Read fon Ezekiyɛ́li 11 Bible Online

Ezekiyɛ́li 11 - fon bible

Ezekiyɛ́li 11

¹Yɛ Mawu tɔn zé mì bó kplá mì yi Mawu Mavɔmavɔ xwé ɔ́ sín hɔntogbó e kpan nukɔn zǎnzǎnhwe jí ɔ́ jí. Un mɔ súnnu koatɔ́n (25) ɖo hɔntogbó ɔ́ jí. Un mɔ togun ɔ́ sín gǎn we ɖo tɛ́ntin yětɔn: Yaazaniya Azúu vǐ ɔ́ kpó Pelatiyahu Benaya ví ɔ́ kpó.

²Mawu ɖɔ nú mì ɖɔ: “Hwɛ gbɛtɔ́ ɔ́, yě mɛ e nɔ ɖo nǔ nyanya sín wě ɖe wɛ, bó nɔ́ ɖo kplɔ́n nyanya ná mɛ wɛ ɖo Jeluzalɛ́mu toxo ɔ́ mɛ lɛ́ɛ ɔ́, yě nɛ́.

³Yě nɔ́ ɖɔ: ‘Káká jɛ hwe ɖé nu ɔ́, mɛ ɖé sɔ́ ná gbá xɔ ɖo fí ǎ. Jeluzalɛ́mu toxo ɔ́ cí nǔsúnnúzɛ́n ɖɔhun bɔ mǐdɛɛ lɛ́ɛ nyí lan bó ɖ'é mɛ.’

⁴Énɛ́ ɔ́ wú ɔ́, hwɛ gbɛtɔ́ ɔ́, nǔ e ɖo te kpɔ́n yě bɔ un ɖɔ nú we ɔ́, yi ɖɔ nú yě.”

⁵Énɛ́ ɔ́, yɛ Mawu Mavɔmavɔ tɔn wa jǐ ce, bó ɖɔ nyi ní ɖɔ nǔ yě ɖɔ: “Xó e Mawu Mavɔmavɔ ɖɔ ɔ́ ɖíe: Izlayɛ́li togun e mi, un tunwun nǔ e ɖɔ wɛ mi ɖe ɔ́, bó tunwun linlin e ɖo ayi mitɔn mɛ wá wɛ é.

⁶Mi hu mɛ ɖo toxo ɔ́ mɛ, káká bɔ cyɔ kpé ali kpá ali kpá.

⁷Énɛ́ ɔ́ wú wɛ nyɛ Aklúnɔ Mavɔmavɔ ɖɔ: nǔgbó wɛ, Jeluzalɛ́mu toxo ɔ́ cí nǔsúnnúzɛ́n ɖɔhun lě e mi ɖɔ gbɔn é; amɔ̌, lan e ɖ'é mɛ lɛ́ɛ ɔ́, mɛ e mi hu lɛ́ɛ wɛ, ényí midɛɛ lɛ́ɛ wɛ ǎ. Midɛɛ lɛ́ɛ ɔ́, un ná nya mi tɔ́n.

⁸Mi ɖo xɛsi ɖi nú ahwanfunfun wɛ. Abǐ Ahwan ɔ́ ná sɛ́ dó mi wɛ nyɛ ka ɖe. Nyɛ Aklúnɔ Mavɔmavɔ wɛ ɖɔ mɔ̌ nú mi.

⁹Un ná nya mi tɔ́n sín toxo ɔ́ mɛ; un ná jó mi nú akɔta ɖěvo lɛ́ɛ. Un ná dɔn tó nú mi.

¹⁰Mi ná kú ɖo ahwangbénu ɖo Izlayɛ́li yíkúngban jí fí; un ná ɖó hwɛ nú mi, bɔ mi ná tunwun ɖɔ nyɛ wɛ nyí Mawu Mavɔmavɔ.

¹¹Toxo élɔ́ ná nyí nǔsúnnúzɛ́n nú mi, bónú mi ná nyí lan bo nɔ mɛ ǎ. Izlayɛ́li yíkúngban jí wɛ un ná dɔn tó nú mi ɖe.

¹²Bɔ mi ná tunwun ɖɔ nyɛ wɛ nyí Mawu Mavɔmavɔ; mi xwedó nǔ e un zɔ́n mi lɛ́ɛ ǎ, mi nyi sɛ́n ce lɛ́ɛ ǎ; lo ɔ́, mi xwedó togun e lɛ́ lɛ̌ dó mi lɛ́ɛ sín walɔ.”

¹³Hwenu e un ɖo xó e Mawu ɖɔ nú mì lɛ́ɛ ɖɔ nú yě wɛ ɔ́, Pelatiyahu Benaya ví ɔ́ kú. Nyɛ ɖésú jɛ ayǐ, bó xwe agbɔ̌nnusú do, bó sú xó bó ɖɔ: “Áo, Aklúnɔ Mavɔmavɔ! A jlǒ ná sú Izlayɛ́li ví e kpo lɛ́ɛ sín kún dó wɛ a?”

¹⁴Énɛ́ ɔ́ gúdo ɔ́, Mawu Mavɔmavɔ ɖɔ nú mì ɖɔ:

¹⁵“È nɔ ɖɔ: Izlayɛ́li ví e ahwan wlí yi to ɖěvo mɛ lɛ́ɛ ɔ́, yě ní nɔ zɔ dɔ̌n ɖó to élɔ́ ɔ́, mǐdɛɛ lɛ́ɛ wɛ è nǎ bɔ é nyí mǐtɔn. Hwɛ gbɛtɔ́ ɔ́, a tunwun mɛ e ɖɔ mɔ̌ ná wɛ Jeluzalɛ́munu lɛ́ɛ ɖe ɔ́ a? Nɔví towe lɛ́ɛ wɛ; nɔví towe jiji lɛ́ɛ wɛ; Izlayɛ́li togun ɔ́ ɖɔ mɔ̌ ná wɛ Jeluzalɛ́munu lɛ́ɛ ɖe.

¹⁶Din ɔ́, ɖɔ nú mɛ e kpó hwi kpó ahwan wlí yi to ɖěvo mɛ lɛ́ɛ ɖɔ nyɛ Aklúnɔ Mavɔmavɔ ɖɔ: ‘Un sɛ́ mi dó zɔ zɔ; un gba mi dó kpé to ɖěvo mɛ to ɖěvo mɛ nǔgbó, amɔ̌, un ɖo kpɔ́ xá mi ɖo fí e mi ɖe lɛ́ɛ xwé ce gbe wɛ mi ɖe ɖɔhun.’

¹⁷Hǔn, bo ɖɔ nú yě ɖɔ nyɛ Aklúnɔ Mavɔmavɔ ɖo ɖiɖɔ nú mi wɛ ɖɔ: ‘Un ná cyán mi sín akɔta e tɛ́ntin mi ɖe lɛ́ɛ mɛ; un ná kplá mi sín to e mɛ un gba mi dó gbɔn lɛ́ɛ mɛ. Un ná kplé mi bó ná zé Izlayɛ́li to ɔ́ nú mi

¹⁸Ée mi ná wá é ɔ́, mi ná sú vodún sinsɛn alɔkpa alɔkpa e ɖo to ɔ́ mɛ lɛ́ɛ bǐ dó, bó ná sú nǔ baɖabaɖa alɔkpa alɔkpa e ko sixú tíin ɖo to ɔ́ mɛ lɛ́ɛ bǐ dó.

¹⁹ Un ná ná ayixa yɔ̌yɔ́ mi, un ná ná linlin yɔ̌yɔ́ mi. Un ná ɖe ayixa mitɔn e syɛ́n awǐnnya ɖɔhun ɔ́ síin, bó ná zé ayixa e nɔ se tónú é ɖó tɛn tɔn mɛ.

²⁰Énɛ́ ɔ́, mi ná xwedó nǔ e un zɔ́n lɛ́ɛ, mi ná wlí ayi sɛ́n ce lɛ́ɛ wú, bó ná nyi, bɔ mi ná nyí togun ce, bɔ un ná nyí Mawu mitɔn.

²¹Amɔ̌, mɛ e nɔ ɖo vodún sɛn wɛ, bó nɔ́ ɖo nǔ baɖabaɖa lɛ́ɛ dó sin wɛ, bó nɔ́ ɖo nǔ e ayi yětɔn ɖɔ nú yě lɛ́ɛ kɛ́ɖɛ́ wa wɛ lɛ́ɛ ɔ́, walɔ yětɔn énɛ́ lɛ́ɛ ji nǔɖé ɔ́, yě ná sɔ́ kpan.’ Xó e nyɛ Aklúnɔ Mavɔmavɔ mitɔn ɖɔ ɔ́ nɛ́.”

²² Hwe énɛ́ nu ɔ́, wɛnsagun susunɔ lɛ́ɛ vlɔ́n awa yětɔn lɛ́ɛ, bɔ kɛkɛ́fɔ lɛ́ɛ lɔ jɛ wǔ dǎn jí. Susu Mawu tɔn ɖo kínkɔ́n wɛ ɖo wɛnsagun susunɔ lɛ́ɛ ta nu.

²³Énɛ́ ɔ́ gúdo ɔ́, susu Mawu Mavɔmavɔ tɔn sí te sín Jeluzalɛ́mu toxo ɔ́ tɛ́ntin, bó yi nɔ te ɖo só ɖé jí, ɖo zǎnzǎnhwe jí nú toxo ɔ́.

²⁴Nǔmimɔ ɖokpó énɛ́ ɔ́ mɛ ɔ́, yɛ Mawu tɔn zé mì, bó lɛ́ kɔ nú mì yi mɛ e ahwan wlí yi ɖó Babilɔ́nu lɛ́ɛ mɛ, bɔ nǔmimɔ ɔ́ nɔ te.

²⁵Ée un wá nyiɖée mɛ ɔ́, un wlí nǔ e Mawu Mavɔmavɔ xlɛ́ mì ɖo nǔmimɔ ɔ́ mɛ ɔ́ ɖɔ nú mɛ e kpó nyi kpó ahwan wlí yi Babilɔ́nu lɛ́ɛ.