Read fon Ezekiyɛ́li 21 Bible Online

Ezekiyɛ́li 21 - fon bible

Ezekiyɛ́li 21

¹Mawu Mavɔmavɔ ɖɔ nú mì ɖɔ:

²“Hwɛ gbɛtɔ́ e, kpan nukɔn tofɔligbé, bó ɖɔ adǎn e un gblɔ́n sɛ́ dó mɛ e ɖo zungbó tofɔligbé tɔn mɛ lɛ́ɛ ɔ́ nú yě; ɖɔ nǔ e un ɖɔ nú we ɖɔ é ná jɛ dó yě jí lɛ́ɛ nú yě.

³Ɖɔ nú zungbó tofɔligbé tɔn ɔ́ ɖɔ: Se xó e ɖɔ wɛ nyɛ Aklúnɔ Mavɔmavɔ ɖe é: Un ná dó we zo, bɔ atín towe mǔ lɛ́ɛ kpó xúxú lɛ́ɛ kpó bǐ nǎ ji; myɔ ɖaxó énɛ́ ɔ́ ná ji sín tofɔligbé káká yi totaligbé; myɔ énɛ́ ná slɔ́ mɛ bǐ; nǔɖé ná sixú xo myɔ énɛ́ cí ǎ.

⁴Énɛ́ ɔ́, mɛ bǐ nǎ tunwun ɖɔ nyɛ Mawu Mavɔmavɔ wɛ flɔ́ myɔ ɔ́; é sixú cí ǎ.”

⁵Un ka sú xó bó ɖɔ nú Mawu ɖɔ: “Á! Aklúnɔ Mavɔmavɔ, mɛ lɛ́ɛ nɔ kó ɖɔ dó wǔ ce ɖɔ: ‘Lǒ dó wɛ jɛ́n é nɔ́ ɖe.’ ”

⁶Ée un ɖɔ mɔ̌ ɔ́, Mawu Mavɔmavɔ lɛ́ ɖɔ nú mì ɖɔ:

⁷“Hwɛ gbɛtɔ́ e, kpan nukɔn Jeluzalɛ́mu, bó ɖɔ xó dó tɛn mímɛ́ lɛ́ɛ wú, bó ɖɔ nǔ e un ɖɔ é ná jɛ dó Izlayɛ́li to ɔ́ wú é.

⁸Ɖɔ nú Izlayɛ́li ví lɛ́ɛ ɖɔ nyɛ Mawu Mavɔmavɔ ɖo ɖiɖɔ nú yě wɛ ɖɔ: Un ná wa nǔ xá mi, un ná ɖe hwǐ ce sín akún mɛ, bó ná hu hwɛjijɔnɔ lɛ́ɛ kpó mɛdídá lɛ́ɛ kpó bǐ.

⁹Un ná hu hwɛjijɔnɔ lɛ́ɛ kpó mɛdídá lɛ́ɛ kpó wú wɛ un ná ɖe hwǐ ce sín akún mɛ, bó ná hu mɛ bǐ sín tofɔligbé káká yi totaligbé.

¹⁰Énɛ́ ɔ́, mɛ bǐ ná mɔ nǔ jɛ wú ɖɔ nyɛ Mawu Mavɔmavɔ ɔ́, un ɖe hwǐ ce sín akún mɛ nǔgbó, un ka sɔ́ ná zé d'é mɛ ǎ.

¹¹Hwɛ gbɛtɔ́ e, hwɛ ɔ́, a nǎ nɔ ɖo azɔn wɛn wɛ ɖo mɛ bǐ nukún mɛ, ɖó a mɔ ɖɔ nǔ bǐ kó gblé, bó ɖo akpɔ mɔ wɛ.

¹²Ényí yě wǎ kan nǔ e wú a ɖo azɔn wɛn wɛ ɔ́ byɔ́ we hǔn, ɖɔ nú yě ɖɔ: ‘Nǔ nyanya ɖé wɛ ɖo nǎ jɛ wɛ bɔ un se. É ná hɛn hǔn nú mɛ bǐ, awakanmɛ ná kú mɛ bǐ, mɛ bǐ ná dán ɖě wa gbɔn, afɔ bǐ ná xo dɔjɔ. Nǔ e ná jɛ ɔ́ nɛ́; é ká sɔ́ ɖo lǐnlín mɛ ǎ, é ná jɛ din tlóló. Xó e nyɛ Aklúnɔ Mavɔmavɔ ɖɔ ɔ́ nɛ́.’ ”

¹³Mawu Mavɔmavɔ lɛ́ ɖɔ nú mì ɖɔ:

¹⁴“Hwɛ gbɛtɔ́ e, ɖɔ nǔ e ɖo nǎ jɛ wɛ ɔ́ nú yě. Ɖɔ nú yě ɖɔ: Hwǐ ɖokpó ɖíe; é ɖá ganjí, é nɔ́ kɔ́n.

¹⁵Mɛ ná dó hu wɛ è ɖe wú wɛ è gan. É ná kɔ́n wú wɛ è ɖǐɖí wǔ ná. Nǔ ná ɖo mɔ̌ bɔ mǐ ná j'awǎ wɛ a? Togun ce sín gǎn ɔ́ ké ya nú kpo ǎ bó gbɛ́ tónú se.

¹⁶Énɛ́ ɔ́, un sɔ́ hwǐ ɔ́ jó; un sɔ́ jó nú è nǎ ɖǐɖí wǔ ná; un sɔ́ jó nú è nǎ zǎn. È gan hwǐ ɔ́ ganjí, hwǐ ɔ́ nɔ́ kɔ́n; è nǎ sɔ́ hwǐ ɔ́ dó alɔ mɛ nú mɛhutɔ́ ɔ́.

¹⁷Hwɛ gbɛtɔ́ e, sú xó, dǒ gbɛvíhan; ɖó hwǐ énɛ́ ɔ́, togun ce jí wɛ è sɔ́ dó, Izlayɛ́li sín gǎn lɛ́ɛ jí wɛ è sɔ́ dó. È nǎ hu yě bǐ ɖó hwǐ wú; è nǎ hu togun yětɔn bǐ ɖó hwǐ wǔ. Hǔn bo nyi alɔ alɔ mɛ, ɖó nukún ɖó nǔɖé sɔ́ ɖe ǎ.

¹⁸È nǎ dó togun ɔ́ kpɔ́n. Ényí togun ce sín gǎn ɔ́ ma ká ké ya nú kpo ǎ ɔ́, étɛ́ ká ná jɛ? Xó e nyɛ Aklúnɔ Mavɔmavɔ ɖɔ ɔ́ nɛ́.

¹⁹Din ɔ́, hwi gbɛtɔ́ e, ɖɔ nǔ e ɖo nǎ jɛ wɛ bɔ un ɖɔ nú we ɔ́ nú yě; zin alɔ dó alɔ mɛ azɔn ɖě, azɔn we, azɔn atɔn. Ɖó mɛhuhwí wɛ, hwǐ e nɔ hu mɛ bǐ é wɛ, hwǐ e ɖo mɛ hu gbɔn fí bǐ wɛ é wɛ.

²⁰Un jló ná dó kpo awakanmɛ nú yě bó ná hu yě. Un sɔ́ mɛhuhwí ɔ́ ɖó hɔn ɖokpó ɖokpó ta. Hwǐ ɔ́ nɔ́ kɔ́n jǐkɛwun ɖɔhun; è gan hwǐ ɔ́ bɔ é ná nɔ́ hu mɛ ganjí.

²¹Hwǐ ɖíɖá, hu mɛ ɖo aɖisí, hu mɛ ɖo amyɔ, hu gbɔn fí bǐ.

²²Din ɔ́, nyi lɔmɔ̌ ná zin alɔ dó alɔ mɛ, bó dó nǔ sin yi jɛ bǎ e mɛ xomɛ sin mì yi ɖó é. Xó e nyɛ Aklúnɔ Mavɔmavɔ ɖɔ ɔ́ nɛ́.”

²³Mawu Mavɔmavɔ ɖɔ nú mì ɖɔ:

²⁴“Hwɛ gbɛtɔ́ e, ɖe ali we nú axɔ́sú Babilɔ́nu tɔn ɔ́ ná gbɔn kpó ahwangɔnu tɔn kpó. A nǎ ɖe ali we lɛ́ɛ bǐ sín to ɖokpó ɔ́ mɛ. Blǒ wuntun ɖokpó ɖó ali lɛ́ɛ ɖokpó ɖokpó sín bǐbɛ́mɛ dó xlɛ́ toxo e mɛ ali ɔ́ yi é.

²⁵Ali we lɛ́ɛ ɖokpó yi Hlaba ɖo Amumɔ́ɔ ví lɛ́ɛ to mɛ; wegɔ́ ɔ́ yi ahohó Jeluzalɛ́mu toxo ɔ́ tɔn kɔn, ɖo Judáa.

²⁶Axɔ́sú Babilɔ́nu tɔn nɔ te fí e ali we lɛ́ɛ bɛ́ sín ɔ́, bó kan nǔ bó ná tunwun toxo e sín ali e é ná sɔ́ é: é sɔ́ gǎ tɔn lɛ́ɛ dó kan nǔ, bó kan nǔ byɔ́ bǒcyɔ tɔn lɛ́ɛ, é kpɔ́n lě e kanlin e é dó sá vɔ̌ ná lɛ́ɛ sín alǐn ɖe é.

²⁷Ée é ɖo nǔ kan wɛ ɔ́, gǎ e ɖɔ Jeluzalɛ́mu wɛ é ná yi ɔ́ jɛ alɔ tɔn aɖisí ɔ́ mɛ. É jɛ Jeluzalɛ́mu ɔ́, é ná gblɔ́n ahwan dán bó ná sú xó bɔ ahwan ná bɛ́. É ná ɖó mɔ e nɔ gba nǔ ɔ́ nú hɔntogbó Jeluzalɛ́mu toxo ɔ́ tɔn lɛ́ɛ; é ná kplé kɔ́ e gúdo sɔ́ja lɛ́ɛ ná nɔ é, bó ná kun do e mɛ sɔ́ja lɛ́ɛ ná nɔ́ ɔ́ lɛ́ lɛ̌ dó toxo ɔ́.

²⁸Jeluzalɛ́munu lɛ́ɛ mɔ ɖɔ nǔ énɛ́ e è kan bɔ é sɔ́ toxo émítɔn ɔ́, xó énɛ́ ɔ́, xó yǎyá wɛ, ɖó è dǒ akpá nú yě ɖɔ émí ná nya xɛ ɖo yě jí, bɔ yě ɖeji d'é wú. Lo ɔ́, Babilɔ́nu xɔ́sú ɔ́ flín yě ɖɔ yě kún nɔ gbejí ó, bó ɖɔ nú yě ɖɔ émí ná wlí kannumɔ yětɔn.

²⁹Énɛ́ ɔ́ wú ɔ́, nyɛ Aklúnɔ Mavɔmavɔ ɖo ɖiɖɔ nú yě wɛ ɖɔ: Nǔ e dó sin wɛ mi ɖe lɛ́ɛ nɔ́ flín agɔ e mi jɛ lɛ́ɛ mì hwebǐnu; nǔwiwa mitɔn lɛ́ɛ nɔ́ ɖe hwɛ e mi nɔ hu lɛ́ɛ kpó nǔ e mi nɔ dó sin lɛ́ɛ kpó nyi wěxo. Ée mi ma jló ná jó hwɛhuhu dó ǎ é ɔ́, un ná jó mi nú kɛntɔ́.

³⁰“Hwɛ gbejímánɔtɔ́ Izlayɛ́li tɔn, nǔ nyanya e dó sin wɛ a ɖe lɛ́ɛ ɔ́, gan ɔ́ ná wá xo bɔ è nǎ ɖó bǐ te.

³¹Nǔ e ɖɔ nú we wɛ nyɛ Aklúnɔ Mavɔmavɔ ɖe ɔ́ ɖíe: È nǎ yí tablá towe sín ta nú we; è nǎ ɖe axɔ́súgbákún sín ta nú we; nǔ bǐ nǎ húzú. Mɛ e nyí gbɛtɔ́ kpaa lɛ́ɛ ɔ́, è nǎ zé yě su, bɔ mɛ e nyí gbɛtɔ́ nukúnɖéjí lɛ́ɛ ɔ́, è nǎ zé yě hwe.

³²Aglingbigba, aglingbigba! Un ná zé Jeluzalɛ́mu toxo ɔ́ dó húzú aglingbigba. È nǎ gba toxo ɔ́ bǐ hánnyá, bɔ é ná nɔ mɔ̌ káká jɛ hwenu e mɛ e[13] lɔ mɛ un sɔ́ hwɛɖiɖɔ dó así ná ɔ́ ná wá é.”

³³ Mawu Mavɔmavɔ lɛ́ ɖɔ nú mì ɖɔ: “Hwɛ gbɛtɔ́ ɔ́, ɖɔ xó e ɖɔ nú we wɛ un ɖe ɔ́ nú Amumɔ́ɔ ví lɛ́ɛ[14]; ɖɔ lě e yě nɔ́ zun Izlayɛ́li ví lɛ́ɛ gbɔn é nú yě; ɖɔ nú yě ɖɔ: È zé hwǐ ɖokpó ɖó te bɔ é ná hɛn nǔ gblé; è ɖǐɖí wǔ ná bɔ é ná hu mɛ; è ɖǐɖí wǔ ná bɔ é ná kɔ́n jǐkɛwun ɖɔhun.

³⁴Hwenu e mi nɔ ɖo xó kpa ɖɔ wɛ, bó nɔ́ ɖɔ nǔ wɛ émí mɔ ɔ́, hwenu e mi nɔ ɖo awo ɖó wɛ, bó nɔ́ ɖɔ nǔ kan wɛ émí ɖe ɔ́, hwǐ ɔ́ ná jɛ kɔ gbo mɛ e ma nɔ ɖó sísí nú Mawu ǎ lɛ́ɛ kpó adǎkaxotɔ́ lɛ́ɛ kpó jí. Ɖó hwenu e nǔ nyanya e dó sin wɛ mi ɖe ɔ́ ná nɔ te dó ɔ́ su.

³⁵Din ɔ́, mi bo fɔ hwǐ mitɔn lɛ́ɛ dó akún mɛ. Fí e è dǒ kún mitɔn ɖe ɔ́, to e mɛ mi jɔ ɖe ɔ́ mɛ wɛ un ná wa nǔ xá mi ɖe.

³⁶Un ná ɖe xomɛsin ce xlɛ́ mi; un ɖo adǎn jí ɔ́, lě e un nɔ dó nǔ sin gbɔn ɔ́, un ná ɖe xlɛ́ mi. Un ná jó mi nú gbɛtɔ́ alǎnnúwatɔ́ e nǔhɛngblé nɔ́ myá nukún ná lɛ́ɛ.

³⁷Zo ná fyɔ́ mi; hun mitɔn ná sa gbɔn to ɔ́ bǐ mɛ. Énɛ́ ɔ́ gúdo ɔ́, mɛ ɖěbǔ sɔ́ ná flín mi ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.”