Read fon Ezekiyɛ́li 10 Bible Online

Ezekiyɛ́li 10 - fon bible

Ezekiyɛ́li 10

¹ Un lɛ́ mɔ nǔ jǐnukúnsin ɖɔhun ɔ́ ɖo wɛnsagun susunɔ lɛ́ɛ ta nu; un mɔ nǔ awǐnnya xɔ akwɛ́ safíi ɖɔhun ɖé ɖ'é mɛ, bɔ é cí axɔ́súzinkpo ɖɔhun.

² Bɔ Mawu ɖɔ nú nya e dó kanvɔ wěwé é ɖɔ: “Gbɔn kɛkɛ́fɔ e ɖo wɛnsagun susunɔ lɛ́ɛ glɔ́ ɔ́ tɛ́ntin; wǔn myɔkán gɔ́ alɔgogo towe, ɖo wɛnsagun susunɔ lɛ́ɛ tɛ́ntin, bó yi fúnfún gbɔn toxo ɔ́ mɛ.” Nyi ɖésú mɔ nya ɔ́ kpó nukún ce kpó, bɔ é ɖidó myɔkán ɔ́ wún gbé.

³Hwenu e nya ɔ́ xweyǐgbe ɔ́, wɛnsagun susunɔ lɛ́ɛ ɖo aɖisíxwé nú sinsɛnxɔ ɔ́, bɔ akpɔ́kpɔ́ gɔ́ Mawu xwé ɔ́ sín kɔ́xota.

⁴Mawu Mavɔmavɔ sín susu sí te sín zinkpo tɔn jí ɖo sinsɛnxɔ ɔ́ mɛ, bó ɖidó sinsɛnxɔ ɔ́ lihɛ́nnu. Akpɔ́kpɔ́ ɖo xwé ɔ́ bǐ jí, bɔ susu Mawu Mavɔmavɔ tɔn hɔ́n dó kɔ́xo ɔ́ ta.

⁵È ɖo xwé ɔ́ sín hɔntogbó jí ɔ́, è nɔ ɖo wɛnsagun susunɔ lɛ́ɛ sín awa gbe se wɛ, Mawu Nǔbǐwúkpétɔ́ ɔ́ wɛ ɖo xó ɖɔ wɛ ɖɔhun.

⁶Nya e dó kanvɔ wěwé ɔ́ ɖo te kɛkɛ́fɔ lɛ́ɛ ɖokpó kpá; fínɛ́ wɛ é ɖe hwenu e Mawu ɖɔ n'i ɖɔ é ní gbɔn kɛkɛ́fɔ lɛ́ɛ tɛ́ntin, bó yi wún myɔkán e ɖo wɛnsagun susunɔ lɛ́ɛ tɛ́ntin é.

⁷Énɛ́ ɔ́, wɛnsagun susunɔ lɛ́ɛ ɖokpó dlɛ́n alɔ, bó wún myɔkán e ɖo tɛ́ntin yětɔn ɔ́ gɔ́ alɔ mɛ, bó kɔn dó alɔ gogo mɛ nú nya e dó kanvɔ wěwé ɔ́, bɔ é ɖidó.

⁸Nǔ gbɛtɔ́ sín alɔ ɖɔhun ɖé lɛ́ɛ ɖo wɛnsagun susunɔ lɛ́ɛ sín awa lɛ́ɛ glɔ́.

⁹ Un lɛ́ mɔ kɛkɛ́fɔ ɛnɛ, bɔ ɖokpó ɖokpó ɖo wɛnsagun susunɔ lɛ́ɛ ɖokpó ɖokpó kpá; kɛkɛ́fɔ énɛ́ lɛ́ɛ nɔ́ kɔ́n awǐnnya xɔ akwɛ́ klizolíti ɖɔhun.

¹⁰Nú è ɖo kɛkɛ́fɔ lɛ́ɛ kpɔ́n wɛ ɔ́, è nɔ mɔ ɖɔ ɖě kún gbɔn vo nú ɖě ó. É cí ɖě wɛ ɖo ɖě xomɛ ɖɔhun.

¹¹Hǔn kɛkɛ́fɔ lɛ́ɛ hɛn ɔ́, yě ná yi gǔdo, nukɔn, aɖisí, amyɔ; é byɔ́ ɖɔ yě ná lílɛ́ ɖo tɛn do ɖokpó ɔ́ mɛ cóbó yi fí e yě xwe ɔ́ ǎ; fí e wɛnsagun susunɔ lɛ́ɛ kpan nukɔn ɔ́ wɛ yě nɔ́ yi; yě ká nɔ́ lílɛ́ cóbó nɔ ɖidó ǎ.

¹² Nǔkún gbɔn wɛnsagun susunɔ lɛ́ɛ wú bǐ; é gbɔn wǔtu yětɔn, é gbɔn nɛgbé yětɔn, é gbɔn alɔ yětɔn, é gbɔn awa yětɔn, bó gbɔn kɛkɛ́fɔ ɛnɛ lɛ́ɛ lɔ wú.

¹³Un se bɔ è nɔ ylɔ́ kɛkɛ́fɔ lɛ́ɛ ɖɔ “axásáxásá jɔhɔn”.

¹⁴ Wɛnsagun susunɔ lɛ́ɛ ɖokpó ɖokpó ɖó nukún mɛ ɛnɛ: nukún mɛ nukɔntɔn ɔ́ nyí wɛnsagun susunɔ sín nukún mɛ, nukún mɛ wegɔ́ ɔ́ nyí gbɛtɔ́ sín nukún mɛ, atɔngɔ́ ɔ́ nyí kinnikínní sín nukún mɛ, bɔ ɛnɛgɔ́ ɔ́ nyí gangan sín nukún mɛ.

¹⁵Wɛnsagun susunɔ ɛnɛ lɛ́ɛ yi jɔhɔn mɛ: wɛnsagun susunɔ énɛ́ lɛ́ɛ ɔ́, nǔɖogbɛ e un ko mɔ ɖo Kebáa tɔ ɔ́ tó lɛ́ɛ wɛ.

¹⁶Nǔɖogbɛ lɛ́ɛ ɖo tɛn sɛ wɛ ɔ́, kɛkɛ́fɔ lɛ́ɛ kpó yě kpó nɔ́ ɖo yiyi wɛ. Yě vlɔ́n awa bo ná sí te sín kɔ́ mɛ ɔ́, kɛkɛ́fɔ lɛ́ɛ nɔ́ jó yě dó ǎ.

¹⁷Nǔɖogbɛ lɛ́ɛ nɔ te ɔ́, kɛkɛ́fɔ lɛ́ɛ lɔ nɔ nɔ te. Yě zɔn ɔ́, kɛkɛ́fɔ lɛ́ɛ lɔ nɔ zɔn, ɖó nǔɖogbɛ lɛ́ɛ sín jlǒ wɛ yě nɔ́ wa.

¹⁸Susu Mawu Mavɔmavɔ tɔn gosín sinsɛnxɔ ɔ́ lihɛ́nnu, bó yi cí wɛnsagun susunɔ lɛ́ɛ jí.

¹⁹Un ɖo te bó mɔ wɛnsagun susunɔ lɛ́ɛ vlɔ́n awa bó zɔn kpó kɛkɛ́fɔ lɛ́ɛ kpó. Yě wǎ nɔ te ɖo Mawu Mavɔmavɔ xwé ɔ́ sín hɔntogbó e kpan nukɔn zǎnzǎnhwe jí é, bɔ Mawu Izlayɛ́li tɔn ɔ́ sín susu ɖo kínkɔ́n wɛ ɖo ta yětɔn nu.

²⁰Nǔɖogbɛ e un mɔ ɖo Mawu Izlayɛ́li tɔn glɔ́ ɖo Kebáa tɔ ɔ́ tó lɛ́ɛ wɛ. Un wá mɔ nǔ jɛ wú lo ɖɔ wɛnsagun susunɔ wɛ yě nyí.

²¹Yě mɛ ɖokpó ɖokpó ɖó nukún mɛ ɛnɛ, awa ɛnɛ, bɔ nǔ gbɛtɔ́ sín alɔ ɖɔhun ɖokpó ɖokpó ɖo nǔɖogbɛ lɛ́ɛ sín awa lɛ́ɛ ɖokpó ɖokpó glɔ́.

²²Nukún mɛ ɖokpó ɔ́ wɛ yě ɖǒ xá nǔɖogbɛ e un mɔ ɖo Kebáa tɔ ɔ́ tó lɛ́ɛ. Wɛnsagun susunɔ lɛ́ɛ ɖokpó ɖokpó ɖo ali tɔn jí télélé, bó ɖo yiyi wɛ.