu nǔ ɖagbe ɖ'ayǐ lɛ́ɛ ɔ́, hlɔ̌nhlɔ́n vɔ ɖo yě wú, bɔ yě nɔ́ jɛ ayǐ gbɔn alixo alixo; yě mɛ e è hɛn ganjí bɔ nǔɖé má hwedó yě ǎ lɛ́ɛ ɔ́, yě wá ɖo zunkɔ́ kíjé wɛ kpó alɔ kpó.

⁶ Hwɛ e togun ce hu ɔ́ syɛ́n hú hwɛ e Sodɔ́mu toxo ɔ́ hu é. Sodɔ́mu toxo e è gba hánnyá ɖo nukún xwixwe ɖokpó mɛ é, gbɛtɔ́ ká ɖó alɔ ɖ'é mɛ có nú é gba hánnyá ǎ.

⁷Gǎn e ɖo toxo ɔ́ mɛ lɛ́ɛ ɔ́, wǔtu yětɔn ɖó blɔ̌ ɖěbǔ ǎ. Agbaza yětɔn wé hú nyibúnɔ́sin; wǔtu yětɔn myá hú awǐnnya koláyi; kan e ɖo lan yětɔn mɛ lɛ́ɛ nyí fɛ́sinnɔ awǐnnya safíi ɖɔhun.

⁸Amɔ̌, din ɔ́, yě wi hú avi; è mɔ yě ɖo ali lɛ́ɛ xo ɔ́, è sɔ́ nɔ́ tunwun yě ǎ; yě kpo xú kɛ́ɖɛ́, yě xú nakí ɖɔhun.

⁹È cí ahwan ɔ́, é nyɔ́ hú è kú adɔ. È cí ahwan ɔ́, é nyɔ́ hú è nǐ ba nǔɖuɖu kpo, bó xú gǒ, é nyɔ́ hú è nǐ ba nǔɖuɖu kpo nú hlɔ̌nhlɔ́n vɔ ɖo mɛ wú.

¹⁰ Nyɔ̌nu ɖé lɛ́ɛ tíin, bɔ é sɔ́n nǔ e ɖo togun ce gbo wɛ ɔ́ wú, bɔ yě nɔ́ ɖa vǐ e yě ɖésúnɔ ji sín xomɛ lɛ́ɛ ɖu; có yě ká yí wǎn nú vǐ yětɔn lɛ́ɛ ganjí.

¹¹Xomɛsin e jí Mawu Mavɔmavɔ ɖe ɔ́, é zé dó wa nǔ xá togun ɔ́ bɔ é jɛ mɛ n'i; é flɔ́ myɔ ɖaxó ɖokpó ɖó Sinyɔ́ɔ, bɔ toxo ɔ́ ji zo káká bɔ dodó tɔn lɛ́ɛ fyɔ́.

¹²Mɛ ɖě lɛ́n gbeɖé ɖɔ kɛntɔ́ ná ɖu ɖo Jeluzalɛ́mu jí ǎ, axɔ́sú lɛ́ɛ lɔ lɛ́n ǎ. Yě lɛ́n ɖɔ mɛɖé ná ɖu ɖo Jeluzalɛ́mu jí bó dó asá hɔntogbó tɔn gbeɖé ǎ.

¹³Hwɛ e gbeyíɖɔ lɛ́ɛ hu lɛ́ɛ wɛ zɔ́n bɔ nǔ baɖabaɖa énɛ́ ɔ́ jɛ; nǔ e vɔ̌sánú-xwlémawutɔ́ lɛ́ɛ dó sin lɛ́ɛ wɛ zɔ́n bɔ nǔ baɖabaɖa énɛ́ ɔ́ jɛ; yě kɔn hwɛjijɔnɔ lɛ́ɛ sín hun kɔn nyi ayǐ ɖo toxo ɔ́ mɛ.

¹⁴Gbeyíɖɔ lɛ́ɛ kpódó vɔ̌sánú-xwlémawutɔ́ lɛ́ɛ kpó ɖo avi dlá wɛ; yě ɖo avi dlá wɛ gbɔn alixo alixo nukúntíntɔ́nnɔ ɖɔhun; yě hu mɛ bó hɛn yěɖée blí, mɛɖé nɔ lɔn ɖ'alɔ awu yětɔn wú vɔ́vɔ́ ǎ.

¹⁵Ényí è mɔ yě jǎwe ɔ́, è nɔ sú xó bó nɔ́ ɖɔ: “Mi nɔ zɔ nú yě! Mɛ blíblí wɛ yě nyǐ! Mi nɔ zɔ! Mi ma sɛkpɔ́ yě ó!” Énɛ́ ɔ́, yě nɔ́ hɔn, yě nɔ́ hɔn bó nɔ ɖo flúflú wɛ gbɔn tomɛ tomɛ. Togun ɖě lɛ́ɛ ká nɔ́ ɖɔ nú yě ɖɔ: “Mi ná nɔ fí ǎ.”

¹⁶Mawu Mavɔmavɔ ɖésú wɛ gba yě dó, é sɔ́ jló ná mɔ yě ǎ; mɛɖé sɔ́ nɔ́ ké ya nú vɔ̌sánú-xwlémawutɔ́ lɛ́ɛ ǎ, mɛɖé ká sɔ́ nɔ́ ɖó sísí nú mɛ e nyí gǎn ɖo togun ɔ́ nu lɛ́ɛ ǎ.

¹⁷Mǐ ɖo nukún ɖó alɔgɔ́númɛtɔ́ wɛ káká bɔ nukún mǐtɔn bo, alɔgɔ́númɛtɔ́ ɔ́ wá ǎ; mǐ ɖo mɛcɔ́kpe mǐtɔn jí bó ɖo ali kpɔ́n nú akɔta ɖé wɛ; mǐ ɖo ali kpɔ́n nú akɔta ɖé wɛ bónú é ná wá hwlɛ́n mǐ gán, akɔta e kpɔ́n ali ná wɛ mǐ ɖe ɔ́ ká wá ǎ.

¹⁸Kɛntɔ́ mǐtɔn lɛ́ɛ ɖo mǐ cɔ́ wɛ, mǐ sɔ́ sixú tɔ́n ǎ. Gbɛ mǐtɔn kó ɖo nǎ vɔ wɛ, azǎn mǐtɔn vɔ, xó mǐtɔn fó.

¹⁹Mɛ e ɖo ya dó nú mǐ wɛ lɛ́ɛ yá afɔ hú gangan ɖo jǐxwé; yě ɖo nyinya mǐ wɛ gbɔn só ta, só ta, yě ɖǒ mɔ nú mǐ ɖo gbětótló mɛ.

²⁰Mɛ e sín alɔ mɛ gbɛ mǐtɔn ɖe ɔ́ nɛ́ jɛ mɔ yětɔn mɛ din nɛ́; axɔ́sú e Mawu Mavɔmavɔ sɔ́ é wɛ; éyɛ́ sín xó ɖɔ wɛ mǐ nɔ́ ɖe bó nɔ́ ɖɔ: “Nú mǐ bɛ yɛ ɖo glɔ̌ tɔn ɔ́, akɔta ɖě lɛ́ɛ ná sixú wa nǔɖé nú mǐ ǎ.”

²¹Togun Edɔ́mu tɔn, a hɛn ɔ́, a nǎ hun xomɛ bó j'awǎ, hwi mɛ e nɔ nɔ Wúsi é! Amɔ̌, hwi lɔmɔ̌ ná nu xomɛsin Mawu tɔn sín kɔ́fu ɔ́; a nǎ nu mú, bó ná jɛ mɛ̌ jɔgbe.

²²Sinyɔ́ɔ, fí e è dɔn tó nú we yi jɛ ɔ́ kpé. È sɔ́ ná kplá we yi to ɖěvo mɛ ɖě ǎ. Amɔ̌, hwɛ Edɔ́mu ɔ́, Mawu ná dɔn tó nú we, ɖó hwɛ e a hu lɛ́ɛ wú; é ná ɖe acɛ e a gba lɛ́ɛ nyi wěxo.